ဂီတဖျော်ဖြေပွဲ

October 25, 2021

ဆောင်းဦးလှိုင်၏ နွေဦးတော်လှန်ရေးရန်ပုံငွေဂီတဖျော်ဖြေပွဲမှ ဒေါ်လာ ၆ သိန်းကျော်ရရှိ

မြန်မာ့နွေဦးတော်လှန်ရေး ရန်ပုံငွေအတွက် အဆိုတော် ဆောင်းဦးလှိုင်ရဲ့ တကိုယ်တော် ဂီတဖျော်ဖြေပွဲကို အမေရိကန်နိုင်ငံမြို့ကြီးတွေမှာ ကျင်းပခဲ့အပြီး ပွဲစဉ် ၁၀ ပွဲကနေ ရန်ပုံငွေ အမေရိကန် ဒေါ်လာ ၆၃၀,၀၀၀ ကျော် ရရှိခဲ့တယ်လို့ သိရပါတယ်။

အဆိုတော်ဆောင်းဦးလှိုင်ရဲ့ “နွေဦးတော်လှန်ရေး ရန်ပုံငွေရှာဖွေခရီးစဉ်”လို့ အမည်ပေးထားတဲ့ တကိုယ်တော်နယ်လှည့်ဖျော်ဖြေပွဲကိုတော့ ပြီးခဲ့တဲ့ သြဂုတ် ၂၈ ရက်နေ့က စတင်ခဲ့တာဖြစ်ပြီး မြို့ကြီး ၁၀ မြို့မှာ ကျင်းပသွားဖို့ ကြေညာထားခဲ့တာ ဖြစ်ပါတယ်။

ပြီးခဲ့တဲ့ အောက်တိုဘာ ၂၃ ရက်မှာတော့ နောက်ဆုံးပွဲစဉ်အနေနဲ့ Dallas, Tx ပွဲမှာ ဖျော် ဖြေခဲ့အပြီးမှာတော့ ပွဲစဉ်တလျှောက် ရန်ပုံငွေအများဆုံးရရှိခဲ့တယ်လို့ ဆောင်းဦးလှိုင်က ပြောပါတယ်။

“ရန်ပုံငွေ $ ၁၀၇,၀၀၀ ပြန်လည်လှူဒါန်းနိုင်မှာဖြစ်တဲ့အတွက် Dallas ပွဲ(my final concert of the tour )ဟာ စံချိန်ထပ်ချိုးနိုင်ခဲ့ပါတယ်။ Dallas မြို့မှ အစ္စလာမ်ဘာသာ ဝင် မြန်မာပြည်ဖွား  မနီလာက  ခန့်မှန်းခြေ $ ၃၀,၀၀၀ ခန့် တစ်ဦးတည်း  လှူဒါန်းအား ဖြည့်ခဲ့ပါတယ်။ Texas ပြည်နယ် Austin မြို့မှ ကျနော့်ရဲ့  Senior & Junior ဆရာဝန် တွေရဲ့လှူဒါန်းမှု အစုစုကလည်း ရံပုံငွေများစွာရရှိခဲ့ပါတယ်။  ပရိသတ်များရဲ့အားပေးမှုက အဓိကပေါ့ဗျာ။ ကျနော့် shirt ,hat & guitar လေလံများမှ  ဒေါ်လာတစ်သောင်းကျော်၊ ကျနော့် Tips ဒေါ်လာ တစ်သောင်းတစ်ထောင်ကျော်၊ အားလုံး $ ၂၁,၀၀၀ ကျော်ကို တစ်ပြားမကျန်ပြန်လည်လှူခဲ့ပါတယ်။ ကျနော့်ပွဲစဉ် ၁၀ ပွဲကနေ စုစုပေါင်းရံပုံငွေ  $ ၆၃၀, ၀၀၀ ကျော်ရခဲ့ပါတယ်။  ကျနော့်ကို ခေတ္တအနားယူခွင့်ပြုပါ”

အမေရိကန်မြို့ကြီးတွေမှာ ဖျော်ဖြေပွဲတွေအသီးသီးက ရရှိတဲ့ ရန်ပုံငွေတွေကိုတော့ မြန်မာ ပြည်အနယ်နယ်အရပ်ရပ်က လိုအပ်တဲ့ နေရာတွေအသီးသီးကို ပေးပို့လှူဒါန်းသွားမှာ ဖြစ်တယ်လို့ ဆိုပါတယ်။

