စစ်ကိုင်းတိုင်း၊ ကသာခရိုင်၊ အင်းတော်မြို့နယ်လမ်းပိုင်းမှာ မန္တလေးမြို့ကနေ မြစ်ကြီးနားမြို့ဘက်ကို စစ်ကောင်စီထုတ်ကုန်တွေဖြစ်တဲ့ မြန်မာဘီယာနဲ့ အန်ဒမန်ဂိုးလ်ဘီယာ ဖာ ၁,၀၀၀ လောက်ကို KIA၊ PDF ပူးပေါင်းတပ်ဖွဲ့က စက်တင်ဘာ ၂၃ ရက် နေ့လယ်ပိုင်းမှာ တားဆီးစစ်ဆေးစဉ် ဖမ်းမိပြီး ဘီယာဖာအားလုံးကို ဖျက်ဆီးလိုက်တယ်လို့ PDF တပ်ဖွဲ့ဝင်တယောက်က ဒီဗွီဘီကို ပြောပါတယ်။
“မန္တလေးဘက်ကနေ မြစ်ကြီးနားဘက်ကို ကုန်တင်ယာဉ် ၁၀ ဘီးကားနဲ့ စစ်ကောင်စီထုတ်ကုန် မြန်မာဘီယာနဲ့ အန်ဒမန်ဂိုးလ်ဘီယာဖာ ၁,၀၀၀ ကို KIA၊ PDF ပူးပေါင်းအဖွဲ့က တားဆီးစစ်ဆေးရာကနေ ဖမ်းမိခဲ့တာ၊ အများပြည်သူရှေ့မှာပဲ ဖျက်ဆီးခဲ့ပါတယ်။ နောက်နောင်လည်း စစ်ကောင်စီထုတ်ကုန်ပစ္စည်းတွေ ဖမ်းဆီးရမိရင် ဖျက်ဆီးသွားမှာ ဖြစ်တယ်။”
စစ်ကောင်စီထုတ်ကုန်တွေ သယ်ဆောင်မောင်းနှင်လာတဲ့ ယာဉ်မောင်းနှစ်ယောက်ကို နောက်နောင် စစ်တပ်ထုတ်ကုန်တွေ မသယ်ဆောင်ဖို့ သတိပေးစကားပြောပြီး ကောင်းမွန်စွာ ပြန်လွှတ်ပေးခဲ့တယ်လို့ နီးစပ်သူထံက သိရပါတယ်။
ပူတာအိုခရိုင်အတွင်းက ပြည်သူတွေ အာဏာသိမ်းစစ်ကောင်စီထုတ်ကုန်နဲ့ မူးယစ်ဆေးတွေ သယ်ဆောင် မရောင်းချဖို့ ကေအိုင်အိုက ထပ်မံသတိပေးလိုက်ပါတယ်။
ပူတာအိုခရိုင်အတွင်းမှာ နေထိုင်ကြတဲ့ မိဘပြည်သူတွေနဲ့ မြစ်ကြီးနား-ဆွမ်ဘရာဘွမ်- ပူတာအိုကားလမ်းကို အမှီပြုသွားလာနေကြတဲ့ ခရီးသွားပြည်သူတွေ အားလုံးသိရှိလိုက်နာနိုင်ဖို့ ဇန်နဝါရီလ ၃၀ ရက်နေ့ ရက်စွဲနဲ့ ကေအိုင်အိုအစိုးရ (ပူတာအိုခရိုင်)က သတိပေးချက်ထုတ်ပြန်လိုက်ပါတယ်။
ထုတ်ပြန်ချက်ထဲမှာ မူးယစ်ဆေးဝါးအပြင် မြစ်ကြီးနားခရိုင်အုပ်ချုပ်ရေးမှူးရုံးကနေ ပိတ်ပင်ထားတဲ့ Myanmar Beer, Dagon Beer နဲ့ စစ်ကောင်စီနဲ့ပတ်သက်တဲ့ ပစ္စည်းများ သယ်ဆောင်တာ၊ ရောင်းချတာ မပြုလုပ်ဖို့ ပါရှိပါတယ်။
စစ်ရှောင်ပြည်သူတွေနဲ့ ဒေသခံပြည်သူတွေရဲ့ ခွင့်ပြုချက်မရရှိတဲ့ လယ်ယာမြေနဲ့ဉယျာဉ်ခြံမြေတွေမှာ ရွှေတူးဖော်တာ လုံးဝ (လုံးဝ) မပြုလုပ်ကြဖို့နဲ့ မြစ်ကြီးနား - ဆွမ်ဘရာဘွမ်-ပူတာအိုကားလမ်းမှာလည်း ညနေ ၅ နာရီကနေ မနက် ၆ နာရီအတွင်း ဖြတ်သန်းသွားလာတာ မပြုလုပ်ကြဖို့ ထပ်မံသတိပေးထားပါတယ်။
ပူတာအိုခရိုင် ဆွမ်ဘရာဘွမ်မြို့နယ် ခင်ဒူကားကျေးရွာနဲ့ ဖုန်ကျန်းကျေးရွာကြားမှာ ဇန်နဝါရီ ၉ ရက်နေ့က KIOနဲ့ Putao PDFတို့ ပူးပေါင်းပြီး ပူတာအိုဘက်ကနေ စစ်ကြောင်းထိုးလာတဲ့ စစ်ကောင်စီတပ်သားတွေကို ထိပ်တိုက်ရင်ဆိုင်တိုက်ခိုက်ခဲ့တယ်လို့ သိရပါတယ်။
