ဂျပန်နိုင်ငံ

October 4, 2022

ဂျပန်နိုင်ငံအပေါ် ပဲ့ထိန်းဒုံးကျည်ဖြင့် မြောက်ကိုရီးယား ပစ်ခတ်

မြောက်ကိုရီးယားဟာ ဂျပန်နိုင်ငံအပေါ် ငါးနှစ်အတွင်း ပထမဆုံးအကြိမ်အဖြစ် အောက်တိုဘာ ၄ ရက်က ပဲ့ထိန်းဒုံးကျည်တစ်စင်းကို  ပစ်ခတ်ခဲ့ပါတယ်။ 

အဆိုပါပစ်ခတ်မှုကြောင့် ဂျပန်နိုင်ငံမြောက်ပိုင်းမှာ ရထားပြေးဆွဲမှုကို ယာယီရပ်ဆိုင်းထားဖို့ ဒေသခံတွေကို သတိပေးချက်ထုတ်ပြန်ထားပါတယ်။ 

ဂျပန်အစိုးရက သူ့နိုင်ငံသားတွေကို အကာအကွယ် ယူထားကြဖို့ သတိပေးထားပြီး ဒုံးကျည်ဟာ ပစိဖိတ်သမုဒ္ဒရာထဲကို မကျရောက်မီ သူ့ရဲ့ပိုင်နက်နယ်မြေကို ဖြတ်ကျော်ပျံသန်းသွားပုံ ရပါတယ်။

ဂျပန်အစိုးရအဖွဲ့ အတွင်းရေးမှူး ဟိရိုကာဇု မတ်ဆုနိုက“ဒီနေ့ မနက် ၇ နာရီ ၂၂ မိနစ်လောက်မှာ မြောက်ကိုရီးယားက သူ့ရဲ့ ကုန်းတွင်းဧရိယာကနေ အရှေ့ဘက်ကို ပဲ့ထိန်းဒုံးကျည်တစ်စင်းကို ဦးတည်ပစ်လွှတ်လိုက်ကြောင်း၊ အဲဒီဒုံးကျည်ဟာ ဂျပန်နိုင်ငံရဲ့ တိုဟိုကုဒေသကို မနက် ၇ နာရီ ၄၄ မိနစ်လောက်မှာ ဖြတ်ကျော်ပျံသန်းသွားပြီးတော့ သီးသန့်စီးပွားရေးဇုန် (EEZ) အပြင်ဖက် ပစိဖိတ်ရေပြင်ထဲကို ကျသွားတယ်” လို့ ပြောပါတယ်။ 

ဒုံးကျည်ကို ဖျက်ဆီးဖို့ ဘာကာကွယ်ရေးအစီအမံကိုမှ အသုံးမပြုခဲ့ကြောင်းလည်း သူက ပြောပါတယ်။

အနီးနားဒေသတွေမှာ သွားလာနေတဲ့ လေယာဉ်နဲ့ ရေယာဉ်တွေအကြောင်း အချက်အလက်တွေကို စုဆောင်းထားပြီး အခုအချိန်မှာတော့ ပျက်စီးဆုံးရှုံးမှု သတင်းတွေ မရရှိသေးကြောင်းလည်း သူကဆိုပါတယ်။ 

မြောက်ကိုရီးယားရဲ့ အကြိမ်ကြိမ် ပဲ့ထိန်းဒုံးကျည် ပစ်လွှတ်မှုတွေ အပါအဝင် ဆက်တိုက်လုပ်ရပ်တွေဟာ ဂျပန်ရဲ့ ငြိမ်းချမ်းရေးနဲ့ လုံခြုံရေးကို ဒေသတွင်းနဲ့ နိုင်ငံတကာ အသိုင်းအဝိုင်းကို ခြိမ်းခြောက်နေပြီး ဂျပန်အပါအဝင် နိုင်ငံတကာ အသိုက်အဝန်းတစ်ခုလုံးကို ကြီးမားတဲ့ စိန်ခေါ်မှု တစ်ရပ်ပါပဲလို့ ဂျပန်အစိုးရ ထိပ်တန်း ပြောရေးဆိုခွင့်ရှိသူ ဟိရိုကာဇု မတ်ဆုနို  က သတင်းစာရှင်းလင်းပွဲမှာ ပြောပါတယ်။

မြောက်ကိုရီးယားအစိုးရဟာ သူ့နိုင်ငံ အရှေ့ဘက်ကမ်းရိုးတန်းကနေ အမျိုးအစား မသိရတဲ့ ဒုံးကျည် တစ်စင်းကို အောက်တိုဘာ ၄ ရက်မှာ ပစ်ခတ်ခဲ့တယ်လို့ တောင်ကိုရီးယားစစ်တပ်ကလည်း အတည်ပြုပြောပါတယ်။

အောက်တိုဘာ ၁ ရက် တုန်းကလည်း တောင်ကိုရီးယားက အရွယ်အစားကြီးမားတဲ့ စစ်ရေးပြမှု မလုပ်မီ နာရီပိုင်းအလိုမှာ မြောက်ကိုရီးယားက တာတိုပစ် ပဲ့ထိန်းဒုံးကျည် နှစ်စင်း ပစ်လွှတ်ခဲ့ပါသေးတယ်။

