စစ်ကိုင်း

November 24, 2022

စစ်ကိုင်းတွင် စစ်ကောင်စီစစ်ကြောင်း ဒရုန်းဖြင့်တိုက်ခိုက်ခံရ၊ ခင်ဦးတွင် လူငယ် ၂ ဦးကို စစ်တပ် သတ်ဖြတ်

စစ်ကိုင်းတိုင်း၊ စစ်ကိုင်းမြို့နယ်အတွင်း စစ်ကောင်စီစစ်ကြောင်းကို နိုဝင်ဘာ ၂၃ ရက် နေ့လယ် ၂ နာရီလောက်က ဒရုန်းနဲ့ တိုက်ခိုက်ခဲ့တယ်လို့ မြင်းခြံ Zero ပြောက်ကျားတပ်ဖွဲ့ တာဝန်ရှိသူက ပြောပါတယ်။

အဲဒီစစ်ကြောင်းဟာ စစ်ကိုင်းမြို့နယ် သိမ်ချောင်းကျေးရွာကို မီးရှို့ပြီးအပြန်မှာ ဒရုန်းအသုံးပြု တိုက်ခိုက်ခဲ့တာလို့ ဆိုပါတယ်။

Zero ပြောက်ကျားတပ်မဟာ တပ်ရင်းမှူး ကိုသက်ကြီးက “တိုက်တာက ပေါက်မ​ကျေးရွာဘက် ထွက်လာတဲ့ စခတွေကို ဒရုန်းနဲ့ တိုက်ခိုက်ခဲ့တယ်ဗျ။ သူတို့ သရက်ခြံထဲ နားနေတဲ့အချိန်ကို တိုက်ခိုက်ခဲ့တာ။ (--)အသေကတော့ အတိအကျ မသိရသေးဘူး။ စုံစမ်းနေဆဲပဲ” လို့ ပြောပါတယ်။

အဲဒီစစ်ကောင်စီတပ်ဟာ စစ်ကိုင်းတပ်ရင်း ၃၃ က တပ်ဖြစ်ပြီး သိမ်ချောင်းရွာက နေအိမ် ၃ လုံးကိုလည်း မီးရှို့ခဲ့ပြီး အပြန်မှာ အခုလို တိုက်ခိုက်ခံရတာလည်း ဖြစ်ပါတယ်။

Zero ပြောက်ကျားတပ်ဖွဲ့က အဲဒီစစ်တပ်ကို ဒရုန်းအသုံးပြုပြီး မိုင်း ၃ လုံးချ တိုက်ခိုက်ခဲ့တာဖြစ်တယ်လို့လည်း သိရပါတယ်။

မြင်းခြံ Zero ပြောက်ကျားတပ်ဖွဲ့အနေနဲ့ စစ်ကိုင်းမြို့နယ်အတွင်းက စစ်ကောင်စီစခန်းတွေ၊ စစ်ကောင်စီယာဉ်တန်းတွေကို အကြိမ်အရေအတွက် အများဆုံး တိုက်ခိုက်နိုင်တဲ့ အဖွဲ့အစည်းတခု ဖြစ်တယ်လို့လည်း ဒေသခံ တော်လှန်ရေးအင်အားစုတွေရဲ့ ပြောပြချက်အရ သိရပါတယ်။

စစ်ကိုင်းတိုင်း၊ ခင်ဦးမြို့နယ်၊ ကံသာယာကျေးရွာအနီး နတ်ကြီးကုန်း ထန်းတောတဲက ဒေသခံပြည်သူ ၂ ဦးကို နိုဝင်ဘာ ၂၃ ရက် နေ့လယ်က စစ်ကောင်စီတပ် ဝင်ရောက်ပြီး ရွာသားတဦးကို ဦးခေါင်းဖြတ် သတ်ထားခဲ့တယ်လို့ ဒေသခံတွေက ပြောပါတယ်။

အဲဒီစစ်ကြောင်းဟာ ခင်ဦးမြို့နယ် မုံလှ သာဝတ္ထိ ရေဦးမြို့နယ် ပင်စိမ်းခင်းကနေ စစ်ကြောင်းထိုးရင်း အခုလို ကျေးရွာအတွင်း ဝင်ရောက်သတ်ဖြတ်သွားတာလို့ ဆိုပါတယ်။

