မကွေးတိုင်း၊ ဂန့်ဂေါမြို့နယ်မြောက်ပိုင်း ယောဒေသမှာ စစ်ကောင်စီအကြမ်းဖက်တပ်တွေနဲ့ ဒေသခံတချို့ အပြန်အလှန်ပစ်ခတ်မှုတွေဖြစ်ပွားပြီး ရွာသားတချို့ သေဆုံး ဒဏ်ရာရ ဖမ်းဆီးခံ ခဲ့ရပါတယ်။
ဒီကနေ့ မတ်လ ၃၁ ရက်နေ့ ပစ်ခတ်မှုမှာ ပျားရွာသား တစ်ဦး ကျဆုံးကာ တချို့ ဒဏ်ရာရခဲ့ ပြီး ပတောင်ခင်ရန်းရွာက ရွာသား ၄ ဦးထိခိုက်ဒဏ်ရာရရှိခဲ့တဲ့အပြင် လူတစ်ချို့ဖမ်းဆီးခံခဲ့ရပါတယ်။
ဒါ့အပြင် ဒီနေ့ ညနေပိုင်းကလည်း ကလေးမြို့နယ်တောင်ပိုင်း နတ်ချောင်း၊ နတ်မြောင်းကျေးရွာဘက်မှာ ထိပ်တိုက်တွေ့ဆုံမှုရှိခဲ့ပြီး ပြည်သူ ၂ ဦး ကျဆုံးခဲ့ပါတယ်။
မတ်လ ၃၀ ရက်နေ့ကလည်း ဂန့်ဂေါ-ကလေးကားလမ်းမှာ စစ်ကောင်စီအကြမ်းဖက်တပ်တွေနဲ့ ဒေသခံတချို့ အပြန်အလှန်ပစ်ခတ်မှုကြောင့် ဟံသာဝတီ၊ နှမ်းခါး၊ အလယ်ရွာတို့မှ ပြည်သူ ၁ ဦးစီ သေနတ်ထိမှန် ကျဆုံးခဲ့ပါတယ်။
အဆိုပါ ပစ်ခတ်မှုမှာ စစ်ကောင်စီအကြမ်းဖက်တပ်တွေဘက်က ထိခိုက်ကျဆုံးမှု အခြေအနေကိုတော့ မသိရသေးပါဘူး။
ဂန့်ဂေါမြို့နယ် ဟံသာဝတီရွာအနီးမှာ မတ်လ ၃၀ ရက်နေ့က ညနေပိုင်းက အကြမ်းဖက် စစ်ကောင်စီတပ်တွေရဲ့ ပစ်ခတ်မှုကြောင့် နှမ်းခါးကျေးရွာက မောင်ဇော်ဇော်မြင့် (ခေါ်) ဖိုးသားလေး ရင်ဘတ်ဖောက်ဝင်ဒဏ်ရာနဲ့ သေဆုံးခဲ့ပြီး ၂ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
ဒီမနက်ပိုင်းမှာလည်း တောင်ခင်ရန်းကျေးရွာအနီးမှာ ထိတွေ့မှု ထပ်မံဖြစ်ပွားကာ ဒေသခံလို့ ယူဆရတဲ့ တူမီးကိုင်ထားသူတွေဘက်က ၈ ဦးခန့် ထိမှန်ခဲ့ပြီး တချို့ သေဆုံးခဲ့တယ်လို့ သိရပါတယ်။
ထိခိုက်သေဆုံး အသေးစိတ်ကိုတော့ အတည်ပြုနိုင်ခြင်းမရှိသေးပါဘူး။ ဒါ့အပြင် ဂန့်ဂေါမြို့ပေါ်နဲ့ အနီးဝန်းကျင်ထိပ်တိုက်တွေ့ရာမှာလည်း ပျားရွာက လူငယ် ၁ ဦးကျဆုံးပြီး ၂ ဦး ထိခိုက်ဒဏ်ရာရရှိတယ်လို့ ဆိုပါတယ်။ အဆိုပါ ထိတွေ့ပစ်ခတ်မှုတွေနဲ့ပတ်သက်လို့ ဆက်သွယ်ရေး အခြေအနေအရ သီးခြားအတည်ပြုနိုင်ခြင်း မရှိသေးပါဘူး။
စစ်ကောင်စီရဲ့ အကြမ်းဖက်လက်နက်ကိုင်တပ်ဘက်လည်း ထိခိုက်ကျဆုံးမှုတွေရှိတယ်လို့ ဒေသခံတွေကတော့ ပြောပါတယ်။
ဂန့်ဂေါမြို့နယ်အတွင်းမှာ တူမီးသေနတ်တွေက တခြားဒေသက တိုင်းရင်းသားတွေလိုပဲ ရိုးရာအမဲလိုက် လက်နက်အဖြစ် အသုံးပြုကြတာလည်း ဖြစ်ပါတယ်။
