လီဗာပူးပရိသတ်တွေက အကြွေစေ့တွေနဲ့ ပစ်ပေါက်ခဲ့ကြောင်း မန်စီးတီးနည်းပြဂွာဒီယိုလာကပြော ပါတယ်။

မနေ့ညက အမ်ဖီးလ်ကွင်းမှာကစားခဲ့တဲ့ပွဲစဉ်မှာ အိမ်ရှင်လီဗာပူးက ဆာလာရဲ့ တလုံးတည်းသောဂိုးနဲ့ အနိုင်ရခဲ့တာပါ။

အဲဒီပွဲချိန်အတွင်းမှာ လီဗာပူးပရိသတ်တွေက နည်းပြဂွာဒီယိုလာကို အကြွေစေ့တွေနဲ့ ပစ်ပေါက်ခဲ့ကြတာပါ။

နည်းပြဂွာဒီယိုလာကတော့ အကြွေစေ့တွေနဲ့ ပစ်ပေါက်တာ ခံရပေမဲ့ ထိမှန်ခြင်းမရှိခဲ့ကြောင်း၊ နောက်တစ်ကြိမ်ပစ်ပေါက်ချိန်မှာ ပိုကောင်းတဲ့ပစ်ပေါက်မှုတွေဖြစ်လာနိုင်ကြောင်း အရွှန်းဖောက်ပြီးပြောပြခဲ့ပါတယ်။

နည်းပြယာဂန်ကလော့ပ်ကတော့  အကြွေစေ့နဲ့ ပစ်ပေါက်ခဲ့တဲ့လုပ်ရပ်ကို ရှုတ်ချခဲ့ပြီး အဲဒီအတွက် ဝမ်းနည်းမိသလို  နည်းပြဂွာဒီယိုလာကို တောင်းပန်ကြောင်းလည်း ပွဲအပြီးမှာပြောပါတယ်။

လီဗာပူးအသင်းကလည်း မန်စီးတီးနဲ့ပွဲမှာ ပရိသတ်တွေတချို့သောင်းကျန်းခဲ့ကြတာကို စိတ်ပျက်မိကြောင်း သတင်းထုတ်ပြန်ခဲ့ပြီး မန်စီးတီး အပါအဝင်သက်ဆိုင်ရာ အာဏာပိုင်တွေနဲ့ ပူးပေါင်းပြီး အရေးယူဖို့လုပ်ဆောင်သွားမှာဖြစ်ကြောင်း သတင်းထုတ်ပြန်သွားခဲ့ပါတယ်။

မန်စီးတီးအသင်းအနေနဲ့ မန်ယူအသင်းနဲ့ ဒါဘီပွဲစဉ်မှာ ၆ ဂိုးထက်ပိုမိုသွင်းယူနိုင်ခဲ့သင့်ကြောင်း နည်းပြဂွာဒီယိုလာက ပြောပါတယ်။

မန်စီးတီးအသင်းဟာ မန်ယူအသင်းကို ပထမပိုင်းမှာပဲ ၄ ဂိုးသွင်းခဲ့ပြီး ပွဲအပြီးမှာ ၆ ဂိုး ၃ဂိုး နဲ့ အနိုင်ရခဲ့ပါတယ်။

ပွဲအပြီး စကိုင်းစပေါ့နဲ့ အင်တာဗျူးမှာတော့ မန်စီးတီးအသင်းအနေနဲ့ ပထမပိုင်းမှာ ၄ ဂိုးထက်ပိုပြီး သွင်းနိုင်ခဲ့သင့်ကြောင်း၊

ဒုတိယပိုင်းမှာ မန်ယူအသင်းက ပိုကောင်းတဲ့အသင်းဖြစ်ခဲ့ပေမယ့် ပရိသတ်တွေအတွက် ကောင်းမွန်တဲ့ပွဲစဉ်ဖြစ်ခဲ့ကြောင်း နည်းပြဂွာဒီယိုလာကပြောပါတယ်။

မန်စီးတီးအသင်းဟာ မန်ယူအသင်းဘက်ကို ဖိအားပေး ကစားနိုင်ခဲ့ပေမဲ့ ကစားသမားတချို့ကတော့ တိုးတက်ဖို့ လိုအပ်နေသေးကြောင်း၊ ကြားရက်မှာ ကစားရမယ့် ချန်ပီယံလိဂ်ပွဲစဉ်မှာ သက်သေပြဖို့လိုအပ်ကြောင် နည်းပြဂွာဒီယိုလာကပြောသွားပါတယ်။