ဂျူဗီ

August 28, 2021

ဂျူဗီတွင် မျှော်မှန်းသလောက်မအောင်မြင်ပေမဲ့ မှတ်တမ်းအချို့ ရေးနိုင်ခဲ့ဟု ရော်နယ်ဒိုပြော

ဂျူဗင်တပ်အသင်းမှာ မျှော်မှန်းထားသလောက် မအောင်မြင်ခဲ့ပေမယ့် အသင်းနဲ့အတူ လှပတဲ့ မှတ် တမ်းတချို့ ရေးထိုးနိုင်ခဲ့တယ်လို့ ရော်နယ်ဒိုကပြောပါတယ်။ 

မန်ယူနိုက်တက်အသင်းဆီ ပြောင်းရွှေ့ကစားဖို့ အတည်ပြုခဲ့ပြီးနောက် ဂျူဗင်တပ်အသင်းနဲ့ ပရိသတ်တွေဆီကို နူတ်ဆက်စာရေးသားခဲ့ရာမှာ ရော်နယ်ဒိုက အဲဒီလို ထည့်သွင်းရေးသားခဲ့တာပါ။ 

ဥရောပရဲ့ အကောင်းဆုံးအသင်းတစ်သင်းဖြစ်ပြီး အီတလီမှာ အကြီးမားဆုံးကလပ်ကနေ ထွက်ခွာလာခဲ့ပြီး အသင်းအတွက် ပွဲစဉ်တိုင်းမှာ အစွမ်းကုန်ပေးဆပ်ကစားခဲ့ကြောင်း၊ အဆုံးသတ်မှာ  ဂုဏ်ယူစရာအောင်မြင်မှုတွေရခဲ့ပေမယ့် အမှန်တကယ်မှာတော့ မျှော်မှန်းထားသလောက် မအောင်မြင်ခဲ့ကြောင်း၊ ဒါပေမယ့်လည်း ဂျူဗင်တပ်အသင်းနဲ့အတူ လှပ တဲ့ သမိုင်းမှတ်တမ်းတချို့ကို အတူတကွရေးထိုးနိုင်ခဲ့တယ်လို့ ရော်နယ်ဒိုကပြောပါတယ်။ 

ဂျူဗင်တပ်အသင်းဟာ ကစားသမားဘဝရဲ့ အစိတ်အပိုင်းတစ်ခုဖြစ်ခဲ့သလို ပရိသတ်တွေကိုလည်း နှလုံးသားထဲမှာ အမြဲတမ်းအမှတ်ရနေမယ်လို့ စီရော်နယ်ဒိုက အင်စတာဂရမ်ကနေ ရေးသား ခဲ့တာဖြစ်ပါတယ်။ 

အသက် ၃၆ နှစ်ရှိ ရော်နယ်ဒိုအတွက် မန်ယူအသင်းက ပေါင် ၁၉.၄ သန်းပေးချေခဲ့ရပြီး ၂ နှစ်စာချုပ် ချုပ်ဆိုမယ်လို့ သိရပါတယ်။ 

ရော်နယ်ဒိုဟာ လက်ရှိအချိန်မှာ ပေါ်တူဂီကိုရောက်ရှိနေပြီး နိုင်ငံတကာပွဲစဉ်တွေအပြီးမှာ ယူနိုက်တက်အသင်းနဲ့ ပူးပေါင်းမှာဖြစ်ပါတယ်။ 

3 months Ago
Up