ဒေသခံရွာသားတဦးက “သူတို့က ခင်ဦးမြို့ကနေ ထွက်လာတဲ့ စစ်ကြောင်းဗျ။ အင်အား ၈၀ လောက်ပါတယ်။ စစ်ကြောင်းထိုးရင်း ကံသာယာနတ်ကြီးကုန်း ထန်းတောတဲက အပြစ်မဲ့ပြည်သူတဦးကို ဇက်ဖြတ်သတ်သွားတယ်။ အမည်က မောင်ထွန်းထွန်းဝင်း၊ အသက်က ၂၇။ နောက်တဦးကတော့ ၅ တန်းကျောင်းသားလေးပါ။ သူ့ကိုတော့ သေနတ်နဲ့ တေ့ပစ်သတ်သွားတယ်။ သူ့အမည်က မောင်ရဲမင်းနောင်၊ အသက်က ၁၄ နှစ်ပါဗျ။ အဲ့အလောင်းတွေကို ကျနော်တို့ တွေ့ရတာက မနေ့က ညနေပိုင်းက စ(--)တွေ ထွက်သွားတော့ ရွာထဲဝင်ရှာလို့ အဲ့အလောင်းတွေကို တွေ့ရတယ်ဗျ။ နောက်ပြီး သူတို့က ဗအိုးရွာမှာ ညအိပ်တယ်။ ဒီနေ့ ဗအိုးရွာ အ‌ေနာက်မြောက်ဘက်ကို စစ်ကြောင်းထိုးမယ်ထင်တယ်” လို့ ပြောပါတယ်။

ဗအိုးကျေးရွာမှာ ညအိပ်ခဲ့တဲ့ စစ်ကြောင်းဟာ ဒီနေ့မနက် ၇ နာရီမှာ ဗအိုး အနောက်မြောက်ဘက် ဦးတည်ထွက်ခွာလာပြီး အင်တိုင်းကြီးမြောက်ဘက် လယ်ပံတောအနီး ရောက်ရှိနေကာ ဒေသခံထောင်နဲ့ချီ နေရပ်စွန့်ခွာ ထွက်ပြေးနေကြရတယ်လို့ ဒေသခံတွေဆီက သိရပါတယ်။

1 week Ago

စစ်ကိုင်းတွင် စစ်တပ်၊ ရဲနှင့် ပျူစောထီးများ တိုက်ခိုက်ခံရ

စစ်ကိုင်းတိုင်း၊ ဝက်လက်နဲ့ မုံရွာမြို့နယ်တွေမှာ နိုဝင်ဘာ ၂၃ ရက်က စစ်ကောင်စီတပ်ဖွဲ့နဲ့ ပျူစောထီးအဖွဲ့တွေ မိုင်းဆွဲတိုက်ခိုက်ခံရပြီး သေဆုံးမှုတွေ ရှိခဲ့တယ်လို့ ဒေသကာကွယ်ရေးတပ်ဖွဲ့တွေက ပြောပါတယ်။

ဝက်လက်မြို့နယ်မှာ နိုဝင်ဘာ ၂၃ ရက် မနက် ၁၀ နာရီခွဲလောက်က လှတောကျေးရွာကနေ ထွက်ခွာလာတဲ့ စစ်ကောင်စီတပ်ဖွဲ့နဲ့ ပျူစောထီး ပူးပေါင်းအဖွဲ့ကို ပြင်းအားမြင့် မိုင်း ၂ လုံးနဲ့ ဖောက်ခွဲတိုက်ခိုက်ရာမှာ ၂ ဦး သေဆုံးသွားတယ်လို့ ဒေသကာကွယ်ရေးအဖွဲ့ဖြစ်တဲ့ Black Wolf - PDF တာဝန်ရှိသူက ပြောပါတယ်။

