စစ်ကောင်စီတပ်

December 2, 2022

ပေါက်မြို့နယ်၌ စစ်ကောင်စီတပ်က ရွာမီးရှို့၊ ပခုက္ကူတွင် တပ်ရိက္ခာပို့ကား တိုက်ခိုက်ခံရ

မကွေးတိုင်း၊ ပေါက်မြို့နယ် ချောင်းဝကျေးရွာကို ဒီဇင်ဘာလ ၁ ရက် မွန်းလွဲပိုင်းမှာ စစ်ကောင်စီစစ်ကြောင်းက မီးရှို့ ဖျက်ဆီးခဲ့တယ်လို့ ဒေသခံတွေဆီကနေ သိရပါတယ်။

ချောင်းဝကျေးရွာကို မနေ့က မွန်းလွဲ ၁ နာရီလောက်မှာ အင်အား ၁၀၀ ကျော်လောက်ပါတဲ့ စစ်ကောင်စီစစ်ကြောင်းက ရွာတောင်ပိုင်းနဲ့ အနောက်ပိုင်းကို မီးရှို့ ဖျက်ဆီးခဲ့ကြတာဖြစ်ပြီး စစ်ကောင်စီတပ်တွေ ကင်းပုန်းဝပ်နေလို့ အိမ်ခြေ ဘယ်လောက်မီးလောင်ဆုံးရှုံးခဲ့တယ်ဆိုတာကို မသိရသေးဘူးလို့ ချောင်းဝရွာဒေသခံတယောက်က ပြောပါတယ်။

စစ်ကောင်စီတပ်တွေ စစ်ကြောင်းစထိုးကတည်းက နိုဝင်ဘာ ၁၉ ရက်နဲ့ ၂၀ ရက်နေ့တွေမှာ အိမ်ခြေ ၁၀၀ လောက်ရှိတဲ့ ချောင်းဝ ရွာသူရွာသားတွေအားလုံး အဝတ်တထည် ကိုယ်တခုနဲ့ ဘေးလွတ်ရာကို ထွက်ပြေးခဲ့ရတာဖြစ်ပြီး ရွာကို မီးရှို့ဖျက်ဆီးနေတာကိုတော့ အဝေးကနေ လှမ်းမြင်နေရတာ လို့ဆိုပါတယ်။

စစ်ဘေးရှောင်ပြည်သူတွေဟာ နီးစပ်ရာတောတောင်တွေမှာ ဖြစ်သလို မိုးကာတဲထိုးပြီးနေနေကြရသလို ဘုန်းကြီးကျောင်းတွေနဲ့ ဆွေမျိုး မိတ်ဆွေတွေဆီမှာ ခိုလှုံနေကြရကာ စောင်၊ ခြင်ထောင်၊ ခေါင်းအုံး၊ အဝတ်အထည်၊ စားနပ်ရိက္ခာ၊ ဆေးဝါးတွေနဲ့ ကျန်းမာရေးစောင့်ရှောက်မှုတွေ အရေးပေါ်အကူညီလိုအပ်နေတယ်လို့ ပြောပါတယ်။

ပေါက်မြို့နယ်မှာ နိုဝင်ဘာ ၁၉ ရက်မှ ဒီဇင်ဘာ ၁ ရက်အထိ စစ်ကောင်စီတပ်တွေနဲ့ ပျူစောထီးတွေ မီးရှို့ဖျက်ဆီးခဲ့လို့ ကျေးရွာ ၉ ရွာလောက်က အိမ်ခြေ ၈၀၀ ကျော် လောက်မီးလောင်ဆုံးရှုံးပြီး ပြည်သူတွေအိုးမဲ့အိမ်မဲ့ ဖြစ်ခဲ့ရတယ်လို့ သိရပါတယ်။

မကွေးတိုင်း၊ ပခုက္ကူမြို့နယ်မှာတော့ ကမ္မမြို့ကနေ မြိုင်မြို့နယ် ကျောက်ခွက်၊ ဖလံကိုင်း ရေနံမြေရဲစခန်းတွေကို ရိက္ခာလာပို့တဲ့ စစ်ကောင်စီတပ်ကကားကို နိုဝင်ဘာ ၃၀ ရက်မှ ဒီဇင်ဘာ ၂ ရက်အထိ လမ်းတလျှောက် မိုင်းတွေ၊ ဒရုန်းတွေနဲ့ တိုက်ခိုက်ခဲ့လို့ စစ်ကောင်စီဘက်က ၄ ယောက် သေဆုံးကာ ၅ ယောက် အပြင်းအထန် ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

