စစ်ကောင်စီ

May 26, 2022

စစ်အုပ်စု ပစ်ခတ်သတ်ဖြတ်မှုကြောင့် ကျဆုံးပြည်သူ ၁,၈၆၃ ဦးရှိလာဟု အေအေပီပီ ထုတ်ပြန်

မြန်မာနိုင်ငံမှာ မတရားအာဏာသိမ်း ၁ နှစ်ကျော်ကာလ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုကြောင့် နိုင်ငံတဝန်း အပြစ်မဲ့ ကျဆုံးပြည်သူ ၁,၈၆၃ ယောက်နဲ့ ဖမ်းဆီးထိန်းသိမ်းခံရသူပေါင်း ၁၃,၈၃၂ ယောက်ထိ ရှိလာခဲ့ပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ မေ ၂၅ ရက်အထိ အေအေပီပီက ကောက်ယူ မှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေး ကာလအတွင်း ဒီနေ့အထိ ၁၀,၇၇၉ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၀၈၄ ယောက်ကတော့ ထောင်ဒဏ် ချမှတ်ခံထားရပါတယ်။

ပြစ်ဒဏ်ကျခံရသူတွေထဲက အသက် ၁၈ နှစ်အောက် ကလေး ၂ ယောက် အပါအဝင် ၇၂ ယောက်ကတော့ သေဒဏ်ချမှတ်ခံထားရတယ်လို့ ဆိုပါတယ်။

ဖမ်းဝရမ်းထုတ်ခံထားရတာကြောင့် တိမ်းရှောင်နေသူ ၁,၉၇၉ ယောက်ထဲက မျက်ကွယ် သေဒဏ်ချမှတ်ခြင်း ခံထားရသူ ၄၁ ယောက် အပါအဝင် အယောက် ၁၂၀ ကတော့ မျက်ကွယ်ပြစ်ဒဏ်ချခံထားရပြီး သေဒဏ်ချမှတ်ခံထားရသူ စုစုပေါင်း ၁၁၃ ယောက်ထိ ရှိလာခဲ့ပြီ ဖြစ်ပါတယ်။

ဒါ့အပြင် အာဏာသိမ်းချိန်မှ ၂၀၂၂ ခုနှစ် ဧပြီလကုန်ထိ အကြမ်းဖက်စစ်အုပ်စုက မတရား ချိပ်ပိတ်သိမ်းဆည်းခံခဲ့ရတဲ့ နေအိမ်၊ အဆောက်အဦ အရေအတွက် စုစုပေါင်း ၅၇၀ ထက်မနည်း ရှိခဲ့တယ်လို့လည်း အေအေပီပီက ဆိုပါတယ်။

ပြီးခဲ့တဲ့ မေ ၂၁ ရက်က တောတွင်း အမဲလိုက်ထွက်ရာကနေ အိမ်ပြန်လာတဲ့ ချင်းပြည်နယ်၊ တီးတိန်မြို့နယ်၊ ဆိုင်းဇန်ကျေးရွာသား ၂ ယောက်ဖြစ်တဲ့ ပေါင်ဇမောင်နဲ့ ပေါင်ဆွင်းထန်တို့ဟာ တီးတိန်မြို့၊ စကောလမ်းရပ်ကွက်မှာ စစ်သားတွေနဲ့ ထိပ်တိုက်တွေ့ပြီး ဖမ်းဆီးသတ်ဖြတ်ခံခဲ့ရကြောင်း သိရှိရပါတယ်။ သူတို့ ၂ ယောက်ဟာ တူမီးသေနတ်ထမ်းပြီး ပြန်လာတာကို ချင်းပြည်သူ့ကာကွယ်ရေးတပ်ဖွဲ့ဝင်တွေလို့ စွပ်စွဲခံခဲ့ရအပြီး ဖမ်းဆီးသတ်ဖြတ်ခံခဲ့ရတာဖြစ်ကြောင်း သိရှိရပါတယ်။

