ဂန္ထဝင်ဂိုးသမားကြီး

August 5, 2020

စပိန်ဂန္ထဝင်ဂိုးသမားကြီး ကာဆီးလက်စ် ကစားသမားဘဝမှ အနားယူ

စပိန် ဂန္ထဝင် ဂိုးသမားကြီး အီကာကာဆီးလက်စ်က ၂၂ နှစ်ကြာ ကစားသမားဘဝကနေ အနားယူလိုက်ပြီဖြစ်ကြောင်း တရားဝင်ထုတ်ပြန်ပါတယ်။  အသက် ၃၉ နှစ်အရွယ်မှာ ကစားသမားဘဝကို အဆုံးသတ်လိုက်တဲ့ ကမ္ဘာ့ဖလားပိုင်ရှင် ကာဆီးလက်စ်ဟာ ၂၀၁၉ မှာ ပြင်းထန်တဲ့ ကျန်းမာရေးပြဿနာနဲ့ ရင်ဆိုင်ရပြီးချိန်ကတည်းက ပြိုင်ပွဲတွေမှာ ဝင်ရောက်နိုင်ခဲ့ခြင်း မရှိခဲ့သူပါ။  သူဟာ နှလုံးရောဂါကနေ ပြန်လည်သက်သာလာခဲ့ပြီးနောက် ၂၀၁၉-၂၀၂၀ ဘောလုံးရာသီအတွက် ပေါ်တိုအသင်းရဲ့ လူစာရင်းမှာ ထည့်သွင်းခံခဲ့ရပါတယ်။  အနားယူတော့မယ့်အကြောင်းကို ကာဆီးလက်စ်က “အရေးကြီးဆုံးအရာက ခင်ဗျားသွားတဲ့လမ်းကြောင်းနဲ့ ခင်ဗျားဘေးက လူတွေပါ။ ဒီလမ်းကြောင်းအတိုင်း ရောက်သွားတဲ့နေရာမဟုတ်ပါဘူး။ ကျနော့်အနေနဲ့ ပြတ်ပြတ်သားသား ပြောနိုင်တာကတော့ ဒါဟာ မှန်ကန်တဲ့လမ်းကြောင်းတစ်ခု ဖြစ်ခဲ့ပြီးတော့ စိတ်ကူးယဉ်ခဲ့ရတဲ့ အဆုံးသတ်ပါ။ ကျေးဇူးတင်ပါတယ်” လို့ သူ့ရဲ့လူမှုကွန်ရက်မှာ ရေးပါတယ်။ စပိန် ဂိုးသမားကြီးဟာ ရီးရဲလ်မက်ဒရစ်အသင်းမှာ ဆယ်ကျော်သက်အရွယ်ကတည်းက ပါဝင်ခဲ့သူဖြစ်ပြီးတော့ ၇၂၅ ပွဲ ကစားခဲ့ကာ လာလီဂါဖလား ၅ လုံးနဲ့ ချန်ပီယံလိဂ်ဖလား ၃ လုံး ဆွတ်ခူးနိုင်ခဲ့ပါတယ်။ သူဟာ စပိန်အသင်းခေါင်းဆောင်အဖြစ်နဲ့ ၂၀၁၀ ကမ္ဘာ့ဖလားကို ဆွတ်ခူးနိုင်ခဲ့ပြီး ၂၀၀၈ နဲ့ ၂၀၁၂ ခုနှစ်တွေမှာလည်း ဥရောပဖလားကို သိမ်းပိုက်နိုင်ခဲ့ပါတယ်။ သူဟာ ၂၀၁၅ ခုနှစ်မှာ ရီးရဲလ်အသင်းကနေ ပေါ်တိုအသင်းကို