ချောစုခင်

September 5, 2020

ဝင်းဦး သီချင်းကို ချောစုခင်သီဆိုမှုနှင့် ခံစားနားဆင်ကြရမယ့် “အတွယ်အတာ” ရုပ်ရှင်ဇာတ်ဝင်တေး (ရုပ်သံ)

“သံသာသာ တေးဖွဲ့လို့သီဆိုမှာပါ… ဒီကမ္ဘာမှာ အပြုံးပန်းနဲ့ ကြိုင်လှိုင်စေရာ… မောင်မယ်တွေ အေးချမ်းတဲ့ သီတာရေပမာ… နှလုံးသားချင်း အမြဲစစ်ခင်း… ဖယ်ရှင်း ဖျောက်ခွာ… သူနိုင်ငါညှဉ်းကြတဲ့ ဒီမြေပြင်ကမ္ဘာ… တူပြိုင်ကာ မတင်းကြနဲ့ ညီစေချင် တာ… ရင်အုံလွှာ အသည်းကြားက… ကြည်လင်စေတနာ… အမုန်းမပွားပဲ ချစ်စေ ကြောင်း… တောင်းဆုဝေဖြာ” ဒီသီချင်းကတော့ နာမည်ကြီးရုပ်ရှင်ကားတကားဖြစ်တဲ့ ၁၉၇၂ ခုနှစ်တုန်းက ထွက်ရှိခဲ့တဲ့ အတွယ်အတာရုပ်ရှင်ကားထဲက ဇာတ်ဝင်တေးတပုဒ်ဖြစ်ပြီး တေးရေး ဂီတလုလင် မောင်ကိုကိုက ရေးဖွဲ့ပေးထားခဲ့ကာ တေးသံရှင်ဝင်းဦးက သီဆိုထားခဲ့တာပါ။ ဒီရုပ်ရှင်ကားကိုတော့ စန္ဒာရုပ်ရှင်ထုတ်လုပ်ရေးက ရိုက်ကူးထုတ်လုပ်ခဲ့တာဖြစ်ပြီး ဒါရိုက်တာ ထွန်းထွန်းက ရိုက်ကူးပုံဖော်ထားခဲ့ကာ သရုပ်ဆောင်တွေအနေနဲ့ ဝင်းဦးနဲ့ ကလေးသရုပ်ဆောင် စန္ဒာတို့က အဓိကပါဝင်ထားကြတာပါ။ အပြစ်ကင်းစင်တဲ့ ကလေးငယ်တဦးနဲ့ ဒုစရိုက်သမားတဦးတို့ကြားက ဆန်းကြယ်တဲ့ ၅၂၈ သံယောဇဉ်အကြောင်းကို အကွက်ကျကျ ရိုက်ကူးထားတဲ့ ဒီရုပ်ရှင်ဟာ သရုပ်ဆောင်မင်းသမီးမပါပဲ ထူးထူးခြားခြား ရိုက်ကူးထားတဲ့ ဇာတ်ကားတကားအနေနဲ့ မှတ်တမ်းဝင်ခဲ့ပါတယ်။ “အနီးအဝေးမရွေး အစဉ်ကြင်နာစိတ်ဖြာ… အနိမ့်အမြင့်အဆင့်ဟာ ရင်မှာအနှစ် ဗလာ… ငါဆိုသည်ငါ လွင့်ပါးသင့်တာ… ချင့်တွယ်စရာ မြန်မကြာ ထံတျာတေးကဗျာ… ရင်ဝယ်ချစ်ဆေးကျွေးမှ လူမှန်ပေတာ… ခိုင်မာစွာ သမုဒယဖွဲ့ ချီနှောင်ကာသာ… ကြာကြာလေ ရစ်ပတ်လို့ ခင်မင်တွယ်တာ… လောကရဲ့အလှ ပန်းချီရေး… အေးချမ်းသာယာ” ဒီသီချင်းကိုတော့ ခုတခါမှာ မြန်မာ့ရုပ်ရှင်နှစ် ၁၀၀ ပြည့် ဂုဏ်ပြုသီဆိုပွဲမှာ အမျိုးသမီးတေးသံရှင် ချောစုခင်ရဲ့ တကျော့ပြန် သီဆိုဟန်နဲ့ ရှုစားနားဆင်ကြရမှာ ဖြစ်ပါတယ်။ ဂီတလောကမှာ ဆယ်စုနှစ် ၃ စုနီးပါး ဖြတ်သန်းခဲ့ပြီဖြစ်တဲ့ ချောစုခင်ဟာ ဆေးရောင်စုံ မိန်းကလေး၊ တစ်ခါချစ်ခွင့်စတဲ့ တကိုယ်တော် တေးအယ်လ်ဘမ်တွေနဲ့ ဂီတလောကထဲ စတင်ဝင်ရောက်ခဲ့ပြီး အဆိုတော် ဇော်ပိုင်နဲ့ စုံတွဲထွက်ရှိခဲ့တဲ့ အကြင်နာ အင်အားတေးအယ်လ်ဘမ်ကတော့ သူ့ကို ပရိသတ်အခိုင်အမာရရှိစေတဲ့ တေးအယ်လ်ဘမ်တချပ် ဖြစ်ခဲ့ပါတယ်။ နောက်ပိုင်းမှာတော့ ခိုင်မြဲသောအချစ်၊ မင်းကြိုက်သလိုချစ်တော့၊ မရွာဘဲမိုးခြိမ်းတယ်၊ ချစ်သူသိုးကလေး၊ မြက်ခင်းပေါ်က အိပ်မက်များ၊ နှစ်ယောက်တည်းကမ္ဘာ၊ စီးဆင်းချင်တယ်၊ ကိုကိုမူပိုင်၊ နေရောင်ခြည်ရဲ့အနမ်း၊ အချစ်စစ်ရဲ့လမ်းစတဲ့ တေးအယ်လ် ဘမ်တွေ ထွက်ရှိခဲ့ကာ သီချင်းပုဒ်ရေ ၂၀၀ ကျော်လောက် သီဆိုထွက်ရှိခဲ့ပါတယ်။ တခြားအတွဲတေးအယ်လ်ဘမ်တွေမှာရော၊ နာမည်ကြီး အဆိုတော်တွေရဲ့ သီချင်း တွေကို ပြန်ဆိုတေးအဖြစ် မြန်မာသံအနေနဲ့ရော စတီရီယိုတေးသီချင်းတွေကိုပါ ချိုကြည် ဩရှတဲ့ အသံနဲ့ ပိုင်ပိုင်နိုင်နိုင် သီဆိုနိုင်တဲ့ ချောစုခင်ရဲ့ သီဆိုမှုဟာ ခုတခါ “အတွယ်အတာ”သီချင်းထဲမှာလည်း လတ်ဆတ်နေဆဲ ဖြစ်နေတာကို ခံစားနားဆင်ကြရမှာ ဖြစ်ပါတယ်။
1 year Ago