မြိုင် ပ.က.ဖ တပ်ရင်း(၁) တပ်ရင်းမှူး ဗိုလ်လက်ယာက  “ကမ္မမြို့ဘက်ကနေ မြိုင်မြို့နယ် ကျောက်ခွက်နဲ့ ဖလန်ကိုင်း ရေနံမြေစခန်းတွေကို နိုဝင်ဘာ ၃၀ ရက်နေ့မှာ ရိက္ခာပို့ဖို့ ထွက်လာတဲ့ စစ်ကားတစီးကို တဲကြီးရွာနဲ့ နယ်သတ်ရွာကြားမှာ မိုင်းဆွဲတိုက်ခိုက်လိုက်လို့ ကားက ဖြည်းဖြည်းချင်းသာမောင်းလာပြီး နယ်သတ်ရွာနားမှာ ရပ်တန့်ပြီး ပြုပြင်နေတဲ့အချိန် ဒီဇင်ဘာ ၁ ရက်နေ့မှာ ဒရုန်းနဲ့ အီနာဂါ ဗုံးသီးတွေ ဖြုတ်ချပြီး တိုက်ခိုက်ခဲ့တယ်”လို့ ပြောပါတယ်။

ကားပြင်နေတဲ့ စစ်ကောင်စီတပ်သား ၇ ယောက်ဟာ ဒီဇင်ဘာ ၂ ရက် မနက် ၇ နာရီခွဲ လောက်မှာ နယ်သတ်ရွာထဲကို ဝင်လာလို့ မိုင်းအကြီး ၄ လုံးနဲ့ တိုက်ခိုက်ခဲ့ရာမှာ ၄ ယောက် သေဆုံးကာ ၃ ယောက် အပြင်းထန်ရသွားတယ်လို့ဆိုပါတယ်။

အဲဒီတိုက်ခိုက်မှုကို မြိုင် ပ.က.ဖ တပ်ရင်း (၁) နဲ့ ကျေးရွာကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး တိုက်ခိုက်မှုအတွင်းမှာ အထိနာသွားတဲ့ စစ်(...)တွေဟာ ရိက္ခာတွေကို ပို့ဆောင်နိုင်ခြင်းမရှိတော့ဘဲ့ သေဆုံးသွားတဲ့ စစ်သား အလောင်းတွေကို ကားပေါ်တင်ပြီး မီးရှို့သွားကြတယ်လို့ ဗိုလ်လက်ယာက ပြောပါတယ်။

မြိုင်မြို့နယ်နဲ့ ပေါက်မြို့နယ်တွေမှာ ဒီဇင်ဘာ ၁ ရက်ကလည်း စစ်ကောင်စီတပ်သားတွေနဲ့ ဒေသကာကွယ်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၂ ယောက် သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။

နှစ်ဖက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

1 hour Ago

ဆားလင်းကြီးမြို့နယ်၌ ချင်းတွင်းမြစ်ကို ဆန်တက်လာသည့် စစ်ကောင်စီတပ်များ တိုက်ခိုက်ခံရ

စစ်ကိုင်းတိုင်း၊ ဆားလင်းကြီးမြို့နယ်ထဲမှာ ချင်းတွင်းမြစ်ကြောင်းအတိုင်း ဆန်တက်လာတဲ့ စစ်ကောင်စီတပ်တွေကို ပြည်သူ့ကာကွယ်ရေးမဟာမိတ်တပ်တွေက ဝိုင်းဝန်းတိုက်ခိုက်ခဲ့လို့ အထိနာခဲ့ပြီး စစ်တပ်တွေဟာ ပြည်သူတွေရဲ့ ကျေးရွာ ၄ ရွာကို မီးရှို့ဖျက်ဆီးခဲ့ပါတယ်။ 

