ဂီတပညာရှင်

July 1, 2019

အစ္စရေး ဂီတပညာရှင် ပစ်သတ်ခံရ

မက္ကဆီကိုနိုင်ငံအလယ်ပိုင်း စန်လူးဝစ်ပိုတိုစီမြို့က ကပွဲကလပ်တခုမှာ ဘယ်သူဘယ်ဝါ မသိရတဲ့ သေနတ်သမားတွေက အစ္စရေး အီလက်ထရောနစ် ဂီတပညာရှင် ဒီဂျေရိုနန်ဒါဟန်ကို အသေပစ်သတ်ခဲ့တယ်လို့ မက္ကဆီကို အာဏာပိုင်တွေက ဇွန် ၂၉ ရက်မှာ ပြောပါတယ်။ လက်နက်ကိုင် အမျိုးသားတအုပ်စုဟာ မြို့တောင်ပိုင်းက ကလပ်ထဲကို စနေနေ့က ဝင်လာခဲ့ပြီး ပစ်ခတ်ခဲ့လို့ အသက် ၄၅ နှစ်အရွယ် ဒါဟန် သေဆုံးပြီး တခြားလူ ၃ယောက် ဒဏ်ရာရတယ်။ ဒါဟန်ဟာ ကလပ်မှာ ဖျော်ဖြေနေခဲ့ကြောင်း ယုံကြည်ရတယ်လို့ ပြည်နယ် အစိုးရ ရှေ့နေချုပ်ရုံးက ကြေညာချက် ထုတ်ပြန်ပါတယ်။ ဒဏ်ရာရသူ တယောက်က ဆေးရုံရောက်ပြီးမှ သေဆုံးခဲ့ပါတယ်။ ပစ်ခတ်သူတွေက ကလပ် အဆောက်အဦထဲက ထွက်သွားပြီး ဘယ်ရောက်နေတယ်ဆိုတာ မသိရသေးဘူးလို့ ကြေညာချက်က ပြောပါတယ်။ ပစ်ခတ်ရတဲ့ နောက်ခံ အကြောင်းရင်းကိုလည်း မသိရသေးပါဘူး။ ဒါဟန်ဟာ ပြင်သစ်မှာ မွေးပြီး အစ္စရေးမှာ ကြီးပြင်းခဲ့တယ်။ ဆွီဒင်နိုင်ငံ စတော့ဟုမ်းမြို့မှာ အခြေချ နေထိုင်တယ်လို့ သူ့ရဲ့ တရားဝင် ဖေ့စ်ဘွတ် စာမျက်နှာက ဆိုပါတယ်။ ဂီတအယ်လ်ဘမ်ပေါင်း ဆယ်ချပ်ထက်မနည်း ဖြန့်ချိထားပြီး ကမ္ဘာပတ် ဖျော်ဖြေရေး ခရီးစဉ် အတော်များများမှာ ပါဝင်ဖျော်ဖြေထားတယ်လို့လည်း ဆိုပါတယ်။
2 years Ago

July 14, 2018

ကွယ်လွန်သူ ဂီတပညာရှင် ဦးရဲလွင်အတွက် ဂီတာပုံစံခေါင်းတလား ပြုလုပ်ပေး

ကွယ်လွန်သူ  ဂီတပညာရှင် တေးရေး ဦးရဲလွင်အတွက် အမေရိကန်နိုင်ငံသား ဂီတပစ္စည်းဒီဇိုင်နာ Matthew Burch က ဂီတာပုံစံ ခေါင်းတလား ပြုလုပ်ပေးခဲ့ပါတယ်။ ပြည်တွင်းစစ်ကြောင့် ဒုက္ခရောက်နေသူတွေကို ပန်းရဲ့လမ်းအဖွဲ့ ဖွဲ့စည်းပြီး နိုင်ငံအနှံ့ လိုက်လံဖော်ျဖြေ ရန်ပုံငွေ ရှာဖွေခဲ့တဲ့ ဦးရဲလွင်ဟာ ဇူလိုင် ၁၀ ရက် ညနေပိုင်းက အသည်းရောဂါနဲ့ ကွယ်လွန်ခဲ့တာပါ။ ဦးရဲလွင်ကို ပေါင်းတည်မြို့မှာ မွေးဖွားခဲ့ပြီး စက်မှုတက္ကသိုလ် တက်နေတုန်းမှာပဲ E.Machine တီးဝိုင်းမှာ ဘေ့စ်ဂစ်တာသမားအဖြစ် ပါဝင်ခဲ့ပြီး ၁၉၈၄ ခုနှစ်မှာတော့ အဆိုတော် ခင်မောင်တိုး ပါဝင်တဲ့ မဇ္ဈိမလှိုင်းဂီတအဖွဲ့ ဖွဲ့စည်းစဉ်မှာ ပါဝင်ခဲ့ပါတယ်။ ၂၀၁၂ ခုနှစ်မှာ  “လွတ်လပ်ငြိမ်းချမ်း ပန်းရဲ့လမ်း” အဖွဲ့ကို ဖွဲ့စည်းလို့ နိုင်ငံအနှံ့မှာ ငြိမ်းချမ်းရေးအတွက် တေးသီးချင်းတွေ နယ်လှည့် ဖျော်ဖြေပြီး ရရှိတဲ့ ရန်ပုံငွေတွေနဲ့ ဒုက္ခရောက်နေသူတွေကို ကူညီခဲ့ပါတယ်။ ဒါကြောင့် ၂၀၁၃ ခုနှစ်အတွက် ပြည်သူ့ဂုဏ်ရည် အထူးဆုကို ရရှိခဲ့ပါတယ်။ ဦးရဲလွင်ကို သူ့ရဲ့ အင်းစိန်နေအိမ်ကနေ ရေဝေးသုသာန်ကို ဒီနေ့ နေ့လယ် ၁ နာရီမှာ  ပို့ဆောင်သင်္ဂြိုလ်မှာ ဖြစ်ပါတယ်။ ဓာတ်ပုံ - တိုက်ဂါး ဂယ်လာရီ
3 years Ago
Up