စစ်တပ်က ပစ်ခတ်

November 29, 2021

မိုးမောက် ခလရ ၄၃၇ တပ်အနီး ဗုံးပေါက်၊ စစ်တပ်က ပစ်ခတ်သဖြင့် ၁ ဦး သေဆုံး

ကချင်ပြည်နယ် မိုးမောက်မြို့နယ် ကြံခင်းရွာအနီးက ခလရ ၄၃၇ တပ်နားမှာ နိုဝင်ဘာ ၂၈ ရက် နေ့လယ် ၂ နာရီလောက်က ပေါက်ကွဲမှုဖြစ်ပွားပြီးနောက် စစ်တပ်က မြို့တွင်းဝင်ရောက် ပစ်ခတ်တာကြောင့် ဒေသခံ ၂ ဦး ဒဏ်ရာရကာ ၁ ဦး သေဆုံးခဲ့တယ်လို့ သိရပါတယ်။

စစ်ယာဉ်တန်းကို ကချင်ပြည်သူ့လွတ်မြောက်ရေးတပ်မတော် KIA က မိုင်းဆွဲတိုက်ခိုက်ရာက ပေါက်ကွဲမှု ဖြစ်ပွားခဲ့တာလို့ ဒေသခံတွေက ပြောပါတယ်။

ပေါက်ကွဲမှုဖြစ်ပြီး ၁ နာရီခန့်အကြာမှာ စစ်ကောင်စီတပ်ဖွဲ့ဝင်တွေက မြို့တွင်း ပစ်ခတ်ဝင်ရောက်ပြီး  လမ်းသွားလမ်းလာနဲ့ ဒေသခံတချို့ကို ဖမ်းဆီးခဲ့တယ်လို့ မိုးမောက်မြို့ခံ တစ်ဦးကပြောပါတယ်။

“လက်နက်ကြီးသံ ၁၃ ချက်လောက်ကြားရတယ်။ ဗုံးပေါက်ကွဲသံရောပဲ။ တိုက်ပွဲဖြစ်တဲ့နေရာက ဒေသခံတွေ မြို့ထဲ တိမ်းရှောင်လာကြတယ်။ စစ်သားတွေက  မြို့ထဲဝင်လာပြီး ပစ်ခတ်ခဲ့တယ်။ အဲဒီနောက် ဒေသခံ အမျိုးသမီး၊ လူငယ်၊ လူကြီး၊ ကလေးတွကို ဖမ်းဆီးခဲ့တယ်။” 

စစ်ကောင်စီတပ်ရဲ့ ပစ်ခတ်မှုကြောင့် ဒေသခံ ၂ ဦး သေနတ်ထိမှန်ဒဏ်ရာရရှိခဲ့ပြီး ၁ ဦး သေဆုံး ခဲ့တယ်လို့ မြို့ခံတစ်ဦးက ပြောပါတယ်။

စစ်တပ်က ဒေသခံ ၃၀ လောက်ကို ဖမ်းဆီးခဲ့ကာ အမျိုးသမီး တချို့နဲ့ လူကြီးတချို့ကို ညနေပိုင်းမှာ ပြန်လွှတ်ပေးခဲ့ပြီး လူငယ်တချို့ကိုတော့ ခလရ-၄၃၇ တပ်အတွင်း ဖမ်းဆီးခေါ်ဆောင်သွားတယ်လို့ သိရှိရပေမဲ့ နိုဝင်ဘာ ၂၉ ရက်မနက်ပိုင်းအထိ ဘယ်နှဦး ခေါ်ဆောင်သွားလဲဆိုတာ အတည်မပြု နိုင်သေးပါဘူး။

ဖောက်ခွဲတိုက်ခိုက်မှုတွေ များလာတဲ့ မိုးမောက်မြို့အဝင်အထွက်တိုင်းမှာ စစ်ကောင်စီတပ်က စစ်ဆေးရေး တင်းကြပ်နေတာကြောင့် ဒေသခံတွေ သွားရေးလာရေး ခက်ခဲနေတယ်လို့ သိရပါတယ်။