ဒါ့အပြင် ပဲခူးတိုင်းဒေသကြီး၊ လက်ပံတန်းမြို့၊ မအူကုန်းရပ်ကွက်မှာ နေထိုင်တဲ့ မနှင်းလဲ့နန္ဒာလွင်ကို အကြမ်းဖက်စစ်အုပ်စုတပ်က မေ ၂၁ ရက် မနက် ၅ နာရီလောက်က ဖမ်းဆီးသွားခဲ့ကြောင်း သိရှိရပါတယ်။ မနှင်းလဲ့နန္ဒာလွင်ကို PDF တွေကို လှူဒါန်းတယ်လို့ စွပ်စွဲကာ ဖမ်းဆီးသွားခဲ့တာလို့ ဆိုပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်း ကြားနိုင်ကြောင်း အသိပေးထားပါတယ်။

32 mins Ago

May 25, 2022

ကချင်ပြည်နယ် လွှတ်တော်ဒုဥက္ကဋ္ဌ နေအိမ်နှင့် NLD အမတ်နေအိမ် ချိပ်ပိတ်ခံရ

ကချင်ပြည်နယ်၊ ပူတာအိုမြို့၊ လုံးစွတ်ရပ်ကွက်မှာရှိတဲ့ ကချင်ပြည်နယ်လွှတ်တော်ဒုဥက္ကဋ္ဌ ဦးခန်လိန်ရဲ နေအိမ်ကို မေလ ၂၅ ရက် ဒီနေ့ ညနေ ၄ နာရီလောက်မှာ  စစ်ကောင်စီလက်အောက်ခံ စစ်သားနဲ့ ရဲတွေ အင်အားအလုံးအရင်းနဲ့လာရောက်ပြီး ချိပ်ပိတ်သွားတယ်လို့ မျက်မြင်တစ်ဦးက ပြောပါတယ်။

“ခုလေးတင် ဦးခန်လိန်ရဲ့ အိမ်မှာ ရဲနဲ့ စစ်သားတွေ အများကြီး နေရာယူထားတယ်။ ခဏအကြာတော့ ချိပ်ပိတ်ကြောင်း ဗီနိုင်းကပ်ပြီး ပြန်ထွက်သွားတယ်” လို့ ဒေသခံကပြောပါတယ်။

ကချင်ပြည်နယ်လွှတ်တော် ဒုဥက္ကဋ္ဌ ဦးခန်လိန်ဟာ စစ်ကောင်စီက အာဏာသိမ်းပြီးနောက်ပိုင်းမှာ ဘေးလွတ်ရာကို မိသားစုလိုက် တိမ်းရှောင်ခဲ့တာဖြစ်ပြီး ပူတာအိုခရိုင်မှာ  ပထမဆုံး နေအိမ်ချိပ်ပိတ်ခံရတာ ဖြစ်ပါတယ်။

အလားတူ ဗန်းမော်မြို့၊ နောင်ခိုရပ်၊ ရွှေကျီးနားဘုရားလမ်းမှာရှိတဲ့ အန်အယ်လ်ဒီ ကချင်ပြည်နယ် လွှတ်တော်ကိုယ်စားလှယ် ဦးဇော်သင်းရဲ့ နေအိမ်ကိုလည်း မေလ ၂၄ ရက် ညနေပိုင်းက စစ်ကောင်စီတပ်ဖွဲ့၀င်တွေ၊ ရဲတပ်ဖွဲ့၀င်တွေက  လာရောက်ချိတ်ပိတ်သွားခဲ့​တယ်လို့ ဒေသခံတွေဆီက သိရပါတယ်။

နောင်ခိုဒေသခံတစ်ဦးက  “၂၀၂၁ ခုနှစ်က စစ်တပ်က အာဏာသိမ်းပြီးနောက်ပိုင်း လွှတ်တော်ကိုယ်စားလှယ်တွေကို ဖမ်းဆီးမှုတွေရှိခဲ့တဲ့အချိန်ကတည်းက ဦးဇော်သင်းတို့ မိသားစုလိုက် ရှောင်သွားကြတာကြာပြီ။ အိမ်က မြက်ရိုင်းပင်တွေ၊ အပင်တွေတောင် အုပ်ဆိုင်းနေတာဟုတ်တယ်။ အဖွဲ့လိုက်ကြီး လာပြီး ဗီနိုင်း လာကပ်ပြီး ပုံရိုက်သွားကြတယ်”လို့ ပြောပါတယ်။

