ဂျပန်နိုင်ငံခြားရေးဝန်ကြီး

August 25, 2020

ဗိုလ်ချုပ်မှူးကြီး မင်းအောင်လှိုင်နှင့် ဂျပန်နိုင်ငံခြားရေးဝန်ကြီးတွေ့ဆုံ ရခိုင်အရေးဆွေးနွေး 

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ ဂျပန်နိုင်ငံခြားရေး ဝန်ကြီး မိုတဲဂိတိုရှိမိဆု  ဦးဆောင်တဲ့အဖွဲ့ကို ဩဂုတ် ၂၄ ရက်က နေပြည်တော်မှာ တွေ့ဆုံပြီး ရခိုင်ပြည်နယ်အရေး၊ ငြိမ်းချမ်းရေး၊ ကိုဗစ်-၁၉ အရေးနဲ့ ရွေးကောက်ပွဲကိစ္စတွေ တွေ့ဆုံဆွေးနွေးခဲ့ ကြပါတယ်။ တွေ့ဆုံရာမှာ ရခိုင်ပြည်နယ်မှာ ဖြစ်ပွားနေတဲ့ ပဋိပက္ခတွေနဲ့ ပတ်သက်လို့  တပ်မတော် အနေနဲ့ တရားဥပဒေနဲ့အညီ  ဆောင်ရွက်နေပြီး တာဝန်ထမ်းဆောင်နေတဲ့ လုံခြုံရေးတပ်ဖွဲ့ဝင်တွေရဲ့ ကာကွယ်ရေးစိတ်ဓာတ်ကိုလည်း ထိခိုက်မှုမရှိအောင် ဆောင်ရွက်နေတဲ့ အခြေအနေတွေကို ဆွေးနွေးခဲ့တယ်လို့ တပ်မတော်က သတင်းထုတ်ပြန်ပါတယ်။  ဂျပန်နိုင်ငံခြားရေးဝန်ကြီးကတော့ ရခိုင်ပြည်နယ်မှာ ဖြစ်ပွားခဲ့တဲ့ စွဲချက်တွေနဲ့ပတ်သက်လို့ စစ်ခုံရုံးရဲ့ စုံစမ်းစစ်ဆေးမှုတွေတိုးတက်မှုရှိဖို့ မျှော်လင့်ကြောင်း၊ ဒီအမှုကိစ္စနဲ့ပတ်သက်ပြီး လုပ်ကိုင်ဆောင်ရွက်နေပုံအဆင့်ဆင့်ကို ထုတ်ဖော်ပြောဆိုဖို့ အရေးကြီးသလို အပြစ်ပေးအရေးယူတာတွေ မြန်နိုင်သမျှ အမြန်ဆုံးလုပ်ဆောင်ဖို့ ပြောကြားခဲ့တယ်လို့ ဂျပန် နို်ငငံခြားရေးဌာနက သတင်းထုတ်ပါတယ်။  ဒါ့အပြင် ငြိမ်းချမ်းရေးဖြစ်စဉ်အောင်မြင်ဖို့နဲ့  ပတ်သက်ပြီးလည်း ဂျပန်အစိုးရအနေနဲ့ ဆက်လက်ပံ့ပိုးကူညီပေးသွားမယ်လို့ ဂျပန်နိုင်ငံခြားရေးဝန်ကြီးက ပြောကြားခဲ့သလို ဗိုလ်ချုပ်မှူးကြီး မင်းအောင်လှိုင်ကလည်း မြန်မာပြည်ငြိမ်းချမ်းရေးဖြစ်စဉ်မှာ အထူးကိုယ်စားလှယ် ဆာဆာကာဝါ ခေါင်းဆောင်ကူညီပေးနေတာကို  အသိအမှတ်ပြုကျေးဇူးတင်လို့  ပြန်လည်ပြောကြားခဲ့တယ်လို့ ဆိုပါတယ်။  ၂၀၂၀ အထွေထွေရွေးကောက်ပွဲကိုလည်း တပ်မတော်ရဲ့ ပူးပေါင်းဆောင်ရွက်မှုနဲ့အတူ  လွတ်လပ်မျှတတဲ့  ရွေးကောက်ပွဲဖြစ်ဖို့  အခိုင်အမာမျှော်လင့်ထားတယ်လို့ ဂျပန်ဝန်ကြီးက ပြောပါတယ်။    အဆိုပါတွေ့ဆုံပွဲကို တပ်မတော်ကာကွယ်ရေးဦးစီးချုပ်နဲ့အတူ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်း၊ ကာကွယ်ရေးဦးစီးချုပ်ရုံး (ကြည်း)မှ တပ်မတော်အရာရှိကြီးများတက်ရောက်ကြပြီး ဂျပန်နိုင်ငံ၊ နိုင်ငံခြားရေးဝန်ကြီးနဲ့အတူ  မြန်မာနိုင်ငံဆိုင်ရာ ဂျပန်နိုင်ငံသံအမတ်ကြီး အီချီရိုမာရူယာမနဲ့  စစ်သံမှူး တာကာရှိကိုမတ်ဆုအပါအဝင် တာဝန်ရှိသူတွေ တက်ရောက်ကြပါတယ်။ ဂျပန်နိုင်ငံခြားရေးဝန်ကြီးဟာ ဩဂုတ် ၂၀ ရက်ကစပြီး ပါပူဝါနယူးဂီနီနိုင်ငံနဲ့ မဲခေါင်ဒေသက ကမ္ဘောဒီးယားနိုင်ငံနဲ့ လာအိုနိုင်ငံတို့ကိုသွားရောက်ခဲ့ပြီး မနေ့က နေပြည်တော်ကို ရောက်ရှိလာကာ ဒီကနေ့ ဩဂုတ် ၂၅ ရက်နေ့မှာ ခရီးစဉ်ကို အဆုံးသတ်ပြီး တိုကျိုမြို့ကိုပြန်လည် ထွက်ခွာမှာ ဖြစ်ပါတယ်။ မြန်မာပြည်ခရီးစဉ်အတွင်း ဂျပန်နိုင်ငံခြားရေးဝန်ကြီးဟာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့လည်းတွေ့ဆုံခဲ့ပြီး  ကိုဗစ်-၁၉ ကပ်ရောဂါ အရေးနဲ့ ပတ်သက်လို့ မြန်မာကို အကူအညီပေးဖို့ ကိစ္စတွေ အပါအဝင်  နှစ်နိုင်ငံပူးပေါင်းဆောင်ရွက်ရေးကိစ္စတွေ ဆွေးနွေးခဲ့ကြပါတယ်။  ဓာတ်ပုံ- DISINFO
1 year Ago