နိုဝင်ဘာ ၂၄ ရက်ကစလို့ ချင်းတွင်းမြစ်ကြောင်းအတိုင်း စစ်ကောင်စီတပ်သားတွေ ပါလာတဲ့ ရေယာဉ်တွေ ဆန်တက်လာတယ်ဆိုတဲ့ သတင်းကြောင့် မဟာမိတ်တပ်တွေဟာ စောင့်ဆိုင်းနေခဲ့ကြပြီး အဲဒီရေယာဉ်တွေဟာ ၂၇ ရက်နေ့မှာ ဆားလင်းကြီးမြို့နယ်ထဲကို ရောက်လာပါတယ်။ 

နိုဝင်ဘာ ၂၈ မနက်ပိုင်းမှာတော့ ဆန်တက်လာတဲ့ ရေယာဉ်တွေကို မဟာမိတ် ၂၃ ဖွဲ့က မိုင်းခွဲတိုက်ခိုက်ခဲ့လို့ ၆ စင်းထဲမှာ ၃ စင်းက သောင်တင်သွားပေမယ့် ကျန် ၃ စင်းကတော့ မုံရွာဘက်ကို ဆက်လက်ဆန်တက်သွားခဲ့တယ်လို့ One Star Task Force (ယင်းမာပင်ခရိုင်တပ်ရင်း (၁၆)၊တပ်ခွဲ(၂) ရဲ့ တာဝန်ခံက ဗိုလ်ကျော်ကြီးက ပြောပါတယ်။ 

တိုက်ခိုက်ခံရလို့ သေဆုံးသွားတဲ့ စစ်သား ၂ လောင်းနဲ့ ဒဏ်ရာရသူ ၉ ယောက်ကို မုံရွာကမ်းဘေးမှာထားခဲ့ပြီး သောင်တင်နေတဲ့ ရေယာဉ်တွေဆီကို ပြန်လာတဲ့ အချိန်မှာလည်း မဟာမိတ်တပ်တွေက ၂ ကြိမ်ထပ်ပြီး မိုင်းခွဲ ပစ်ခတ်တိုက်ခိုက်ခဲ့လို့ စစ်သား ၁၀ ယောက်လောက် အနည်းဆုံး သေဆုံးနိုင်တယ်လို့ ဆိုပါတယ်။ 

နိုဝင်ဘာ ၂၉ ရက်နေ့မှာတော့ မဟာမိတ်တပ်တွေ ထပ်ရောက်လာတာကြောင့် အဖွဲ့ ၃၀ ကျော်သွားပြီး ကျောက်ချထားတဲ့ စစ်တပ်ရေယာဉ် ၅ စင်းကို မနက်ပိုင်းမှာ RPG တွေ၊ လက်နက်ငယ်တွေနဲ့ သွားရောက်တိုက်ခိုက်လို့ စစ်သားအသေအပျောက် ရှိနိုင်ပေမယ့် အရေအတွက်ကိုတော့ မသိရသေးပါဘူး။ 

မဟာမိတ်တပ်တွေဟာ လက်နက်အင်အားမမျှတာနဲ့ ကျည်မလုံလောက်တာကြောင့် ပြန်ဆုတ်ခွာလာခဲ့ပြီး တပ်သားရဲဘော် နှစ်ယောက်ကတော့ မိုင်းမတော်တဆဖြစ်လို့ ဒဏ်ရာနည်းနည်းရခဲ့တယ်လို့ ဆိုပါတယ်။ 

ဗိုလ်ကျော်ကြီးကတော့ ဒီရက်ပိုင်းမှာ စစ်ကောင်စီတပ်တွေနဲ့ မဟာမိတ်တပ်တွေ ထိတွေ့ တိုက်ခိုက်တာ ၆ ကြိမ်ဖြစ်ခဲ့ပြီး စစ်သား ၂၀ လောက်သေဆုံးနိုင်တယ်လို့ ခန့်မှန်းပေမဲ့ စစ်ကောင်စီက တိုက်ပွဲသတင်းထုတ်ပြန်တာမရှိသလို သေဆုံးဒဏ်ရာရသူ အရေအတွက်ကို သီးခြား အတည်ပြုနိုင်တာလည်း မရှိသေးပါဘူး။ 

အထိနာသွားတဲ့ စစ်ကောင်စီတပ်တွေဟာ ဆားလင်းကြီးမြို့နယ်ထဲက ဆားထုံး၊ ထန်းဇင်၊ တောကျောင်းနဲ့ လက်ပံကျွန်းရွာတို့ကို မီးရှို့ဖျက်ဆီးခဲ့ပါတယ်။ 