ဦးဇော်သင်းရဲ့ နေအိမ်ကို နိုင်ငံပိုင်အဖြစ် သိမ်းဆည်းလိုက်​ပြီး မည်သူမျှ ရောင်း၀ယ်ကျူးကျော်ခြင်းမပြုရလို့လည်း ဗီနိုင်းမှာ ရေးထားတာကို တွေ့ရပါတယ်။

စစ်အာဏာသိမ်းပြီးနောက် ဗန်းမော်မြို့နယ်နဲ့ ကချင်ပြည်နယ်မှာ အန်အယ်လ်ဒီ လွှတ်တော်ကိုယ်စားလှယ်တယောက်ရဲ့ အိမ်ကို ချိပ်ပိတ်တာ ပထမဦးဆုံးဖြစ်ပြီး အများပြည်သူကို ခြိမ်းခြောက်တာဖြစ်တယ်လို့ နယ်ခံ NLD ပါတီ၀င်တဦးက ပြောပါတယ်။

စစ်ကောင်စီလက်အောက်ခံ စစ်သားနဲ့ ရဲတွေက ပူတာအိုမြို့နယ်အတွင်းရှိ အုပ်ချုပ်ရေးမှူးတွေက ထွက်စာတင်လို့ သေနတ်နဲ့ ချိန်ရွယ် ခြိမ်းခြောက်ခံရတာလည်း ရှိခဲ့တယ်လို့ ပူတာအိုမြို့ခံ က ပြောပါတယ်။

ဗန်းမော်မြို့နယ်မှာလည်း CDM ၀န်ထမ်းတွေနဲ့ PDF လို့ သံသယရှိသူတွေ၊ NLD ပါတီ၀င်အမှုဆောင်တွေကိုလည်း စစ်ကောင်စီက မကြာခဏ ဖမ်းဆီးနေတာကြောင့် ရှောင်တိမ်းနေကြရပါတယ်။

12 hours Ago

ပေါက်မြို့နယ်တွင် ကျောင်းထိုင်ဆရာတော် ၁ ပါးကို ရဲတပ်ဖွဲ့က ဖမ်းဆီးပြီး လူဝတ်လဲခိုင်း

မကွေးတိုင်း၊ ပေါက်မြို့နယ်၊ ပေခုနှစ်ပင်ကျေးရွာရှိ အတုမင်္ဂလာသီရိ မလိခကျောင်းတိုက်က ကျောင်းထိုင်ဆရာတော် ဥူးဝဏ္ဏိဿရကို မေ ၂၅ ရက် ဒီနေ့ မနက် ၈ နာရီလောက်မှာ စစ်ကောင်စီလက်အောက်ခံ ရေပြာရဲစခန်းမှ ရဲတပ်ဖွဲ့ဝင်တွေက လူဝတ်လဲခိုင်းပြီး ဖမ်းဆီးသွားတယ်လို့ ဒေသခံထံက သိရပါတယ်။

စစ်ကောင်စီရဲ့ သတင်းပေး ဒလန်တွေက မမှန်သတင်းပေးလို့ ပုသိမ်-မုံရွာကားလမ်း ရေပြာလမ်းဆုံမှာ စစ်ကောင်စီရဲတပ်ဖွဲ့ကကြိုစောင့်ပြီး ဆရာတော်ကို ဖမ်းသွာတာလို့ ပေခုနှစ်ပင်ကျေးရွာ ဒေသခံတယောက်က ဒီဗွီဘီကို ပြောပါတယ်။

