စစ်ကောင်စီ ယာဉ်တန်း

November 22, 2021

ကရင်ပြည်နယ် စစ်ကောင်စီခန့်ဥက္ကဋ္ဌ၏ ယာဉ်တန်း မိုင်းဆွဲတိုက်ခိုက်ခံရ

အကြမ်းဖက် စစ်ကောင်စီခန့်  ကရင်ပြည်နယ် စစ်ကောင်စီဥက္ကဋ္ဌ စောမြင့်ဦး လိုက်ပါလာတဲ့ ယာဥ်တန်းဟာ ဘားအံ-လှိုင်းဘွဲ ကားမကြီး၊ ရေပူ(မောကို)လမ်းခွဲနားမှာ မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။

​နိုဝင်ဘာ ၂၁ ရက် မနက်ပိုင်းက ပြည်နယ် စစ်ကောင်စီဥက္ကဋ္ဌဟာ လှိုင်းဘွဲမြို့ အောက်စီဂျင်စက်ရုံဖွင့်ပွဲကအပြန်မှာ  ယာဉ်တန်းကို မိုင်းဆွဲတိုက်ခိုက်ခံခဲ့ရတာဖြစ်ပြီး ကား ၂ စီး ထိမှန်ပျက်စီးခဲ့တယ်လို့ ဖြစ်စဥ်ကို မျက်မြင်တွေ့ရှိသူတွေက ဆိုပါတယ်။ 

Photo-MOI

​မျက်မြင်တွေ့ရှိသူတစ်ဦးက "ကျနော်က ခြံကို အလုပ်သွားလုပ်မလို့ ဆိုင်ကယ်နဲ့အသွား ရှေ့နားမှာတင် မိုင်းဆွဲတိုက်ခိုက်ခံရတာ။ အသံကြားတော့ ကျနော်လည်း ဆိုင်ကယ်ပေါ်က ခုန်ဆင်းပြီး ဝပ်နေလိုက်တယ်။ ကားတွေတော့၂ စီးတော့ ထိတယ်။ လူထိမထိတော့ မသိဘူး။ မေးမြန်းခံရမှာ ကြောက်လို့ နောက်ကြောင်းပြန်လှည့် လာလိုက်တယ်"လို့ ပြောပါတယ်။

မိုင်းဆွဲတိုက်ခိုက်မှုကြောင့် ပြည်နယ်စစ်ကောင်စီ ဥက္ကဋ္ဌ စောမြင့်ဦးကတော့ ထိမှန်တာမရှိသလို သူ စီးနင်းလာတဲ့ယာဥ်လည်း  ထိမှန်ခြင်းမရှိဘူးလို့ ပြည်နယ်စစ်ကောင်စီအဖွဲ့နဲ့ နီးစပ်သူတစ်ဦးက ဆိုပါတယ်။

အဆိုပါ မိုင်းဆွဲတိုက်ခိုက်ခံရတဲ့ နေရာဟာ KNU တပ်မဟာ ၇  ထိန်းချုပ်နယ်မြေဖြစ်ပေမယ့် ကားလမ်းမကြီးတလျောက်နဲ့ အနီးပတ်ဝန်းကျင်ကျေးရွာတွေမှာ KNU/ KNLA_PC နဲ့ BGF တပ်ဖွဲ့ဝင်တွေ သွားလာလှုပ်ရှားနေတဲ့ နယ်မြေဖြစ်ပါတယ်။

နိုဝင်​ဘာ ၁၉ ရက်​​ကလည်း စစ်​​ကောင်​စီခန့် စစ်ကိုင်းတိုင်းဝန်ကြီးချုပ်လိုက်ပါလာတဲ့ ယာဉ်​တန်းကို က​လေးဝ PDF က   က​လေးမြို့နယ်​ ယုဇန ​ကျေးရွာနားမှာ မိုင်းဆွဲ တိုက်​ခိုက်ခဲ့ပါတယ်။

2 weeks Ago

November 2, 2021

ဖောင်းဆိုင်ဘက် စစ်ကြောင်းထိုးလာသည့် စစ်ကောင်စီယာဉ်တန်းကို ကိုးကန့်အဖွဲ့ တိုက်ခိုက်

ရှမ်းပြည်နယ်‌ မြောက်ပိုင်း မူဆယ်ခရိုင် မုံးကိုးမြို့အထွက် ကောင်းဒပ်ရွာအနီးမှာ ဖောင်းဆိုင်ဘက် စစ်ကြောင်းထိုးလာတဲ့ စစ်ကောင်စီယာဉ်တန်းကို နိုဝင်ဘာ ၂ ရက်နေ့ မွန်းလွဲ ၁ နာရီခွဲလောက်မှာ ကိုးကန့် MNDAA က ကြားဖြတ်တိုက်ခိုက်ခဲ့ပြီး ယာဉ်‌ကို ဖျက်ဆီးခဲ့တယ်လို့ ကိုးကန့်အဖွဲ့က သတင်းထုတ်ပြန်ထားပါတယ်။

ကြူကုတ်(ပန်ဆိုင်း)နဲ့ မုံးကိုးကြား နော့ဂူရွာအထွက် နော့ဂူရွာနဲ့ နမ့်ဆူရွာကြားမှာလည်း စစ်ကောင်စီဘက်က စစ်ကြောင်းထိုးလာတဲ့ ယာဉ်တန်းကို ကြားဖြတ်တိုက်ခိုက်ခဲ့တာဖြစ်ပြီး ၁၅ မိနစ်ခန့်ကြာ တိုက်ပွဲဖြစ်ပွားခဲ့တယ်လို့ ဒေသခံတဦးက ပြောပါတယ်။

ညနေ ၃ နာရီကျော်အချိန်ထိ အဲဒီနေရာရဲ့ အပေါ်ဘက် တောင်ကြောတလျှောက် ပစ်ခတ်သံတွေ ကြားနေဆဲဖြစ်ပြီး ထိခိုက်ပျက်စီးမှုအခြေအနေကိုတော့ သွားမကြည့်ရဲလို့ ဘာမှမသိရဘူးလို့ ဆိုပါတယ်။

နှစ်ဘက်တိုက်ပွဲအတွင်း သေဆုံး ဒဏ်ရာရမှု အခြေအနေကို မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။

လတ်တလော ကြူကုတ်(ပန်ဆိုင်း)နဲ့ မုံးကိုးဘက်တွေမှာ စစ်ကောင်စီဘက်က အင်အားထပ်တိုး စစ်ကြောင်း ထိုးနေတာ‌ကြောင့် စစ်ကောင်စီနဲ့ ကိုးကန့် MNDAA တို့အကြား ဆက်တိုက် တိုက်ပွဲတွေ ဖြစ်ပွားနေတယ်လို့ သိရပါတယ်။

တိုက်ပွဲ အဆက်မပြတ် ဖြစ်ပွားနေတာကြောင့် ဒေသခံပြည်သူတွေ စိုက်ခင်းသွားလာ လုပ်ကိုင်ဖို့ စပါးရိတ်သိမ်းဖို့ အခက်အခဲနဲ့ ရင်ဆိုင်နေရတယ်လို့ ဒေသခံတွေက ပြောပါတယ်။

1 month Ago
Up