“သုံးခဲ့တဲ့မိုင်းက အထူးထုတ်လုပ်ထားတဲ့ မိုင်းပါ။ ပေါက်ကွဲအားပြင်းတယ်။ သူတို့ အင်အား ၁၀ ကောင်လောက်က လှတောရွာကနေ ထွက်အလာမှာ အသင့်ရှိတဲ့မိုင်းနဲ့ ဖောက်ခွဲတိုက်ခိုက်ခဲ့တာ။ ၂ ကောင်သေတယ်။ ကျန်တဲ့ ဒဏ်ရာရသွားတဲ့ကောင်တွေလည်း ရှိတယ်။”

အဲ့ဒီတိုက်ခိုက်မှုဟာ ပြီးခဲ့တဲ့ အောက်တိုဘာလအတွင်းက တိုက်ပွဲမှာ ကျဆုံးခဲ့ရတဲ့ Black Wolf - PDF အဖွဲ့က ရဲဘော် ၄ ဦးအတွက် လက်တုံ့ပြန်တာလို့ ဆိုပါတယ်။

မုံရွာမြို့နယ် တောပုကျေးရွာအဝင် လမ်းပိုင်းမှာ နိုဝင်ဘာ ၂၃ ရက် ညနေ ၃ နာရီခွဲလောက်က စစ်ကောင်စီတပ် လက်အောက်ရှိ ပြည်သူ့စစ်အမည်ခံ ပျူစောထီးအဖွဲ့တွေကို မိုင်းဆွဲတိုက်ခိုက်ရာ ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဖြစ်တဲ့ Brave Heart Army (BHA) မှ တာဝန်ရှိသူတဦးက ပြောပါတယ်။

“ပျူ ၆ ယောက်က သူတို့ရဲ့ တောပုပျူရွာကနေ ထွက်လာတာကို ရွာအဝင်လမ်းပိုင်း မိုင်းကွင်းထဲ ရောက်လာချိန်မှာ အသင့်ထောင်ထားတဲ့ မိုင်း ၂ လုံးသုံးပြီး ဖောက်ခွဲခဲ့တာ။ သေတဲ့ ၂ ကောင်ကတော့ လေထဲဝဲသွားတယ်။ အဲဒီမှာတင် ပွဲချင်းပြီးသေတာ။”

မိုင်းပေါက်ကွဲပြီးနောက် ကျန်တဲ့ ပျူစောထီးအဖွဲ့တွေက လက်နက်ငယ်တွေနဲ့ တုံ့ပြန် ပစ်ခတ်ခဲ့ပေမဲ့ ‌ကာကွယ်ရေးတပ်ဖွဲ့ဝင်တွေ အထိအခိုက်တစုံတရာ မရှိခဲ့ဘူးလို့ ဆိုပါတယ်။

နိုဝင်ဘာ ၂၂ ရက် ညနေ ၅ နာရီလောက်ကလည်း ချောင်းဦးမြို့ အထွေထွေအုပ်ချုပ်ရေးရုံးကနေ စစ်ကောင်စီတပ်ဖွဲ့ဝင် ၃ ဦး လိုက်ပါလာတဲ့ Crown အမျိုးအစား ကားတစီးကို မုံရွာမြို့ကနေအပြန်မှာ ဒေသကာကွယ်ရေးအဖွဲ့က မိုင်းဆွဲတိုက်ခိုက်ခဲ့တယ်လို့ သိရပါတယ်။

အဲ့ဒီတိုက်ခိုက်မှုအတွင်း ကားမှာ ဘီးတွေပွင့်ထွက် ထိခိုက်ပျက်စီးခဲ့ပြီး ကားပေါ်ပါလာတဲ့ ၃ ဦးလုံး ဒဏ်ရာအသီးသီး ရရှိသွားရာမှာ ၁ ဦးက ဒဏ်ရာပြင်းထန်တယ်လို့ သိရပါတယ်။

စစ်ကိုင်းတိုင်းမှာ စစ်ကောင်စီတပ်နဲ့ ပျူစောထီး ပူးပေါင်းအဖွဲ့က ကျေးရွာတွေကို စစ်ကြောင်းထိုး စီးနင်းဝင်ရောက်တာတွေနဲ့ နေအိမ်မီးရှို့တာတွေ ဆက်တိုက်ပြုလုပ်နေပြီး ဒေသကာကွယ်ရေးအဖွဲ့တွေနဲ့ ထိတွေ့တိုက်ပွဲတွေလည်း ဖြစ်ပွားနေပါတယ်။