တောကျောင်းမှာ ၃၂ အိမ်၊ ထန်းဇင်မှာ ၂၄ အိမ်၊ ဆားထုံးမှာ အိမ် ၂၀၀ ကျော်နဲ့ လက်ပံကျွန်းမှာ ၃၄ အိမ် မီးလောင်သွားတယ်လို့  ဒေသခံတယောက်က ပြောပါတယ်။ 

ဆားလင်းကြီးမြို့နယ်ထဲမှာ စစ်ကောင်စီတပ်တွေ စစ်ကြောင်းထိုးနေလို့ ရွာပေါင်း ၁၅ ရွာလောက်က ဒေသခံ ၁၀၀၀၀ ကျော် ထွက်ပြေး တိမ်းရှောင်နေရပါတယ်။

2 hours Ago

ဒီးမော့ဆိုတွင် စစ်ကောင်စီထိန်းချုပ်နယ်မြေများကို KRU အဖွဲ့ ပြန်လည်သိမ်းယူ

ကယား (ကရင်နီ)ပြည်နယ်၊ ဒီးမော့ဆိုမြို့၊ ကုန်းသာရွာထဲမှာ စစ်ကောင်စီတပ်ထိန်းချုပ်ထားတဲ့ နယ်မြေတွေကို ကယား (ကရင်နီ) တော်လှန်ရေးတပ်ပေါင်းစု (KRU) က ပြန်လည်သိမ်းယူနိုင်ခဲ့ပြီး လက်နက်ခဲယမ်းတွေ သိမ်းဆည်းရမိတယ်လို့ ကရင်နီတော်လှန်ရေး တပ်ပေါင်းစု (KRU) က ဒီဇင်ဘာ ၂ ရက်မှာ ထုတ်ပြန်ပါတယ်။

ကုန်းသာကျေးရွာဟာ ကရင်နီတော်လှန်ရေးတပ်ပေါင်းစု (KRU) ရဲ့ စစ်မျက်နှာနယ်မြေဖြစ်ပြီး ပြီးခဲ့တဲ့ ဧပြီလက တိုက်ပွဲတွေအတွင်း နယ်မြေတခြမ်းကို စစ်ကောင်စီတပ်က ထိန်းချုပ်လိုက်ပြီး တပ်သား ၃၀ ဝန်းကျင် တပ်စွဲထားတာလို့ KRU ကနေ သိရပါတယ်။

ကုန်းသာကျေးရွာအတွင်း နယ်မြေရှင်းလင်းရေး ပြုလုပ်စဉ် စစ်ကောင်စီတပ်ရဲ့ ရိက္ခာ၊ စွပ်ဗုံး၊ ကျည်ဆန်နဲ့ အသုံးအဆောင်ပစ္စည်းတွေ သိမ်းပိုက်ရရှိခဲ့ပြီး မိုင်းရှင်းလင်းရေး ပြုလုပ်နေပြီလို့ ထုတ်ပြန်ချက်မှာ ဖော်ပြပါတယ်။

ကရင်နီတော်လှန်ရေးတပ်ပေါင်းစုမှ ပြန်ကြားရေးတာဝန်ရှိသူက “နယ်မြေတခုလုံး ပေးထားရတာတော့ မဟုတ်ပါဘူး။ သူတို့က ကုန်းသာရွာထဲမှာ အင်အား ၃၀ ဝန်းကျင်လောက်နဲ့ တပ်စွဲထားတာ။ ထိတွေ့မှု ခနပဲဖြစ်ပြီး စခန်းစွန့် ပြေးသွားတယ်။ မပြေးရင်လည်း သေဖို့ပဲရှိတယ်လေ။ တဖက်မှာလည်း KA၊ KNDF ပူးပေါင်းတပ်ဖွဲ့တွေ ရှိနေလို့ စခန်းစွန့်ခဲ့တာ ဖြစ်နိုင်တယ်” လို့ ပြောပါတယ်။

