ဂျပန်

December 6, 2022

ခရိုအေးရှားက ဂျပန်အသင်းကိုအနိုင်ယူပြီး ကမ္ဘာ့ဖလား ကွာတားဖိုင်နယ်တက်ရောက်

ဒီနေ့ည ယှဉ်ပြိုင်ကစားခဲ့တဲ့ ကမ္ဘာ့ဖလား ၁၆ သင်းအဆင့် ရှုံးထွက်ပွဲစဉ်မှာ ခရိုအေးရှားအသင်းက ဂျပန်အသင်းကို ပင်နယ်တီအဆုံးအဖြတ်နဲ့ အနိုင်ယူပြီး ကွာတားဖိုင်နယ် တက်ရောက်သွားပါတယ်။

ဒီနေ့ပွဲမှာ ခရိုအေးရှားအသင်းက ဘောလုံးပိုင်ဆိုင်မှု အသာစီးနဲ့ ဂိုးကန်သွင်းခွင့် ပိုမိုရရှိခဲ့ပါတယ်။ ဒါပေမဲ့ ဦးဆောင်ဂိုးကိုတော့ ဂျပန်အသင်းက ပထမပိုင်း ပွဲကစားချိန် ၄၃ မိနစ်မှာ အသင်းခေါင်းဆောင် ရိုရှီဒါရဲ့ ပေးပို့မှုကနေ မဲ့ဒါက သွင်းယူခဲ့တာပါ။

ဒုတိယပိုင်းမှာလည်း ခရိုအေးရှားက ဘောလုံးပိုင်ဆိုင်မှု အသာစီးယူကစားနိုင်ခဲ့ပြီး ပွဲကစားချိန် ၅၅ မိနစ်မှာ လော့ဖ်ရန်းရဲ့ ပေးပို့မှုကနေ ပူလီဆစ်က ချေပဂိုး သွင်းယူခဲ့တာပါ။  

ဒီနောက် ဒုတိယပိုင်း ပွဲကစားချိန်ပြီးဆုံးတဲ့အထိ တဖက်နဲ့တဖက် ဂိုးမသွင်းနိုင်ခဲ့တာကြောင့် အချိန်ပို ဆက်လက်လက်ယှဉ်ပြိုင်ကစားခဲ့ကြပါတယ်။ 

အချိန်ပိုယှဉ်ပြိုင်ကစားရာမှာလည်း နှစ်ဖက် တပ်မံ ဂိုးမသွင်းနိုင်ခဲ့ဘဲ ပင်နယ်တီကန်သွင်းရာမှာတော့ ခရိုအေးရှားအသင်းက ၃ ဂိုး ၁ ဂိုးနဲ့ အနိုင်ရရှိသွားပါတယ်။

ခရိုအေးရှားအသင်းဟာ ဒီဇင်ဘာ ၆ ရက် မနက် မြန်မာစံတော် ၁ နာရီခွဲယှဉ်ပြိုင်ကစားမယ့် ဘရာဇီးနဲ့ တောင်ကိုရီးယားအသင်းတို့ အနိုင်ရရှိတဲ့အသင်းနဲ့ ကွာတားဖိုင်နယ် ယှဉ်ပြိုင်ကစားရမှာပါ။

2 days Ago

December 1, 2022

လိင်တူလက်ထပ်ထိမ်းမြားမှု တားမြစ်ချက် ဖွဲ့စည်းပုံအခြေခံဥပဒေနှင့် ကိုက်ညီဟု တိုကျိုတရားရုံး အမိန့်ချ

ဂျပန်နိုင်ငံ တိုကျိုမြို့တရားရုံးက လိင်တူလက်ထပ်ထိမ်းမြားမှု တားမြစ်ချက်ဟာ ဖွဲ့စည်းပုံအခြေခံဥပဒေနဲ့ ကိုက်ညီမှုရှိတယ်လို့ နိုဝင်ဘာ ၃၀ ရက်က အမိန့်ချမှတ်ခဲ့ပါတယ်။

ဒီလိုအမိန့်ချမှတ်ခဲ့ပေမဲ့ လိင်တူစုံတွဲမိသားစုတွေအပေါ်မှာ ဥပဒေကြောင်းအရ အကာအကွယ် မရှိတာကလည်း လူအခွင့်အရေးချိုးဖောက်ရာ ကျတယ်လို့ တရားရုံးက မှတ်ချက်ပေးခဲ့တာကြောင့် တရားလိုတွေဘက်က ကြိုဆိုခဲ့ပါတယ်။

အမှုမှာ လူ ၈ ဦး ပါဝင်တဲ့ စုံတွဲ ၄ တွဲက ထိခိုက်နစ်နာမှုတွေအတွက် ယန်း ၁ သန်း (ဒေါ်လာ ၇,၀၀၀ ကျော်) ကို တရားရုံးမှာ အသီးသီး ဦးတိုက်လျှောက်ထား တောင်းဆိုခဲ့တာဖြစ်ပြီး တရားရုံးက ပယ်ချခဲ့ပါတယ်။

တရားရုံးက အမိန့်ဖတ်ကြားပြီးနောက် ရုံးအပြင်ဘက်က လှုံ့ဆော်စာတမ်းတွေ ကိုင်ဆောင်ထားတဲ့ အဖွဲ့ကလည်း “ဒါဟာ လက်ထပ်ထိမ်းမြားမှုဆိုင်ရာ တန်းတူညီမျှရေးအတွက် တိုးတက်မှု” ရှိခဲ့တာကြောင့် သူတို့အတွက် အားတက်စေတယ်လို့ ဆိုပါတယ်။

ဂျပန်နိုင်ငံရဲ့ ဖွဲ့စည်းပုံအခြေခံဥပဒေထဲမှာ လက်ထပ်ထိမ်းမြားမှုဟာ “လိင် ၂ မျိုးစလုံးရဲ့ အပြန်အလှန် သဘောတူညီမှု” လို့ အနက်ဖွင့်ဆိုထားပြီး G7 အဖွဲ့ဝင်နိုင်ငံတွေထဲမှာ လိင်တူလက်ထပ်မှုကို ခွင့်ပြုထားခြင်းမရှိတဲ့ တခုတည်းသောနိုင်ငံလည်း ဖြစ်ပါတယ်။

7 days Ago
More News
Up