ချီတက်ဆန္ဒပြ

August 8, 2022

၃၄ နှစ်မြောက် ရှစ်လေးလုံးနှင့် စစ်အာဏာရှင်ဆန့်ကျင်ရေး တိုကျိုတွင် ချီတက်ဆန္ဒပြ

ရှစ်လေးလုံး ၃၄ နှစ်မြောက် အထိမ်းအမှတ်နဲ့ စစ်အာဏာရှင်ဆန့်ကျင်ရေး ချီတက်ဆန္ဒပြပြွကို ဂျပန်နိုင်ငံ တိုကျိုမြို့မှာ ဩဂုတ် ၈ ရက် ဒီနေ့ ပြုလုပ်ကြပါတယ်။

မြန်မာ့အရေး စိတ်ဝင်စားတဲ့ ဂျပန်လူမျိုးတွေအပါအဝင် ဂျပန်နိုင်ငံရောက် မြန်မာနိုင်ငံသား ရာနဲ့ချီကာ လူစည်ကားတဲ့ တိုကျိုမြို့ ဂိုးဒန်းဒအရပ်မှ စတင်ကာ စစ်ကောင်စီလက်အောက်ခံ တိုကျိုသံရုံးကို ဖြတ်ကာ ချီတက်ဆန္ဒပြခဲ့ကြပြီး သံရုံးရှေ့မှာလည်း ၂ နာရီကျော်လောက် ကြွေးကြော်ဆန္ဒပြခဲ့ကြပါတယ်။

အာဏာရှင်ကို ဆန့်ကျင်ခဲ့တဲ့ သမိုင်းဝင် ရှစ်လေးလုံးကြီး ၃၄ နှစ်ရှိပေမယ့် အခုထိ မြန်မာပြည်မှာ လူ့အခွင့်အရေးတွေ ဆုံးရှုံးနေတာကို ဂျပန်ပြည်သူတွေ ပိုမိုသိရှိအောင် လူစည်ကားတဲ့အရပ်မှာ လှည့်လည်ဆန္ဒပြရတာလို့ ချီတက်ပွဲ ဦးဆောင်သူတဦးဖြစ်တဲ့  ဦးကျော်ကျော်စိုးက ဒီဗွီဘီကို ပြောပါတယ်။

မတရားဖိနှိပ်မှုကို မခံချင်လို့ လူထုလှုပ်ရှားမှုနဲ့ တပါတီ အာဏာရှင်စနစ်ကို ဖြိုချနိုင်ခဲ့တဲ့ ရှစ်လေးလုံး စိတ်ဓာတ်တွေနဲ့ အခုခေတ်လူငယ်တွေရဲ့ ဇွဲ၊ စွမ်းပကား စွန့်လွှတ်ရဲတဲ့သတ္တိတွေနဲ့ ပေါင်းစပ်တဲ့ နွေဦးတော်လှန်ရေးဟာ မုချအောင်မြင်ရမယ် ယုံကြည်တယ်လို့လည်း သံရုံးရှေ့ ရှစ်လေးလုံး အထိမ်းအမှတ် ဆန္ဒပြပွဲ လာရောက်ပူးပေါင်းခဲ့သူ ဦးမြတ်သူက ပြောပါတယ်။

၃၄ နှစ်မြောက် တိုကျို ရှစ်လေးလုံး ချီတက်ဆန္ဒပြပွဲမှာ ထူးခြားမှုကတော့ ဂျပန်ရောက် မြန်မာနိုင်ငံသာတွေနဲ့အတူ မြန်မာ့အရေး စိတ်ဝင်စားတဲ့ ဂျပန်အလုပ်သမားသမဂ္ဂတွေ၊ ဂျပန်အန်ဂျီအိုအဖွဲ့တွေပါ အကြမ်းဖက်စစ်ကောင်စီကို ဆန့်ကျင်ကြောင်း ဆိုင်းဘုတ်တွေ ကိုင်စွဲကာ ချီတက်ဆန္ဒပြ တောင်းဆိုခဲ့တာကို တွေ့ရပါတယ်။

4 months Ago

August 5, 2022

ဘေရွတ်ဆိပ်ကမ်းတွင် ပေါက်ကွဲမှုဖြစ်ပွားခဲ့သည့် ၂ နှစ်မြောက်အထိမ်းအမှတ် ချီတက်ဆန္ဒပြ

ဘေရွတ်ဆိပ်ကမ်းမှာ ပေါက်ကွဲမှုကြီးဖြစ်ပွားပြီး ၂ နှစ်ပြည့် အထိမ်းအမှတ်အဖြစ် လက်ဘနွန်မြို့တော်မှာ သြဂုတ် ၄ ရက်က ထောင်နဲ့ချီတဲ့ ဆန္ဒပြသူတွေ ချီတက်ခဲ့ကြပြီး ပေါက်ကွဲမှုနောက်ကွယ်က အမှန်တရားကို ဖော်ထုတ်ဖို့ အစိုးရရဲ့ ပျက်ကွက်မှုကို ရှုတ်ချခဲ့ကြပါတယ်။

ကပ်ဘေးကို သတိတရအနေနဲ့ သြဂုတ် ၄ ရက် မွန်းလွဲပိုင်းက လူတွေစုဝေးခဲ့ကြတဲ့ မြို့တော်ရဲ့ကမ်းနားဟာ ပေါက်ကွဲမှုကြောင့် ပြိုကျပျက်စီးသွားတဲ့ စပါးဂိုဒေါင်တွေ ကျန်ရှိနေတဲ့ နေရာကနေ မီတာ ရာနဲ့ချီဝေးပါတယ်။

သွေးနီရောင် လက်ဗွေရာတွေ တံဆိပ်ရိုက်နှိပ်ထားတဲ့ တီရှပ်တွေကို ဝတ်ဆင်ထားတဲ့ ဆန္ဒပြသူတွေဟာ လက်ဘနွန် တရားရေးဝန်ကြီးဌာနကနေ မြို့တော် ကမ်းနားကို ချီတက်ခဲ့ကြပြီး အဲဒီကနေမှ ဘေရွတ်မြို့လယ်ရှိ လွှတ်တော်ကို ချီတက်ခဲ့ကြပါတယ်။

ဘေရွတ်မှာ ၂၀၂၀ ခုနှစ် ဩဂုတ် ၄ ရက်မှာ သမိုင်းတလျှောက် အကြီးမားဆုံး ပေါက်ကွဲမှုတွေထဲက တခုဖြစ်တဲ့ ဗုံးပေါက်ကွဲမှုကြောင့် လူပေါင်း ၂၂၀ ထက်မနည်း သေဆုံးခဲ့ရပါတယ်။

ဒီပေါက်ကွဲမှုကြီးဟာ ဆိပ်ကမ်းရှိ ဆိုက်ထဲမှာ သိမ်းဆည်းထားတဲ့ အမိုနီယမ်နိုက်ထရိတ် ဂိုဒေါင်ကြီးတွေကနေ ဖြစ်ပွားခဲ့ပြီး ဒါကို အစိုးရက ၂၀၁၃ ခုနှစ်ကတည်းက လျစ်လျူရှုထားခဲ့တာပါ။

ဒီဖြစ်ရပ်အတွက် အကြီးတန်းအရာရှိ အများအပြားမှာ တာဝန်ရှိကြောင်း စွပ်စွဲခံထားရပေမဲ့ ဒီကနေ့အထိ တယောက်မှ အရေးယူမခံရသေးပါဘူး။

4 months Ago
More News
Up