"ပေါက်မြို့မရဲစခန်း စစ်ကြောရေးကို ခေါ်သွားကြတယ်။ စစ်(…) တွေက NLD ထောက်ခံသူဆိုရင် PDF လို့ထင်ပြီး ဖမ်းဆီးနှိပ်စက်တာ။ ခု ဘုန်းဘုန်းက ဘယ်ဘက်မှမပါဘူးလို့ သိရတယ်။ ခုဆို ပေါက်တောင်ပိုင်းက ပြည်သူတွေဆိုရင် PDF လို့ စွပ်စွဲပြီး ပေါက်မြို့အဝင်အထွက်တွေမှာ ဖမ်းဆီးရိုက်နှက်တာတွေ လုပ်နေတယ်။ ဒူးထောက်ခိုင်းတာတွေကအစ လုပ်နေတယ်။ ရေပြာဘက်မှာလဲ အဲလိုပဲလုပ်တယ်။"

ပေါက်မြို့နယ် မီးသတ်ဦးစီးဌာနက ဝန်ထမ်း ၄ ယောက်ကိုလည်း ပြည်သူ့ကာကွယ်ရေးတပ်ဖွဲ့ PDF တွေကို ထောက်ပံ့ကူညီတယ်ဆိုတဲ့ စွပ်စွဲချက်နဲ့ မေ ၂၀ ရက် မနက် ၆ နာရီလောက်မှာ စစ်ကောင်စီတပ်တွေက လာရောက်ဖမ်းဆီးသွားတယ်လို့ သိရပါတယ်။

ပခုက္ကူခရိုင်အတွင်းမှာ အခုနှစ် ဖေဖော်ဝါရီလကနေ ဒီနေ့အချိန်အထိ စစ်ကောင်စီတပ်ဖွဲ့တွေရဲ့ မတရားစွပ်စွဲ ဖမ်းဆီးခံထားရသူ ၂၀၀ ကျော်လောက်ရှိနေပြီး အခု မေလအတွင်းမှာ ၇၀ ကျော်လောက် မတရား ဖမ်းဆီးခံထားရတယ်လို့ သိရပါတယ်။

16 hours Ago

အတိုးအရင်းပြန်ဆပ်ပြီးသည့် တောင်သူများကို မိုးစပါးချေးငွေ ၁ ဧကလျှင် ကျပ် ၁ သိန်းခွဲနှုန်းဖြင့် ထုတ်ချေး

မိုးစပါးချေးငွေအတွက် အရင်းနဲ့အတိုး ပေးဆပ်ပြီးဖြစ်တဲ့ တောင်သူတွေကို  ၂၀၂၂ ခုနှစ်အတွက် မိုးစပါးချေးငွေတွေ ထုတ်ယူနိုင်ပြီလို့ စစ်ကောင်စီလက်အောက်ခံ မြန်မာ့လယ်ယာဖွံ့ဖြိုးရေးဘဏ်က အသိပေးကြေညာထားပါတယ်။

စိုက်ပျိုးစရိတ်ချေးငွေတွေကို စိုက်ပျိုးရာသီအလိုက် ထုတ်ချေးပေးနေရာမှာ အချိန်စေ့ ချေးငွေတွေဖြစ်တဲ့ ၂၀၂၀ မိုးချေးငွေနဲ့ ၂၀၂၀ မိုးချေးငွေ အရင်း၊ အတိုး ပေးဆပ်ပြီးတဲ့ တောင်သူတွေကို အခုမေလ ၁၆ ရက်ကစပြီး သက်ဆိုင်ရာ ခရိုင်နဲ့ မြို့နယ် ဘဏ်ခွဲတွေမှာ စတင်ထုတ်ချေးပေးနေတာလို့ ဆိုပါတယ်။