ဖြစ်စဉ်နဲ့ပတ်သက်လို့ ဒေသခံ KIA ထံ ဆက်သွယ်ခဲ့ပေမဲ့ ဆက်သွယ်လို့ မရခဲ့ပါဘူး။

မိုးမောက်မြို့နယ်အတွင် စစ်တပ်အာဏာသိမ်းခဲ့ပြီးနောက် ဗုံးပေါက်ကွဲတာတွေ၊  တိုက်ပွဲဖြစ်ပွား တာတွေ အချိန်အတန်ကြာ ငြိမ်သက်နေရာမှာ အခုအခါ ပြန်လည်ဖြစ်ပွားလာတာပါ။

1 year Ago

November 26, 2021

ဘုတလင်မြို့နယ်၌ စစ်တပ်က ပစ်ခတ်သဖြင့် ပြည်သူ ၇ ဦး လက်နက်ကြီးထိမှန်

စစ်​ကိုင်းတိုင်း ဘုတလင်မြို့နယ် သာယာကုန်း​ကျေးရွာ ဘုန်း​တော်ကြီး​ကျောင်းဝင်း အတွင်းမှာ စစ်​ရှောင်​နေစဥ် စစ်​ကောင်စီတပ်ဖွဲ့ပစ်ခတ်မှု​ကြောင့် လက်နက်ကြီးထိမှန်ခံခဲ့ရတဲ့ ပြည်သူ ၇ ဦးကို ကနီဆေးတပ်ဖွဲ့ (Kani medical team ) က နိုဝင်ဘာ ၂၅ ရက်​ ညပိုင်းမှာ သွား​ရောက်​ဆေးကုသမှု ​ပေးခဲ့ပါတယ်။ 

ဒဏ်ရာရသူ ၇ ဦးဟာ အမျိုးသမီး ၆ ဦးနဲ့ အမျိုးသား ၁ ဦးဖြစ်ပြီး အဲဒီထဲက အမျိုးသမီး ၂  ဦးက​တော့ အသက်အန္တရာယ်စိုးရိမ်ရတယ်လို့ ​ဆေးကုသမှု​ပေး​နေတဲ့ တာဝန်ရှိသူတစ်​ဦးက ​ပြောပါတယ်။  

တိုက်ပွဲအတွင်းမှာ စစ်​ရှောင်ပြည်သူ ၇ ဦးနဲ့ ​PDF ဘက်က ၂ ဦး ဒဏ်ရာရရှိခဲ့တာဖြစ်ပြီး စုစု​ပေါင်း ၉ ဦးရှိကာ စစ်​ကောင်စီဘက်က ထိခိုက်ကျဆုံးမှု အ​ခြေ​အနေက​တော့ မသိရ​သေးဘူးလို့ ဆိုပါတယ်။

နိုဝင်ဘာ ၂၅ ရက်​နေ့က စစ်​ကောင်စီတပ်ဖွဲ့နဲ့ KPDF(Kani PDF) မဟာမိတ်တပ်​ပေါင်းစု အဖွဲ့တို့ဟာ ကနီမြို့နယ်နှင့် ဘုတလင်မြို့နယ် အစပ်မှာ တိုက်ပွဲဖြစ်ပွားခဲ့မှု​ရှိခဲ့ပြီး မြသိန်းတန် ဘုရားကုန်း ​ပေါ်က​နေ စစ်​ကောင်စီတပ်ဖွဲ့က လက်နက်ကြီး​တွေနဲ့ ပစ်ခတ်ခဲ့တာ​ကြောင့် စစ်​ရှောင်ပြည်သူ​တွေ ဒဏ်ရာရရှိခဲ့တာဖြစ်ပါတယ်။

မကွေးတိုင်း ဆောမြို့နယ်မှာလည်း နိုဝင်ဘာ ၂၅ ရက်က PDF- ဆောတပ်ဖွဲ့က ဒေသခံပြည်သူ ၁၅၀ ကျော်ကို ကျန်းမာရေးစောင့်ရှောက်ပေးခဲ့တယ်လို့ သိရပါတယ်။

သက်ကြီးဘိုးဘွားတွေနဲ့ ကလေးငယ်တွေအပါဝင် ဒေသခံပြည်သူ ၁၅၀ ကျော်ကို ကျန်းမာရေးစောင့်ရှောက်ပေးခဲ့တဲ့အပြင် စိတ်ဓာတ်ခွန်အားဖြစ်စေတဲ့ စကားတွေပြောပြီး ပြုစုစောင့်ရှောက်ပေးခဲ့တယ်လို့ PDF-ဆောရဲ့ ပြန်ကြားရေးတာဝန်ခံက ပြောပါတယ်။

1 year Ago
More News
Up