စစ်တပ်ကဖမ်းဆီး

December 29, 2021

ဝန်ခြုံးရွာပြည်သူ ၅ ဦးအား စစ်တပ်ကဖမ်းဆီးပြီး စစ်ရှောင်တဲ ၅လုံးကို မီးရှို့ဖျက်ဆီး

မကွေးတိုင်းဒေသကြီး ပေါက်မြို့နယ် ဝန်ခြုံးရွာမှာ မနေ့ မွန်းတည့် ၁၂ နာရီလောက်က ပျူစောထီးအဖွဲ့နဲ့ စစ်ကောင်စီတပ်တွေက အမျိုးသား ၂ ယောက်နဲ့ အမျိုးသမီး ၃ ယောက်ကို သေနတ်တွေနဲ့ထောက်ပြီး ဖမ်းဆီးသွားသလို စစ်ရှောင်တဲ ၅ လုံးကို မီးရှို့ ဖျက်ဆီးခဲ့ကြတယ်လို့ ဒေသခံပြည်သူတစ်ယောက်က ပြောပါတယ်။

ဖမ်းဆီးခံရတဲ့ ပြည်သူတွေကတော့ ဦးဘိုသိန်း၊ ကိုဌေးလွင်၊ ဒေါ်ပုတို၊ ဒေါ်ပုနဲ့ ဒေါ်တင်မိုးတို့ ၅ ယောက်ဖြစ်တယ်လို့ ဆိုပါတယ်။

ပျူစောထီးအဖွဲ့နဲ့ စစ်ကောင်စီတပ်တွေဟာ ဒေသခံတွေ စိုက်ပျိုးထားတဲ့ စပါးခင်းတွေကိုလည်း အဓမ္မ ဝင်ရောက်ရိပ်သိမ်းယူဆောင်သွားကြတယ်လို့ ပြောပါတယ်။

ဝန်ခြုံးရွာ ဘုန်ကြီးကျောင်းထဲမှာ စစ်ကောင်စီအင်အား ၅၀ လောက်တပ်စွဲထားသလို နေရာအနှံ့ ကင်းပုန်းတွေ ချထားတာကြောင့် ဒေသခံပြည်သူ ၁၀၀၀ လောက် ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။

ဖမ်းဆီးခံရတဲ့ ဒေသခံပြည်သူတွေရဲ့ အခြေနေကို အသေးစိတ်သိရှိနိုင်ဖို့ ပေါက်မြို့နယ်ရဲတပ်ဖွဲ့မှူးရုံးကို တယ်လီဖုန်းနဲ့ ဆက်သွယ်ခဲ့ပေမယ့် ဖုန်းလက်ခံဖြေကြားခြင်းမရှိပါဘူး။

1 year Ago

December 15, 2021

ကျောက်ဆည်တွင် ၁၅ နှစ်အောက် ကလေးများကို စစ်တပ်ကဖမ်းဆီးပြီး ငွေဖြင့်ပြန်ရွေးခိုင်း

မန္တလေးတိုင်း၊ ကျောက်ဆည်မြို့နယ်၊ မင်းဝံကျေးရွာက အသက် ၁၅ နှစ်အောက် ကလေးငယ် ၁၀ ဦးကို စစ်ကောင်စီတပ်သားတွေက ဖမ်းဆီးသွားပြီး ဒီဇင်ဘာ ၁၄ ရက်နေ့မှာ မိဘတွေက ငွေနဲ့ပြန်ရွေးခဲ့ရတယ်လို့ ဒေသခံတွေဆီက သိရပါတယ်။

အမည်မဖော်လိုသူတဦးက “ဒီဇင်ဘာ ၁၀ ရက်နေ့ အသံတိတ်သပိတ်နေ့က ကလေးတွေက လက်သုံးချောင်းထောင်လိုင်းပေါ်တင်ခဲ့ပြီးတဲ့နောက် အိမ်တွေကို လာဖမ်းသွားကြတာ။ ဖမ်းဆီးခံရတာ ကလေးငယ် ယောကျ်ားလေး ၆  ယောက်နဲ့ မိန်းကလေး ၄ ယောက်၊ စုစုပေါင်း ၁၀  ယောက်ပေါ့” လို့ ပြောပါတယ်။

စစ်ကောင်စီတပ်သားတွေဟာ ဒီဇင်ဘာ ၁၄ ရက်နေ့၊ နေ့လယ် ၂ နာရီထက် နောက်မကျစေဘဲ ကလေးတွေကို ငွေနဲ့လာရွေးဖို့ ဖမ်းဆီးခံရတဲ့ကလေးတွေရဲ့ အုပ်ထိန်းသူတွေဆီကို ဆက်သွယ်လာတယ်လို့ ဒေသခံတွေက ပြောပါတယ်။

“ကလေးတွေကို မနေ့က နေ့လယ် ၂ နာရီမတိုင်ခင် ကလေး ၁ ယောက် ငွေ ၆ သိန်းနဲ့လာရွေးရမယ်။ မဟုတ်ရင် ထောင်ချမယ်လို့ ခြိမ်းခြောက်လို့သွားရွေးရတာ။ စျေးညှိရင်းနဲ့ကလေး ၁ ယောက် ၅ သိန်းနှုန်းနဲ့ သိန်း ၅၀ ပေးမှ ကလေးတွေကို ပြန်လွှတ်ပေးတယ်” လို့ ငွေပေးပြန်ရွေးခဲ့ရတဲ့ မိဘတွေနဲ့နီးစပ်သူတဦးက ပြောပါတယ်။

စစ်ကောင်စီတပ်သားတွေ ကလေးငယ်တွေကို ဖမ်းဆီးပြီး ငွေတောင်းခံတဲ့ဖြစ်စဉ်မှာ စစ်ကောင်စီခန့် မင်းဝံကျေးရွာ အုပ်ချုပ်ရေးမှူးဟာ အဓိကပါဝင်သူတဦးဖြစ်တယ်လို့  ဒေသခံကျေးရွာသားတွေက သုံးသပ်ပြောဆိုနေကြပါတယ်။

ပြီးခဲ့တဲ့ ဒီဇင်ဘာ ၁၂ ရက်နေ့ကလည်း ကျောက်ဆည်မြို့၊ ရဲစုရပ်ကွက်က ယခင်ရပ်ကွက်အုပ်ချုပ်ရေးမှုးဟောင်း ဦးတိုးကို ပုဂ္ဂိုလ်ရေးအမြင်မကြည်လင်တဲ့ လက်ရှိအုပ်ချုပ်ရေးမှူးက စစ်ကောင်စီကို မဟုတ်မမှန် သတင်းပေးခဲ့တာကြောင့် အကြမ်းဖက်ဖမ်းဆီးခံရသေးတယ်လို့ သိရပါတယ်။

1 year Ago
More News
Up