ဒီ့အတွက် အရင်ချေးငွေတွေ ပေးဆပ်ပြီးတဲ့ တောင်သူလယ်သမားတွေအနေနဲ့ ၂၀၂၂ ခုနှစ်၊ မိုးရာသီ စိုက်ပျိုးစရိတ်ချေးငွေတွေ အချိန်မီရရှိနိုင်ဖို့ မြန်မာ့လယ်ယာဖွံ့ဖြိုးရေးဘဏ်လက်အောက်ရှိ သက်ဆိုင်ရာ ခရိုင်၊ မြို့နယ် ဘဏ်ခွဲတွေနဲ့ အမြန်ဆုံး ဆက်သွယ်ဆောင်ရွက်ကြဖို့လည်း ဆော်ဩထားပါတယ်။

ဒါနဲ့ပတ်သက်ပြီး မြန်မာ့လယ်ယာဖွံ့ဖြိုးရေးဘဏ်ခွဲ ဝန်ထမ်းတဦးက “အရင်ယူထားတဲ့ မိုးစပါးချေးငွေ ကြွေးကျေသူတွေကို ဦးစားပေး ထုတ်ပေးတာပါ။ အခုနှစ် မေလ ၁၆ ရက်နေ့ကစပြီး စက်တင်ဘာလအထိ ထုတ်ချေးပေးသွားမှာပါ။ ၁ ဧကကို  ၁ သိန်းခွဲ ကျပ်နှုန်းနဲ့ ထုတ်ချေးပေးပြီး အတိုးနှုန်းကတော့ ချေးငွေအပေါ် ၁ နှစ်ကို ၅ ရာခိုင်နှုန်းနဲ့ ကောက်ခံသွားမှာ ဖြစ်တယ်” လို့ ပြောပါတယ်။ 

တဖက်မှာလည်း စစ်တပ်က အာဏာသိမ်းပြီးနောက် ဖြစ်ပေါ်လာတဲ့ အကျိုးဆက်တွေကြောင့်  ၁ နှစ်ကျော်ကာလအတွင်းမှာ စိုက်ပျိုးရေးလုပ်ငန်သုံး သွင်းအားစုတွေရဲ့ စျေးနှုန်းက အဆမတန် မြင့်တက်လာပြီး  ဒီဒဏ်ကို လယ်သမားတွေ ခါးစည်းခံနေရပါတယ်။

ဧရာဝတီတိုင်းမှ တောင်သူတဦးက “လယ်သမားတွေဘဝက ကိုဗစ်ကာလကတည်းက ကျပ်တည်းနေတာ ဆိုပေမယ့် အာဏာသိမ်းပြီးနောက်ပိုင်း ပိုပြီးဆိုးသွားစေတယ်။ ပြီးခဲ့တဲ့ နွေစပါးကလည်း အထွက်မကောင်းဘူး။ ဒီကြားထဲ သွင်းအားစုစရိတ်တွေကလည်း အရင်ထက် ၃ဆ နီးပါး တက်လာတယ်။ ဒီတော့ ယူထားတဲ့ အကြွေးတွေက အခုထိ မကျေသေးဘူး။ အခု မိုးစပါးအတွက် ချေးငွေပေးမယ်ဆိုတာက ကြွေးကျေသူတွေကို ပေးမှာဖြစ်လို့ ကျနော်တို့က မရနိုင်ဘူး။ ဒီတော့ အပြင်ကနေပဲ ထုံးစံအတိုင်း ချေးရဦးမယ်” လို့  ဒီဗွီဘီကို ပြောပါတယ်။

စစ်ကိုင်းတိုင်း၊ မကွေးတိုင်း၊ ကယားပြည်နယ်နဲ့ ကရင်ပြည်နယ်ထဲမှာတော့ စစ်ကောင်စီတပ်တွေက ရွာတွေကို မီးရှို့ဖျက်ဆီး၊ လေကြောင်းကနေ ဗုံးကြဲတိုက်ခိုက်မှုတွေကြောင့် ရွာလုံးကျွတ် မီးလောင် ပျက်စီးကာ ဒေသခံတောင်သူတွေလည်း အိုးအိမ်နဲ့ လယ်ယာမြေတွေကို စွန့်ခွာပြီး  စစ်ဘေးရှောင် ထွက်ပြေးနေကြရလို့ စိုက်ပျိုးရေးလုပ်ငန်းတွေ မလုပ်နိုင်ဘဲ  ဖြစ်နေကြရပါတယ်။ 

