ငှက်ဖျားရောဂါ

July 24, 2020

ရေးမြို့နယ်တွင် ငှက်ဖျားရောဂါဖြစ်ပွားသူပေါင်း ၄၀၀ ကျော်ရှိနေ 

မွန်ပြည်နယ်၊ ရေးမြို့နယ်မှာ ၂၀၂၀ ပြည့်နှစ်အတွင်း  ဇူလိုင်လအထိ ငှက်ဖျားရောဂါဖြစ်ပွားသူပေါင်း ၄၀၃ ဦးရှိနေပြီး လက်ရှိမှာ သေဆုံးသူ မရှိသေးဘူးလို့ ငှက်ဖျားတိုက်ဖျက်ရေးအဖွဲ့က ပြောပါတယ်။ ငှက်ဖျားရောဂါကူးစက်မှုဟာ အသက် ၅ နှစ်အောက်ကလေးနဲ့ အသက် ၆၀ အထက်လူကြီးတွေမှာပါဖြစ်ပွားခဲ့ပြီး နှစ်ကုန်အထိဆိုရင်တော့ ရောဂါဖြစ်ပွားသူတွေ ပိုမိုဖြစ်ပွါးလာနိုင်တယ်လို့ဆိုပါတယ်။ အခုနှစ် မိုးရာသီမစခင်ကတည်းက စတင်ဖြစ်ပွားလာခဲ့ရာမှာ အရင်နှစ်ကထက် ငှက်ဖျားရောဂါ ပိုမိုဖြစ်ပွားလာတာကို တွေ့ရှိရပြီးပါတယ်။  ၂၀၁၉ ခုနှစ်က မွန်ပြည်နယ်မှာ ငှက်ဖျားရောဂါဖြစ်ပွားသူ ၅၉၉ ဦး ဖြစ်ခဲ့ပြီး သေဆုံးသူတဦးမှ မရှိခဲ့ပါဘူး။ ငှက်ဖျားရောဂါကူးစက်မှုများတဲ့ အရပ်ဒေသမှာ သွားရောက်လုပ်ကိုင်နေထိုင်ကြတဲ့ သူတွေဟာ ငှက်ဖျားရောဂါသယ်ဆောင်နိုင်တဲ့ အနိုးဖလိစ် (Anopheles) ခြင်အမျိုးအစားတွေ ကိုက်ခံရာကနေ ရောဂါကူးစက်ခံရတာ အဖြစ်များပါတယ်။  ငှက်ဖျားရောဂါကို မွန်ပြည်နယ်၊ ရေးမြို့နယ် ရေးချောင်းဖျားဒေသ အပြင် ကရင်ပြည်နယ် တနင်္လာရီတိုင်းဒေသကြီးနဲ့ ထိစပ်နေတဲ့ နယ်မြေဒေသတွေမှာ ပိုမိုအဖြစ်များလာတာကို တွေ့ရှိရတယ်လို့ ဆိုပါတယ်။ ငှက်ဖျားရောဂါဖြစ်ပွါးတဲ့ အရပ်ဒေသက  ငှက်ဖျားလူနာတွေအနေနဲ့ ငှက်ဖျားဆေးတွေကို စနစ်တကျ သောက်သုံးကြဖို့နဲ့ တာရှည်ခံဆေးစိမ် ခြင်ထောင်တွေကို သုံးစွဲကြဖို့ ကျန်းမာရေး အသိပညာပေးလုပ်ငန်းတွေကို  ကျန်းမာရေးဝန်ထမ်းတွေက ဆောင်ရွက်နေပါတယ်။ သတင်း - နေမျိုးထွဋ် ရေး
10 months Ago

July 13, 2020

လွိုင်ကော် fever clinic ၌ တီဘီ၊ သွေးလွန်တုပ်ကွေးနှင့် ငှက်ဖျားရောဂါ ရှာဖွေကုသပေးနေ