လက်ရှိအနေအထားအရ ကလေး၊ ဂန့်ဂေါတို့မှာ စစ်ကောင်စီရဲ့ အကြမ်းဖက်တပ်တွေကို ရရာလက်နက်တွေနဲ့ အန်တုရင်ဆိုင်နေကြတာပါ။
မကွေးတိုင်း၊ ဂန့်ဂေါမြို့နယ်ရှိ ရပ်ကွက်ကျေးရွာတွေကို အာဏာသိမ်းစစ်ကောင်စီရဲ့ အကြမ်းဖက် လက်နက်ကိုင်တပ်တွေက တရားမဲ့ပြုကျင့်ကာ နေအိမ်တွေကို ဝင်ရောက်ရှာဖွေပြီး အဖိုးတန်ပစ္စည်းတွေကို ယူဆောင်နေတယ်လို့ ဒေသခံတွေက ပြောပါတယ်။
မတ်လ ၂၅ ရက်နေ့ မနက်ပိုင်းက ဂန့်ဂေါမြို့နယ် မြောက်ပိုင်းရှိ ကန်၊ ကန်သာ စတဲ့ ကျေးရွာတွေကို အင်အားအလုံးအရင်းနဲ့ဝင်ရောက်ကာ ရွာခံတချို့ရဲ့ လမ်းညွှန်ပြတဲ့ နေအိမ်တချို့ကို ဝင်ရောက်ရှာဖွေနေပြီး ငွေသားနှင့် အဖိုးတန်ပစ္စည်းတွေ ယူဆောင်သွားတယ်လို့ ဆိုပါတယ်။
ကန်သာကျေးရွာအတွင်းဝင်ရောက်ရှာဖွေမှုမှာ CDM ပြုလုပ်နေတဲ့ ကျန်းမာရေး ဝန်ထမ်းတချို့ရဲ့ နေအိမ်လည်းပါဝင်ပြီး အဆိုပါအိမ်က ငွေကျပ် ငါးသောင်းကျော်၊ ရွှေကြယ်သီးနှင့် ဘလူးတုဘောက်တွေ ယူဆောင်သွားတဲ့အပြင် နေအိမ်တံခါးကိုလည်း ရိုက်ချိုးဖျက်ဆီးသွားတယ်လို့ မျက်မြင်ဒေသခံတွေထံက သိရပါတယ်။
ကန်ကျေးရွာနေအိမ်တချို့ရှာဖွေရာမှာတော့ ဘာမှ မတွေ့ရဘဲ လူငယ်နှစ်ဦး ဖမ်းဆီးခံရ တယ်လို့ ဆိုပါတယ်။ ကန်၊ ကန်သာကျေးရွာတွေက မကွေးတိုင်း လျှပ်စစ်၊ ပတ်ဝန်းကျင် ထိန်းသိမ်းရေးဝန်ကြီး ဦးမြင့်ဇော်ရဲ့ ကျေးရွာဖြစ်တယ်လို့ သိရပါတယ်။
မနေ့ကလည်း ဂန့်ဂေါမြို့အနီးက ပြား၊ ရှုံးရှီ စတဲ့ကျေးရွာတွေကို ဝင်ရောက်ရှာဖွေမှုတွေ ရှိတယ်လို့ သိရပါတယ်။ ရပ်ကွက် ကျေးရွာတွေကို ဝင်ရောက်ရှာဖွေရာမှာ ဒလန်တွေက ရှာရမယ့်နေအိမ်တွေကို လမ်းညွှန်တာတွေလုပ်နေပြီး တချို့ရပ်ကွက်ကျေးရွာတွေမှာတော့ ဒလန်အိမ်တွေကို ပြည်သူတွေက ခဲနဲ့ထုတာတွေလည်း ရှိတယ်လို့ ဒေသခံတွေက ပြောပါတယ်။
ဂန့်ဂေါမြို့နယ်မှာ စစ်ကောင်စီရဲ့ အကြမ်းဖက်လက်နက်ကိုင်တပ်တွေရဲ့ ပစ်သတ်မှုကြောင့် အသက် ၆၀ ကျော် အမျိုးသမီးတစ်ဦးကျဆုံးထားပါတယ်။
ဂန့်ဂေါခရိုင်အနေနဲ့ စစ်ကောင်စီ အကြမ်းဖက်လက်နက်ကိုင်တပ်တွေရဲ့ ပစ်ခတ်မှုကြောင့် ကျဆုံးသူ နှစ်ဦးရှိပြီလည်းဖြစ်ပါတယ်။
