ဧရာဝတီတိုင်း၊ ဘိုကလေးမြို့ရှိ  စစ်ကောင်စီသင်္ကြန်မဏ္ဍပ်မှာ စတုဒိသာ ထမင်းကျွေးဖို့ ဘိုကလေးမြို့နယ်အုပ်ချုပ်ရေးမှူးက ရပ်ကျေးအုပ်ချုပ်ရေးမှူးတွေကို ကျေးရွာတွေမှာ ငွေလိုက်လံကောက်ခံ စေခိုင်းနေတယ်လို့ ဒေသခံတွေဆီက သိရပါတယ်။

ဘိုကလေးမြို့နယ်မှာရှိတဲ့ ကျေးရွာက  ဒေသခံတစ်ဦးက  "မြို့ပေါ်က စစ်ကောင်စီသင်္ကြန်မဏ္ဍပ်မှာ ရေကစားတဲ့သူတွေနဲ့ လာရောက်လည်ပတ်တဲ့သူတွေကို စတုဒိသာကျွေးဖို့ ထွေအုပ်က  အလှူငွေကောက်ခိုင်းတာ။ ကျေးရွာအုပ်ချုပ်ရေးမှူးတွေက သူတို့နဲ့ မကင်းရာမကင်းကြောင်း လုပ်ငန်းရှင်တွေဆီက ငွေလိုက်ကောက်နေတယ်။ မကင်းရာမကင်းကြောင်းဆိုတော့လည်း ပိုက်ဆံထည့်ရတာပေါ့”လို့   ပြောပါတယ်။

စစ်ကောင်စီ သင်္ကြန်မဏ္ဍပ်ကို  ဘိုကလေးမြို့နယ် မြို့မရဲစခန်းနဲ့ ထွေအုပ်ရုံးအနီးမှာ ပြုလုပ်ထားပြီး မဏ္ဍပ်မှာ Non CDM ဝန်ထမ်းတွေနဲ့ စစ်တပ်ထောက်ခံသူတချို့လာရောက် ရေကစားကြပါတယ်။

ဘိုကလေးမြို့ခံတယောက်က "မြို့ပေါ်ကလူတွေကတော့ ရေကစားတာမရှိဘူး ကလေးတွေပဲရှိတယ်။ သူတို့ မဏ္ဍပ်မှာလည်း ဝန်ထမ်းတွေနဲ့ သူတို့ လူတွေနဲ့ပဲရေကစားတာ။ သူတို့လူနဲ့သူပေါ့။ လုံခြုံရေးအပြည့်နဲ့ပဲ။ ဟိုးအရင်ကဆို မြို့ထဲမှာ မဏ္ဍပ်လေးတွေနဲ့ ရေပက်တာတွေရှိတယ်။ ဆိုင်ကယ် ဆိုက်ကားတွေနဲ့ ရေပက်ခံထွက်တာတွေရှိတယ်။ စတုဒိသာကြွေးတာတွေရှိတယ် ခုမရှိသလေါက်ပဲ"လို့ပြောပါတယ်။

စစ်ကောင်စီသင်္ကြန်မဏ္ဍပ်အနီးမှာ  စတုဒိသာထမင်းကျွေးဖို့ အရင်ကစီစဉ်ထားပေမဲ့  အကြောင်းအမျိုးမျိုးကြောင့် မြစိမ်းရောင်ဘုရားထဲမှာပဲ  စတုဒိသာကျွေးမှာဖြစ်တယ်လို့ ထွေအုပ်ဝန်ထမ်းတယောက်က ပြောပါတယ်။

ဘိုကလေးမှာ ဧပြီ ၁၄ ရက် မနက်ပိုင်းက စစ်ကောင်စီထောက်ခံသူလို့  ဒေသခံအများစုက သတ်မှတ်ထားတဲ့ အမျိုးသမီးတယောက် သေနတ်နဲ့ နားထင်ကို အနီးကပ် ပစ်ခတ်ခံရလို့ သေဆုံးခဲ့ပါတယ်။

