စစ်ကြောရေး

September 23, 2021

ထားဝယ်တက္ကသိုလ်ကျောင်းသူဟောင်း မစိုးမီမီကျော် စစ်ကြောရေးအပြီး အရက်ပျံသောက်သေကြောင်းကြံ

တနင်္သာရီတိုင်း၊ ထားဝယ်မြို့မှာ စစ်ကောင်စီတပ်ရဲ့ ဖမ်းဆီးခံရတဲ့ ထားဝယ်တက္ကသိုလ်ကျောင်းသူဟောင်း မစိုးမီမီကျော်ဟာ စစ်ကြောရေးအပြီးမှာ အရက်ပျံသောက်ပြီး ကိုယ့်ကိုယ့်ကိုယ် သေကြောင်းကြံဖို့ ကြိုးစားခဲ့တာကြောင့် ထားဝယ်စစ်ဆေးရုံ တင်ထားရတယ်လို့ သိရပါတယ်။

ထားဝယ်တက္ကသိုလ် (အင်္ဂလိပ်စာအထူးပြု ကျောင်းသူအဟောင်း) မစိုးမီမီကျော်ဟာ စက်တင်ဘာ ၂၀ ရက်နေ့က အကြမ်းဖက်စစ်ကောင်စီတပ်တွေရဲ့ ဖမ်းဆီးခြင်းခံခဲ့ရတာပါ။

ဘာကြောင့် ဒီလိုလုပ်တယ်ဆိုတာကို‌တော့ မေးမြန်းအတည်ပြုနိုင်ခြင်း မရှိသေးဘဲ မိသားစုဝင်တွေကို သွားတွေ့ခွင့်တောင် မပေးသေးဘူးလို့ မစိုးမီမီကျော်နဲ့ နီးစပ်သူတစ်ဦးက ပြောပါတယ်။  ဒါပေမဲ့ စစ်ဆေးရုံမှာပဲ ရှိနေကြောင်းနဲ့ စိုးရိမ်စရာမရှိကြောင်း သူက ဆိုပါတယ်။

စက်တင်ဘာ ၂၀ ရက်နေ့က အကြမ်းဖက်စစ်‌ကောင်စီတပ်သားတွေဟာ မသျှားပြည့်ခင်ဆီကနေ အွန်လိုင်းမှ မုန့်မှာယူ ဟန်ဆောင်ဖမ်းဆီးခဲ့ပြီးနောက် မစိုးမီမီကျော်နဲ့ ကိုစိုးပြည့်အောင်တို့ရဲ့ နေအိမ်ကို ခြိမ်းခြောက်လိုက်ပြခိုင်းကာ ဖမ်းဆီးခဲ့တာလို့ ထားဝယ်တက္ကသိုလ်ကျောင်းသားများသမဂ္ဂက ထုတ်ပြန်ထားပါတယ်။

သူတို့ ၃ ယောက်စလုံး စစ်ကြောရေးရောက်ရှိကာ မသျှားပြည့်ခင်နဲ့ ကိုစိုးပြည့်အောင်တို့ကို မေးမြန်းစစ်ဆေးခဲ့ပြီးနောက် မစိုးမီမီကျော်အား စားရင်းစာအုပ်ပြကာ ရိုက်နှက်မေးမြန်းခဲ့ပေမယ့် မဖြေကြားတဲ့အတွက် စစ်ဆေးမှုကို ရပ်တန့်ခဲ့ကြောင်း သိရပါတယ်။

အဲဒီနောက် မစိုးမီမီကျော်ဟာ အိမ်သာသွားပြီး သူ့မှာပါလာတဲ့ အရက်ပျံကိုသောက်ကာ သက်သေခဲ့တာကြောင့် စစ်ဆေးရုံ ပို့ဆောင်လိုက်ရတယ်လို့ သိရပါတယ်။

မသျှားပြည့်ခင်နဲ့ ကိုစိုးပြည့်အောင်တို့ကတော့ ထားဝယ်မြို့မရဲစခန်းမှာပဲ ရှိနေကြောင်း ထားဝယ်တက္ကသိုလ်ကျောင်းသားများသမဂ္ဂက ထုတ်ပြန်ထားပါတယ်။

