ချွန်းပူးရီးခရိုင်

November 21, 2022

ထိုင်းနိုင်ငံ ချွန်းပူးရီးခရိုင်တွင် မြန်မာအလုပ်သမား ၁ ဦး လူသတ်မှုဖြင့် ဖမ်းဆီးခံရ

ထိုင်းနိုင်ငံအရှေ့ပိုင်း၊ ချွန်းပူးရီးခရိုင်၊ ဘန်လမွန်မြို့နယ်ထဲမှာ မြန်မာရွှေ့ပြောင်းလုပ်သား တယောက် လူသတ်မှုနဲ့ ဖမ်းဆီးခံရတယ်လို့ ချန်နယ်လ် ၇ ထိုင်းတီဗွီသတင်းမှာ ဖော်ပြပါတယ်။

ဘန်လမွန်မြို့ ဘန်လမွန်ရပ်ကွက် ကုန်တင်ကုန်ချအလုပ်သမားတန်းလျားမှာ မနေ့ နိုဝင်ဘာ ၂၀ ရက် ညနေက ဓားထိုးမှုဖြစ်ပြီး ဒဏ်ရာရသူရှိကြောင်း အကြောင်းကြားချက်ရတဲ့အတွက် လူနာတင်ယာဉ်နဲ့အတူ သွားရောက်စစ်ဆေးခဲ့တယ်လို့ ဘန်လမွန်နယ်မြေရဲတပ်ဖွဲ့ တာဝန်ရှိသူက ပြောပါတယ်။

ရဲတပ်ဖွဲ့က ရောက်ရှိသွားချိန်မှာ အသက် ၂၉ နှစ်အရွယ် အလုပ်သမား တယောက် ရင်အုံမှာ ဓားထိုးဒဏ်ရာနဲ့ သွေးထွက်လွန်ပြီး သေဆုံးသွားခဲ့ပြီလို့ ဆိုပါတယ်။

အနီးနားနေ အလုပ်သမားတွေရဲ့ ပြောပြချက်အရ သေဆုံးသူနဲ့ အသက် ၄၂ နှစ်ရွယ် မြန်မာလုပ်သား တယောက်တို့ဟာ ဒီမတိုင်ခင်က တခြားသူတွေနဲ့အတူ အရက်ဝိုင်းဖွဲ့သောက်နေကြောင်း၊ အတန်ငယ်မူးလာတော့ ဘာသာရေးအကြောင်းနဲ့ပတ်သက်လို့ အငြင်းအခုံဖြစ်ကာ နှစ်ယောက်သား စကားများရန်ဖြစ်ခဲ့တယ်လို့ မျက်မြင်သက်သေတွေက ပြောပါတယ်။

အဲဒီနောက် သူတပြန်ကိုယ်တပြန် လုံးထွေးသတ်ပုတ်ရင်း နိုင်းအဲမ်ဆိုသူ မြန်မာအလုပ်သမားက နိုင်းနာ့သ်ဖုန်းကို ဓားနဲ့ ၂ ကြိမ်ထိုးခဲ့ကြောင်း၊ နိုင်းနာ့သ်ဖုန်း လဲကျသွားတော့ နိုင်းအဲမ်လည်း ထွက်ပြေးသွားတယ်လို့ ဆိုပါတယ်။

တာဝန်ရှိသူတွေက နိုင်းအဲမ်ကို လိုက်လံစုံစမ်းရှာဖွေရာ အဲဒီည သန်းခေါင်လောက်မှာပဲ အခင်းဖြစ်တဲ့နေရာနဲ့ ၁၀ ကီလိုမီတာခန့်ဝေးတဲ့ ဆီရီရားချားမြို့နယ် ဘန့်နောင်ဖန်ဖွဲရပ်ကွက်ရှိ သူ့ရဲ့ အရင်အလုပ်ရှင်ဟောင်းရဲ့ ကြက်ခြံထဲမှာ ပုန်းနေတာကို တွေ့ရှိခဲ့ပါတယ်။

အဲဒီနောက် လူသတ်ရာမှာ အသုံးပြုခဲ့တဲ့ ၁ ပေခန့်အရှည်ရှိဓား ဝှက်ထားတဲ့နေရာကို လိုက်ပြခဲ့ပါတယ်။ နိုင်းအဲမ်က ဓားနဲ့ထိုးခဲ့ကြောင်း ဖွင့်ဟဝန်ခံပြီး သတင်းထောက်တွေက ဘာပြောချင်လဲလို့ မေးရာမှာ သူက “တောင်းပန်ပါတယ်” လို့ပဲ တိုတိုတုတ်တုတ် ပြောသွားပါတယ်။

ဘန်လမွန်ရဲတပ်ဖွဲ့က သူ့ကို လူသတ်မှုနဲ့ ကနဦးအမှုဖွင့်ထားတယ်လို့ သတင်းမှာ ဖော်ပြထားပါတယ်။

