ငြိမ်းချမ်းရေး

June 17, 2022

ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)အဖွဲ့နှင့် စစ်ခေါင်းဆောင်တွေ့ဆုံ ဒေသဖွံ့ဖြိုးရေး တင်ပြ

တိုင်းရင်းသားလက်နက်ကိုင်အဖွဲ့တဖွဲ့ဖြစ်တဲ့ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ဒုဥက္ကဋ္ဌ(၁) ခွန်ထွန်းတင်ဦးဆောင်တဲ့  ငြိမ်းချမ်းရေးကိုယ်စားလှယ်အဖွဲ့ဟာ  အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို ဇွန် ၁၆  ရက်က နေပြည်တော်မှာ သွားရောက် တွေ့ဆုံပါတယ်။

တွေ့ဆုံရာမှာ (PNLO)အဖွဲ့က ငြိမ်းချမ်းတဲ့နည်းလမ်းနဲ့ ဖြေရှင်း ဆောင်ရွက်ဖို့ အစဉ်လက်ခံထားကြောင်း၊ ပါတီစုံဒီမိုကရေစီစနစ် ကျင့်သုံးရေး၊ ဒီမိုကရေစီနဲ့ ဖက်ဒရယ်ကိုအခြေခံတဲ့ ပြည်ထောင်စု တည်ဆောက်ရေး ဆွေးနွေးခဲ့ပြီး ဒေသဖွံ့ဖြိုး တိုးတက်ရေးဆိုင်ရာကိစ္စတွေ တင်ပြခဲ့တယ်လို့  စစ်ကောင်စီပြန်ကြားရေးက သတင်းထုတ်ပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကလည်း ငြိမ်းချမ်းရေးတွေ့ဆုံ ဆွေးနွေးရာမှာ တိုင်းရင်းသားလက်နက်ကိုင်အဖွဲ့တွေရဲ့ တောင်းဆိုချက်တွေ၊ ဒေသနဲ့ တိုင်းပြည်အတွက် အမှန်တကယ်လိုအပ်ပြီး ဖြစ်သင့်ဖြစ်ထိုက်တာတွေကို  ပွင့်လင်းစွာ အကြေအလည် ဆွေးနွေးသွားမယ်၊ ပါတီစုံဒီမိုကရေစီစနစ် ကျင့်သုံးဆောင်ရွက်ရေး၊ ဒီမိုကရေစီနှင့် ဖက်ဒရယ်ကိုအခြေခံတဲ့ ပြည်ထောင်စု တည်ဆောက်ရေးဆိုင်ရာကိစ္စရပ်တွေ ရှင်းလင်းဆွေးနွေးခဲ့တယ်လို့ ဆိုပါတယ်။

အဆိုပါဆွေးနွေးပွဲကို စစ်ကောင်စီဘက်က ဒုဗိုလ်ချုပ်မှူးကြီး စိုးဝင်း၊ ဗိုလ်ချုပ်ကြီး မြထွန်းဦး၊ ဒုဗိုလ်ချုပ်ကြီး မိုးမြင့်ထွန်း၊ ဒုဗိုလ်ချုပ်ကြီးရာပြည့်တို့ တက်ရောက်ကြပြီး ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)မှ ဒုဥက္ကဋ္ဌ(၁)နဲ့အတူ တွဲဖက်အထွေထွေအတွင်းရေးမှူး(၁) ခွန်မင်းသိန်းနဲ့ ဗဟို ကော်မတီဝင် ခွန်ဇွဲထိုရ်တို့ တက်ရောက်ကြပါတယ်။

ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO)မှ ဒုတိယဥက္ကဋ္ဌ(၁) ခွန်ထွန်းတင်ဦးဆောင်တဲ့ ငြိမ်းချမ်းရေးကိုယ်စားလှယ်အဖွဲ့ဟာ ဇွန် ၁၅ ရက်က နေပြည်တော်ကို ရောက်ရှိလာတာဖြစ်ပြီး နောက်နေ့တွေမှလည်း စစ်ကောင်စီလက်အောက်ခံ အဖွဲ့တွေနဲ့ ဆက်လက်ဆွေးနွေးဖို့ရှိနေပါတယ်။

