ဂရိ

December 7, 2022

ဂရိတွင် ဆန္ဒပြသူများနှင့် ရဲတပ်ဖွဲ့ ရုန်းရင်းဆန်ခတ်ဖြစ်ပြီး လူ ၃၅ ဦးထက်မနည်း ဖမ်းဆီးခံရ

ဂရိနိုင်ငံမှာ ဆယ်ကျော်သက်တဦး ရဲတွေရဲ့ အသတ်ခံရမှု ၁၄ နှစ်မြောက် အထိမ်းအမှတ် ဆန္ဒပြပွဲတွေအတွင်း ဒီဇင်ဘာ ၆ ရက်က ရဲတပ်ဖွဲ့နဲ့ ဆန္ဒပြသူတွေ ရုန်းရင်းဆန်ခတ်ဖြစ်ခဲ့ပြီး အေသင်မြို့တော်နဲ့ နိုင်ငံမြောက်ပိုင်းရှိ သယ်စလိုနီကီမြို့တွေမှာ လူ ၃၅ ဦးထက်မနည်း ဖမ်းဆီးခံရ ပါတယ်။

ဂရိနိုင်ငံမှာ ဆယ်စုနှစ်တွေအတွင်း အဆိုးရွားဆုံး အဓိကရုဏ်းတွေ ဖြစ်ခဲ့တဲ့ ၂၀၀၈ ခုနှစ်က အသက် ၁၅ နှစ်အရွယ် အလက်ဇန်းဒရို့စ် ဂရီဂိုရိုပူလို့စ် သေဆုံးခဲ့ရတဲ့ နှစ်ပတ်လည်နေ့မှာ ရဲတပ်ဖွဲ့ရဲ့ ရက်စက်ကြမ်းကြုတ်မှုကို ဆန့်ကျင်တဲ့ အထိမ်းအမှတ်အဖြစ် မြို့နှစ်မြို့လုံးမှာ ထောင်နဲ့ချီတဲ့ ဆန္ဒပြသူတွေ လမ်းမတွေပေါ်မှာ ချီတက်ဆန္ဒပြခဲ့ကြပါတယ်။

ဆယ်ကျော်သက်လူငယ်လေး အပစ်ခံရပြီးတဲ့နောက် နာရီပိုင်းအတွင်း လူထောင်ပေါင်းများစွာက ကားတွေကို မီးရှို့၊ လုယက်ပြီး ဈေးဆိုင်တွေကို ရိုက်ခွဲခဲ့ပါတယ်။

ပစ်သတ်ခဲ့တဲ့ ရဲအရာရှိကို ထောင်ဒဏ်တသက်တကျွန်း ချမှတ်ခဲ့ပေမဲ့ အယူခံတရားရုံးက အစောပိုင်းမှာ ပြန်လွှတ်ပေးခဲ့တာပါ။

မြို့နှစ်မြို့လုံးမှာ ဆန္ဒပြသူတွေက ဓာတ်ဆီပုလင်းဗုံးတွေနဲ့ မီးပန်းတွေ ပစ်ပေါက်ပြီး ဆန္ဒပြပွဲတွေကို စောင့်ကြပ်နေတဲ့ ရဲတွေက မျက်ရည်ယိုဗုံးတွေနဲ့ တုံ့ပြန်ခဲ့ပါတယ်။

သယ်ဆာလိုနီကီမြို့က ရောမ လူ့အဖွဲ့အစည်းဝင် အသက် ၁၆ နှစ်အရွယ် ယောက်ျားလေးတဦး ပစ်ခတ်ခံရလို့ ခေါင်းမှာ ဒဏ်ရာရတဲ့အတွက် ဆေးရုံမှာ ကုသခံနေချိန် ဆန္ဒပြပွဲတွေဖြစ်ပြီး ရဲတပ်ဖွဲ့နဲ့ ထိပ်တိုက်တွေ့ခဲ့တာပါ။

ဆန္ဒပြသူတွေက လယ်ထွန်စက်ကို မီးရှို့တာ အပါအဝင် လမ်းတွေပေါ်မှာ အတားအဆီးတွေ တပ်ဆင်ပြီး မီးရှို့ခဲ့ကြပါတယ်။

ယောက်ျားလေးက ဓာတ်ငွေ့ဖိုးမပေးဘဲ ဓာတ်ဆီဆိုင်ကနေ မောင်းထွက်သွားတယ်လို့ ရဲတွေက စွပ်စွဲခဲ့ပါတယ်။ ရဲတပ်ဖွဲ့ဝင်တွေက လိုက်ဖမ်းရင်း ကလေးငယ်မှာ ကျည်ဆန်ဒဏ်ရာ ရရှိခဲ့တာပါ။ ဒီဖြစ်စဉ်နဲ့ပတ်သက်ပြီး ရဲအရာရှိတဦးကို ဖမ်းဆီးထားပါတယ်။