ကယားပြည်နယ်၊ လွိုင်ကော်မြို့ မြို့နယ်ခန်းမမှာ ဖွင့်လှစ်ထားတဲ့ အခမဲ့ဆေးခန်း (fever clinic)မှာ ဒီကနေ့ ဇူလိုင် ၁၃ ရက်နေ့ကစပြီး တီဘီ၊ သွေးလွန်တုပ်ကွေးနဲ့ ငှက်ဖျားရောဂါပိုးတွေကိုပါ အခမဲ့စမ်းသပ်ပေးနေပါတယ်။ ကိုဗစ်-၁၉ ကပ်ရောဂါ ကြိုတင်ကာကွယ်နိုင်ဖို့ ရည်ရွယ်ပြီး လွိုင်ကော်မြို့ မြို့နယ်ခန်းမမှာ အဖျားရောဂါကု အခမဲ့ဆေးခန်း (fever clinic)ကို ဇွန်လ ၁ ရက်နေ့ကတင်ဖွင့်လှစ်ခဲ့ပြီး ဒီကနေ့မှာ  ထပ်တိုးဝန်ဆောင်မှုပေးမှာဖြစ်တယ်လို့ အဖျားရောဂါကုဆေးခန်းမှာ တာဝန်ယူလုပ်ဆောင်နေတဲ့ ဒေါက်တာပြည့်ဖြိုးကျော်ကပြောပါတယ်။ “ဒီ fever clinic ကိုစစချင်လုပ်တုန်းကတော့ ပုံမှန် ကိုဗစ်-၁၉ ကို ထိန်းချုပ် ကာကွယ် ကုသရေးကို တဘက်တလမ်းကနေ အထောက်အကူပြုဖို့ အဖျားလူနာနဲ့ အသက်ရှုလမ်းကြောင်း ဆိုင်ရာလူနာတွေကို ကြည့်နေတာပေါ့နော်။ အဲလိုလုပ်ရင်းနဲ့မှ ကျနော်တို့ ပြည်နယ်တီဘီတို က်ဖျက်ရေးဌာနနဲ့ပူးပေါင်းပြီးတော့ အဖျားလူနာနဲ့တွဲတဲ့ ချောင်းဆိုးတဲ့ လူနာတွေကို တီဘီရောဂါပါ ရှာဖွေပေးမယ်ဆိုပြီးတော့ အခုရွေ့လျား ဓာတ်မှန်စက်နဲ့ ဓာတ်ပုံရိုက်ပေးမယ်ပေါ့နော်။ နောက်တခု ထပ်တိုးတဲ့ဝန်ဆောင်မှုအနေနဲ့ကတော့ အဖျားရောဂါနဲ့ တွဲတဲ့ သွေးလွန်တုပ်ကွေးပေါ့နော်။ အခုဆိုရင် မိုးရာသီ ရာသီချိန်လည်းရောက်လာပြီ သွေးလွန်တုပ်ကွေးတွေလည်း လွိုင်ကော်မြို့မှာ တွေ့လာရပြီဆိုတော့ သွေးလွန်တုပ်ကွေး ပိုးရှိမရှိကိုပါ စစ်ဆေးပေးမယ်ပေါ့နော်။” ဒီလိုထပ်တိုးဝန်ဆောင်မှုအတွက် ပြည်နယ် တီဘီတိုက်ဖျက်ရေးဌာနက ဆရာဝန်တဦး၊ ဓာတ်မှန်ကျွမ်းကျင် ၂ ဦးနဲ့ ဓာတ်ခွဲဝန်ထမ်း ၂ ဦးတို့က ပါဝင်ကူညီ စမ်းသပ်ကုသပေးနေတာဖြစ်ပါတယ်။ အရင်လက စတင်ဖွင့်လှစ်တဲ့ အဖျားရောဂါ ကုသဆေးခန်းအတွက် မြန်မာနိုင်ငံဆရာဝန်အသင်း (ကယားပြည်နယ်)  နဲ့ ပရဟိတအဖွဲ့တွေပူးပေါင်းပြီး  ဒီအခမဲ့ဆေးခန်းကို ဖွင့်လှစ်ခဲ့တာပါ။ ဇွန်လ ၁ ရက်မှ ဇူလိုင် ၁၁ ရက်နေ့အထိ အဖျားရောဂါကု အခမဲ့ဆေးခန်း (fever clinic)မှာ လာရောက်ပြသတဲ့လူနာ ၁၁၀ ကျော်ရှိခဲ့ပြီး အများစုမှာ အဖျားရောဂါနဲ့  လာရောက်သူများပြားခဲ့သလို ကိုဗစ်-၁၉ သံသလူနာ မရှိခဲ့ဘူးလို့ ဒေါက်တာ ပြည့်ဖြိုးကျော်က ပြောပါတယ်။ လွိုင်ကော် မြို့နယ်ခန်းမမှာ ဖွင့်လှစ်တဲ့  အဖျားရောဂါကု အခမဲ့ဆေးခန်း (fever clinic )ကို မနက် ၉ နာရီခွဲကနေ ၁၁ နာရီခွဲ တကြိမ်၊ မွန်းလွဲ ၂ နာရီခွဲကနေ ၄ နာရီခွဲအထိ တနေ့နှစ်ကြိမ်ဖွင့်လှစ်ပေးတာဖြစ်ပြီး အပတ်စဉ် တနင်္ဂနွေနေ့တိုင်း  ပိတ်မှာဖြစ်ပါတယ်။ ဒီကနေ့ ဇူလိုင် ၁၃ ရက်နေ့ကစပြီး တနင်္လာ၊ ဗုဒ္ဓဟူးနဲ့သောကြာနေ့တွေမှာ တပတ်ကို ၃ ရက်နဲ့ အခမဲ့ စမ်းသပ် ကုသပေးမှာဖြစ်ပါတယ်။
10 months Ago
Up