1 week Ago

September 27, 2022

ထိုင်းအမျိုးသမီးတဦးအား မုဒိမ်းကျင့်ရန်ကြိုးစားသည့် မြန်မာ ၁ ဦး ဖမ်းဆီးခံရ

ထိုင်းနိုင်ငံ၊ ချွန်းပူးရီးခရိုင်၊ ဘန့်ဘိန်မြို့ နောင်ချန်းရပ်ကွက်ရှိ အလုပ်သမားတန်းလျားမှာ ထိုင်းအမျိုးသမီး ၁ ဦးကို မုဒိမ်းကျင့်ဖို့ကြိုးစားတဲ့ မြန်မာ ၁ ဦး ဖမ်းဆီးခံရတယ်လို့ ချနယ်လ် ၇ ထိုင်းတီဗွီသတင်းမှာ ဖော်ပြပါတယ်။ 

စန်းလွင် လို့ခေါ်တဲ့ မြန်မာလုပ်သား ၁ ဦးဟာ ပြီးခဲ့တဲ့ စက်တင်ဘာ ၂၅ ရက်နေ့ညက သူ့တည်းတဲ့ အခန်းနဲ့ မျက်နှာချင်းဆိုင်အခန်းထဲကို ဝင်သွားပြီး အိပ်ပျော်နေတဲ့ အမျိုးသမီးရဲ့ခန္ဓာကိုယ်ကို အုပ်မိုးကာ အဓမ္မကျင့်ဖို့ ကြိုုးစားစဉ် အမျိုးသမီး ရုတ်တရက်နိုးလာပြီး အော်ဟစ်အကူအညီ တောင်းသလို ခြေနဲ့လည်း ဆောင့်ကန်ပစ်လိုက်တယ်လို့ ဆိုပါတယ်။ 

အမျိုးသမီး အော်သံကြောင့် တခန်းတည်းအိပ်နေတဲ့ အသက် ၆၇ နှစ်ရွယ် မိခင်ဖြစ်သူလည်း နိုးလာပြီး စန်းလွင် လဲကျသွားတာနဲ့ တခါတည်းဖမ်းချုပ်ကာ လက်ကိုကြိုးနဲ့ချည်နှောင်ပြီး ရဲကို အကြောင်းကြားလိုက်တာလို့ မိခင်က ရဲတွေကို ပြောပါတယ်။ 

ဒီမတိုင်ခင် နေ့ခင်းက စန်းလွင်ဟာ အိမ်ရှေ့မှာရပ်ထားတဲ့ သူတို့ ဟိုင်းလပ်ကားပေါ်ကို ခပ်တည်တည်နဲ့ တက်ထိုင်ခဲ့ကြောင်း၊ မိခင်ဖြစ်သူကလည်း သူ့ကို သင်္ကာမကင်းဖြစ်ပြီး မကောင်းတာလုပ်မှာစိုးလို့ အလင်းရောင်ရအောင် သမက်ကိုခေါ်ပြီး မီးလုံးထပ်ဆင်ခဲ့ကြောင်း၊ ညရောက်တော့လည်း တံခါးကို သေချာပိတ်ပြီးမှ အိပ်ရာဝင်တာတောင် ရအောင်ဝင်ခဲ့သေးတယ်လို့  မိန်းကလေးမိခင်က ဆက်ပြောပါတယ်။ 

စန်းလွင်ကလည်း သူဟာ အလုပ်ရှာဖို့ အဲဒီမှာ လာတည်းခိုကြောင်း၊ အမျိုးသမီးကို မြင်တော့ စိတ်ဝင်စားပြီး ညအချိန်မှာ အခန်းတံခါးဖွင့်ပြီး အဓမ္မပြုကျင့်ဖို့ ဝင်သွားခဲ့တာလို့ ဝန်ခံပါတယ်။ 

အသက် ၇၆ နှစ်ရွယ် အဘွားကြီးက လွယ်လွယ်ကူကူနဲ့ ဖမ်းချုပ်နိုင်တာကတော့ သူဟာ အအိပ်အစားပျက်ပြီး ထမင်းမစားရတာ ၃ ရက်ရှိပြီမို့ ရုန်းကန်ရန်အားမရှိဘူးလို့ ဖြေဆိုပါတယ်။ သူဟာ ဘယ်ကလာလို့ ဘယ်ကိုသွားမလဲဆိုတာတော့ အတိအကျမဖြေဆိုဘဲ ကြောင်တောင်တောင်လို ဖြစ်နေတယ်လို့ ဆိုပါတယ်။ 

ဘန့်ဘိန်နယ်မြေရဲစခန်းကတော့ သူ့ကို သူတပါးနယ်မြေ ဝင်ရောက်ကျူးကျော်မှု၊ အချိန်မတော် သူများအခန်းထဲ ခိုးဝင်မှု၊ အမျိုးသမီးအား အဓမ္မပြုကျင့်ဖို့ ကြိုးစားမှု စတဲ့ပုဒ်မတွေနဲ့ အမှုဖွင့်ထားတယ်လို့ သတင်းမှာ ဖော်ပြသွားပါတယ်။

2 months Ago
Up