စစ်ပွဲ အလိုမရှိ

April 5, 2018

စစ်ပွဲ အလိုမရှိကြောင်း ပြဇာတ်ကခဲ့သည့် ကျောင်းသား ၈ ဦးကို ငွေဒဏ်အမိန့်ချမှတ်

ပုသိမ်ဟိုတယ်မှာ ကပြခဲ့တဲ့ စစ်ပွဲအလိုမရှိ ပြဇာတ်နဲ့ပတ်သက်ပြီး တပ်မတော်ကနေ အကြည်ညိုပျက်စေမှုပုဒ်မ ၅၀၀ နဲ့ တရားစွဲထားတဲ့ ကျောင်းသား ၈ ဦးကို ပုသိမ်မြို့နယ် တရားသူကြီးဦးဝင်းအောင်က ဧပြီ ၄ ရက် ရုံးချိန်းမှာ ငွေဒဏ်တွေ အသီးသီး  ပြစ်ဒဏ်ချမှတ်ခဲ့ပါတယ်။ ပြဇာတ်ပါ ပြကွက်တွေဟာ တပ်မတော်မိသားစုတွေရဲ့ ဂုဏ်သိက္ခာ ညှိုးနွမ်းစေတယ်လို့ ဆိုပြီး အနောက်တောင်တိုင်းစစ်ဌာနချုပ်က ဒုဗိုလ်မှူးကြီး အောင်မျိုးနိုင်က ကျောင်းသား ၉ ဦးကို တရားစွဲဆိုခဲ့တာဖြစ်ပြီး ရုံးချိန်းကို မျိုးကိုကို ဆိုတဲ့ ကျောင်းသား ၁ ဦး ပျက်ကွက်ခဲ့တဲ့အတွက် ကျောင်းသား ၈ ဦးကိုသာ အမိန့်ချမှတ်ခဲ့တာလို့  တရားစွဲခံရတဲ့ ကျောင်းသားတွေက ပြောပါတယ်။ ကျောင်းသား ၈ ယောက်ထဲက ကိုအောင်ခန့်ဇော်နဲ့ ကိုမြတ်သူထက်တို့ကို ဒဏ်ငွေ ၅ သောင်းကျပ်စီ ချမှတ်ခဲ့ပြီး ကိုထက်ပိုင်ဖြိုးပါ ကျောင်းသား ၆ ဦးကိုတော့ ဒဏ်ငွေ ၃ သောင်းကျပ်စီ ချမှတ်ခဲ့တယ်လို့ ပုသိမ်မြို့နယ်တရားရုံးကနေ သိရပါတယ်။ ပုသိမ်မြို့နယ် တရားသူကြီး ဦးဝင်းအောင် “နှစ်ဦးကို ပုဒ်မ ၅၀၀ အရ အပြစ်ရှိကြောင်း ဆုံးဖြတ်တယ်။ ကျန်တဲ့ ၆ ဦးကို ပုဒ်မ ၅၀၀/၃၄ အရ အပြစ်ရှိကြောင်း ဆုံးဖြတ်တယ်။ အဲဒါကြောင့် ဒီအမိန့်ကို ချလိုက်တာ”လို့ပြောပါတယ်။ ပျက်ကွက်ခဲ့တဲ့ ကျောင်းသား မျိုးကိုကိုကိုတော့ ရာဇဝတ်ကျင့်ထုံးပုဒ်မ ၅၀၀/၁၂ အရ တရားခံပြေး ကြေညာပြီး ဥပဒေအတိုင်း ဆက်လက်ဆောင်ရွက်သွားမှာ ဖြစ်တယ်လို့ သိရပါတယ်။ ပုသိမ်ဟိုတယ်မှာ ၂၀၁၇  ဇန်နဝါရီ ၉ ရက်က ကျောင်းသားတွေ ကပြခဲ့တဲ့ပြဇာတ်မှာ စစ်ပွဲထောက်ခံ ဆန္ဒဖော်ထုတ်နေသူတွေကို ဘာအတွက်ကြောင့် စစ်ပွဲတွေကို ထောက်ခံရသလဲလို့ အောက်စီဂျင်အမည်ရှိ သတင်းဌာနက မေးမြန်းနေတဲ့ပုံစံ ကပြခဲ့တာ ဖြစ်ပါတယ်။ ဒီအမှုကို ပုသိမ်မြို့နယ် တရားရုံးက ၂၀၁၇ ဇန်နဝါရီ ၂၅ ရက်ကနေ စတင်လက်ခံစစ်ဆေးခဲ့တာဖြစ်ပြီး တရားရင်ဆိုင်နေရတာ တနှစ်ကျော်အကြာမှာ အခုလို အမိန့်ချမှတ်ခဲ့တာ ဖြစ်ပါတယ်။ သတင်း - မြမင်းဦး(ပုသိမ်)
3 years Ago
Up