16 hours Ago

မွန်ဝန်ကြီးချုပ်အပေါ်စွပ်စွဲထားသည့် ရွေးကောက်ပွဲအမှု ဇွန်လဆန်းတွင် အမိန့်ချမည်

ထောင်ဒဏ် ၂၃  နှစ်ကျခံနေရတဲ့  မွန်ပြည်နယ် ဝန်ကြီးချုပ် ဒေါက်တာအေးဇံကို အာဏာသိမ်း စစ်ကောင်စီက နောက်ထပ် စွဲဆိုထားတဲ့ ရွေးကောက်ပွဲမလျော်သြဇာသုံးမှုအတွက် လာမယ့် ဇွန်လဆန်းပိုင်းမှာ အပြီးသတ် အမိန့်ချမှတ်ဖို့ ရှိနေတယ်လို့ တရားရုံးနဲ့ နီးစပ်သူတွေက ပြောပါတယ်။

ဝန်ကြီးချုပ် ဒေါက်တာအေးဇံကို စစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှုဖြစ်တဲ့ ရာဇသတ်ကြီး ဥပဒေ ပုဒ်မ ၁၃၀ (က) အတွက် မေ ၂၄ ရက်နေ့က မော်လမြိုင်မြို့နယ်တရားရုံးမှာ ရုံးထုတ်စစ်ဆေးခဲ့တာပါ။

ဒါပေမဲ့ အခုရုံးချိန်းမှာ ဝန်ကြီးချုပ် ဒေါက်တာအေးဇံဘက်က တင်သွင်းထားတဲ့ တရားခံပြ သက်သေ မလာတဲ့အတွက်ကြောင့် စစ်ကောင်စီ တရားသူကြီးက တရားခံပြသက်သေကို ပယ်ချပြီး လာမယ့် ရုံးချိန်းကို မေ ၃၁ ရက်နေ့ကို ရွှေ့ပြောင်းလိုက်တာပါ။

တရားရုံးနဲ့နီးစပ်သူတွေ အဆိုအရ စစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှုမှာ တရားလိုနဲ့ တရားခံပြသက်သေ အားလုံးနီးပါးကို စစ်ဆေးထားပြီးဖြစ်လို့ ဇွန်လဆန်းပိုင်းမှာ အပြီးသတ်အမိန့်ချမှတ်ဖို့ ရှိနေတယ်လို့ ဆိုပါတယ်။

ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ အဂတိအမှု ၉ မှုအတွက် ပြီးခဲ့တဲ့ မေလ ၁၆ ရက်မှာ ထောင်ဒဏ် ၂၁ အမိန့်ချမှတ်ခံထားရပါတယ်။ 

ဒါ့အပြင်  ပြီးခဲ့တဲ့နှစ် ဒီဇင်ဘာလတုန်းကလည်း နိုင်ငံ့ဝန်ထမ်းတွေကို CDM လှုပ်ရှားမှုမှာ ပါဝင်ပေးဖို့ တိုက်တွန်းခဲ့တယ်ဆိုပြီး စစ်ကောင်စီက ထောင်ဒဏ် ၂ အမိန့်မှတ်ထားတာပါ။

မွန်ပြည်နယ်ဝန်ကြီးချုပ် ဒေါက်တာအေးဇံဟာ အခုအခါမှာတော့ စစ်ကောင်စီက စွဲဆိုထားတဲ့ ရာဇသတ်ကြီး ဥပဒေ ပုဒ်မ ၁၃၀ (က) ၊ ၁၇၁ (စ)နဲ့ အမှု ၃ မှုနဲ့ ဆက်လက် တရားရင်ဆိုင်နေရပါတယ်။

ဝန်ကြီးချုပ် ဒေါက်တာအေးဇံကိုတော့ စစ်ကောင်စီက ကျိုက်မရောဗဟိုအကျဉ်းထောင်မှာ ဖမ်းဆီးချုပ်နှောင်ထားတာ ဖြစ်ပါတယ်။