အလားတူ ဒီးမော့ဆိုမြို့နယ် သေးဆူလဲကျေးရွာအတွင်း တပ်စွဲထားတဲ့ စစ်ကောင်စီတပ်ဖွဲ့နဲ့ KNDF, KA, KGZ, PDF ပူးပေါင်းတပ်ဖွဲ့တွေကြား ထိတွေ့တိုက်ပွဲ ဖြစ်ပွားခဲ့ပြီး ပူးပေါင်းတပ်ဖွဲ့က နယ်မြေတွေကို ပြန်လည်ထိန်းချုပ်နိုင်ခဲ့ပြီလို့ သိရပါတယ်။

5 hours Ago

ရေး-သံဖြူဇရပ် ကားလမ်းတွင် စစ်ကောင်စီတပ် တိုက်ခိုက်ခံရပြီး ၂ ဦးသေ

မွန်ပြည်နယ်၊ ရေး-သံဖြူဇရပ် ကားလမ်းပေါ်မှာ ဒီဇင်ဘာ ၁ ရက် မနက် ၁၁ နာရီခွဲက ချုံခိုတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂ ယောက် သေဆုံးခဲ့တယ်လို့ တောင်ညိုပြောက်ကျားတပ်ဖွဲ့က ဒီဇင်ဘာ ၂ ရက် မှာ ထုတ်ပြန်ပါတယ်။

ကနင်ကမော့ရွာနဲ့ အောင်သာယာရွာကြား ပရာသားတံတားနားမှာ စစ်ကား ၂ စီးပေါ်က စစ်ကောင်စီတပ်ဖွဲ့ဝင်တွေ ကားပေါ်ကဆင်းနေချိန် ကင်းပုန်းဝပ်နေတဲ့ ပြောက်ကျားတပ်ဖွဲ့က တိုက်ခိုက်ခဲ့တာလို့ ဆိုပါတယ်။

ချုံခိုတိုက်ခိုက်မှုဖြစ်စဉ်မှာ တောင်ညိုပြောက်ကျားတပ်ဘက်က ထိခိုက်သေဆုံးတာ ရှိ၊ မရှိကိုတော့ ထုတ်ပြန်ချက်မှာ ဖော်ပြမထားပါဘူး။

ရေး-သံဖြူဇရပ် ကားလမ်းပိုင်းမှာ စစ်ကောင်စီတပ်တွေ မကြာခဏ အလစ်အငိုက် ချုံခိုတိုက်ခိုက်ခံရလေ့ရှိပြီး ထိခိုက်ကျဆုံးတာတွေ ရှိခဲ့တာကြောင့် အနီးနားရွာက ဒေသခံတွေ ခြိမ်းခြောက်ခံနေရတယ်လို့ သိရပါတယ်။

အဲဒီ ရေး-သံဖြူဇရပ်လမ်း ဖြစ်စဉ်တွေနဲ့ ပတ်သက်လို့ စစ်ကောင်စီဘက်က သတင်းမထုတ်ပြန်ပေမဲ့ အင်အားထပ်ဖြည့်လာနိုင်တာကြောင့် တိုက်ပွဲတွေ ပြင်းထန်လာမှာကို ​ဒေသခံတွေ စိုးရိမ်နေကြပါတယ်။

6 hours Ago

မြင်းမူတွင် စစ်ကောင်စီတပ်ကို PDF အမျိုးသမီးကွန်မန်ဒိုများ တိုက်ခိုက်

စစ်ကိုင်းတိုင်း၊ မြင်းမူမြို့ အထက ၁ ကျောင်းဝင်းအတွင်း စခန်းချတပ်စွဲထားတဲ့ စစ်ကောင်စီ တပ်ဖွဲ့ဝင်တွေကို ဒီဇင်ဘာ ၁ ရက် မနက် ၁၁ နာရီလောက်က ‌ဒေသကာကွယ်ရေးအဖွဲ့ဖြစ်တဲ့ Moe Nyo Revolation Force (MNRF) ရဲ့ အမျိုးသမီးကွန်မန်ဒိုတပ်ဖွဲ့က ဗုံးပစ်တိုက်ခိုက်ခဲ့ပါတယ်။