2 months Ago

November 10, 2022

ဂရိတွင် ဆန္ဒပြသူများအား ရဲတပ်ဖွဲ့ဖမ်းဆီး

ဂရိနိုင်ငံမှာ အိမ်ထောင်စုများစွာကို ထိခိုက်စေတဲ့ ငွေကြေးဖောင်းပွမှု မြင့်တက်တာကြောင့် အေသင်မြို့တော်ရဲ့ ပါလီမန်အပြင်ဘက်က ဆန္ဒပြပွဲအတွင်း ရုန်းရင်းဆန်ခတ် ဖြစ်ပွားခဲ့ပြီး နိုဝင်ဘာ ၉ ရက်မှာ ဂရိရဲတွေက လူ ၁၀ ယောက်ထက်မနည်းကို ဖမ်းဆီးခဲ့ပါတယ်။

ရဲတွေဆီကို ကျောက်ခဲတွေနဲ့ ဓာတ်ဆီဗုံးတွေ ပစ်ပေါက်နေတဲ့ ဆန္ဒပြသူတစုကို လူစုခွဲဖို့ ရဲတပ်ဖွဲ့က မျက်ရည်ယိုဗုံးတွေနဲ့ ပစ်ခတ်ခဲ့ပါတယ်။ ကားတစီးနဲ့ ဆိုင်ပြတင်းပေါက် တချို့လည်း ပျက်စီးခဲ့ကြောင်း ရဲတပ်ဖွဲ့က ပြောပါတယ်။

ထောင်နဲ့ချီတဲ့ အလုပ်သမားတွေဟာ ငွေကြေးဖောင်းပွမှုဒဏ်ကို တောင့်ခံနိုင်မယ့် လုပ်ခလစာ တိုးမြှင့်ပေးဖို့ တောင်းဆိုကြတဲ့ သပိတ်ကို ဆင်နွှဲကြပါတယ်။

ဥရောပရဲ့ စွမ်းအင်ဈေးနှုန်းတွေ ကြီးမြင့်လာတာနဲ့အမျှ နေထိုင်မှုစရိတ်တွေလည်း မြင့်တက်လာတာကြောင့် ဥရောပတိုက်အနှံ့ အလုပ်သမားသပိတ်တွေနဲ့ ဆန္ဒပြပွဲတွေ ဖြစ်လာရပါတယ်။

အေသင်မြို့ ပါလီမန်ကို ချီတက်ရာမှာ ဆန္ဒပြသူ ၂၀,၀၀၀ လောက် ပါဝင်ခဲ့ကြောင်း ရဲတပ်ဖွဲ့က ပြောပါတယ်။

ဒီဆန္ဒပြမှုဟာ ဂရိနိုင်ငံမှာ နှစ်ပေါင်း ၃၀ လောက် ကြာမြင့်လာတဲ့ ငွေကြေးဖောင်းပွမှုကို တိုက်ဖျက်ဖို့ လုပ်ခလစာတိုးပေးရေး နိုင်ငံရဲ့ အကြီးဆုံးသမဂ္ဂတွေက တောင်းဆိုတဲ့ ၂၄ နာရီကြာ ဆန္ဒပြမှုရဲ့ တစိတ်တပိုင်း ဖြစ်ပါတယ်။

အစိုးရဟာ လက်ရှိ တလကို ၇၁၃ ယူရို ရရှိအောင် အနိမ့်ဆုံးအခကြေးငွေ တိုးပေးထားတာဖြစ်ပြီး ဇန်နဝါရီလကတည်းက တိုးပေးထားတာ ၂ ကြိမ် ရှိသွားပါပြီ။

အစိုးရဟာ ၂၀၂၃ မှာ ထပ်တိုးပေးမယ်လို့ ကတိပြုထားပြီး နောက်ထပ် အကူအညီတွေလည်း ပေးဦးမယ်၊ ပင်စင်စားတွေကိုလည်း ထပ်တိုးပေးမယ်လို့ ကတိပေးခဲ့ပါတယ်။ ဒါပေမဲ့ သမဂ္ဂတွေဟာ အနည်းဆုံးအခကြေးငွေကို များများစားစား တိုးမြှင့်ပေးဖို့နဲ့ နှစ်တွေကြာလာတာနဲ့အမျှ ပျက်ပြယ်နေတဲ့ အလုပ်သမားဥပဒေတွေ ပြန်လည်ထူထောင်ရေးတို့ကို တောင်းဆိုနေတာ ဖြစ်ပါတယ်။

3 months Ago
More News
Up