တိုင်းရင်းသား လက်နက်ကိုင်အဖွဲ့အစည်းတွေနဲ့ ငြိမ်းချမ်းရေး တွေ့ဆုံဆွေးနွေးဖို့  အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ဧပြီ ၂၂ ရက်မှာစတင်ဖိတ်ခေါ် ထားတာဖြစ်ပြီး လက်နက်ကိုင် ၁၀ ဖွဲ့က တက်ရောက်မယ်လို့ စာရင်းပေးထားတဲ့အထဲ ၆ ဖွဲ့နဲ့တွေ့ဆုံခဲ့ပြီး ဖြစ်ပါတယ်။

တွေ့ဆုံပြီးတဲ့ အဖွဲ့တွေကတော့ ‘ဝ’ ပြည်သွေးစည်းညီညွတ်ရေးပါတီ (UWSP)၊ အမျိုးသားဒီမိုကရက်တစ်မဟာမိတ်တပ်မတော် (NDAA) မိုင်းလားအဖွဲ့၊ ရှမ်းပြည်ပြန်လည်ထူထောင်ရေးကောင်စီ (RCSS)၊ မွန်ပြည်သစ်ပါတီ (MNSP)၊ ကရင်ငြိမ်းချမ်းရေးကောင်စီ KNLA-PC နဲ့ ရခိုင်ပြည်လွတ်မြောက်ရေးပါတီ (ALP)တို့ ဖြစ်ပါတယ်။ 

အဆိုပါအဖွဲ့တွေဟာ စစ်ကောင်စီတပ်တွေနဲ့ တိုက်ပွဲတွေဖြစ်ပွားတာမရှိတဲ့ လက်နက်ကိုင်အဖွဲ့တွေ ဖြစ်ပြီး လက်ရှိစစ်အာဏာရှင်ကို တော်လှန်တိုက်ခိုက်နေကြတဲ့ KNU၊ KIO အပါအဝင် တိုင်းရင်းသားလက်နက်ကိုင်အဖွဲ့တွေကတော့ အာဏာသိမ်းစစ်ခေါင်းဆောင်နဲ့ သွားရောက် တွေ့ဆုံတာ မရှိပါဘူး။

မတွေ့ဆုံရသေးတဲ့အဖွဲ့တွေအနေနဲ့ ဆွေးနွေးပွဲလာချင်ရင် လာနိုင်အောင် ထပ်မံဖိတ်ခေါ်ထားတယ်လို့ စစ်ခေါင်းဆောင်က ပြောပါတယ်။

Photo- CINCDS

1 week Ago

June 13, 2022

ရခိုင်ပြည်လွတ်မြောက်ရေးပါတီ(ALP) နှင့် အာဏာသိမ်း စစ်ခေါင်းဆောင် တွေ့ဆုံ

ရခိုင်တိုင်းရင်းသားလက်နက်ကိုင်အဖွဲ့တဖွဲ့ဖြစ်တဲ့ ရခိုင်ပြည်လွတ်မြောက်ရေးပါတီ (ALP) ဒု ဥက္ကဋ္ဌ ဒေါ်စောမြရာဇာလင်း ဦးဆောင်တဲ့အဖွဲ့ဟာ  ဇွန်လ ၁၃ ရက်မနက်က အာဏာသိမ်း စစ်ခေါင်း ဗိုလ်ချုပ်မှူးကြီးမင်းအောင်လှိုင်နဲ့ နေပြည်တော်မှာ တွေ့ဆုံဆွေးနွေးခဲ့ပါတယ်။

အခုငြိမ်းချမ်းရေး ဆွေးနွေးပွဲမှာ တိုင်းပြည်ရဲ့ ပကတိအနေအထားနဲ့ ကိုက်ညီပြီး ဖြစ်သင့်ဖြစ်ထိုက်တာတွေ တိုင်းရင်းသား လက်နက်ကိုင် အဖွဲ့အစည်းတွေရဲ့ တောင်းဆိုချက်တွေ အမှန်တကယ် ဖြစ်နိုင်ဖွယ်ရှိတာတွေကို  အသေးစိတ် အကြေအလည် ဆွေးနွေးအဖြေရှာ ဆောင်ရွက်သွားမှာဖြစ်ကြောင်း ငြိမ်းချမ်းရေး ဆွေးနွေးပွဲသို့ ရောက်ရှိလာခြင်း မရှိသေးတဲ့ တိုင်းရင်းသား လက်နက်ကိုင်အဖွဲ့ အနေနဲ့ တိုင်းပြည်အကျိုး၊ ဒေသအကျိုးကို မြင်အောင်ကြည့်စေလိုပြီး လာရောက်ဆွေးနွေးလိုတဲ့ စိတ်ဆန္ဒရှိပါက ထပ်မံဖိတ်ခေါ်ကြောင်း စစ်ခေါင်းဆောင်က ပြောဆိုခဲ့တယ်လို့ စစ်ကောင်စီပြန်ကြားရေးက သတင်းထုတ်ပါတယ်။