ပြောင်းရွှေ့သွားခဲ့ပြီး ပေါ်တူဂီအသင်းအတွက် ၁၅၆ ပွဲ ကစားခဲ့ကာ ဖလား ၂ လုံး ဆွတ်ခူးနိုင်ခဲ့ပါတယ်။ ကစားသမားဘဝက အနားယူခဲ့ပေမယ့် ကာဆီးလက်စ်ကို အားကစားနယ်ပယ်ထဲမှာပဲ ဆက်လက်မြင်တွေ့ရဖွယ်ရှိနေပြီး သူဟာ စပိန်ဘောလုံးအဖွဲ့ချုပ် (RFEF) ရဲ့ ဥက္ကဋ္ဌအဖြစ်လည်း ဝင်ရောက်ယှဉ်ပြိုင်မယ်လို့ ကြေညာထားပါတယ်‌။ ကာဆီးလက်စ် အနားယူသွားခဲ့တဲ့ကိစ္စနဲ့ပတ်သက်ပြီး ရီးရဲလ်မက်ဒရစ်အသင်းက သူတို့ရဲ့ တရားဝင် ဝက်ဘ်ဆိုဒ်ကနေတဆင့် ကြေညာချက်တစ်စောင် ထုတ်ပြန်ဂုဏ်ပြုခဲ့ပါတယ်။  ကာဆီးလက်စ်ဟာ ရီးရဲလ်အသင်းနဲ့အတူ လာလီဂါဖလား၊ ချန်ပီယံလိဂ်ဖလားတွေအပြင် Super de Espanan ဖလား ၄ ကြိမ်၊ UEFA စူပါဖလား ၂ ကြိမ်၊ ကမ္ဘာ့ကလပ်များဖလား ၁ ကြိမ်တို့ကိုပါ ဆွတ်ခူးနိုင်ခဲ့သူ ဖြစ်ပါတယ်။ အသင်းလိုက် ဆုဖလားတွေအပြင် ကာဆီးလက်စ်ဟာ လာလီဂါရဲ့အကောင်းဆုံး ဂိုးသမားဆုကို ၂ ကြိမ်ရရှိခဲ့ပြီး FIFA FIFAPro ကမ္ဘာ့အကောင်းဆုံးကစားသမား ၁၁ ဦး စာရင်းမှာလည်း ၅ ကြိမ် ပါဝင်ခွင့်ရရှိခဲ့သူ ဖြစ်ပါတယ်။ သူဟာ ၂၀၁၀ ခုနှစ်မှာ ကမ္ဘာ့ဖလားရွှေလက်အိတ်ဆုကို ရရှိခဲ့ပြီး ၂၀၁၉ ခုနှစ်မှာ Primeira Liga အကောင်းဆုံး ဂိုးသမားဆိုကို ရရှိခဲ့ပါတယ်။  သူဟာ စပိန်အသင်းနဲ့အတူ ကမ္ဘာ့ဖလား ၄ ကြိမ် ပါဝင်ခွင့်ရရှိခဲ့ပြီး အသင်းရဲ့သမိုင်းတလျှောက် ဒုတိယမြောက် ပွဲအများဆုံးကစားထားသူ ဖြစ်ကာ ချန်ပီယံလိဂ်သမိုင်းတ‌လျှောက် ပွဲအများဆုံးကစားထားသူ၊ clean sheet အများဆုံး ရရှိထားသူနဲ့ ပင်နယ်တီကာကွယ်မှု အများဆုံး ပြုလုပ်ထားသူဆိုတဲ့ မှတ်တမ်းကိုလည်း ပိုင်ဆိုင်ထားပါတယ်။
1 year Ago