တောင်ကိုရီးယား၊ အမေရိကန်နဲ့ ဂျပန် ရေတပ်တို့ သောကြာနေ့က ရေငုပ်သင်္ဘော တိုက်ဖျက်ရေး လေ့ကျင့်ခန်းတွေအပါအဝင် ဒေသတွင်း နိုင်ငံတွေက စစ်ရေး လေ့ကျင့်နေချိန်မှာ မြောက်ကိုရီးယား အစိုးရက ဒုံးကျည်တွေ ပစ်လွှတ်နေတာပါ၊

ပြိုင်ဘက် ကိုရီးယား နှစ်နိုင်ငံဟာ လက်နက်နဲ့ စစ်ရေးအသုံးစရိတ်တွေ အကြီးအကျယ် တိုးသုံးလာနေရင်း ဒေသတွင်း လက်နက်ပြိုင်ဆိုင်မှုထဲမှာ ပါဝင်ပတ်သက်နေပါတယ်။

2 months Ago

September 10, 2022

သံအမတ်ကြီး ဦးကျော်မိုးထွန်းကို ဆက်လက်ခန့်အပ်ရေး တိုကျိုမြို့တွင် တောင်းဆို ဆန္ဒပြ

သံအမတ်ကြီး ဦးကျော်မိုးထွန်းကို အမြဲတမ်းကိုယ်စားလှယ်အဖြစ်  ကုလသမဂ္ဂအထွေထွေညီလာခံမှာ ဆက်လက်အတည်ပြုခန့်အပ်နိုင်ရေး ဂျပန်နိုင်ငံ၊ တိုကျိုမြို့ရှိ ကုလသမဂ္ဂရုံးရှေ့မှာ ဂျပန်ရောက်မြန်မာနိုင်ငံသားတွေက စက်တင်ဘာ ၉ ရက်မှာ ဆန္ဒပြကြ တောင်းဆိုကြပါတယ်။

ဒီလှုပ်ရှားမှုမှာ အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာကိုယ်စားလှယ် စောဘလှနဲ့ ရုံးအဖွဲ့ဝင်တွေပါဝင်ခဲ့ကြပြီး ကုလသမဂ္ဂ အမြဲတမ်းကိုယ်စားလှယ်အဖြစ် ဦးကျော်မိုးထွန်းကို ဆက်လက်ခန့်အရေး မြန်မာပြည်သူတွေရဲ့ ဆန္ဒကို ဂျပန်ရောက်မြန်မာအဖွဲ့အစည်း ၅၄ ဖွဲ့ လက်မှတ်ရေးထိုး တောင်းဆိုထားတဲ့စာကို တိုကျိုကုသမဂ္ဂရုံးတာဝန်ခံက တဆင့် ကုလသမဂ္ဂ စိစစ်လက်ခံရေး Credential ကော်မတီထံ ပေးပို့ခဲ့ပါတယ်။

NUG ဂျပန်နိုင်ငံဆိုင်ရာ ကိုယ်စားလှယ် စောဘလှသိန်းက “အကြမ်းဖက်စစ်အုပ်စုကို ဖြုတ်ချနိုင်ဖို့ မြန်မာပြည်သူတွေရဲ့ အသံကို ကိုယ်စားပြုတဲ့ ဦးကျော်မိုးထွန်း ကုလသမဂ္ဂမှာ ဆက်ရှိရေးက အရမ်းအရေးကြီးတယ်။ ဒါကြောင့်ပြည်တွင်းပြည်ပမှာ အခုလို ဆန္ဒဖေါ်ထုတ်လှုပ်ရှားမှုတွေ ပြုလုပ်နေရတာ”လို့ ဒီဗွီဘီကို ပြောပါတယ်။

ကမ္ဘာ့နိုင်ငံအသီးသီးမှာသာမက မြန်မာနိုင်ငံအတွင်းမှာပါ အခုလိုတောင်းဆိုမှုတွေ ပြုလုပ်နေတာဖြစ်ပြီး သံအမတ်ကြီး ဦးကျော်မိုးထွန်းကို ဆက်လက် အတည်ပြုခန့်အပ်နိုင်ရေးက ယခုလအတွင်းမှာ ကုလသမဂ္ဂအထွေထွေညီလာခံရဲ့  Credentials ကော်မတီက ဒီလထဲ စဉ်းစားဆုံးဖြတ်မှာဖြစ်ပါတယ်။

အကြမ်းဖက်စစ်ကောင်စီဘက်ကလည်း သူတို့ကိုယ်စားလှယ်ကို လက်ခံဖို့တောင်းဆိုထား တာကြောင့် အခုကိစ္စက သံခင်းတမန်ခင်းတိုက်ပွဲတခုဖြစ်လို့ အရမ်းအရေးကြီးပေမဲ့ သတ်မှတ်ချက်တွေမှာ ဦးကျော်မိုးထွန်းဘက်က အရေးသာနေတယ်လို့ CDMသံအရာရှိ ဦးအောင်စိုးမိုးက ပြောပါတယ်။

ကမ္ဘာနိုင်ငံအသီးသီးမှာ အလားတူလှုပ်ရှားမှုတွေပြုလုပ်ကြမှာဖြစ်သလို ဂျပန်နိုင်ငံမှာလည်း စက်တင်ဘာ ၁၁ ရက်နေ့ မြို့ကြီး ၈ မြို့မှာ တပြိုင်နက်တည်း ချီတက်ဆန္ဒပြကြဖို့ ရှိနေပါတယ်။

3 months Ago
More News
Up