စစ်ခေါင်းဆောင်

October 4, 2021

ကလောမြို့နယ်တွင် ကျောက်မီးသွေးခေါင်းတွဲ မီးရထားခရီးစဉ် ပြေးဆွဲမည်ဟု စစ်ခေါင်းဆောင်ပြော

ကလောမြို့ကို အခြေပြုပြီး မြင်းတိုက်နဲ့ ဟဲဟိုးကြား ကျောက်မီးသွေးခေါင်းတွဲနဲ့ မီးရထားခရီးစဉ် ပြေးဆွဲဖို့နဲ့ ပြင်ဦးလွင်ကို အခြေပြုပြီး ဇီးပင်ကြီးနဲ့ နောင်ချိုကြား အပန်းဖြေ ခရီးစဉ်တွေ ပြေးဆွဲဖို့ စီစဉ်နေကြောင်း အာဏာသိမ်းစစ်ခေါင်းဆောင်က ပြောကြားလိုက်ပါတယ်။

အောက်တိုဘာ ၃ ရက်မွန်းလွဲပိုင်းက  ကလောမြို့နဲ့  အောင်ပန်းမြို့ရှိဒေသခံ မြို့မိမြို့ဖတွေ၊ စီးပွားရေး လုပ်ငန်းရှင်တွေကို ကလောမြို့ရှိ စစ်ဦးစီး တက္ကသိုလ် ဧည့်ခန်းမဆောင်မှာ တွေ့ဆုံဆွေးနွေးရာမှာ  ဗိုလ်ချုပ်မှူးကြီး မင်းအောင်လှိုင်က ပြောကြားလိုက်တာပါ။ 

ကလောမြို့ဟာ မြန်မာနိုင်ငံရဲ့ တောင်ပေါ်အပန်းဖြေမြို့တစ်မြို့ဖြစ်ပြီး ပူတာအို၊ ပြင်ဦးလွင်၊ ဟားခါး၊ သံတောင်ကြီး၊ ကလော  စတဲ့မြို့တွေကို တောင်ပေါ် အပန်းဖြေမြို့တော်များဖြစ်စေရေး လုပ်ဆောင်နေကြောင်း၊ ကလောမြို့အား အပန်းဖြေမြို့အဖြစ် ဆောင်ရွက်ရာမှာ ပတ်ဝန်းကျင်သာယာလှပရေး ဒေသခံ ပြည်သူတွေက ဝိုင်းဝန်းဆောင်ရွက်ကြဖို့လိုကြောင်း စစ်ခေါင်းဆောင်က ပြောပါတယ်။ 

ဒါ့အပြင် ကလောမြို့သို့ လာရောက်ရာ လမ်းကြောင်းတစ်လျှောက်မှာ ထင်းရှူး၊ ခါတော်မီ၊ စိန်ပန်း၊ ချယ်ရီ စတဲ့မျက်စိပသာဒဖြစ်စေနိုင်တဲ့ အပင်တွေအလှဆင်စိုက်ပျိုးထားကြဖို့၊ လမ်းတွေကိုလည်း အဆင့်မြှင့်တင်ဖို့၊ မြို့သာယာလှပရေးအတွက် သက်ဆိုင်ရာဌာနတွေက ဆောင်ရွက်နေသလို မြို့နေ ပြည်သူလူထုကလည်း ဆောင်ရွက်ကြဖို့တိုက်တွန်းပြောသွားပါတယ်။

ကလောမြို့ကို ခရီးသွားမြို့တော်အဖြစ် လုပ်ဆောင်ကြဖို့နဲ့ ဒေသတွင်းထုတ်ကုန်ပစ္စည်းတွေ အဆင့်မီပြီး အရည်အသွေးပြည့်ဝတဲ့ Quality Product တွေဖြစ်အောင် ဆောင်ရွက်ကြစေလိုတယ်လို့ လည်း စစ်ခေါင်းဆောင်က ပြောသွားပါတယ်။

Photo-DSINFO

3 weeks Ago

October 2, 2021

အာဏာသိမ်းစစ်ခေါင်းဆောင် ပူတာအိုသို့ သွားရန် ထပ်မံစီစဉ်

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ မနက်ဖြန် အောက်တိုဘာ ၃ ရက်မှာ ကချင်ပြည်နယ် ပူတာအိုမြို့သို့ လာဖို့ ရှိတယ်လို့ ပူတာအို ၄၆ တပ်ရင်းမှ အရာရှိတစ်ဦးက ဒီဗွီဘီကို အတည်ပြု ပြောကြားပါတယ်။

“ဒီနေ့လာတဲ့ နယ်လုံ၀န်ကြီးက ရှေ့ပြေး လာတာပါ။ မနက်ဖြန်တော့ မင်းအောင်လှိုင် လာမှာဖြစ်တယ်။ လာရင်းကိစ္စကတော့ ပြည်သူ့စစ်အဖွဲ့နဲ့တွေ့ပြီး ခေါင်းလန်ဖူးဘက်ကိုတက်ဖို့ ခရီးစဉ်ဆွဲထားတယ်” လို့ ၄၆ တပ်ရင်းမှ အရာရှိက ပြောပါတယ်။

စစ်ခေါင်းဆောင်ဟာ ပြီးခဲ့တဲ့စက်တင်ဘာလအတွင်း ကချင်ပြည်နယ်ခရီးစဉ်မှာ ပူတာအိုကိုတက်ဖို့ စီစဉ်ခဲ့ပေမဲ့ ကေအိုင်အေ တပ်မဟာ -၁ က မြစ်ကြီးနား-ပူတာအို ကားလမ်းကို ၃ ရက်ကြာပိတ်ခဲ့လို့ ပူတာအိုခရီးစဉ်ကို လုံခြုံရေးကြောင့်  ဖျက်သိမ်းခဲ့ရပြီးနောက် ဒုတိယအကြိမ် ပူတာအိုကို သွားဖို့ စီစဉ်တာ ဖြစ်တယ်လို့ သိရပါတယ်။

စစ်ခေါင်းဆောင်ရဲ့  ပူတာအိုခရီးစဉ်မတိုင်မီ ပူတာအိုကာကွယ်ရေးတပ်ဖွဲ့ (PUTAO PDF) က  ပြည်သူတွေ  မျှော်လင့်သလို အဆင်သင့်ပြင်ဆင်ထားပြီဖြစ်ကြောင်း ကြေညာထားပါတယ်။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ မနေ့ကတော့ ရှမ်းပြည်နယ် ခရီးစဉ်သွားရောက်နေပါတယ်။ 

3 weeks Ago
More News
Up