ငဖဲမြို့နယ်

June 14, 2022

ငဖဲတွင် PDF ၉ ဦး အလင်းဝင်သည့်သတင်း စစ်ကောင်စီက လိမ်ညာဖန်တီးခြင်းဖြစ်ဟု PRA (မကွေး) ပြော

မကွေးတိုင်း ငဖဲမြို့နယ်မှာ ဇွန်လ ၁၃ ရက်နေ့က ပြည်သူ့ကာကွယ်ရေးတပ်ဖွဲ့ PDF သင်တန်းဆင်း ရဲဘော် ၉ ယောက် စစ်ကောင်စီထံ အလင်းဝင်တယ်ဆိုတဲ့ ထုတ်ပြန်ချက်ဟာ သတင်းအမှားဖြစ်ပြီး စစ်ကောင်စီရဲ့ လုပ်ကြံဖန်တီးမှုဖြစ်တယ်လို့ PRA (မကွေး) က ပြောပါတယ်။

“စစ်ကောင်စီဘက်က ထုတ်ပြန်တဲ့ ဓာတ်ပုံထဲက လူတချို့ကို ကျနော် ကောင်းကောင်းသိပါတယ်။ သူတို့တွေက စစ်အာဏာသိမ်းပြီး ၂၀၂၁ ဖေဖော်ဝါရီလနဲ့ မတ်လလောက်တွေမှာ စစ်အာဏာရှင် ဆန့်ကျင်ရေး ဆန္ဒပြပွဲတွေမှာ တက်တက်ကြွကြွပါဝင်ခဲ့သူတွေ ဖြစ်ပါတယ်။ နောက်ပိုင်း စစ်ကောင်စီက အဖမ်းအဆီး ကြမ်းလာတဲ့အချိန်မှာ သူတို့တွေက ဆွေမျိုးတွေအိမ်မှာ တိမ်းရှောင်နေတာပါ။ သူတို့ တိမ်းရှောင်ခဲ့တဲ့ အမျိုးတွေအိမ်ကိုလည်း အတိအကျသိပါတယ်။ ကြောက်အားလန့်အားနဲ့ ပြန်လာပြီး စစ်ကောင်စီဆီမှာ ခံဝန်ကတိထိုးပြီး နေနေတဲ့သူတွေ ဖြစ်ပါတယ်။ ဘာမှ PDF တပ်ဖွဲ့တွေမှာ ပါဝင်ခဲ့သူတွေ မဟုတ်ပါဘူး။ အဲဒီကိစ္စကို ကျနော်တို့တင်မက တမြို့နယ်လုံးက လူတွေ သိကြတယ်။ သူတို့ထဲက တချို့ဆိုရင် ဖေဖော်ဝါရီလ ၄ ရက်နေ့မှာကိုပွဲ မင်္ဂလာဆောင်ပွဲကျင်းပပြီး စစ်ကောင်စီခန့် အုပ်ကြီးတွေတောင်မှာ တောင်းရမ်းပေးရတာတွေ ရှိတယ်။ အဲဒါက ဘယ်လိုလုပ် PDF တပ်ဖွဲ့ဝင် ဖြစ်မှာတုန်း” လို့ PRA(မကွေး)ရဲ့ တာဝန်ခံ ဗိုလ်ဟာကျူလီက DVB ကို ပြောပါတယ်။

ငဖဲမြို့နယ်မှာ လှုပ်ရှားနေတဲ့ PRA(မကွေး)၊ Traingle 3T PDF နဲ့ အနောက်ပိုင်းတိုင် PDF အဖွဲ့ ၃ ဖွဲ့က PDF တပ်ဖွဲ့ဝင် လုံးဝမဟုတ်ဘဲ မကွေးတိုင်း ကြံ့ခိုင်ရေးပါတီ ပြန်ကြားရေးတာဝန်ခံ ဦးအောင်နိုင်လင်းနဲ့ စစ်ကောင်စီခန့် ပဒါန်းအုပ်ကြီး ဦးကျော်ရွှေတို့ ပူးပေါင်းကြံစည်ထားတာဖြစ်ကြောင်း၊ ဦးအောင်နိုင်လင်း မိဘနေရာမှာ ဝင်ရောက်လက်မှတ်ထိုးပေးပြီး သူ့ဘေးမှာ ထိုင်နေတဲ့ကလေးက သူ့သားလည်း မဟုတ်သလို ဘာမှသက်ဆိုင်မှုမရှိဘူးလို့ ဆိုပါတယ်။

မကွေးတိုင်းဒေသကြီးတပ်တော် MDA/MDPDF နဂါးအဖွဲ့ကလည်း မကွေးတိုင်းအတွင်း အလင်းဝင်တဲ့ PDF မရှိကြောင်း ထုတ်ပြန်ထားပါတယ်။

မကွေးတိုင်း စစ်ကောင်စီအဖွဲ့ လူမှုကွန်ရက် Page နဲ့ MRTV သတင်းတွေမှာတော့ ပြစ်မှုကျူးလွန်ခြင်းမရှိတဲ့ ငဖဲမြို့နယ်က PDF သင်တန်းဆင်း ၉ ယောက် အလင်းဝင်လာလို့ ထောက်ပံ့ငွေ တစ်ယောက် ၁ သိန်းကျပ်ပေးအပ်ပြီး မိဘတွေဆီ ပြန်လည်အပ်နှံခဲ့တယ်လို့ ဖော်ပြထားပြီး စစ်ကောင်စီရဲ့ ဝါဒဖြန့်မီဒီယာတွေ TV Channel တွေကနေ ဆက်တိုက် ထုတ်လွှင့်နေပါတယ်။

