ချင်းပြည်နယ်

December 24, 2022

ချင်းပြည်နယ်တွင် နေရပ်စွန့်ခွာထွက်ပြေးရသူ ၁ သိန်းခန့်ရှိ၊ အိန္ဒိယဘက် ထွက်ပြေးရသူ ၄ သောင်းကျော်ရှိလာ

ချင်းပြည်နယ်ထဲမှာ ဖြစ်ပွားခဲ့တဲ့ တိုက်ပွဲတွေကြောင့် ပြည်တွင်းနေရပ်စွန့်ခွာထွက်ပြေးရသူ ၁ သိန်းနီးပါးထိ ရှိလာပြီး အိန္ဒိယနိုင်ငံ၊ မီဇိုရမ်ပြည်နယ်ဘက်ခြမ်းကို နယ်စပ်ဖြတ်ကျော် ထွက်ပြေးတိမ်းရှောင်ခဲ့ကြရတဲ့ စစ်ပြေးဒုက္ခသည်ပေါင်း ၄၀,၀၀၀ ထက်မနည်း ရှိခဲ့တယ်လို့ ISP Myanmar က ထုတ်ပြန်ပါတယ်။

ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက် စစ်အာဏာသိမ်းပြီးချိန်ကတည်းက အခုနှစ် နိုဝင်ဘာလအထိ ချင်းပြည်နယ်က မြို့နယ် ၉ ခုလုံးမှာတော့ လက်နက်ကိုင်တိုက်ပွဲပေါင်း ၅၉၂ ကြိမ်ထက်မနည်း ဖြစ်ပွားခဲ့ပြီး ဒီတိုက်ပွဲတွေထဲမှာတော့ မင်းတပ်မြို့နယ်မှာ တိုက်ပွဲပေါင်း ၁၂၅ ကြိမ်ကျော်နဲ့ အများဆုံး ဖြစ်ခဲ့တယ်လို့ ဆိုပါတယ်။ ဒါ့အပြင် လေကြောင်းတိုက်ခိုက်ခံရမှု ၃၃ ကြိမ်ထက်မနည်း ရှိခဲ့ပြီး ရက္ခိုင့်တပ်တော် (AA) လှုပ် ရှားနေတဲ့ ပလက်ဝမြို့နယ်မှာတော့ လေကြောင်းတိုက်ခိုက်ခံရမှု ၂၇ ကြိမ်ထက်မနည်း ရှိခဲ့ပြီး အများဆုံးဖြစ်ခဲ့တယ်လို့ ဆိုပါတယ်။

တဆက်တည်းမှာပဲ လက်နက်ကိုင်ပဋိပက္ခတွေအတွင်း နေအိမ်နဲ့ အဆောက်အအုံ ၁,၁၇၅ လုံးထက်မနည်း မီးရှို့ဖျက်ဆီးခံခဲ့ရပြီး ထန်တလန်မြို့နယ်မှာ အများဆုံးဖြစ်ခဲ့ကာ အရေအတွက်အားဖြင့် နေအိမ်၊ အ ဆောက်အအုံ ၁,၀၁၁ လုံးထက်မနည်း ရှိခဲ့တယ်လို့ ISP Myanmar ထုတ်ပြန်ချက်မှာ ဖော်ပြပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က နောက်ဆုံး ထုတ်ပြန်ချက်မှာတော့ နိုင်ငံတဝန်း အိုးအိမ်စွန့်ခွာထွက်ပြေးတိမ်းရှောင်ရသူဦးရေဟာ ၁ ဒသမ ၄ သန်းကျော်ထိ ရှိလာခဲ့ပြီဖြစ်ကာ ပြီးခဲ့တဲ့ ဇူလိုင်လအတွင်း ပြည်တွင်းနေရပ်စွန့်ခွာသူဦးရေ အများဆုံး စံချိန်တင်ခဲ့တယ်လို့ ဆိုပါတယ်။

ဒါ့အပြင် အာဏာသိမ်း အကြမ်းဖက်စစ်ကောင်စီဟာ အစားအသောက်နဲ့ ဆေးဝါးပစ္စည်းတွေ အပါအဝင် မရှိမဖြစ်လိုအပ်တဲ့ ကုန်ပစ္စည်းတွေ သယ်ဆောင်ခွင့်ကို ကန့်သတ်ထားတာကြောင့် နေရပ်စွန့်ခွာ ထွက်ပြေးရသူတွေ အပါအဝင် နိုင်ငံအရှေ့တောင်ပိုင်း တနံတလျားက ထိခိုက်ခံစားရသူတွေဆီ လူသားချင်းစာနာမှုဆိုင်ရာ အကူအညီတွေ သွားရောက် အကူအညီပေးဖို့ အခက်အခဲတွေ ရှိနေတယ်လို့ ပြောပါ တယ်။

2 months Ago

December 13, 2022

ပလက်ဝရှိ ပြည်သူအခြေပြုကျောင်းများတွင် ဆရာ၊ ဆရာမများ လိုအပ်နေ

ချင်းပြည်နယ်၊ ပလက်ဝမြို့နယ်မှာ ကြားကာလ ပြည်သူ့အခြေပြု ပညာရေးလုပ်ငန်းတွေ လုပ်ဆောင်နေရာမှာ သင်ကြားရေး ဆရာ၊ ဆရာမ မလုံလောက်မှုနဲ့ ကျောင်းတွေအတွက် လိုအပ်ချက်များစွာရှိနေတယ်လို့ ပလက်ဝမြို့နယ် ပညာရေးဘုတ်အဖွဲ့က သိရပါတယ်။