March 3, 2020

ဒီဂီယာ လက်စွမ်းကျနေသည့်အပေါ် ဂန္ထဝင်ဂိုးသမားကြီး ပီတာရှမိုက်ကယ် ဝေဖန် 

မန်ယူဂိုးသမား ဒီဂီယာ အမှားများနေတာဟာ ရီးရဲလ်ကို ပြောင်းရွှေ့ဖို့ ပျက်ပြားခဲ့တာနဲ့ သက်ဆိုင်နေနိုင်ကြောင်း ယူနိုက်တက်အသင်းရဲ့ တချိန်က ဂန္ထဝင်ဂိုးသမားကြီး ပီတာရှမိုက်ကယ်က သုံးသပ်ပြောပါတယ်။  ဒီဂီယာဟာ ဒီအပြောင်းအရွှေ့ကိစ္စမတိုင်ခင်အထိ ယူနိုက်တက်အသင်းအတွက် ယုံကြည်ရတဲ့ ဂိုးသမားတဦး ဖြစ်ခဲ့ပေမယ့် နောက်ပိုင်းမှာတော့ လက်စွမ်းကျဆင်းလာကာ အမှားများစွာကိုလည်း ဆက်တိုက်ကျူးလွန်ခဲ့ပါတယ်။  ဒီဂီယာဟာ ပြီးခဲ့တဲ့ အဲဗာတန်အသင်းနဲ့ ပွဲစဉ်မှာလည်း ချီတုံချတုံ ဖြစ်ကာ ဆုံးဖြတ်ချက် မပြတ်သားတဲ့ အမှားအယွင်းတခုကို ကျူးလွန်ခဲ့ပြီး ဒီအမှားကြောင့်ပဲ ယူနိုက်တက်အသင်းကို အဲဗာတန်တိုက်စစ်မှူး ကယ်ဗတ်လီဝိန်းရဲ့ သွင်းဂိုးကို ခွင့်ပြုပေးလိုက်ရပါတယ်။  ဒီဂီယာရဲ့ ပယောဂမကင်းမှုကြောင့် ယူနိုက်တက်အသင်း ပေးလိုက်ရတဲ့ ပေးဂိုး အရေအတွက်ဟာ ၇ ဂိုးအထိ ရှိလာပြီး ဒါဟာအသင်းအတွက် ခံစစ်ပိုင်းဆိုင်ရာ ကြီးမားတဲ့ ယိုယွင်းမှုတခုလည်း ဖြစ်ပါတယ်။  မန်ယူနိုက်တက်အသင်းအတွက် အကောင်းဆုံးကစားသမားဆုကို ၄ ကြိမ်တိုင်တိုင် ရရှိခဲ့တဲ့ ဒီဂီယာရဲ့ လက်စွမ်း သိသိသာသာ ကျဆင်းလာရတာဟာ အာရုံစူးစိုက်မှု နည်းပါးခြင်းကြောင့် ဖြစ်တယ်လို့  ရှမိုက်ကယ်က သုံးသပ်ပါတယ်။  “ထိပ်တန်းကလပ်အသင်းတွေအတွက် ချန်ပီယံဆုတွေကို ဆွတ်ခူးဖို့ ဘယ်အရာကိုမှ လွယ်လွယ်ကူကူနဲ့ ခွင့်မပြုလိုက်ဖို့ လိုအပ်ပါတယ်။ ခင်ဗျားတို့ ဒီလိုလုပ်လို့ မရပါဘူး။ ပွဲ ၇ မှာ အမှားအယွင်း ၇ ခုက အမှတ်တွေ လျော့အောင် လုပ်ခဲ့ပါတယ်။ ဒါဟာ အရမ်းများတဲ့ အရေအတွက်ပါ။ ဒါဟာ ထိပ်တန်းကလပ်အသင်းတခုအတွက် အရမ်းများတဲ့ အရေအတွက် ဖြစ်ပြီးတော့ ဒီဂီယာအနေနဲ့ ဒီအခြေအနေကို ပြောင်းလဲပစ်ဖို့ လိုအပ်နေပါပြီ။ သူ ပိုပြီးတော့ အာရုံစူးစိုက်မှု ရှိသင့်နေပါပြီ” လို့လည်း ရှမိုက်ကယ်က ပြောပါတယ်။  ဒါ့အပြင် ဒီဂီယာရဲ့ အခုလို ကျဆင်းလာမှုကို ခြေရာခံကြည့်မယ်ဆိုရင် ရီးရဲလ်အသင်းကို ပြောင်းရွှေ့ဖို့ကိစ္စ ပျက်ပြားသွားခဲ့ခြင်းကနေ စတင်ခဲ့တယ်လို့လည်း သူက ယူဆထားပါတယ်။ အသင်းမပြောင်းဖြစ်ခဲ့တဲ့နောက် ဒီဂီယာဟာ ယူနိုက်တက်အသင်းနဲ့ စာချုပ်သစ် ထပ်မံချုပ်ဆိုခဲ့ပါတယ်။  ဒါပေမဲ့ ဂန္ထဝင်ဂိုးသမားကြီး ပီတာရှမိုက်ကယ်က “သူ ရီးရဲလ်မက်ဒရစ်ကို မပြောင်းရွှေ့နိုင်ခဲ့တာကြောင့် ဖြစ်ပေါ်လာတဲ့ စိတ်ပျက်မှုက အရာအားလုံးကို ဖြစ်ပေါ်စေခဲ့တာပါ။ သူ့လိုမျိုး အတွေ့အကြုံရင့် ကစားသမားတယောက်အနေနဲ့ ဒီကိစ္စကို အဖြေရှာပြီး အောင်အောင်မြင်မြင် ကျော်ဖြတ်သွားဖို့ လိုအပ်ပါတယ်။ ဒီလို အမှားတွေသာ မရှိခဲ့ရင် လူတွေကလည်း ဒီကိစ္စတွေအပေါ် အာရုံစိုက်နေမှာ မဟုတ်ပါဘူး။ တကယ်လို့ လူတွေက ခင်ဗျားရဲ့ စွမ်းဆောင်ရည်နဲ့ပတ်သက်ပြီး တခုခုကို လက်ညှိုးထိုး အပြစ်တင်နေတယ်ဆိုရင် ခင်ဗျားအနေနဲ့ ဒီကိစ္စကြီးကို တကယ့်ပြဿနာကြီးတခုအဖြစ် ကိုယ့်ကိုယ်ကိုယ် ယုံကြည်လာတတ်ပါတယ်။ ဒါဟာ အခု ဒီဂီယာ ကြုံတွေ့နေရတဲ့ အခက်အခဲလည်း ဖြစ်နိုင်ပါတယ်” လို့လည်း ပြောပါတယ်။
2 years Ago
Up