2 weeks Ago

April 8, 2022

ငဖဲမြို့နယ်တွင် တိုက်ပွဲပြင်းထန်၊ ကျေးရွာ ၂ ရွာကို စစ်ကောင်စီတပ် မီးရှို့

မကွေးတိုင်း ငဖဲမြို့နယ်မှာ ဧပြီ ၇ ရက်နေ့က ဒေသခံ PDF တပ်ဖွဲ့တွေနဲ့ စစ်ကောင်စီတပ်တွေ တိုက်ပွဲတွေ ဆက်ဖြစ်နေပြီး ကျေးရွာ ၂ ရွာကို စစ်ကောင်စီတပ်တွေက မီးရှို့ဖျက်ဆီးသွားတယ်လို့ PRA (မကွေး) ကနေ သိရပါတယ်။

ငဖဲမြို့နယ် အနောက်ဘက် ၁၆ မိုင်လောက်အကွာမှာရှိတဲ့ ရေယာဉ်တောင်ကြောမှာ ဧပြီ ၇ ရက် မနက် ၇ နာရီခွဲလောက်က စစ်ကောင်စီတပ်တွေကို PRA (မကွေး) နဲ့ အရှိုချင်းကားကွယ်ရေးတပ် ACDF တို့ ပူးပေါင်းပြီး စောင့်ကြိုတိုက်ခိုက်ခဲ့ကြတယ်လို့ PRA (မကွေး) ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။

စစ်ကောင်စီတပ်ဘက်က သေဆုံးသူ များပြားနိုင်ပေမယ့် သာလွန်အင်အား အများအပြားနဲ့ ကာပစ် ပစ်ပြီး ပြန်လည်ဆုတ်ခွာသွားတာကြောင့် သေဆုံးသူအရေအတွက်ကို အတိအကျ အတည်မပြုနိုင်သေးဘူးလို့ ဆိုပါတယ်။

"ကျနော်တို့ ညီနောင်မဟာမိတ်တပ်ဖွဲ့တွေဘက်ကတော့ ထိခိုက်ကျဆုံးမှု မရှိဘဲ စစ်ကောင်စီတပ်တွေ ရှေ့ဆက်မတိုးနိုင်အောင် ဟန့်တားထားနိုင်တယ်။" PRA (မကွေး) ပြန်ကြားရေးတာဝန်ခံက ပြောပါတယ်။

စစ်ကောင်စီတပ်တွေဟာ စေတုတ္တရာမြို့နယ် သက္ကယ်ကျင်းရွာဘက်ကို လက်နက်ကြီးတွေနဲ့ ပစ်ခတ်ခဲ့သလို ငဖဲမြို့နယ် ခါကျင်ရွာနဲ့ ရှစ်ခုရွာကို မီးရှို့ဖျက်ဆီးခဲ့ကြတယ်လို့ ဆိုပါတယ်။

မီးရှို့ဖျက်ဆီးခံရတဲ့ ကျေးရွာ ၂ ရွာမှာတော့ အိမ်ခြေ ၅၀ လောက်ရှိပြီး ရွာအမည်မပေါက်သေးပါဘူး။ နှစ်ဖက်တိုက်ပွဲတွေကြောင့် တိုက်ပွဲဧရိယာအတွင်းမှာရှိတဲ့ ဒေသခံပြည်သူတွေဟာ ဘေးလွတ်ရာ နေရာတွေကို တိမ်းရှောင်နေကြရတယ်လို့ ဆိုပါတယ်။

ငဖဲမြို့နယ် ရေယာဉ်တောင်ကြောကို ဧပြီ ၆ ရက် မနက်ပိုင်းကလည်း စစ်ကောင်စီတပ်သား အင်အား ၆၀၀ လောက် စစ်ကြောင်းထိုးလာလို့ PRA (မကွေး) နဲ့ အရှိုချင်းကာကွယ်ရေးတပ် (ACDF) တို့ ပူးပေါင်းပြီး လက်ဦးမှုရယူ တိုက်ခိုက်ခဲ့လို့ စစ်ကောင်စီတပ်သား ၂၀ လောက် သေဆုံးကာ အများအပြား ဒဏ်ရာရရှိခဲ့တယ်လို့ သိရပါတယ်။

PRA (မကွေး) ခြေကုပ်ယူထားတဲ့ နေရာကို ဒီကနေ့ ဧပြီ ၈ ရက်နေ့မှာ စစ်ကောင်စီဘက်က ရဟတ်ယာဉ် ၂ စီး၊ ဂျက်ဖိုက်တာတစီးနဲ့ လေကြောင်းတိုက်ခိုက်မှု ပြုလုပ်တဲ့အပြင် မြေပြင် အမြောက်တပ်ကလည်း အပြင်းအထန် တိုက်ခိုက်နေတယ်လို့ ထုတ်ပြန်ထားပါတယ်။

3 months Ago
More News
Up