ဂိုးသွင်းစံချိန်

December 31, 2020

ဖယ်လ်ကာအို၏ ဂိုးသွင်းစံချိန်ကို ဆွာရတ် လိုက်မှီ

အက်သလက်တီကို တိုက်စစ်မှူး လူးဝစ္စဆွာရတ်ဟာ ဖယ်လ်ကာအိုရဲ့ အက်သလက်တီကို ကစားသမားဘဝအစပိုင်း ဂိုးသွင်းစံချိန်ကို လိုက်မှီသွားခဲ့ပြီဖြစ်ပါတယ်။  မနေ့ညက ကန်သွားတဲ့ ဂီတာဖေးနဲ့ပွဲမှာ ဆွာရတ်ဟာ မိနစ် ၂၀ မှာ ဂိုးသွင်းယူပေးနိုင်ခဲ့ပြီး ဒီဂိုးဟာ ပွဲရဲ့ တစ်လုံးတည်းသော သွင်းဂိုးလည်း ဖြစ်ပါတယ်။  ဥရုဂွေးတိုက်စစ်မှူးရဲ့ သွင်းဂိုးဟာ နည်းပြ ဆီမြွန်နီရဲ့ အက်သလက်တီကိုအသင်းနဲ့ ပွဲ ၅၀၀ ပြည့်ကို အနိုင်သေချာစေခဲ့ပြီး အသင်းကိုလည်း အမှတ်ပေးဇယားထိပ်ဆုံးကို ပို့ဆောင်ပေး နိုင်ခဲ့ပါတယ်။  ဆွာရတ်အတွက် ဒါဟာ ဘာကာကနေ တီကိုအသင်းကို ပြောင်းပြီး ကစားခဲ့တဲ့ ၁၁ ပွဲမှာ ၈ ဂိုးမြောက် သွင်းဂိုးဖြစ်ပြီး ပေါ်တိုကနေ အက်သလက်တီကိုအသင်းကို ပြောင်းလာတဲ့ ဖယ်လ်ကာအိုရဲ့ ၂၀၁၁ ဂိုးသွင်း စံချိန်နဲ့လည်း တူညီခဲ့ပြီဖြစ်ပါတယ်။  ဒီပွဲမှာ ဆွာရတ်ဟာ သူ့အတွက် ၉ ဂိုးမြောက်သွင်းဂိုးကို ရရှိဖို့ နီးစပ်ခဲ့ပေမဲ့ ဘောလုံးဟာ ဘားထိခဲ့တာ ဖြစ်ပါတယ်။  ဆွာရတ်ဟာ အက်သလက်တီကိုအသင်းကို ရောက်ရောက်ခြင်းမှာပဲ အသင်းနဲ့အံဝင်ခဲ့တာ ဖြစ်ပါတယ်။  သူဟာနိုဝင်ဘာ တစ်လလုံးနီးပါးအနားယူခဲ့ရပေမဲ့ ဒီဇင်ဘာလအစောပိုင်းမှာ ပြန်လည်ကောင်းမွန်လာခဲ့သူ ဖြစ်ပါတယ်။  အသက် ၃၃ နှစ်အရွယ် တိုက်စစ်ကစားသမားဟာ ဘာကာနည်းပြသစ် ရော်နယ်ကိုးမန်းရဲ့ အစီစဉ်တွေထဲမှာ မပါဝင်တော့တာကြောင့် တီကိုအသင်းကို ထွက်ခွာလာခဲ့ရသူဖြစ်ပါတယ်။ သူထွက်ခွာခဲ့ရမှုက ကာလရှည် ကစားဖော်မက်ဆီအတွက်လည်း စိတ်အနှောင့်အယှက် ဖြစ်စေခဲ့ပါတယ်။ မက်ဆီဟာ ဆွာရတ်ကို ထွက်ခွာခွင့်ပေးတဲ အသင်းရဲ့ လုပ်ရပ်ကို အရင်က ဝေဖန်ခဲ့ဖူးသလို တနင်္ဂနွေနေ့မှာ လုပ်ခဲ့တဲ့အင်တာဗျူး တစ်ခုမှာလည်း ဒီကိစ္စကိုထပ်မံ ထည့်သွင်းပြောဆိုခဲ့ပါတယ်။  လက်ရှိအချိန်တော့ ဆီမြွန်နီရဲ့ တီကိုအသင်းဟာ လာလီဂါအမှတ်ပေးဇယားကို ဦးဆောင်သူ အဖြစ် နှစ်သစ်ကူးနိုင်ခဲ့ပြီဖြစ်ကာ ၂၀၁၃-၁၄ နောက်ပိုင်းပထမဆုံးအကြိမ်လာလီဂါ ချန်ပီယံဖြစ်ဖို့ အခြေအနေကောင်းတွေကို ပိုင်ဆိုင်ထားနိုင်ပြီလည်း ဖြစ်ပါတယ်။  တီကိုအသင်းဟာ ချန်ပီယံလိဂ်မှာလည်း ၁၆ သင်းအဆင့်ကို တက်ရောက်ထားနိုင်ကာ ချဲလ်ဆီးအသင်းနဲ့ ရင်ဆိုင်ရမှာ ဖြစ်ပါတယ်။ 
4 months Ago