4 days Ago

September 20, 2021

စစ်ကြောရေးကပြန်လွတ်လာသူ ပေါင်းတည်မြို့က အမျိုးသား ၁ ဦးသေဆုံး

အကြမ်းဖက်စစ်တပ်ရဲ့ မတရားဖမ်းဆီးခံရပြီး ပြန်လည်လွတ်မြောက်လာတဲ့ ပဲခူးတိုင်းအနောက်ခြမ်း၊ ပေါင်းတည်မြို့၊ ဘွဲ့ပင်ကန်ရပ်ကွက်၊ မှတ်တိုင်လမ်းမှာနေထိုင်တဲ့ အမျိုးသား ၁ ဦးဟာ ၅ ရက်အကြာ စက်တင်ဘာ ၁၉ ရက်နေ့က သေဆုံးသွားတယ်လို့သိရပါတယ်။

သေဆုံးသူ ဦးတိုးကြီးရဲ့ မိတ်ဆွေတဦးက “သူနေတဲ့ရပ်ကွက်က လေးထောင့်ခင်း ဘုန်းကြီးကျောင်းဝိုင်းထဲမှာ သူ့အလောင်းကို မနေ့က မနက်ပိုင်းက တွေ့ရတာ။ လည်ပင်းမှာ ပြတ်ရှထားတဲ့ဒဏ်ရာနဲ့ ဦခေါင်းနောက်စေ့ပေါက်ပြဲဒဏ်ရာတွေတော့ တွေ့တယ်” လို့ ပြောပါတယ်။

သေဆုံးသွားသူဟာ အသက် ၅၀ အရွယ် ဦးတိုးကြီးဆိုသူဖြစ်ပြီး သားဖြစ်သူ ကိုသီဟနဲ့အတူ Mytel တာဝါတိုင်ဖျက်ဆီးဖို့ ကြံရွယ်တယ်ဆိုပြီး အကြမ်းဖက်စစ်ကောင်စီတပ်တွေက စက်တင်ဘာ ၁၃ ရက်နေ့က ဖမ်းဆီးသွားတာပါ။

သေဆုံးသူ ဦးတိုးကြီးကို စက်တင်ဘာ ၁၄ ရက်နေ့မှာ ပြန်လွှတ်ပေးခဲ့ပေမယ့် သားဖြစ်သူ မောင်သီဟကိုတော့ ဒီနေ့အချိန်အထိ ပြန်မလွှတ်ပေးသေးဘူးလို့ ဒေသခံတွေဆီက သိရပါတယ်။

“ကိုယ့်ကိုယ်ကိုယ် သတ်သေတာလား။ သူများသတ်လို့ သေတာလားဆိုတာ သေချာမဝေခွဲနိုင်ကြ ဘူး။ သူကိုယ်တိုင် အနှိပ်စက်ခံရတာရယ်။ သူ့သား အနှိပ်စက်ခံရတာရယ်ကြောင့် စစ်ကြောရေးက ပြန်လွတ်လာတဲ့အချိန်ကစပြီး သူ့စိတ်တွေ ကစဉ့်ကလျား ဖြစ်နေတယ်” လို့ မိသားစုနဲ့ နီးစပ်သူတဦးက ပြောပါတယ်။

ဦးတိုးကြီး သေဆုံးမှုနဲ့ပတ်သက်လို့ ဒီဗွီဘီက ပေါင်းတည်မြို့မရဲစခန်းကို ဆက်သွယ်မေးမြန်းခဲ့ရာ သေမှုသေခင်းနဲ့သာ အမှုရေးဖွင့်ထားတယ်လို့ ပြန်လည်ဖြေကြားပါတယ်။

အကြမ်းဖက်စစ် ကောင်စီတပ်တွေဟာ စိတ်မထင်ရင် မထင်သလို ပြည်သူတွေကို ဖမ်းဆီးနှိပ်စက် နေတဲ့အတွက် ဒေသခံတွေဟာ စီးပွားရေးအဆင်မပြေတာ အပါအဝင် အချိန်မရွေး အကြောင်းအမျိုးမျိုးပြပြီး ဖမ်းဆီးနှိပ်စက်မှာကို စိုးရိမ်နေကြတယ်လို့ ဒေသခံတွေဆီက သိရပါတယ်။

1 week Ago
More News
Up