အခုလာမယ့် ၂၀၂၂ သင်္ကြန်ပွဲတော်ကို  ပဲခူးတိုင်း၊ ပေါင်းတည်မြို့မှာ ကျင်းပဖို့အတွက်  သစ်သမားတွေနဲ့ လောင်းကစားဝိုင်းတွေထံကနေ ငွေကောက်ခံပြီး ကျင်းပဖို့ စီစဉ်နေတယ်လို့ ဒေသခံ စစ်ကောင်စီထွေအုပ် အသိုက်အဝန်းကနေ သိရပါတယ်။

ပြီးခဲ့တဲ့ မတ်လ ၂၄ ရက်နေ့က  သင်္ကြန်ပွဲတော်ကိစ္စနဲ့ ပတ်သက်လို့  ဌာနဆိုင်ရာပေါင်းစုံခေါ်ပြီး အစည်းအဝေးကျင်းပခဲ့ပါတယ်။

ပေါင်းတည်မြို့ခံ တယောက်က “သူတို့က အစည်းအဝေးမတိုင်ခင်ကတည်းက ပြည်ကိုသွားပြီး တီးဝိုင်းသွားငှားတယ်။ ရ မရတော့မသိဘူး။ ရပ်ကွက်ထဲမှာလည်း ခါတိုင်းလိုငွေကောက်တာတော့မရှိသေးဘူး၊ ဒါပေမဲ့ သစ်သမားတွေထံကတော့  မဏ္ဍပ် တခုလုံးစာတို့ ဘာတို့အတွက် အလှူခံထားတယ်လို့ကြားတယ်၊ ကျန်တာတော့ နှစ်လုံးသုံးလုံးနဲ့ လောင်းကစားဝိုင်းတွေကနေ လှည့်တောင်းဦးမှာပေါ့။ အခုကလည်း စစ်အာဏာသိမ်းပြီးကတည်းက  ပေါင်းတည်မှာ လောင်းကစားဝိုင်းတွေ တရား၀င်လုပ်ခွင့် ရနေသလိုပဲ။ ကြက်၊ ဖဲ ၊ ဂျင်၊ ဂျူံးဂျူံးကျ အစုံပဲ သူတို့ဆီက လိုင်းကြေးတွေက သိန်းနဲ့ချီပြီးနေ့တိုင်း ရနေတာလေ၊ အဲ့ဒီဒိုင်တွေကိုပဲစီစဉ်ခိုင်းမှာပေါ့” လို့  ပြောပါတယ်။ 

အစည်းအဝေးတက်ရောက်ခဲ့တဲ့ ဒေသခံတယောက်ကတော့ “ ၊ပေါင်းတည်မြို့မှာက ရပ်ကွက်ကြီး ၁၂ ခုရှိပြီး ၂ ရပ်ကွက်တယိမ်း ထွက်ရမှာ။ အဲဒီတော့  ယိမ်း ၆ ယိမ်းထွက်ရမှာပေါ့။ ယိမ်းတယိမ်းကို အသုံးစရိတ် ၃ သိန်းသတ်မှတ်ထားတယ်။ မီးမမှန်လို့ ရေအခက်အခဲကို  မဏ္ဍပ်နောက်မှာ တာလဘတ်နဲ့ ရေကန်လုပ်ပြီးရေကို မီးသတ်ကားတွေအကူအညီနဲ့ လုပ်ဖို့စီစဉ်ထားတယ်” လို့ပြောပါတယ်။

ဗဟိုမဏ္ဍပ်ကိုတော့  ခါတိုင်းနှစ်တွေလို ရန်ကုန်-ပြည်လမ်းပေါ်မှာဆောက်မှာမဟုတ်ဘဲ မင်းကွပ် ၁ ရပ်ကွက်၊ အရှေ့လမ်းမှာဆောက်ဖို့ စီစဉ်ထားတယ်လို့လည်း အစည်းအဝေးကနေ သိရပါတယ်။