ဒါ့အပြင် ပါတီစုံဒီမိုကရေစီစနစ် ကျင့်သုံးဆောင်ရွက်ရေးဆိုင်ရာ ကိစ္စရပ်၊ ဒီမိုကရေစီနှင့် ဖက်ဒရယ်ကို အခြေခံတဲ့ ပြည်ထောင်စုစနစ် တည်ဆောက်ရေးဆိုင်ရာ ကိစ္စ၊ နိုင်ငံရေးအရ သဘောထားကွဲလွဲမှုတွေကို ငြိမ်းချမ်းတဲ့ နည်းလမ်းနဲ့သာ ဖြေရှင်းဆောင်ရွက်ဖို့ ရှင်းလင်းဆွေးနွေးခဲ့တယ်လို့လည်းဆိုပါတယ်။

ရခိုင်ပြည်လွတ်မြောက်ရေးပါတီ ALP အဖွဲ့ကလည်း ရခိုင်ပြည်နယ် တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးတို့ကို ဆက်လက်ဆောင်ရွက်နိုင်မယ့် အခြေအနေများ၊ ပါတီစုံဒီမိုကရေစီစနစ် ကျင့်သုံးရေး၊ ဒီမိုကရေစီနှင့် ဖက်ဒရယ်ကို အခြေခံတဲ့ ပြည်ထောင်စုစနစ် တည်ဆောက်ရေးကိစ္စ ပြန်လည်ဆွေးနွေးပြီး ဒေသဖွံ့ဖြိုးတိုးတက်ရေးဆိုင်ရာများကို တင်ပြခဲ့တယ်လို့ ဆိုပါတယ်။

အဆိုပါဆွေးနွေးပွဲကို စစ်ခေါင်းဆောင်နဲ့အတူ စစ်ကောင်စီအဖွဲ့ဝင် ဗိုလ်ချုပ်ကြီး မြထွန်းဦး၊ ဒုဗိုလ်ချုပ်ကြီး မိုးမြင့်ထွန်း၊ ဒုဗိုလ်ချုပ်ကြီး ရာပြည့်တို့ တက်ရောက်ကြပြီး ပုံမှန်တက်ရောက်နေကြ ဒုစစ်ခေါင်းဆောင် ဒုဗိုလ်ချုပ်မှူးကြီး စိုးဝင်းတော့ တက်ရောက်တာ မတွေ့ရပါဘူး။ ရခိုင်ပြည်လွတ်မြောက်ရေးပါတီ ALP ဘက်ကတော့ ဒုတိယဥက္ကဋ္ဌ ဒေါ်စောမြရာဇာလင်းနဲ့အတူ ဗဟိုအလုပ်အမှုဆောင် ကော်မတီဝင် ခိုင်စိုးမြနဲ့  ခိုင်ပေါ်လင်းတို့  တက်ရောက်ကြပါတယ်။

ALP အဖွဲ့ဟာ စစ်ကောင်စီလက်အောက်ခံ ငြိမ်းချမ်းရေးဆွေးနွေးရေးအဖွဲ့၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီတို့နဲ့ နေပြည်တော်မှာ ငြိမ်းချမ်းရေးဆွေးနွေးမှုတွေ ဆက်လက်ပြုလုပ် သွားဖို့ရှိပါတယ်။

အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က တိုင်းရင်းသားလက်နက်ကိုင် အဖွဲ့အစည်းတွေကို ငြိမ်းချမ်းရေး တွေ့ဆုံဆွေးနွေးနွေးဖို့  ဧပြီလ ၂၂ ရက်က   ဖိတ်ခေါ်ခဲ့တာ ဖြစ်ပါတယ်။

စစ်ခေါင်းဆောင်နဲ့ တွေ့ဆုံဆွေးနွေးဖို့ တိုင်းရင်းသားလက်နက်ကိုင်အဖွဲ့ ၁၀ ဖွဲ့က စာရင်းပေးထားပြီး တဖွဲ့ချင်းဆီ နေပြည်တော်မှာ တွေ့ဆုံဆွေးနွေးနေတာ ဖြစ်ပါတယ်။ 

Photo-MOI

2 weeks Ago
More News
Up