အသက် ၄၉ နှစ်အရွယ် ရှိနေပြီဖြစ်တဲ့ ဆောင်းဦးလှိုင်ဟာ လတ်တလောမှာတော့ ပြည်ပမှာ နေထိုင်နေပြီး ကိုယ်ပိုင်သံစဉ်သီချင်းတွေနဲ့အတူ ဂီတလှုပ်ရှားမှုတွေ ဆက်လက်ပြီးတော့ လုပ်ဆောင်နေဆဲ ဖြစ်ပါတယ်။ 

၁၉၈၉ ခုနှစ်လောက်က စတင်ပြီးတော့ တေးရေးဆရာတဦးအနေနဲ့ မြန်မာ့ဂီတ လောကထဲကို ရောက်ရှိလာခဲ့တဲ့ ဆောင်းဦးလှိုင်ဟာ ၁၉၉၃ ခုနှစ်မှာတော့ ‘မင်းရဲ့ သူရဲကောင်း’ တကိုယ်တော်တေးအယ်လ်ဘမ်နဲ့ အောင်မြင်တဲ့အဆိုတော်တယောက်အဖြစ် ပရိသတ်တွေက လက်ခံအားပေးခဲ့ကြတာ ဖြစ်ပါတယ်။ 

သူဟာ ဆေးပညာဘွဲ့ရတဦးလည်းဖြစ်ပြီး နောက်ပိုင်းမှာတော့ ကိုယ်တိုင်ရေးသားပြီး ကိုယ်တိုင်သီဆိုခဲ့တဲ့ တကိုယ်တော် တေးအယ်လ်ဘမ်ပေါင်း ၁၀ ချပ်ထက်မနည်း ထွက်ရှိခဲ့ပြီး ဖြစ်ပါတယ်။ 

အဲဒီအချိန်ကာလတွေမှာတော့ တကိုယ်တော်သီဆိုမှုတွေအပြင် ထရေစီနဲ့ တခြား အဆိုတော်တွေပါ ပါဝင်ဖွဲ့စည်းထားတဲ့ ‘ခရီးသွားငါးယောက်’၊ တေးသံရှင် စည်သူလွင်၊ အဲလက်စ်တို့နဲ့ သီဆိုအောင်မြင်ခဲ့တဲ့ ‘19:18’ အယ်လ်ဘမ်တွေမှာပါ ပရိသတ်တွေကြား ဆယ်စုနှစ်နဲ့ချီ နေရာယူနိုင်ခဲ့တာ ဖြစ်ပါတယ်။

၂၀၀၇ ခုနှစ် ရွှေဝါရောင်တော်လှန်ရေးနောက်ပိုင်းမှာတော့ ဆောင်းဦးလှိုင်ဟာ တေးသီချင်းထုတ်လုပ်မှုတွေကို ရပ်နားထားခဲ့ပြီး ဆယ်စုနှစ်အကြာ ၂၀၁၇ မှာတော့ ‘ကမ္ဘာ့စံချိန်’ မီနီအယ်လ်ဘမ်ကို ထွက်ရှိခဲ့တာပါ။

အဲဒီနောက် ကြားကာလ ၂၀၁၀ ပြည့်နှစ် ရွေးကောက်ပွဲမှာ NLD အစိုးရကို ထောက်ခံအားပေးတဲ့ တေးသီချင်းတွေကို ရေးသားခဲ့ပြီး ‘မေမေနိုင်မှ ဖြစ်မှာပါ’ ၊ ဒေါ် အောင်ဆန်းစုကြည်ရဲ့ နေအိမ်အကျယ်ချုပ်နဲ့ ဖိနှိပ်ခံကာလတုန်းကအခြေအနေကို ရည်ရွယ်ရေးသားခဲ့ပြီး နီနီခင်ဇော် သီဆိုခဲ့တဲ့ ‘မျှော်လင့်ချက် တစုံတရာ’ သီချင်းတွေဟာလည်း အောင်မြင်ခဲ့တဲ့ တေးသီချင်းတွေ ဖြစ်ခဲ့ပါတယ်။

1 month Ago

December 2, 2020

မိုရီဆာကီဝင်း၏ Acoustic Live ဂီတဖျော်ဖြေပွဲ ကျပ် ၅၀၀၀ ဖြင့် အွန်လိုင်းမှ ကြည့်ရှုနိုင်(ရုပ်သံ)