အလားတူ ဒီပဲယင်းမြို့နယ်၊ စိုင်ပြင်မြို့ရဲစခန်းကို နိုဝင်ဘာ ၂၃ ရက် ညနေ ၅ နာရီလောက်က အမည်မသိ ပြည်သူ့တော်လှန်ရေး ပူးပေါင်းအဖွဲ့တွေက ဝင်ရောက်ပစ်ခတ်ခဲ့လို့ ရဲ ၅ ဦး သေဆုံးပြီး ဒဏ်ရာရရှိသူတွေလည်း များပြားတယ်လို့ စိုင်ပြင်‌မြို့ ဒေသခံတွေက ပြောပါတယ်။

ဒေသခံပြည်သူတဦးက “ပထမက ရဲစခန်းကို လာပစ်တယ်။ အဲဒီလို ပစ်တဲ့သူ‌တွေက ရဲစခန်းတောင်ဘက်ကို ထွက်ပြေးသွားတယ်။ အဲဒီပြေးတဲ့နောက်ကို ရဲစခန်းထဲက ရဲတွေက လက်နက်ကိုင်ပြီး လိုက်ပစ်တယ်။ ဟိုဘက်က အသင့်စောင့်နေတဲ့ PDF တွေက ပြန်ပစ်တာ အုံးအုံးချင်းကို ဆက်နေတာပဲ။ တိုက်ပွဲက မကြာလိုက်ဘူးဗျ။ ဟိုဘက် PDF အဖွဲ့က ပစ်ပစ်ဆုတ်ဆုတ် ပစ်သွားတယ်။ ဟိုဘက်က မျှားခေါ်သွားတာကို မသိဘဲ လိုက်သွားတော့ ရခတွေ အငိုက်မိသွားတယ်။ သေတာကတော့ ၅ ဦး သေတယ်။ ဒဏ်ရာရတဲ့သူတွေလည်း များတယ်ဗျ။ အယောက်ရေ အတိအကျတော့ မသိရသေးဘူး” လို့ ပြောပါတယ်။

အခုတိုက်ခိုက်မှုအတွင်း ရဲ ၅ ဦးနဲ့ ဒဏ်ရာရရှိသူများတယ် ဆိုတာကိုတော့ ဒီဗွီဘီအနေနဲ့ သီးခြား အတည်မပြုနိုင်သေးပါဘူး။

ဒေသခံကာကွယ်ရေးအဖွဲ့တွေက ပြီးခဲ့တဲ့ မတ်လ ၅ ရက်နေ့ကလည်း စိုင်ပြင်မြို့ ရဲစခန်းကို ပစ်ခတ်ခဲ့တယ်လို့ ဒေသခံတွေဆီကနေ သိရပါတယ်။

စစ်ကိုင်းတိုင်းအတွင်းမှာပဲ ကလေးမြို့မြောက်ဘက် ၅ မိုင်ကျော်လောက်အကွာမှာရှိတဲ့ ရေဆန်ကျွန်းဘုရားပေါ်၊‌ ရှေ့မျက်နှာဘုရားအနီးမှာ ဗုံးတလုံးထောင်ထားတာ တွေ့ခဲ့ရတယ်လို့ ဒေသခံတွေက ဒီဗွီဘီကို ပြောပါတယ်။

နိုဝင်ဘာ ၂၃ ရက်က ရေဆန်ကျွန်းဘုရားပေါ်မှာ အဆိုပါဗုံး ထောင်ထားကို ဒေသခံတဦးက တွေ့ရှိခဲ့တာကြောင့် ရေဆန်ကျွန်းဘုရား တောင်ခြေရင်းရှိ‌ ကျီကုန်းကျေးရွာက စစ်‌ကောင်စီ လက်အောက်ခံ စစ်ဗိုလ်ထွက် အုပ်ချုပ်ရေးမှူး ဦးငြိမ်းချမ်းအောင်ဆီ သွားရောက် အကြောင်းကြားခဲ့တယ်လို့ ဆိုပါတယ်။