September 2, 2020

မြန်မာ့ရုပ်ရှင်ရာပြည့် ဂီတဖျော်ဖြေပွဲ မေဆွိ၊ ချောစုခင်၊ နီနီခင်ဇော်နှင့် အနုပညာရှင်များ ပါဝင်ဖျော်ဖြေမည်

အခုနှစ်မှာ ကျရောက်တဲ့ မြန်မာ့ရုပ်ရှင်ရာပြည့်အထိမ်းအမှတ်အနေနဲ့ ရုပ်ရှင်တေး သီချင်းအပုဒ် ၁၀၀ ကို မြန်မာ့ရုပ်မြင်သံကြားကနေ အပတ်စဉ် ထုတ်လွှင့်ပြသပေးနေပြီး ခုလာမယ့် သီတင်းပတ် ၅ ပတ်မြောက်ပွဲစဉ်မှာတော့ မေဆွိ၊ ၊ ချောစုခင်၊ နီနီခင်ဇော်တို့နဲ့ အတူ တခြားအနုပညာရှင်တွေ ဖျော်ဖြေသွားဖို့ ရှိနေပါတယ်။ ဒီအစီအစဉ်ကိုတော့ အပတ်စဉ် သောကြာနေ့ ၈ နာရီသတင်းအစီအစဉ်အပြီးမှာ ထုတ်လွှင့်နေတာဖြစ်ပြီး ပြီးခဲ့တဲ့ ဩဂုတ် ၇ ရက်နေ့ကတော့ ပွဲစဉ် ၁ အဖြစ် မောင်သိန်းဝင်း ၊ R ဇာနည်၊ နေမင်းအိမ်၊ ဟေမာနေဝင်း၊ စိုးပြည့်သဇင်၊ ချစ်စနိုးဦး၊ ခင်ပိုးပန်းချီ၊ မေ့ချစ်သက်နဲ့ မေလသံစဉ်တို့က ဖျော်ဖြေ တင်ဆက်ခဲ့ကြပါတယ်။ ဩဂုတ်လ ၁၄ ရက်နေ့ ဖျော်ဖြေပွဲအမှတ်စဉ် ၂ မှာတော့ ဂီတမှူးစန္ဒရား ကိုခင်လှ၊ စန္ဒရားတင်ကိုကိုတို့ရဲ့ မြန်မာမှုတေးဂီတအဖွဲ့နဲ့အတူ ထား၊ ချိုပြုံး၊ ရီရီသန့်၊ ခင်ညွန့်ရည်၊ တက္ကသိုလ်လဲ့လဲ့၊ နှင်းရည်သန့်၊ ခင်ပိုးပန်းချီတို့နဲ့ တခြားအဆိုတော်တွေက ဖျော်ဖြေတင် ဆက်ခဲ့ကြတာပါ။ ဩဂုတ်လ ၂၁ ရက်နေ့ ဖျော်ဖြေပွဲအမှတ်စဉ် ၃ အနေနဲ့ အင်ပါ ယာတေးဂီတအဖွဲ့နဲ့ အတူ နာမည်ကျော် အဆိုတော်တွေဖြစ်ကြတဲ့ ဇော်ဝင်းထွဋ်၊ ရင်ဂို၊ ဝိုင်းစုခိုင်သိန်းတို့ အပြင် တခြားအဆိုတော်တွေဖြစ်ကြတဲ့ စည်သူလွင်၊ အောင်လ၊ ဝေလ၊ မေသက်ထားဆွေ၊ ဂျူဝယ်လ်၊ အေးမြဖြူ တို့က