ဗုံးဟာ ကျောင်းဝင်းအတွင်းရှိ စစ်ကောင်စီတပ်ဖွဲ့ဝင်တွေရှိရာ နေရာအနီးဘက်ကို ကျရောက်ပေါက်ကွဲခဲ့ပြီး ထိခိုက်သေဆုံးမှု အခြေနေကိုတော့ မသိရှိရသေးဘူးလို့ Moe Nyo Revolation Force မှ တာဝန်ရှိသူတဦးက ဆိုပါတယ်။

“အမျိုးသမီးအထူးတပ်ဖွဲ့ဖြစ်တဲ့ ကွန်မန်ဒိုတပ်ဖွဲ့ဝင်တွေက သွားရောက်တိုက်ခိုက်ခဲ့တာ။ လျက်ဆားပုလင်း (ဗုံး) က သူတို့ရှိရာဘက် ကျကွဲတယ်ဆိုတာတော့ အတည်ပြုနိုင်ပါတယ်။ လက်ရှိမှာ အထိအခိုက် အသေအပျောက် အခြေအနေကိုတော့ စုံစမ်းနေဆဲပါ။”

ဗုံးပေါက်ကွဲပြီးနောက် စစ်ကောင်စီတပ်ဖွဲ့ဝင်တွေက အမျိုးသမီးကွန်မန်ဒိုအဖွဲ့ကို လိုက်လံပစ်ခတ်တာတွေ ရှိခဲ့ပေမဲ့ ထိခိုက်ဒဏ်ရာရ ကျဆုံးမှု တစုံတရာ မရှိခဲ့ဘူးလို့ သိရပါတယ်။

Moe Nyo Revolution Force ခေါင်းဆောင် မိုးညိုက “ကျနော်တို့ မိုးညိုတပ်ရဲ့ အမျိုးသမီး ကွန်မန်ဒိုတွေက လျက်ဆားပုလင်း (ကေအိုင်အေထုတ် လက်ပစ်မိုင်း) နဲ့ သွားရောက်တိုက်ခိုက်ခဲ့တာ ဖြစ်ပါတယ်။ စစ်(--)တွေက ကျောင်းထဲမှာ စခန်းချတယ်။ ကျောင်းရှေ့ ကျောက်တိုင်ကနေပြီး ယောက်ျားလေး ဆိုင်ကယ် နှစ်ယောက်စီးတွေကို တားစစ်တယ်၊ ငွေညှစ်တယ်၊ လမ်းသွားလမ်းလာတွေကိုလည်း မထင်ရင် မထင်သလို ဖမ်းဆီးရိုက်နှက်တာမျိုးတွေ ရှိတယ်။ အဲဒီအတွက်ကြောင့် သွားရောက်တိုက်ခိုက်ခဲ့ရခြင်းဖြစ်တယ်။”

အခုလို အမျိုးသမီးကွန်မန်ဒိုတွေ မစ်ရှင်က ပထမဆုံးဖြစ်ပြီး နောင်မှာလည်း အလားတူ တိုက်ခိုက်မှုတွေ အများကြီးဆက်လုပ်သွားမယ်လို့လည်း ဆိုပါတယ်။

“နောက်ပိုင်းမှာလည်း အမျိုးသမီးကွန်မန်ဒိုတွေအနေနဲ့ မစ်ရှင်တွေ အများကြီးရှိဦးမှာပါ။ ပြည်သူလုထုကို ကျနော်ပြောချင်တာက စစ်(--)တွေ တပ်စွဲထားတဲ့ နေရာတွေနားမှာ မနေဖို့၊ စစ်(--)တွေထိုင်တဲ့ လက်ဖက်ရည်ဆိုင်တွေမှာ အတူမထိုင်ဖို့၊ ပြည်သူကားသမားတွေ အနေနဲ့လည်း သူတို့ယာဉ်တန်းတွေနဲ့ အနည်းဆုံး ပေ ၅၀ လောက်အကွာကနေ မောင်းနှင်ကြဖို့ ပြောချင်ပါတယ်” လို့ Moe Nyo Revolution Force ခေါင်းဆောင် မိုးညိုက ဆက်ပြောပါတယ်။