ကျီကုန်းကျေးရွာဥက္ကဋ္ဌ ဦးငြိမ်းချမ်းအောင်က ကျေးရွာအနီးက စစ်တပ်‌တွေကို သွားရောက်တိုင်ကြားကာ အကူအညီ တောင်းခံခဲ့တာ‌ကြောင့် ဗုံးထောင်ထားတဲ့နေရာကို စစ်ကား ၂ စီး၊ စစ်ကောင်စီတပ်သား အင်အားအများအပြားနဲ့ လာရောက်စစ်ဆေး ရှာဖွေခဲ့တယ်လို့ ‌ကျီကုန်းရွာ ဒေသခံတွေက ပြောပါတယ်။

အဲဒီဗုံးကို စစ်ကောင်စီတပ်သားတွေက ကြည့်ရှုစစ်ဆေးပြီး နောက်မှာတော့ ဖယ်ရှားလို့ မရတာကြောင့် ဗုံးကို ဖောက်ခွဲခဲ့ရတယ်လို့ ဆိုပါတယ်။ ဗုံးဖောက်ခွဲခဲ့တဲ့နေရာအနီးရှိ မြေသားတွေ ထိခိုက်ပျက်စီးသွား‌ပေမဲ့ ကြီးမားတဲ့ ထိခိုက်ပျက်စီးဆုံးရှုံးမှုတော့ မရှိဘူးလို့ ပြောကြပါတယ်။

အဆိုပါ ဗုံးထောင်ခံထားရတဲ့ ရေဆန်ကျွန်းဘုရား အနီးပတ်ဝန်းကျင်ဟာ စစ်ကောင်စီတပ်သားတွေ နယ်မြေစိုးမိုးနေတဲ့နေရာဖြစ်ပြီး ဗုံးထောင်တာကိုတော့ ဘယ်အဖွဲ့အစည်းက ထောင်ထားခဲ့လဲဆိုတာ ဒီဗွီဘီအနေနဲ့ သီးခြားအတည်မပြုနိုင်‌သေးသလို ဒေသခံ ကာကွယ်ရေးတပ်တွေဘက်ကလည်း သတင်းထုတ်ပြန်ထားတာ မရှိသေးပါဘူး။

ဘယ်အဖွဲ့အစည်းမဆို ဘုရားပေါ်မှာ ဗုံးထောင်တဲ့လုပ်ရပ် မလုပ်သင့်ကြောင်း၊ ရေဆန်ကျွန်းဘုရားကို လာရောက်ဖူးမြော်လည်ပတ်ကြတဲ့ ဘုရားဖူးသူတွေကို ထိခိုက်နိုင်တယ်ဆိုတာ သိထားသင့်ကြောင်း၊ ဗုံးထောင်ခဲ့တဲ့ အဖွဲ့အစည်း လူပုဂ္ဂိုလ်ကိုလည်း ပြင်းပြင်းထန်ထန် ရှုတ်ချတယ်လို့ ကလေးမြို့ခံတဦးက ပြောပါတယ်။

ကလေးမြို့၊ ရေဆန်းကျွန်းဘုရားဟာ စစ်တပ်အာဏာမသိမ်းခင်ကာလကတော့ အနီးအနားက ဒေသခံတွေနဲ့ မြို့နေပြည်သူတွေ အများအပြား ဘုရားဖူးလည်ပတ်ကြပြီး စစ်အာဏာ သိမ်းပြီးတဲ့ နောက်မှာတော့ လည်ပတ်သူတွေ လျော့နည်းလာတယ်လို့လည်း ဒေသခံတွေက ပြောပါတယ်။

1 week Ago

November 18, 2022

စစ်ကိုင်းတွင် စစ်တပ်ကပစ်ခတ်ပြီး နေအိမ်များမီးရှို့၊ ကလေးမြို့တွင် စစ်ကောင်စီတပ်ကို CNDF တိုက်ခိုက်