August 24, 2020

ဂျပန်နိုင်ငံခြားရေးဝန်ကြီး မြန်မာပြည်လာရောက်၊ ဒေါ်လာသန်း ၄၁၀ တန်ဖိုးရှိ အကူအညီပေးမည်

ကိုဗစ်-၁၉ ကပ်ဘေးကာလ  စီးပွားရေးအကျပ်အတည်းတွေကို ဖြေရှင်းဖို့အတွက် ဂျပန်နိုင်ငံက မြန်မာကို  အမေရိကန်ဒေါ်လာ သန်း ၄၁၀ တန်ဖိုးရှိတဲ့  အထောက်အပံ့တွေ ပေးအပ်သွားမယ်လို့ ဂျပန်နိုင်ငံခြားရေးဝန်ကြီးက ပြောပါတယ်။ မဲခေါင်ဒေသတွင်း ၃ နိုင်ငံကို ခရီးလှည့်နေတဲ့  ဂျပန်နိုင်ငံခြားရေးဝန်ကြီး မိုတဲဂိတိုရှိမိဆုဟာ လာအိုနိုင်ငံကနေတဆင့် မြန်မာနိုင်ငံကို ဒီကနေ့ ဩဂုတ် ၂၄ ရက်မှာ မြန်မာနိုင်ငံကို  လာရောက်ဖို့ရှိနေတာ ဖြစ်ပါတယ်။  ဒီခရီးစဉ်နဲ့ ပတ်သက်ပြီး   ဂျပန်နိုင်ငံခြားရေးဝန်ကြီးက သတင်းစကားပါးရာမှာ မြန်မာနိုင်ငံကို အကူအညီပေးမယ့်အကြောင်းထည့်သွင်းပြောထားတာလို့  ဒီကနေ့ ထုတ်နိုင်ငံပိုင် သတင်းစာတွေမှာ ဖော်ပြပါတယ်။ မြန်မာနိုင်ငံမှာ အခုအချိန်အထိ အစိုးရနဲ့ ပြည်သူတွေ စည်းလုံးညီညွတ်မှုကြောင့် နိုင်ငံတွင်း ကိုဗစ်-၁၉ ရောဂါကူးစက်ပျံ့နှံ့မှုကို ထိန်းချုပ်နိုင်တဲ့အတွက် ချီးကျူးတဲ့အကြောင်း၊  တစ်ဖက်မှာ လည်း ကမ္ဘာလုံးဆိုင်ရာ စီးပွားရေးကျဆင်းမှုတွေနဲ့ နိုင်ငံများအချင်းချင်း အပြန်အလှန် ကူးလူး သွားလာမှုတွေရပ်ဆိုင်းခဲ့ရတဲ့ အကျိုးဆက်တွေဟာ  ဂျပန်နိုင်ငံနဲ့ မြန်မာနိုင်ငံအပေါ်မှာလည်း အလွန်ကြီးမားစွာ ရိုက်ခတ်မှာ မလွဲဧကန် ဖြစ်ကြောင်း  ဂျပန်နိုင်ငံခြားရေးဝန်ကြီးက ပြောပါတယ်။ မြန်မာနိုင်ငံမှာ ခုအချိန်အထိ နှစ်နိုင်ငံအကြားနဲ့ နိုင်ငံတကာအဖွဲ့အစည်းတွေကနေ တဆင့် အမေရိကန်ဒေါ်လာ သန်း ၃၀ ကျော် တန်ဖိုးရှိတဲ့ နည်းပညာအကူအညီတွေ၊ ကျန်းမာရေးနဲ့ ဆေးဘက်ဆိုင်ရာ စက်ပစ္စည်းကိရိယာအထောက် အပံ့တွေကို ပေးအပ်ခဲ့တဲ့အပြင် စီးပွားရေးအကျပ် အတည်းတွေကို ဖြေရှင်းဖို့  အမေရိကန်ဒေါ်လာ သန်း ၄၁၀ တန်ဖိုးခန့်ရှိ အထောက်အပံ့တွေ ပေးအပ်သွားမယ်လို့လည်း ပြောပါတယ်။ မြန်မာနိုင်ငံက