ဂျော်ဂျင်ဟို

August 27, 2021

ဥရောပအကောင်းဆုံးကစားသမားဆုကို ကန်တေနှင့် ဒီဘရိုင်းကိုကျော်ဖြတ်ပြီး ဂျော်ဂျင်ဟို ရရှိ

ချဲလ်ဆီးကွင်းလယ်လူ ဂျော်ဂျင်ဟိုဟာ အသင်းဖော် ကန်တေနဲ့ မန်စီးတီးက ဒီဘရိုင်းတို့ကို ကျော်ဖြတ်ပြီး ဥရောပ တစ်နှစ်တာအကောင်းဆုံးကစားသမားဆု ရရှိသွားပါတယ်။ 

အသက် ၂၉ နှစ်ရှိ ဂျော်ဂျင်ဟိုဟာ ချဲလ်ဆီးနဲ့အတူ ဥရောပချန်ပီယံ၊ ဥရောပစူပါဖလား ချန်ပီယံဆုတွေရရှိခဲ့သလို အီတလီနဲ့လည်း ယူရိုချန်ပီယံဖြစ်အောင်စွမ်းဆောင်နိုင်ခဲ့တာပါ။ 

ဒီလိုအရေးပါတဲ့ ဆုပေးပွဲကို ကန့်သတ်ချက်စည်းမျဉ်းတွေကြောင့် လာရောက်မယူနိုင်တာကို စိတ်မကောင်းဖြစ်ပေမယ့် ဆုရရှိခဲ့တဲ့အတွက်တော့ ကျေနပ်ပျော်ရွှင်မိတယ်လို့ ဂျော်ဂျင်ဟိုက ပြောပါတယ်။ 

ဒီဆုရရှိအောင် ပူးပေါင်းပါဝင်ကူညီပေးခဲ့သူ တစ်ယောက်ချင်းစီကို ကျေးဇူးတင်ရှိပြီး ပရိသတ်တွေ၊ မိတ်တွေနဲ့ မိသားစုဝင်တွေကိုလည်း ကျေးဇူးတင်ကြောင်း ဂျော်ဂျင်ဟိုကပြောပါတယ်။ 

ယူအီးအက်ဖ်အေဟာ နေရာအလိုက် အကောင်းဆုံးဆုတွေလည်း ချီးမြှင့်ခဲ့ပြီး ဂိုသမားဆုကို ချဲလ်ဆီးက မန်ဒီ၊ နောက်တန်းဆုကို မန်စီးတီးက ရူဘင်ဒိုင်ယက်ဖ်၊ ကွင်းလယ်ဆုကို ကန်တေ၊ အကောင်းဆုံး တိုက်စစ်မှူးဆုကို ဒေါ့မွန်တိုက်စစ်မှူး ဟာလန်းတို့က ရရှိခဲ့ပါတယ်။ 

အကောင်းဆုံးနည်းပြဆုကိုလည်း ချဲလ်ဆီးနည်းပြ တူချယ်ကပဲ ရယူနိုင်ခဲ့ပါတယ်။ 

1 year Ago

August 20, 2021

ဥရောပအကောင်းဆုံးဆု ဆန်ကာတင်စာရင်းတွင် ဂျော်ဂျင်ဟို၊ ဒီဘရိုင်းနှင့် ကန်တေတို့ ရွေးချယ်ခံရ

ဥရောပအကောင်းဆုံး ဘောလုံးသမားဆုအတွက် ဆန်ကာတင် ၃ ဦးစာရင်းကို ထုတ်ပြန်ခဲ့ရာမှာ မန်စီးတီးက ဒီဘရိုင်း၊ ချဲလ်ဆီးက ဂျော်ဂျင်ဟိုနဲ့ ကန်တေတို့ပါဝင်လာပါတယ်။

ဒီဘရိုင်းဟာ မန်စီးတီးအသင်းနဲ့အတူ ပရီးမီးယားလိဂ်ချန်ပီယံဆုဖလား ရယူနိုင်ခဲ့သလို ချန်ပီယံလိဂ်ဗိုလ်လုပွဲကိုလည်းတက်ရောက်  အောင်စွမ်းဆောင်နိုင်ခဲ့သူပါ။

ချဲလ်ဆီးကွင်းလယ်လူ ၂ ဦးကတော့ ချန်ပီယံလိဂ်ဆုဖလားရယူနိုင်ခဲ့ပြီး ဂျော်ဂျင်ဟိုကတော့ အီတလီနဲ့အတူ ယူရိုချန်ပီယံ ဆုဖလားကိုပါ ရယူနိုင်ခဲ့တာပါ။

အကောင်းဆုံးဆု အတွက် အမှတ်ပေးခဲ့ကြရာမှာ မက်ဆီက ၁၄၈ မှတ်နဲ့ အဆင့် ၄ နေရာမှာရပ်တည်ခဲ့ပြီး လီဝန်ဒေါစကီး၊ ဒမ်မာရမ်နာ ၊အမ်ဘာပေ၊ စတာလင်၊ စီရော်နယ်ဒိုနဲ့ ဟာလန်းတို့က ထိပ်ဆုံးမှာအစဉ်လိုက်ရပ်တည် ခဲ့ကြတာပါ။

ဥရောပအကောင်းဆုံးဘောလုံးသမားဆုကိုတော့ သြဂုတ် ၂၆ ရက်မှာ ကြေညာမှာဖြစ်ပါတယ်။ ဆန်ကာတင်သုံးဦးကို မဲပေးရွေးချယ်ရာမှာ ယူရိုပြိုင်ပွဲဝင် ၂၄ သင်းက နည်းပြ ၂၄ ဦး၊ ချန်ပီယံလိဂ်နဲ့ ယူရိုပါလိဂ် ကစားခဲ့တဲ့ အသင်းပေါင်း ၈၀ က နည်းပြတွေနဲ့ ဥရောပဘောလုံးအဖွဲ့ချုပ်ဝင်နိုင်ငံတွေက ဂျာနယ်လစ် ၅၅ ဦးတို့က ပထမ၊ ဒုတိယနဲ့တတိယ ရွေးချယ်ပေးသွားရမှာဖြစ်ပါတယ်။ 

အကောင်းဆုံး နည်းပြဆုအတွက် ဆန်ကာတင်သုံးဦးမှာတော့ ချဲလ်ဆီးနည်းပြတူချယ်၊ မန်စီးတီးနည်းပြ ဂွာဒီယိုလာနဲ့ အီတလီနည်းပြမန်ချီနီတို့ ပါဝင်ပါတယ်။

1 year Ago
More News
Up