စစ်ကိုင်းတိုင်း၊ စစ်ကိုင်းမြို့နယ် စဉ့်ကိုင်ကျေးရွာနဲ့ တလိုင်းကျေးရွာတို့ကို စစ်ကောင်စီတပ်က ပစ်ခတ်ဝင်ရောက်လာပြီး နေအိမ်တွေကို မီးရှို့ခဲ့တာကြောင့် မင်းဝံတောင်ရိုးတကြောရှိ ကျေးရွာပေါင်း ၂၀ လောက်က ဒေသခံပြည်သူ ၁၀,၀၀၀ ထက်မနည်း တိမ်းရှောင်နေရတယ်လို့ ဒေသခံတွေက ပြောပါတယ်။

နိုဝင်ဘာ ၁၇ ရက် မနက်ပိုင်းက စစ်ကိုင်းမြို့နယ် စဉ့်ကိုင်ကျေးရွာဘက်ကို စစ်ကောင်စီတပ် အင်အား ၂၀၀ လောက်နဲ့ စစ်ကြောင်းထိုး ဝင်ရောက်လာကာ နေအိမ်တွေကို မီးရှို့သွားတာလို့ ဆိုပါတယ်။

ဒေသခံတဦးက “အခုဝင်လာတဲ့ စစ်ကောင်စီစစ်ကြောင်းက အရင်ရက်တွေက ဝက်လက်မြို့နယ်ထဲက ထန်းကြီးရွာဘက်တကြောကို မီးရှို့ပြီး သောင်းကြမ်းခဲ့တဲ့ စစ်ကြောင်းလို့ သိရတယ်။ အဲ့ဒီဘက်ကနေ ဒီနယ်ဘက်ခြမ်းကို စစ်ကြောင်းထိုးလာတာ။ အခု စဉ့်ကိုင်အခြေအနေကတော့ မီးလောင်အိမ်ခြေအရေအတွက် အတိအကျ မသိရသေးဘူး။ အတော်များတယ်။ ရွာစဉ်အလိုက် လက်နက်ကြီး၊ လက်နက်ငယ်တွေနဲ့ ပစ်ခတ်လာတာပါ” လို့  ပြောပါတယ်။

စဉ့်ကိုင်ကျေးရွာမှာ လူနေအိမ်ခြေ ၁၅၀ လောက်ရှိပြီး စဉ့်ကိုင်တောင်ရွာနဲ့ မြောက်ရွာ နှစ်ခြမ်းလုံးကိုပါ စစ်တပ်က မီးရှို့သွားတာလို့ သိရပါတယ်။

ဒါ့အပြင် စဉ့်ကိုင်ကျေးရွာကို မီးရှို့ပြီး တဆက်တည်းမှာပဲ နိုဝင်ဘာ ၁၈ ရက် ဒီနေ့မနက်မှာ တလိုင်းကျေးရွာကို အဲ့ဒီစစ်ကြောင်းက ဝင်ရောက်လာကာ နေအိမ်တချို့ကို မီးရှို့ခဲ့တယ်လို့ သိရပြီး ဆက်လက်စစ်ကြောင်းထိုးနေတာကြောင့် ဒေသတွင်းရှိ ကျေးရွာပေါင်း ၂၀ ‌ခန့်က ပြည်သူဦးရေ ၁၀,၀၀၀ ထက်မနည်း ဘေးလွတ်ရာကို တိမ်းရှောင်နေကြရတယ်လို့ ဒေသခံတွေက ဆိုပါတယ်။

အခု နိုဝင်ဘာ ၁၃ ရက်နေ့ကလည်း စစ်ကိုင်းမြို့နယ်အစပ်ရှိ ဝက်လက်မြို့နယ် ထန်းကြီးကျေးရွာကို စစ်ကောင်စီတပ်က စီးနင်းဝင်ရောက် မီးရှို့ခဲ့တာကြောင့် နေအိမ်ပေါင်း ၄၀၀ လောက် မီးလောင်ဆုံးရှုံးခဲ့တဲ့အပြင် ဒေသခံပြည်သူ ၄ ဦးကို မီးရှို့သတ်ဖြတ်ခဲ့ပြီး မသန်စွမ်းပြည်သူ ၁ ဦးလည်း မီးလောင်သေဆုံးခဲ့ပါတယ်။

