ဂါဇာ

August 7, 2021

ဂါဇာရှိ ဟားမက်စ်အုပ်စုရှိသည့်နေရာကို အစ္စရေး ဗုံးကြဲ

ဂါဇာကမ်းမြောင်ဒေသကနေ မီးလောင်စေတဲ့ မီးပုံးပျံတွေ လွှတ်တင်နေတာကို တုံ့ပြန်တဲ့ အနေနဲ့ အစ္စရေးလေယာဉ်က ဂါဇာမှာရှိတဲ့ ဟားမတ်စ်တွေရဲ့ တည်နေရာတွေကို သြဂုတ် ၇ ရက်မှာ ဗုံးကြဲ တိုက်ခိုက်ခဲ့တယ်လို့ အစ္စရေး စစ်တပ်က ပြောပါတယ်။

ဂါဇာကိုအုပ်ချုပ်နေတဲ့ ဟားမတ်စ်အစ္စလာမစ်အုပ်စုကပိုင်တဲ့ ခြံဝင်းတစ်ခုနဲ့ ဒုံးကျည် ပစ်လွှတ်နေတဲ့ နေရာကို ပစ်မှတ်ထား တိုက်ခိုက်ခဲ့တာလို့ အစ္စရေးစစ်တပ်က ပြောပြီး ဒီတိုက်ခိုက်မှုကြောင့်ဖြစ်တဲ့ အသေအပျောက် အထိအခိုက် စာရင်းကို ချက်ချင်း မသိရသေးပါဘူး။

ဟားမတ်စ်တွေကလည်း ချက်ချင်း မှတ်ချက် မပေးသေးပါဘူး။ အစ္စရေးနဲ့ ဟားမတ်စ်တို့ ၁၁ ရက်ကြာတိုက်ပွဲဖြစ်အပြီး အပစ်အခတ် ရပ်စဲခဲ့တဲ့ မေ ၂၁ ရက်တည်းက ခုထိ ဂါဇာက ပါလက်စတိုင်းတွေဟာ နယ်စပ်တလျှောက်မှာ မီးလောင်စေတဲ့ ပစ္စည်းတွေ ချိတ်ဆွဲထားတဲ့ မီးပုံးပျံတွေကို ဖောဖောသီသီ လွှတ်တင်ခဲ့တာပါ။

ဒါကြောင့် အစ္စရေးဘက်က လယ်ကွင်းတွေ မီးလောင် ပျက်စီးခဲ့ပါတယ်။ ပါလက်စတိုင်းတွေကတော့ မေလတိုက်ပွဲအတွင်း တင်းကျပ်ခံထားရတဲ့ ကမ်းရိုးတန်းဒေသမှာ ကန့်သတ်ချက်တွေကို ဖြေလျှော့ရေး အစ္စရေးကို ဖိအားပေးဖို့ ရည်ရွယ်ပြီး မီးပုံးပျံတွေ လွှတ်တင်နေတာလို့ ပြောပါတယ်။

 ဂါဇာက ကန့်သတ်ချက်တွေကို အစ္စရေးက ဖြေလျော့ပေးအပြီးမှာ မီးပုံးပျံ လွှတ်တင်တာတွေ လျော့ကျ သွားတယ်လို့ ရိုက်တာသတင်းဌာနက ရေးပါတယ်။

ဒါပေမဲ့ သြဂုတ် ၆ ရက်မှာ ဂါဇာကနေ မီးပုံးပျံတွေ ထပ်ပြီး လွှတ်တင်ခဲ့လို့ အစ္စရေးနဲ့ ဂါဇာ နယ်စပ်နားမှာ မီးလောင်မှု  ၄ ကြိမ် ဖြစ်ခဲ့ပါတယ်။

6 months Ago

October 21, 2020

ဂါဇာမှ အစ္စရေးနယ်စပ်ဆီ ဖြတ်ကျော်တူးဖော်ထားသည့် ဥမင် ရှာဖွေတွေ့ရှိ

ဂါဇာကမ်းမြောင်ဒေသကနေ အစ္စရေးဆီ နယ်စပ်ဖြတ်ကျော် တူးဖော်ထားတဲ့ ဥမင်အသစ်တခုကို အစ္စရေးက အောက်တိုဘာ ၂၀ မှာ ရှာတွေ့ခဲ့ပါတယ်။ မြေအောက်ဥမင်ဟာ အစ္စရေးပိုင်နက်ထဲကို မီတာ ဒါဇင်ချီ ရောက်နေပြီလို့လည်း အစ္စရေး စစ်တပ်က ပြောပါတယ်။ အစ္စရေး စစ်အင်ဂျင်နီယာတွေက မြေအောက်အာရုံခံစနစ်ကို သုံးပြီး ဥမင်ကို ရှာတွေ့ခဲ့တာပါ။ ပြီးစီးခဲ့ရင် ဒီဥမင်ဟာ ဂါဇာကနေ မိုင် ၄၀ အကွာထိ ဆက်သွယ်ပေးထားနိုင်ပါတယ်။ ပါလက်စတိုင်းတွေဟာ ဂါဇာကမ်းမြောင်ဆီကို မှောင်ခိုပစ္စည်းတွေ၊ ဟားမတ်စ်အုပ်စုနဲ့ တခြားအုပ်စုကွဲတွေက စစ်သွေးကြွတွေအတွက် လက်နက်တွေကို နည်းအမျိုးမျိုးနဲ့ ခိုးသွင်းဖို့ မြေအောက်ဥမင်တွေကို သုံးပါတယ်။ စစ်သွေးကြွတွေကလည်း ပင်လယ်ရေကြောင်းရော ကုန်းကြောင်းကပါ ဂါဇာကို ပိတ်ဆို့ထားတဲ့ကြားကနေ အစ္စရေးကို တိုက်ခိုက်ဖို့ ဥမင်တွေကို သုံးပါတယ်။ အခု အသစ်တွေ့တဲ့ ဥမင်ကတော့ ဂါဇာတောင်ပိုင်း ခန်းယောနစ်မြို့ကနေစပြီး အစ္စရေးနယ်စပ်ကို ဖြတ်ဖောက်ထားတယ်လို့ အစ္စရေး စစ်ဘက်ပြောခွင့်ရက ပြောပါတယ်။ ဘယ်သူက ဒီဥမင်ကို ဖောက်တယ်ဆိုတာ မဆုံးဖြတ်ရသေးပါဘူး။ ဒါပေမဲ့ ဂါဇာကမ်းမြောင်က စတဲ့ ဖြစ်ရပ်တိုင်းအတွက် ဟားမတ်စ်တွေမှာ တာဝန်ရှိတယ်လို့ ပြောခွင့်ရက ဆက်ပြောပါတယ်။ ဟားမတ်စ် စစ်အုပ်စု ပြောခွင့်ရကတော့ ဒီဖြစ်ရပ်အတွက် မှတ်ချက်ပေးဖို့ ငြင်းထားပါတယ်။
1 year Ago
More News
Up