အဆိုပါ ကျောင်းဝင်းအတွင်းမှာ စစ်ကောင်စီရဲ့ တပ်မ ၃၃၊ နမခနဲ့ အရာတော်တပ်တွေ ပေါင်းစုတပ်စွဲထားတာဖြစ်ပြီး တိုက်ခိုက်ခံရမှုကြောင့် မြေ‌ပြင်အနေအထားအရ ထိခိုက်ကျဆုံးစာရင်း အတိအကျရရှိဖို့ ခက်ခဲပေမဲ့ မြင်းမူဆေးရုံကို လူနာတွေ ရောက်ရှိလာတဲ့အတွက် အထိအခိုက်ရှိနိုင်ကြောင်း သိရပါတယ်။

ပြီးခဲ့တဲ့ နိုဝင်ဘာ ၃၀ ရက်ကလည်း မြင်းမူမြို့နယ် တောချောင်းဦးနယ်မြေရဲစခန်းကို ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ပြီး ရဲတပ်ဖွဲ့ဝင် ၇ ဦး သေဆုံးခဲ့ပါတယ်။

6 hours Ago

မြိုင်နှင့် ပေါက် တိုက်ပွဲများတွင် စစ်ကောင်စီတပ်က ၂ ဦးသေ၊ အများအပြား ဒဏ်ရာရ

မကွေးတိုင်း မြိုင်နဲ့ ပေါက်မြို့နယ်တွေမှာ စစ်ကောင်စီတပ်နဲ့ ဒေသကာကွယ်ရေး ပူးပေါင်းတပ်တို့ တိုက်ပွဲဖြစ်ပွားပြီး စစ်ကောင်စီတပ်က ၂ ယောက် သေဆုံးကာ အများအပြား ဒဏ်ရာရခဲ့တယ်လို့ မြိုင် ပ.က.ဖ က သိရပါတယ်။

မြိုင်မြို့နယ် ကိုင်းတောမစာသင်ကျောင်းနားမှာ တပ်စွဲထားတဲ့ စစ်ကောင်စီတပ်ဖွဲ့ဝင် ၁၀ ယောက်အနက် စျေးဝယ်ထွက်လာတဲ့  ၄ ယောက်ကို ဒီဇင်ဘာ ၁ ရက် မနက် ၇ နာရီလောက်က ဆေးရုံနားအရောက်မှာ စလစ်မိုင်းအကြီး ၂ လုံးနဲ့ မိုင်းဆွဲတိုက်ခိုက်ခဲ့လို့  ၂ ယောက် သေဆုံးပြီး ၂ ယောက် ဒဏ်ရာရရှိခဲ့တယ်လို့ မြိုင် ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။

အဲဒီတိုက်ခိုက်မှုကို GOBA ဗိုလ်မိုးကြိုးအဖွဲ့၊ ဂဠုန်တပ်ဖွဲ့တို့နဲ့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီတပ်က အလောင်းတွေကို ဆွဲယူပြီး ဆုတ်ခွာသွားကြတယ်လို့ ဆိုပါတယ်။

ဒါ့အပြင် ပေါက်မြို့နယ် ချောင်းကူရွာအရှေ့မြောက်ဘက်မှာ လျှပ်စစ်မီးလိုင်းလာဆက်တဲ့ စစ်ကောင်စီတပ်ကိုလည်း ဒီဇင်ဘာ ၁ ရက် မနက် ၈ နာရီလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့လို့ စစ်ကောင်စီတပ်ဘက်က ထိခိုက်သေဆုံးသူ ရှိနိုင်တယ်လို့ ဗိုလ်လက်ယာက ပြောပါတယ်။

ရဲဘော်တွေက မနက် ၅ နာရီလောက်ကတည်းက ကင်းပုန်းဝပ်ပြီး တိုက်မိုင်း ၃ လုံးနဲ့ မိုင်းခွဲ တိုက်ခိုက်ပြီးနောက် အပြန်အလှန် ထိတွေ့တိုက်ပွဲဖြစ်ပွားကာ ဒဏ်ရာရတဲ့ စစ်သား ၄ ယောက်လောက်ကို ကားပေါ်ဆွဲတင်သွားတာ တွေ့ရပြီး တိုက်ပွဲမှာတော့ ရဲဘော်တွေအနေနဲ့ ထိခိုက်ကျဆုံး မရှိခဲ့ဘူးလို့  ဗိုလ်လက်ယာက ဆိုပါတယ်။

နှစ်ဖက်တိုက်ပွဲအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းမထုတ်ပြန်ပါဘူး။

6 hours Ago
More News
Up