October 14, 2020

ရော်နယ်ဒို၏ ဂိုးသွင်းစံချိန်ကို ဘရာဇီးတိုက်စစ်မှူး နေမာ ကျော်ဖြတ်

ပီရူးအသင်းကို အနိုင်ရရှိခဲ့တဲ့ပွဲမှာ ဟက်ထရစ်သွင်းယူနိုင်ခဲ့တဲ့ တိုက်စစ်မှူး နေမာဟာ ရော်နယ်ဒိုရဲ့ ဂိုးသွင်းစံချိန်ကို ကျော်ဖြတ်ကာ ဘရာဇီးအသင်းအတွက် ဒုတိယမြောက် ဂိုးသွင်းအများဆုံး ကစားသမား ဖြစ်လာပါတယ်။ ပီအက်စ်ဂျီ တိုက်စစ်မှူးဟာ ဒီပွဲမှာ သွင်းဂိုး ၂ ဂိုးကို ပင်နယ်တီကနေတဆင့် ရရှိခဲ့တာဖြစ်ပြီး ဟက်ထရစ်ဖြစ်စေမယ့် ဂိုးကို အချိန်ပိုမှာ ရရှိခဲ့ပါတယ်။  ဒါ့ကြောင့် အသက် ၂၈ နှစ်အရွယ် နေမာဟာ ဘရာဇီးအသင်းအတွက် ၁၀၃ ပွဲ ကစားပြီးချိန်မှာ သွင်းဂိုး ၆၄ ဂိုးအထိ ရှိလာပြီဖြစ်ပြီး ဂန္ထဝင်ကစားသမားကြီး ရော်နယ်ဒိုရဲ့ သွင်းဂိုးမှတ်တမ်းကိုလည်း ကျော်ဖြတ်နိုင်ခဲ့ပြီ ဖြစ်ပါတယ်။ ဒိုကြီးလို့ လူသိများတဲ့ ရော်နယ်ဒိုဟာ သူ့ရဲ့ ၁၇ နှစ်ကြာ ကစားသမားဘဝအတွင်း ဘရာဇီးအသင်းအတွက် ၉၈ ပွဲ ကစားကာ ၆၂ ဂိုး သွင်းယူပေးခဲ့ပါတယ်။ သူဟာ အသင်းနဲ့အတူ ကမ္ဘာ့ဖလား ၂ ကြိမ်၊ ကိုပါဖလား ၂ ကြိမ်နဲ့ ကွန်ဖက်ဒရေးရှင်းဖလား ၁ ကြိမ် ရရှိခဲ့သူလည်း ဖြစ်ပါတယ်။ ဒါကြောင့် လက်ရှိအချိန်မှာ ဘရာဇီးအသင်းအတွက် နေမာထက် ဂိုးပိုသွင်းထားနိုင်တာ ပီလီတစ်ယောက်သာ ရှိတော့ပြီး ပီလီကတော့ ၇၇ ဂိုး သွင်းယူပေးထားပါတယ်။  နေမာရဲ့ စွမ်းဆောင်ရည်ကြောင့် သူဟာ ဘရာဇီးအသင်းကို ၆ ကြိမ်မြောက် ကမ္ဘာ့ဖလားပိုင်ရှင်ဖြစ်စေမယ့် ကစားသမားတစ်ဦးလို့လည်း ဘရာဇီးဂန္ထဝင်ဂိုးသမားကြီး တက်ဖာရယ်က ပြောပါတယ်။  နေမာအနေနဲ့ ပီအက်စ်ဂျီအသင်းနဲ့သာ ချန်ပီယံလိဂ်ဖလား ဆွတ်ခူးနိုင်ခဲ့ရင် သူဟာ ဖီဖာရဲ့ အကောင်းဆုံးကစားသမားဆုကို ရရှိမယ့်သူလို့လည်း တက်ဖာရယ်က သုံးသပ်ပါတယ်။ နေမာဟာ အခုရာသီအစပိုင်းမှာ အဆင်မပြေမှုတွေနဲ့ ရင်ဆိုင်နေရသူဖြစ်ပြီး အစောပိုင်းမှာ ကိုရိုနာဗိုင်းရပ်စ် ကူးစက်ခံခဲ့ရပါတယ်။ အဲဒီနောက်မှာ ပြန်ကစားခဲ့တဲ့ မာဆေးလ်နဲ့ပွဲမှာ တိုက်ရိုက်အနီကတ်ပြ ထုတ်ခံခဲ့ရပြီး ပြိုင်ဘက်နောက်ခံလူ ဂွန်ဇာလတ်ကိုလည်း လူမျိုးရေး ခွဲခြားခဲ့တယ်လို့ စွပ်စွဲခဲ့ပါတယ်။ ဒီဖြစ်ရပ်ကြောင့် သူဟာ ၂ ပွဲပယ်ပြစ်ဒဏ် ကျခံခဲ့ရပါတယ်။ သူဟာ ဘရာဇီး လက်ရွေးစင်အသင်းအတွက် ၁၁ လအတွင်း ပထမဆုံးပွဲအဖြစ် ဘိုလီဗီးယားကို ၅ ဂိုးပြတ် အနိုင်ရရှိခဲ့တဲ့ပွဲစဉ်မှာ ကစားခဲ့ပြီး အသင်းအတွက် ၂ ဂိုး ဖန်တီးပေးနိုင်ခဲ့ပါတယ်။
6 months Ago
Up