အာဏာသိမ်း တနှစ်ပြည့်တဲ့ရက်မှာ ပြုလုပ်ဖို့ နှိုးဆော်ထားတဲ့ အသံတိတ်သပိတ်အကြောင်းနှိုးဆော်ရင် အရေးယူမယ်လို့ အာဏာသိမ်းစစ်ကောင်စီက ထုတ်ပြန်ပါတယ်။
လာမဲ့ ဖေဖော်ဝါရီ ၁ ရက်နေ့မှာ ပြည်တော်ဝင်ဖို့ ရုန်းကြစို့ ဆိုတဲ့ ကြွေးကြော်သံနဲ့ တနေကုန် အသံတိတ်သပိတ်လုပ်ကြဖို့၊ ညနေမှာ လက်ခုပ်တီးကြဖို့အတွက် တိုက်တွန်းနှိုးဆော်နေကြတာပါ။
မကြာသေးခင် ဒီဇင်ဘာလထဲမှာ တနိုင်ငံလုံးနီးပါး ပြုလုပ်အောင်မြင်ခဲ့တဲ့ အသံတိတ်သပိတ်ကို ကြောက်ရွံ့တဲ့ စစ်ကောင်စီကတော့ ဥပဒေ ပုဒ်မတွေနဲ့ ခြိမ်းခြောက်ထုတ်ပြန်ပါတယ်။
ပြီးခဲ့တဲ့ အသံတိတ်သပိတ်တုန်းက ဈေးဆိုင်တွေ ပိတ်ကြတာကို စစ်ကောင်စီတပ်သားနဲ့ သူတို့လက်အောက်ခံအဖွဲ့တွေက ခြိမ်းခြောက်ဖွင့်ခိုင်းတာ၊ ဆိုင်ခန်းသိမ်းမယ်လို့ ခြိမ်းခြောက်တာမျိုးတွေ လုပ်ခဲ့ကြတာပါ။
အသံတိတ်သပိတ် (silence Strike) ကို CRPH၊ NUG နဲ့ သူတို့ရဲ့ လက်အောက်ခံအဖွဲ့အစည်းတွေ၊ ဆက်နွှယ်နေတဲ့ အဖွဲ့အစည်းတွေ၊ လူပုဂ္ဂိုလ်တွေရဲ့ ဖေ့စ်ဘွတ်ခ်အကောင့်တွေကနေ နိုင်ငံတော် တည်ငြိမ်ရေးကို ပျက်ပြားစေဖို့နဲ့ ပြည်သူတွေ ကြောက်ရွံ့အောင်လုပ်နေတာလို့ စစ်ကောင်စီက ဆိုပါတယ်။
ဒါတွေလိုက်လုပ်ရင်၊ နှိုးဆော်ကူညီရင် အကြမ်းဖက်မှုတိုက်ဖျက်ရေးဥပဒေပုဒ်မ ၅၂(က)၊ ရာဇသတ်ကြီးပုဒ်မ ၁၂၄-က နဲ့ ပုဒ်မ ၅၀၅-က၊ အီလက်ထရောနစ်ဆက်သွယ်ဆောင်ရွက်ရေး ဥပဒေပုဒ်မ ၃၃(က)နဲ့ တခြား တည်ဆဲဥပဒေတွေအရ အရေးယူမယ်လို့ ခြိမ်းခြောက်ပါတယ်။
ဒါ့အပြင် ဒီကိစ္စနဲ့ သက်ဆိုင်တဲ့ ရွှေ့ပြောင်းနိုင်တဲ့ ပစ္စည်း၊ မရွှေ့ပြောင်းနိုင်တဲ့ ပစ္စည်းတွေကို အကြမ်းဖက်မှု တိုက်ဖျက်ရေး၌ပဒေအရ သိမ်းဆည်းနိုင်တယ်လို့လည်း ဆိုပါတယ်။
အသံတိတ်သပိတ်ဆိုတာကတော့ တနေကုန် အရေးကြီးအကြောင်းမရှိရင် အပြင်မထွက်ဘဲ နေကြတာဖြစ်ပြီး ညနေ ၄ နာရီအချိန်မှာတော့ တော်လှန်နေသူတွေကို ဂုဏ်ပြုတဲ့အနေနဲ့ လက်ခုပ်တီးကြမှာ ဖြစ်ပါတယ်။
အကြမ်းဖက်အာဏာသိမ်းစစ်ကောင်စီကို ဆန့်ကျင်တဲ့အနေနဲ့ ပြုလုပ်တဲ့ ဒီလို အသံတိတ်သပိတ်ကို ပြီးခဲ့တဲ့နှစ် မတ် ၂၄ ရက်နဲ့ ဒီဇင်ဘာ ၁၀ ရက်တို့မှာ တနိုင်ငံလုံးနီးပါးပါဝင် ပြုလုပ်အောင်မြင်ခဲ့ပါတယ်။
