ဂျာမနီ

December 13, 2021

ယူကရိန်းကို အကာအကွယ်ပေးရန် ဂျာမာန်အဓိပတိသစ် ကတိပြု

ရုရှားက ဓာတ်ငွေ့တွေ ဥရောပဆီကို တင်ပို့ဖို့ လမ်းကြောင်းပေါ်က ကြားခံစခန်းအဖြစ် ယူကရိန်းရဲ့ အခန်းကဏ္ဍကို အကာအကွယ်ပေးဖို့ ဂျာမနီက ဆက်ပြီး ကတိပြုထားတယ်လို့ ဂျာမန်အဓိပတိ အိုလာ့ဗ်ရှော့ဇ်က ပိုလန်မြို့တော်ဝါဆောက သတင်းစာရှင်းလင်းပွဲအတွင်း ဒီဇင်ဘာ ၁၂ ရက်က ပြောလိုက်ပါတယ်။

အငြင်းပွားစရာဖြစ်နေတဲ့ နော့ဒ်စထရင်းမ် တူးဓာတ်ငွေ့ပိုက်လိုင်းအပေါ် ဖိအားတိုးလာတာနဲ့ ပတ်သက်ပြီး ခုလို မှတ်ချက်ပေးလိုက်တာပါ။

ရုရှားက ဓာတ်ငွေ့တွေ ယူကရိန်းနိုင်ငံကို ဖြတ်သန်းပြီး ဂျာမနီဆီ သွယ်ယူတင်ပို့တဲ့ နော့ဒ်စထရင်းတူး ဓာတ်ငွေ့ပိုက်လိုင်းဟာ စည်းမျဉ်းစည်းကမ်း အဟန့်အတားတွေကြောင့် ခုထိ အသိအမှတ်ပြု မခံရသေးဘဲ တချိန်တည်းမှာ ရုရှားက ယူကရိန်းကို ထိုးစစ်ဆင်မှာ စိုးရိမ်နေကြပါတယ်။

ယူကရိန်းရဲ့ ဓာတ်ငွေ့  သယ်ယူပို့ဆောင်ရေးလုပ်ငန်း ဆက်အောင်မြင်နေဖို့ သေချာစေရေးအတွက် ကျနော်တို့မှာ တာဝန်ရှိတယ်လို့ ဆက်ခံယူထားပြီး အနာဂတ် အခွင့်အလမ်းတွေအတွက်လည်း အတူတူပါပဲလို့ ဂျာမန်အဓိပတိက ပိုလန်ဝန်ကြီးချုပ်နဲ့ ပူးတွဲသတင်းစာရှင်းလင်းပွဲအတွင်း ပြောပါတယ်။

အနားယူသွားတဲ့ ဂျာမန်အဓိပတိဟောင်း အိန်ဂျလာမာကယ်ကလည်း နော့ဒ်စထရင်းမ်တူး ဓာတ်ငွေ့ပိုက်လိုင်း အလုပ်လုပ်ရေးအတွက် နိုင်ငံရေးအခြေခံက ယူကရိန်းကို နောင်အနာဂတ်မှာပါ ဓာတ်ငွေ့ ကြားခံသယ်ပို့ရေးလမ်းကြောင်းအဖြစ် ဆက်သုံးဖို့ ရုရှားရဲ့ ကတိကဝတ်ပဲလို့ ပြောဖူးပါတယ်။

ယူကရိန်းကို ပြန်လည်ပြည့်ဖြိုးမြဲ စွမ်းအင်နဲ့ လိုအပ်တဲ့ ထုတ်လုပ်မှုကို ဖြစ်ပေါ်စေမယ့် အဓိက ရင်းမြစ် ဖြစ်လာစေရေး ကူညီဖို့ ဘယ်လိုကူညီမလဲဆိုတာနဲ့ ပတ်သက်ပြီး ခိုင်ခိုင်မာမာ ဆွေးနွေးနေတယ်လို့လည်း ဂျာမန်အဓိပတိက ပြောပါတယ်။ 