တင်ဆက်ပေးခဲ့ကြတာ ဖြစ်ပါတယ်။ ပြီးခဲ့တဲ့ ဩဂုတ်လ ၂၇ ရက်နေ့ ဖျော်ဖြေပွဲအမှတ်စဉ် ၄ မှာတော့ မြန်မာသံ အဆိုတော်ကြီးတွေဖြစ်ကြတဲ့ ထား၊ ရီရီသန့်၊ တင်ဦးလေးတို့နဲ့အတူ ခင်စိုးဝင်း၊ စိမ်းလဲ့လဲ့၊ ဝိုင်းလမင်းအောင်၊ မေသက်ထားဆွေစတဲ့ အဆိုတော်ပေါင်းများစွာကသီဆိုဖျော်ဖြေခဲ့ကြ တာပါ။ အခုလာမယ့် စက်တင်ဘာလ ၄ ရက်နေ့ ဖျော်ဖြေပွဲအမှတ်စဉ် ၅ မှာတော့ မေဆွိ၊ ချောစုခင်၊ နီနီခင်ဇော်တို့နဲ့အတူ တခြားအဆိုတော်တွေ ဖြစ်ကြတဲ့ ချမ်းမြေ့မောင်ချို၊ ဇော် ပိုင်၊ ဖိုးကာ၊ ဝေလ၊ အောင်ထက်တို့က အင်ပါယာတေးဂီတအဖွဲ့နဲ့အတူ ဖျော်ဖြေသွားကြ မှာ ဖြစ်ပါတယ်။ မြန်မာ့ရုပ်ရှင်ဟာ အာရှဒေသတွင်း သက်တမ်းအရှည်ကြာဆုံးသော ရုပ်ရှင်လောက တွေထဲက တခုဖြစ်ပြီး လာမယ့် အောက်တိုဘာလ ၁၃ ရက်နေ့မှာတော့ သက်တမ်းနှစ် ၁၀၀ ပြည့်မြောက်ခဲ့ပြီ ဖြစ်ပါတယ်။ မြန်မာ့ ပထမဦးဆုံးသော ရုပ်ရှင်ကားကတော့ ၁၉၂၀ ခုနှစ်က ဦးထွန်းရှိန် (ဝိုင်အမ်ဘီအေ ခေါင်းဆောင်နဲ့ အမျိုးသားရေးရှေ့နေ)ရဲ့ နာရေးအခမ်းအနားကို သက်ဝင်ပေါ်လွင်အောင် ရိုက်ကူး ထားတဲ့ မှတ်တမ်းရုပ်ရှင် ဖြစ်ပြီး နောက်ပိုင်းနှစ်တွေမှာတော့ ရုပ်ရှင်ဟာ မြန်မာ့အမျိုးသားရေး နိုးကြားတက်ကြွလာစေဖို့ အဓိကအခန်းကဏ္ဍက ပါဝင်လာခဲ့တာ ဖြစ်ပါတယ်။ အခုနှစ်မှာ ကျရောက်တဲ့ မြန်မာ့ရုပ်ရှင် ရာပြည့်အခမ်းအနားကတော့ လတ်တလော ကမ္ဘာ့နိုင်ငံတွေအနှံ့ ဖြစ်ပွားနေဆဲ ကိုဗစ်-၁၉ ကပ်ရောဂါကြောင့် ကျင်းပမယ့် ရက်ကို တိတိကျကျ မသိနိုင်သေးဘဲ ရပ်ဆိုင်းထားခဲ့ရတာ ဖြစ်ပါတယ်။
1 year Ago
Up