နေအိမ်၊ တိုက်ခန်း ငှားရမ်းနေထိုင်ပြီး အကြမ်းဖက်မှုတွေ ကျူးလွန်ကြောင်း ဖော်ထုတ်ရရှိပါက ငှားရမ်းတဲ့ အိမ်ပိုင်ရှင်တွေ အရေးယူခံရမယ့်အပြင် နိုင်ငံတော်ဘဏ္ဍာအဖြစ် သိမ်းဆည်းခံရမယ်လို့ စစ်ကောင်စီအကြမ်းဖက်အဖွဲ့က သတိပေးခြိမ်းခြောက်ထားပါတယ်။
နေအိမ်၊ တိုက်ခန်း ငှားရမ်းနေထိုင်ပြီး အကြမ်းဖက်မှုများ ကျူးလွန်ကြောင်း ဖော်ထုတ်ရရှိပါက ငှားရမ်းစဉ်မှာ သက်ဆိုင်ရာ ရပ်ကွက် သို့မဟုတ် ကျေးရွာ အုပ်စုအုပ်ချုပ်ရေးမှူးရုံးသို့ ဧည့်စာရင်းမတိုင်ကြောင်း စိစစ်တွေ့ရှိရပါက ပိုင်ရှင်မှာ တာဝန်ရှိမှာဖြစ်လို့ သက်ဆိုင်ရာ တည်ဆဲဥပဒေအရ အရေးယူခံရမယ်လို့ စစ်ကောင်စီလက်အောက်ခံ အကြမ်းဖက်မှုတိုက်ဖျက်ရေးဗဟိုအဖွဲ့ရဲ့ စက်တင်ဘာ ၉ ရက် ထုတ်ပြန်ချက်မှာ ဖော်ပြပါတယ်။
ဒါ့အပြင် အဆိုပါ ငှားရမ်းထားတဲ့ နေအိမ်၊ တိုက်ခန်းတွေကို အကြမ်းဖက်မှု တိုက်ဖျက်ရေးဥပဒေအရ အရေးယူဆောင်ရွက်နေတဲ့ အမှုတွေနဲ့ ဆက်စပ်ပြီး သက်သေခံအဖြစ် သိမ်းဆည်းခံရမှာဖြစ်ပြီး တရားရုံးမှာ စစ်ဆေးပေါ်ပေါက်ချက်အရ နိုင်ငံတော်ဘဏ္ဍာအဖြစ် သိမ်းဆည်းခံရမယ်လို့လည်း သတိပေးထားပါတယ်။
နိုင်ငံအနှံ့ ဖောက်ခွဲဖျက်ဆီးသူတွေဟာ တိမ်းရှောင်၊ ပုန်းခိုနေထိုင်ဖို့ နေအိမ်၊ တိုက်ခန်းတွေ ငှားရမ်းသုံးစွဲခဲ့ကြပြီး အကြမ်းဖက်လုပ်ငန်းတွေ ဆောင်ရွက်နေကြောင်း တွေ့ရှိရတယ်လို့ ဆိုပါတယ်။
ဒါ့ကြောင့် နေအိမ်၊ တိုက်ခန်း ငှားရမ်းသူ အိမ်ရှင်တွေအနေနဲ့ မိမိတို့ရဲ့ နေအိမ်၊ တိုက်ခန်းတွေ ငှားရမ်းမယ် ဆိုပါက ငှားရမ်းနေထိုင်သူတွေရဲ့ ကိုယ်ရေးအချက်အလက်၊ အထောက်အထားပြည့်စုံစွာနဲ့ ရပ်ကျေးအုပ်ချုပ်ရေးမှူးရုံတွေမှာ ဧည့်စာရင်း တိုင်ကြားဖို့နဲ့ သံသယဖြစ်ဖွယ်တွေ့ရှိရပါက အချိန်မီသတင်းပို့ အကြောင်းကြားဖို့ စစ်ကောင်စီက တိုက်တွန်းထားပါတယ်။
စစ်တပ်အာဏာသိမ်းယူခဲ့တဲ့ ၂၀၂၁ ဖေဖော်ဝါရီမှ စက်တင်ဘာ ၉ ရက်အထိ မြန်မာနိုင်ငံတဝန်း ဗုံးခွဲတိုက်ခိုက်မှုပေါင်း ၂၃၉၀ ကြိမ်၊ လက်နက်ငယ်နဲ့ ပစ်ခတ်တိုက်ခိုက်မှု ၃၀၄ ကြိမ် ဖြစ်ပွားခဲ့ပြီး ၇၉၉ ယောက်သေဆုံးကာ ၇၂၆ ယောက်ဒဏ်ရာရခဲ့တယ်လို့လည်း ဒီကနေ့ စက်တင်ဘာ ၁၂ ရက်ထုတ် စစ်ကောင်စီ အာဘော်သတင်းစာတွေမှာ ဖော်ပြပါတယ်။