1 month Ago

December 2, 2021

ဂျာမနီတွင် ဒုတိယကမ္ဘာစစ်လက်ကျန်ဗုံး ပေါက်သဖြင့် ၄ ဦး ဒဏ်ရာရ

ဂျာမနီနိုင်ငံ မြူးနစ်ချ်မြို့က လူစည်ကားရာ အဓိက ဘူတာရုံတခုအနား တံတား တစင်းမှာ ဒုတိယကမ္ဘာစစ်ကျန် ဗုံးဟောင်းတလုံး ဒီဇင်ဘာ ၁ ရက်က ပေါက်ကွဲခဲ့လို့ လူ ၄ ယောက် ဒဏ်ရာရတယ်လို့ ရဲတွေက တွစ်တာ လူမှုကွန်ရက်ပေါ်ကနေ ပြောလိုက်ပါတယ်။

ဒဏ်ရာရသူ ၁ ယောက်က ဒဏ်ရာပြင်းထန်တယ်လို့ မြူးနစ်ချ် မီးသတ်ဌာနက ပြောပါတယ်။

ဂျာမနီမှာ ဒုတိယကမ္ဘာစစ်ပြီးတည်းက နှစ် ၇၀ ကျော်အတွင်း နှစ်စဉ် ဗုံးနဲ့ ခဲယမ်းမီးကျောက် တန်ချိန် ၂ ထောင်ကျော် ရှာတွေ့နေကျပါ။

အမေရိကန်နဲ့ ဗြိတိန်စစ်လေယာဉ်တွေဟာ ဂျာမနီကို ဗုံးတန်ချိန် ၁ သန်းခွဲ ကြဲချခဲ့လို့ လူ ၆ သိန်းလောက် သေဆုံးခဲ့ပါတယ်။

ဗုံးအားလုံးရဲ့ ၁၅ ရာခိုင်နှုန်းက မပေါက်ကွဲခဲ့ဘဲ တချို့ဗုံးတွေက မြေအောက် ပေ ၂၀ အနက်မှာ နစ်မြုပ်နေတယ်လို့ အရာရှိတွေက ခန့်မှန်းထားပါတယ်။

ပေါက်ကွဲတဲ့နေရာမှာ ဥမင်ဆောက်ဖို့ တွင်းတူးတာကြောင့် စစ်ကျန်ဗုံးက ပေါက်ခဲ့တာလို့ ရဲက ပြောပါတယ်။

အခုတော့ အဲဒီနေရာကို အရံအတားတွေ ကာထားပြီး နောက်ထပ် အန္တရာယ် မရှိတော့ဘူးလို့ ရဲက ဆက်ပြောပါတယ်။

ဗုံးလက်ကျန်တွေ ရှိ၊ မရှိ စစ်ဆေးဖို့ ဖောက်ခွဲရေး ပညာရှင်တွေကိုလည်း အခင်းဖြစ်ရာ နေရာကို ဆင့်ခေါ်ခဲ့တယ်လို့ မီးသတ်ဌာနက ပြောပါတယ်။

ပေါက်ကွဲမှုကြောင့် ဘူတာကို အသွားအပြန် ရထားခရီးစဉ်တွေကို ဆိုင်းငံ့ထားတယ်လို့ ရထား အာဏာပိုင်တွေက ပြောပါတယ်။ ရထားခုတ်မောင်းမှု ဘယ်တော့ပြန်စမယ်ဆိုတာ ရှင်းရှင်းလင်းလင်း မသိရသေးပါဘူး။ 

ဂျာမနီက ဆောက်လုပ်ရေးလုပ်ငန်းခွင်တွေမှာ စစ်ကျန်ဗုံးတွေကို မကြာခဏ တွေ့နေပြီး ပညာရှင်တွေက ဖြုတ်သိမ်းတာ ဒါမှမဟုတ် ထိန်းချုပ် ဖောက်ခွဲတာတွေ လုပ်လေ့ရှိတယ်လို့ ရိုက်တာ သတင်းမှာ ဖော်ပြပါတယ်။

2 months Ago
More News
Up