နှုတ်ခမ်းနီမလေးတို့ အသည်းစွဲအဆိုတော် မိုရီဆာကီဝင်း ဖျော်ဖြေမယ့် Acoustic Live ဂီတဖျော်ဖြေပွဲကို အွန်လိုင်းကနေ Live Streaming အနေနဲ့ လာမယ့် ဒီဇင်ဘာ ၂၂ ရက်မှာ ထုတ်လွှင့်သွားဖို့ ရှိနေပါတယ်။ “ကျနော်ချစ်ရသော ပရိသတ်များအတွက် အထူး Online Live Stream ပွဲလေးကို စီစဉ်ထားပါတယ်။ ဒီပွဲလေးကတော့ မြန်မာပြည်က ပရိသတ်များအတွက် ပထမဆုံးအ ကြိမ် Online Live Stream ပွဲလေး ဖြစ်မှာပါ။ ဒီပွဲလေးမှာ ချစ်ပရိသတ်တွေ ပျော်ရွှင်၊ စိတ်လှုပ်ရှားဖွယ်ကောင်းတဲ့ အစီအစဉ်တွေနဲ့အတူ၊ အထူးလက်ဆောင်လေးတွေလည်း ပေးသွားမှာနော်” အဝင်း လို့ ချစ်စနိုးနာမည်နဲ့ မြန်မာပရိသတ်တွေကြား ထင်ရှားတဲ့ မိုရီဆာကီဝင်းကတော့ အသက် ၃၀ အရွယ်ရှိနေပြီဖြစ်ကာ ဂျေပေါ့ပ်တေးဂီတအဖွဲ့ PrizmaX အဖွဲ့ဝင် တယောက်လည်း ဖြစ်ပါတယ်။ အသက် ၁၀ နှစ်အရွယ်လောက်ကတည်းက ဂျပန်နိုင်ငံကို မိဘတွေနဲ့ ပြောင်းရွှေ့နေထိုင်ခဲ့သူ အဝင်းဟာ ၁၄ နှစ်သားအရွယ် အလယ်တန်းကျောင်းသားဘဝမှာကတည်းက စတင်ကာ Stardust Entertainment က ရွေးချယ်ခံခဲ့ရပြီး ဖျော်ဖြေရေးအနုပညာ လှုပ်ရှားမှုတွေထဲ ပါဝင်လာခဲ့သူပါ။ အဲဒီနောက် သီချင်းတွေဆိုသလို သရုပ်ဆောင်တာတွေလည်း လုပ်နေတဲ့ မိုရီဆာ ကီဝင်းဟာ ဝါရင့်ဒါရိုက်တာ Steven Spielberg ရိုက်ကူးထားတဲ့ ဟောလိဝုဒ်နာမည်ကြီး ရုပ်ရှင်ကားတကားဖြစ်တဲ့ ‘Ready Player One’ ရုပ်ရှင်ထဲမှာလည်း ပါဝင်ခဲ့ပြီး ဒါရိုက်တာ ကြည်ဖြူသျှင် ရိုက်ကူးတဲ့ ဂျပန်-မြန်မာချစ်ကြည်ရေး ‘ဇာတိမြေ’ရုပ်ရှင်မှာလည်း ပါဝင်သရုပ်ဆောင်ခဲ့ကာ ပရိသတ်တွေ ချစ်ခင်အားပေးမှုတွေ ရရှိထားသူတယောက် ဖြစ်ပါတယ်။ ခုလတ်တလောမှာတော့ မြန်မာပြည်က ပရိသတ်တွေအတွက် သူ ပါဝင်ဖျော်ဖြေမယ့် ဂီတဖျော်ဖြေပွဲကို ဒီဇင်ဘာ ၂၂ ရက်၊ မြန်မာစံတော်ချိန် ည ၇ နာရီမှာ Streaming Live Show အနေနဲ့ ပြုလုပ်သွားမှာ ဖြစ်တယ်လို့ သိရပါတယ်။ ကြည့်ရှုလိုတဲ့ ပရိသတ်တွေအနေနဲ့ အွန်လိုင်းလက်မှတ်တွေကိုတော့ မြန်မာငွေ ကျပ် ၅,၀၀၀ နဲ့ ဖော်ပြပါလင့်ခ်-https://www.messenger.com/t/chelmo.tips ကတဆင့် ဒီဇင်ဘာ ၁ ရက်က စတင်ကာ ၁၈ ရက်နေ့အထိ ဝယ်ယူနိုင်ကြောင်း ကြေညာထားခဲ့ ပါတယ်။
1 year Ago
More News
Up