ဂူဂယ်လ်

March 3, 2022

ကျူးကျော်စစ်ကြောင့် ကမ္ဘာ့နာမည်ကြီးကုမ္ပဏီအချို့ ရုရှားရှိလုပ်ငန်းများ ရပ်ဆိုင်း

အက်ပဲလ်၊ ဂူဂယ်လ်၊ ဖို့ဒ်၊ ဟာလေဒေးဗစ်ဆင်နဲ့ အက်ဇွန် မိုဘိုင်းတို့ အပါအဝင် အမေရိကန်က လူသိအများဆုံး ကုမ္ပဏီကြီးတွေထဲက တချို့ဟာ ယူကရိန်းအပေါ် စစ်ရေးအရ ကျူးကျော်ဝင်ရောက်ခဲ့တဲ့ ရုရှားကို ပြစ်တင်လိုက်ပြီး သူတို့ရဲ့လုပ်ငန်းတွေ ရပ်ဆိုင်းမယ်လို့ ပြောပါတယ်။

အကြမ်းဖက်မှုကို မလိုလားတဲ့ ရင်းနှီးမြှုပ်နှံသူတွေနဲ့ သုံးစွဲသူတွေဆီက ဖိအားတွေလည်း တဖြည်းဖြည်း ပိုတိုးလာနေတာပါ။

အက်ပဲလ် နိုင်ငံတကာ ကော်ပိုရေးရှင်းက သူ့ရဲ့ အိုင်ဖုန်းနဲ့ တခြား ထုတ်ကုန်တွေကို ရုရှားနိုင်ငံထဲမှာ အရောင်းရပ်လိုက်ပြီလို့ မတ်လ ၁ ရက် နှောင်းပိုင်းမှာ ပြောပါတယ်။

ယူကရိန်းနိုင်ငံထဲက အရပ်သားတွေကို ကာကွယ်ဖို့ သူ့ရဲ့မြေပုံ အပလီကေးရှင်းကိုလည်း အပြောင်းအလဲတွေ လုပ်နေပြီလို့ ပြောပါတယ်။

အယ်လ်ဖာဘတ်နဲ့ ဂူဂယ်လ် အပါအဝင် နည်းပညာ ကုမ္ပဏီတွေကလည်း ရုရှားအစိုးရစာနယ်ဇင်း ထုတ်ဝေဖြန့်ချိသူတွေကို သတင်းကဏ္ဍကနေ ဖြုတ်ချလိုက်ပါတယ်။

ရုရှားနိုင်ငံထဲမှာ ပူးတွဲစက်ရုံ ၃ ရုံရှိတဲ့ ဖို့ဒ်ကုမ္ပဏီကလည်း ရုရှားမှာ ထုတ်လုပ်မှုတွေကို ရပ်ဆိုင်းမယ်လို့ သူ့ရဲ့ ရုရှားစီးပွားဘက်ကို ပြောလိုက်ပါပြီ။

မော်တော်ဆိုင်ကယ်ထုတ်လုပ်သူ ဟာလေ ဒေးဗစ်ဆင်ကလည်း သူ့ဆိုင်ကယ်တွေ ရုရှားကို မပို့တော့ဘူးလို့ ပြောပါတယ်။ အက်ဇွန် မိုဘိုင်း ကော်ပိုရေးရှင်းကလည်း ရုရှားမှ ဆက်ပြီး မထုတ်လုပ်တော့ဘူးလို့ ပြောပါတယ်။

ရုရှားမှာ အကြီးဆုံး နိုင်ငံခြားရင်းနှီးမြှုပ်နှံသူ ဗြိတိန် စွမ်းအင်လုပ်ငန်းကြီး ဘီပီ ဘီပီအယ်လ်နဲ့ ရှဲလ် ပြည်သူ့ကော်ပိုရေးရှင်းတို့ကလည်း ရုရှားမှာ ဆက်ပြီး အလုပ်မလုပ်တော့ဘူးလို့ ပြောခဲ့ကြပါတယ်။

9 months Ago

January 22, 2021

သြစတြေးလျ search engine ကို ပိတ်ပစ်မည်ဟု ဂူဂယ်လ်ခြိမ်းခြောက် 

သတင်းအသုံးပြုခွင့်အတွက်   ဂူဂယ်လ်ကို အခကြေးငွေ တောင်းမယ်ဆိုရင်  သြစတြေးလျ သတင်းအချက်အလက်ရှာဖွေရေး  search engine ကို ပိတ်ပစ်မယ်လို့  ဂူဂယ်လ်က ခြိမ်းခြောက် ပြောဆိုလိုက်ပါတယ်။  ဂူဂယ်လ်ရဲ့ ခြိမ်းခြောက်မှုက ကမ္ဘာတအနှံ့ အနီးကပ် စောင့်ကြည့်နေတဲ့  News Corp တို့လို သတင်းမီဒီယာတွေနဲ့ ဖြစ်နေတဲ့ တိုက်ပွဲအရှိန်ကို ပိုမို မြင့်တက်လာစေပါတယ်။  သြစတြေးလျအစိုးရအနေနဲ့ ဥပဒေသစ် အသက်ဝင်အောင် လုပ်ပါက ဂူဂယ်လ်ကို သုံးနေတဲ့ သြစတြေးလျနိုင်ငံသား ၁၉ သန်းဟာ အဆင့်နိမ့်ကျတဲ့ သတင်းအချက်အလက်ရှာဖွေရေးနဲ့  YouTube အတွေ့အကြုံတွေကို ရင်ဆိုင်ရမယ်လို့  ဂူဂယ်လ်က သတိပေးခဲ့ပါတယ်။  ဝန်ကြီးချုပ် စကော့မော်ရစ်ဆင်က  ဂူဂယ်လ်ရဲ့ မှတ်ချက်စကားကို ပြစ်တင်လိုက်ပြီး  သြစတြေးလျမှာ လုပ်ကိုင်တဲ့ လုပ်ငန်းတွေအတွက်  သြစတြေးလျက စည်းမျဉ်းသတ်မှတ်တာ ဖြစ်တယ်လို့ တုံ့ပြန် ပြောဆိုခဲ့ပါတယ်။
2 years Ago
Up