22 hours Ago

မွန်ပြည်နယ် လွှတ်တော် ဥက္ကဋ္ဌ၏ သားဖြစ်သူ အကြမ်းဖက်ဥပဒေဖြင့် အမှုဖွင့်ခံရ

မွန်ပြည်နယ်လွှတ်တော်ဥက္ကဋ္ဌ ဒေါ်တင်အိရဲ့သားဖြစ်သူ ကိုသဲဟိန်းကို အာဏာသိမ်း စစ်ကောင်စီက အကြမ်းဖက်မှု တိုက်ဖျက်ရေးဥပဒေ ပုဒ်မ ၅၀(ည)နဲ့ အမှုဖွင့် အရေးယူထားတယ်လို့ ရှေ့နေအသိုင်းအဝိုင်းက ပြောပါတယ်။

ကိုသဲဟိန်းကို အာဏာသိမ်း စစ်ကောင်စီက ပြည်သူ့ကာကွယ်ရေးတပ်ဖွဲ့ PDF တွေကို ငွေကြေး ထောက်ပံ့တယ်ဆိုတဲ့ စွပ်စွဲချက်တွေနဲ့ ပြီးခဲ့တဲ့ မေလ ၁၁ ရက်နေ့က နေအိမ်မှာ လာရောက် ဖမ်းဆီးသွားတာပါ။

စစ်ကောင်စီနဲ့ နီးစပ်သူတွေ အဆိုအရ ဖမ်းဆီးရမိတဲ့ ပြည်သူ့ကာကွယ်ရေးတပ်ဖွဲ့တစ်ဦးရဲ့ ထွက်ဆိုချက်ကြောင့် ကိုသဲဟိန်းကို ဖမ်းဆီးရတာလို့ ဆိုပါတယ်။

ရှေ့နေတစ်ဦးဖြစ်တဲ့ ကိုသဲဟိန်းကိုတော့ စစ်ကောင်စီက ဖမ်းဆီးအမှုဖွင့်ပြီးနောက် ကျိုက်မရော ဗဟိုအကျဉ်းထောင်ကို ပို့ဆောင်ထားပါတယ်။

ဒါပေမဲ့ စစ်ကောင်စီဘက်က ဖမ်းဆီးစဉ် ကိုသဲဟိန်းမှာ ပြည်သူ့ကာကွယ်ရေးတပ်ဖွဲ့တွေကို ငွေကြေးထောက်ပံ့တယ်ဆိုတဲ့ ခိုင်လုံတဲ့ အထောက်အထား တစုံတရာ တွေ့ရှိခဲ့ခြင်း မရှိဘူးလို့ ဆိုပါတယ်။

မွန်ပြည်နယ် လွှတ်တော် ဥက္ကဋ္ဌ ဒေါ်တင်အိဟာ စစ်တပ် အာဏာသိမ်းပြီးကတည်း သံဖြူဇရပ်မြို့ နေအိမ်မှာ ဆက်လက် နေထိုင်နေတာ ဖြစ်ပါတယ်။

အလားတူ ပြီးခဲ့တဲ့ ဇန်နဝါရီ ၃ ရက်နေ့က မွန်ပြည်နယ် ဝန်ကြီးချုပ် ဒေါက်တာအေးဇံရဲ့ ဇနီးဖြစ်သူ ဒေါ်ခင်အေးမူနဲ့ သားဖြစ်သူ ကိုနေဖြိုးဇံတို့ကို စစ်ကောင်စီတပ်ဖွဲ့ဝင်က သိမ်ဇရပ်မြို့၊ သုံးခွကျေးရွာ နေအိမ်မှာ လာရောက် ပစ်ခတ် ဖမ်းဆီးပြီး ဇန်နဝါရီ ၅ ရက်နေ့မှာ ပြန်လွှတ်ပေးခဲ့ပါတယ်။

24 hours Ago
More News
Up