အလုပ်သင်အလုပ်သမားနဲ့ ပညာတော်သင်ကျောင်းသား အများအပြား ဂျပန်နိုင်ငံသို့သွားရောက်ဖို့ စောင့်ဆိုင်းနေတဲ့ကိစ္စနဲ့ပတ်သက်လို့လည်း ကိုဗစ်-၁၉ ရောဂါ ထပ်မံ ကူးစက်ပြန့်ပွားမှုကို တားဆီးကာကွယ်နိုင်ပြီး နှစ်နိုင်ငံ စလုံးအတွက် အဆင်ပြေမယ့်ပုံစံမျိုးနဲ့ အသွားအလာတွေပြန်လည် ဖွင့်လှစ်နိုင်ရေး နှစ်နိုင်ငံ ဆွေးနွေးညှိနှိုင်း ဆက်လက် လုပ်ဆောင်မယ်လို့ ဆိုပါတယ်။  ၂၀၂၀ ရွေးကောက်ပွဲအတွက်လည်း ဂျပန်နိုင်ငံက ဂျပန်နိုင်ငံအစိုးရရဲ့ အထူးကိုယ်စားလှယ် ဆာဆာကာဝါယိုဟီ ဦးဆောင်တဲ့ ရွေးကောက်ပွဲ လေ့လာရေးအဖွဲ့ကို စေလွှတ်ပြီး မဲရုံတွေမှာ တစ်ကြိမ်ထက်ပို မဲပေးခြင်းမှ ကာကွယ်နိုင်ရန်ဖို့ အလွယ်တကူ ဖျက်ပစ်လို့မရတဲ့ မင်ရည်တွေ ထောက်ပံ့ကူညီသွားမယ်လို့ ဂျပန်နိုင်ငံခြားရေးဝန်ကြီးက ပြောပါတယ်။ ဂျပန်နိုင်ငံနဲ့ မြန်မာနိုင်ငံတို့ဟာ  ဒုတိယကမ္ဘာစစ်ကြီးနောက်ပိုင်းမှာ ချစ်ကြည်ရင်းနှီးတဲ့ ဆက်ဆံရေးကို အပြောင်းအလဲမရှိဘဲ ထိန်းသိမ်းလာခဲ့ကြပြီး အထူးသဖြင့် စစ်ကြီးပြီးခါစ စားနပ်ရိက္ခာ အကျပ်အတည်းနဲ့ ကြုံတွေ့ခဲ့ရတဲ့ကာလမှာ မြန်မာနိုင်ငံမှ ဆန် အမြောက်အမြားကို ပေးပို့ခဲ့တဲ့ ကျေးဇူးတရားကို ဘယ်အခါမှ မေ့ပျောက်နိုင်မှာမဟုတ်ဘူးလို့လည်း မစ္စတာ မိုတဲဂိတိုရှိမိဆုက ပြောပါတယ်။  မစ္စတာ မိုတဲဂိတိုရှိမိဆုဟာ  မြန်မာနိုင်ငံကို အရ်က သုံးကြိမ်တိုင်တိုင် လာရောက်လည်ပတ်ခဲ့ဖူးပြီး နိုင်ငံခြားရေးဝန်ကြီးအနေနဲ့တော့ မြန်မာနိုင်ငံကို ပထမဦးဆုံးအကြိမ် အလည်အပတ်လာ ရောက်တာ ဖြစ်ပါတယ်။ ဂျပန်နိုင်ငံခြားရေးဝန်ကြီးဟာ ဩဂုတ် ၂၀ ရက်ကစပြီး ပါပူဝါနယူးဂီနီနိုင်ငံ၊ ကမ္ဘောဒီးယားနိုင်ငံနဲ့ လာအိုနိုင်ငံတို့ကိုသွားရောက်ခဲ့ပြီး ဒီကနေ့ နေပြည်တော်ကို ရောက်ရှိလာကာ မနက်ဖန် ဩဂုတ် ၂၅ ရက်နေ့မှာ ခရီးစဉ်ကို အဆုံးသတ်ပြီး တိုကျိုမြို့ကိုပြန်လည် ထွက်ခွာမှာ ဖြစ်ပါတယ်။  ဓာတ်ပုံ- MOFA JAPAN
1 year Ago
Up