ချင်းပြည်နယ်၊

September 20, 2021

အကြမ်းဖက်စစ်တပ်၏ ခြိမ်းခြောက်မှုကြောင့် ထန်တလန်တမြို့လုံးနီးပါး နေရပ်စွန့်ခွာ

စစ်ကောင်စီအကြမ်းဖက်အဖွဲ့က ချင်းပြည်နယ်၊ ထန်တလန်မြို့နေ ပြည်သူလူထုကို  စက်တင်ဘာ ၂၁ ရက် မနက်ဖန် နောက်ဆုံးထားပြီး မြို့ကနေ ထွက်ခွာကြဖို့ ခြိမ်းခြောက်တာကြောင့် မြို့ခံပြည်သူတွေအားလုံးနီးပါး နေရပ်စွန့်ခွာနေရကြရပြီး တချို့ကတော့  အိန္ဒိယနယ်စပ်ကို ထွက်ပြေးတိမ်းရှောင်နေကြရပါတယ်။ 

ထန်တလန်မြို့ကို ပြီးခဲ့တဲ့ရက်ပိုင်းကတည်းက စစ်ကောင်စီတပ်တွေက  လက်နက်ကြီးတွေနဲ့ အပြင်းအထန် ဆက်တိုက်ပစ်ခတ်၊ မီးရှို့၊ လူတွေကို ပစ်သတ်ခဲ့ပြီး  မြို့ခံပြည်သူတွေကို စက်တင်ဘာ ၂၁ ရက်နေ့နောက်ဆုံးထားပြီး မြို့ကနေထွက်ခွာဖို့ ခြိမ်းခြောက်ခဲ့တာလို့  ချင်းပြည်နယ်ကာကွယ်ရေးတပ် CDF ဗဟို တာဝန်ရှိသူတစ်ဦးက ဒီဗွီဘီကို ပြောပါတယ်။ 

ထန်တလန်မြို့ကို စစ်ကောင်စီတပ်တွေက ထိန်းချုပ်ဖို့ အင်အားသုံး ကြိုးစားနေပြီး အင်တာနက်နဲ့ ဖုန်းလိုင်းတွေလည်း  ဖြတ်တောက်ထားပါတယ်။

ထန်တလန်မြို့ပေါ်မှာ နေထိုင်တဲ့ပြည်သူတစ်သောင်းကျော်အထဲမှာ ထောင်နဲ့ချီတဲ့ ပြည်သူ အများစုက ထန်တလန်ဝန်းကျင်ရှိ ကျေးရွာတွေဘက် ရွှေ့ပြောင်းသွားနေကြပြီး တချို့ကတော့  အိန္ဒိယနယ်စပ် မီဇိုရမ်ဘက် ထွက်ပြေးတိမ်းရှောင်နေရကာ စားဝတ်နေရေးအခက်အခဲတွေရင်ဆိုင်နေရတယ်လို့ဆိုပါတယ်။ 

စက်တင်ဘာ ၁၈ နေ့က ထန်တလန် CDF နဲ့ စစ်ကောင်စီတပ်တွေ တိုက်ပွဲတွေဖြစ်ပွားခဲ့ပြီး စစ်ကောင်စီဘက်က စစ်သား ၃၀ ကျော်သေဆုံးခဲ့တယ်လို့ ထန်တလန် CDF က သတင်းထုတ်ပြန်ထားပါတယ်။

စစ်ကောင်တပ်တွေက မြို့ထဲကို လက်နက်ကြီးတွေနဲ့ပစ်ခတ်ခဲ့တာကြောင့် ထန်တလန်မြို့က နေအိမ် ၁၀ လုံးကျော်လည်း မီးလောင်ပျက်စီးခဲ့ပါတယ်။

မီးလောင်အိမ်တွေကို အကူအညီပေးဖို့သွားရောက်ခဲ့တဲ့ သင်းအုပ်ဆရာတစ်ယောက်ကိုလည်း စစ်တပ်ကပစ်သတ်ခဲ့ပြီး ရွှေလက်စွပ်ကို လက်ဖြတ်ပြီး ဖြုတ်ယူသွားပါတယ်။ 

ဟားခါးမြို့ကိုလည်း စစ်ကောင်စီတပ်တွေက  အကြမ်းဖက်ထိန်းချုပ်ဖို့ကြိုးစားနေပြီး မင်းတပ် CDF နဲ့လည်း ထိတွေ့တိုက်ပွဲတွေဆက်တိုက်ဖြစ်ပွားနေပါတယ်။

ချင်းပြည်နယ်မှာ ဖြစ်နေတဲ့အခြေအနေတွေအရ  စစ်ကောင်စီနဲ့ညှိနှိုင်းစရာအကြောင်းမရှိတော့ဘဲ ရင်ဆိုင်တုံ့ပြန်သွားမယ်လို့ မင်းတပ် CDF တာဝန်ရှိသူတစ်ဦးကပြောပါတယ်။ 