စစ်ကိုင်းတိုင်း၊ ကလေးမြို့၊ တာဟန်းရပ်ကွက် နေကြာတိုက်အနီးမှာ တပ်စွဲနေတဲ့ စစ်ကောင်စီတပ်သားတွေကို ‌CNDF နဲ့ ပူးပေါင်းအဖွဲ့က တိုက်ခိုက်ခဲ့တယ်လို့ သိရပါတယ်။

နိုဝင်ဘာ ၁၆ ရက် ညပိုင်းက တိုက်ခိုက်ခဲ့တာဖြစ်ပြီး စစ်ကောင်စီဘက်က စစ်သား ၂ ဦး သေဆုံးကာ CNDF ပူးပေါင်းတပ်ဖွဲ့ဘက်က ထိခိုက်ကျဆုံးမှု မရှိဘူးလို့ ဆိုပါတယ်။

တာဟန်းဘက်မှာ တိုက်ပွဲဖြစ်ပွားနေတဲ့အတွက် မြို့ပတ်လမ်းကနေ ရှောင်ကွင်းပြီး စက်မှုဇုန်ဘက်ကနေ အိမ်ကိုပြန်လာတဲ့ ကလေးဒေသခံ မောင်နှမ ၂ ဦးပါလာတဲ့ ကားကို ညနေ ၆ နာရီလောက်မှာ မြို့ပတ်လမ်းပေါ် အထက (၈) စာသင်ကျောင်းမှာ တပ်စွဲနေတဲ့ စစ်ကောင်စီတပ်က သေနတ်နဲ့ ပစ်ခဲ့တဲ့အတွက် ကားမှန်ကွဲအက်သွားပြီး ကားပေါ်မှာ လိုက်ပါလာတဲ့ မောင်နှမ ၂ ယောက် ထိခိုက်ဒဏ်ရာရခဲ့တယ်လို့ ဆိုပါတယ်။

စစ်တပ်ပစ်ခတ်ခံခဲ့ရတဲ့ အမျိုးသားက “စက်မှုကနေ နေအိမ်ကိုပြန်ရင်း တာဟန်းဘက်မှာ ပစ်ခတ်‌သံကြားလို့ ရှောင်ကွင်းပြီးပြန်လာရင်း ညနေ ၆ နာရီကျော်မှာ အထက (၈) စာသင်ကျောင်းနားမှာ လှမ်းပစ်လို့ ကားမှန်ကွဲပြီး ကျနော်က ခြေထောက်မှာ ဒဏ်ရာနည်းနည်းရတယ်။ ကျနော့်အမက မျက်နှာမှာ ယမ်းစစင်လို့ နဖူးမှာဘုထွက်ပြီး မျက်လုံးဖွင့်မရဘူး။ အိမ်ပြန်ပြီး အဖေ့ကိုခေါ်ပြီး ဆေးရုံတက်ချင်လို့ပါဆိုပြီး ကလေးမြို့ ကာယကံမေတ္တာ လူမှုကူညီရေးအသင်းထံ အကူအညီတောင်းခဲ့ရတယ်” လို့ ပြောပါတယ်။

စစ်ကောင်စီတပ် ပစ်ခတ်ခံခဲ့ရတဲ့ အဆိုပါမောင်နှမ ၂ ဦးကတော့ လက်ရှိမှာ စိုးရိမ်စရာ အခြေအနေ မရှိဘူးလို့ သိရပါတယ်။

ဒေသခံကာကွယ်ရေးတပ်တွေရဲ့ ပစ်ခတ်မှုကြောင့် စစ်ကောင်စီတပ်သား ၂ ဦး သေဆုံးသွားတယ်လို့ ဆိုပေမဲ့ ဒီဗွီဘီက သီးခြားအတည်မပြုနိုင်သေးသလို စစ်ကောင်စီက သတင်းထုတ်ပြန်ထားတာလည်း မတွေ့ရသေးပါဘူး။

2 weeks Ago
More News
Up