စက်တင်ဘာလဆန်းကစပြီး စစ်ကောင်စီတပ်နဲ့ ထန်တလန် CDF တို့ တိုက်ပွဲတွေ ဖြစ်ပွားခဲ့ပြီး စက်တင်ဘာ ၁၃ ရက်နေ့က နယ်မြေအရအရေးပါတဲ့ လုံလဲရ် စစ်ကောင်စီတပ်စခန်းကို ထန်တလန် CDF က သိမ်းယူခဲ့ပါတယ်။

ထန်တလန်မြို့ပေါ်မှာနေထိုင်တဲ့ ပြည်သူတစ်သောင်းကျော်ရှိပြီး အနီးအနားကျေးရွာတွေမှာ နေထိုင်တဲ့ပြည်သူက လေးသောင်းနီးပါးရှိနေပါတယ်။

ချင်းခရစ်ယာန်ဘုရားကျောင်းတွေမှာ စစ်ကောင်စီတပ်တွေ တပ်စွဲထားတာ၊ သောက်စားမူးယစ်နေတာ၊ သင်းအုပ်ဆရာကို ပစ်သတ်တာ၊ ဒေသခံပြည်သူတွေကို အနိုင်ကျင့်သတ်ဖြတ်နေတာ၊ နေအိမ်တွေကို မီးရှို့ဖျက်ဆီးတာတွေကို ချင်းနှစ်ချင်းခရစ်ယာန်အဖွဲ့ချုပ်က အပြင်းအထန်ရှုံ့ချပြီး အဆိုပါလုပ်ရပ်တွေ ရပ်တန့်ဖို့ စက်တင်ဘာ ၁၉ရက်နေ့မှာ ကြေညာချက်ထုတ်ပြန်တောင်းဆိုထားပါတယ်။ 

4 weeks Ago

September 12, 2021

လုံလဲရ်တပ်စခန်းကို CNF နဲ့ CDFပူးပေါင်းသိမ်းပိုက်ပြီးနောက် ရဲနှင့် စစ်သားအားလုံး CDM လုပ်

မြန်မာ-အိန္ဒိယနယ်စပ်၊ ချင်းပြည်နယ်၊ ထန်တလန်မြို့နယ်အတွင်းရှိ လုံလဲရ်တပ်စခန်းကို ချင်းအမျိုးသားတပ်ဦး (CNF) နဲ့ ချင်းဒေသကာကွယ်ရေးတပ်ဖွဲ့ (CDF)  ပူးပေါင်းအဖွဲ့က  တိုက်ခိုက်သိမ်းပိုက်လိုက်ပါတယ်။ 

အဲဒီလုံလဲရ်တပ်စခန်းဟာ ရဲနဲ့ စစ်တပ် ပူးပေါင်း တပ်စွဲထားတဲ့ တပ်စခန်းဖြစ်ပြီး စခန်းမှာရှိတဲ့ တပ်နဲ့ ရဲတွေက အာဏာဖီဆန်ရေးလှုပ်ရှားမှု CDM မှာ ပူးပေါင်းပါဝင်လိုက်တာဖြစ်ပြီး အင်အားဘယ်လောက်လဲဆိုတာကိုတော့  ဒီဗွီဘီသတင်းဌာနကိုပြောပြတဲ့  သတင်းရင်းမြစ်က လုံခြုံရေးအခြေအနေအရ ပြောမပြခဲ့ပါဘူး။

ဒီဖြစ်စဉ်နဲ့ပတ်သက်ပြီး  ထပ်မံအတည်ပြုနိုင်ဖို့  သက်ဆိုင်ရာ CNF နဲ့ CDF တပ်ဖွဲ့တွေရဲ့ တာဝန်ရှိသူတွေကို ဒီဗွီဘီသတင်းဌာနက ဆက်သွယ်နေပေမယ့် ဆက်သွယ်လို့မရသေးပါဘူး။

အဲဒီလုံလဲရ်ကျေးရွာကို စက်တင်ဘာ ၁၀ ရက် နေ့လယ်ပိုင်းက အကြမ်းဖက်စစ်ကောင်စီက တိုက်လေယာဉ်နဲ့ ပစ်ခတ်တိုက်ခိုက်လို့  ဒေသခံပြည်သူတွေ ဘေးလွတ်ရာကို ထွက်ပြေးတိမ်းရှောင်ခဲ့ရပါတယ်။

ချင်းပြည်နယ် မကွီအိမ်နူး တပ်စခန်းကို CDF မင်းတပ်က ဇူလိုင် ၂၄ ရက်နေ့က သိမ်းပိုက်တဲ့အခါမှာလည်း စခန်းမှူး ဗိုလ်ကြီး သိန်းထိုက်နဲ့တပ်ဖွဲ့ဝင်တွေက ပြန်လည်ခုခံခြင်းမပြုလုပ်ပဲ CDM ပြုလုပ်ခဲ့တာကြောင့်  မကွီအိမ်နူးတပ်စခန်းကို မင်းတပ် CDF က တိုက်ပွဲမဖြစ်ဘဲ သိမ်းပိုက်နိုင်ခဲ့ပြီး စခန်းကို မီးရှို့ဖျက်ဆီးနိုင်ခဲ့ပါတယ်။

(ဓာတ်ပုံ- ယခင်  မကွီအိမ်နူးတပ်စခန်းကို သိမ်းပိုက်ခဲ့စဉ်က)

1 month Ago
Up