ပလက်ဝမြို့နယ် ပညာရေးဘုတ်အဖွဲ့ ဥက္ကဋ္ဌကိုဂျွန်က “အာဏာသိမ်းပြီးနောက်ပိုင်းမှာ စကစ ကဖွင့်တဲ့ကျောင်းတွေ ရှိသလို ကျနော်တို့လို ပြည်သူ့အခြေပြုပြီး ဖွင့်ထားတဲ့ ကျောင်းတွေလည်း ရှိပါတယ်။ ကျနော်တို့အတွက် အဓိက သင်ကြားရေး ဆရာ ဆရာမ လိုအပ်ချက် များစွာရှိပါတယ်။ လက်ရှိက CDM ဆရာတွေ အနည်းငယ်နဲ့ လုပ်အားပေး ဆရာတွေ အများစု ကူညီသင်ကြားနေတာပါ။ ပြည်သူတွေရဲ့ စားဝတ်နေရေး အခက်အခဲတွေကြောင့် လုပ်အားပေးနေတဲ့ ဆရာတွေကို ကျနော်တို့က ဉာဏ်ပူဇော်ခတွေလည်း လုံလောက်အောင် မထောက်ပံ့ပေးနိုင်ပါဘူး။ နောက် ကျောင်းသားတွေအတွက် ကျောင်းသုံး စာရေးကိရိယာတွေနဲ့ ကျောင်းအတွက် ပရိဘောဂတွေ စတာတွေ အများကြီး လိုအပ်နေပါတယ်” လို့ ပြောပါတယ်။

ဒေသတွင်း တည်ငြိမ်မှုမရှိတာနဲ့ ကျောင်းတွေ ပြည့်စုံလုံလောက်မှု မရှိတဲ့အတွက်ကြောင့် ကလေးတွေရဲ့ ပညာရေး များစွာ နောက်ကျနေရကြောင်းကိုလည်း ဒေသခံတဦးက ပြောပါတယ်။

“နယ်မြေထိန်းချုပ်မှုမရှိနိုင်သေးတဲ့ နေရာတွေမှာ ကလေးတွေက အရင်လို လုံလုံခြုံခြုံ ပညာသင်ကြားခွင့်လည်း မရတော့ဘူး။ အခုဆို ကျောင်းမသွားနိုင်ဘဲ လမ်းဘေးမှာ ဒီတိုင်းနေနေကြပြီး ပညာရေးနဲ့ အလှမ်းဝေးနေကြပြီ။ စစ်တပ်ကဖွင့်တဲ့ ကျောင်းတွေမှာ မတက်ချင်တာရှိတယ်၊ တချို့မိဘတွေက မထားတာတွေ ရှိတယ်ပေါ့။”

ပလက်ဝမြို့နယ်မှာ အမျိုးသားညီညွတ်ရေးအစိုးရ (NUG) ရဲ့ ညွှန်ကြားချက်နဲ့ သင်ရိုးတွေအတိုင်း ဖွင့်လှစ်သင်ကြားပေးနေတဲ့ကျောင်းတွေ ရှိသလို ဒေသတွင်း လိုအပ်ချက်အရ ဘာသာရပ်ဆိုင်ရာတွေကို ကိုယ်တိုင်သင်ရိုးညွှန်းတမ်းရေးဆွဲပြီး သင်ကြားပေးနေရတဲ့ကျောင်းတွေ ရှိတယ်လို့လည်း သိရပါတယ်။

လက်ရှိ ပလက်ဝမြို့နယ် ဒေသကာကွယ်ရေးထိန်းချုပ်မှုရှိတဲ့ နယ်မြေတွေမှာ အမျိုးသားညီညွတ်ရေးအစိုးရ (NUG) ရဲ့ ညွှန်ကြားချက်နဲ့ သင်ကြားနေတဲ့ ကျောင်းတွေနဲ့ ကိုယ်ထူကိုယ်ထ ဖွင့်လှစ်ထားတဲ့ ပြည်သူ့ကျောင်းပေါင်း ၆၅ ကျောင်းကို ကျေးရွာပေါင်း ၅၀ ကျော်မှာ ဖွင့်လှစ်ထားပြီး ကျောင်းသား ၅,၀၀၀ ကျော်ကို ဆရာ ဆရာမ ၂၀၀ ကျော်နဲ့ သင်ကြားပေးနေပါတယ်။

အခြေခံမူလတန်းမှ အလယ်တန်းအဆင့်ထိသင်ကြားနေတဲ့ အဆိုပါ ပြည်သူ့ကျောင်းများကို ပြည်ပစစ်ဘေးရှောင်စခန်းများမှာလည်း ဖွင့်လှစ်သင်ကြားပေးပြီး လာမယ့် ၂၀၂၂-၂၀၂၃ ပညာသင်နှစ်အတွက်လည်း နယ်မြေထိန်းချုပ်နိုင်တဲ့နေရာတွေမှာ NUG ပညာရေးဝန်ကြီးဌာနက ကျင်းပတဲ့ အခြေခံပညာရေးပြီးမြောက်ကြောင်းအရည်အချင်းစစ်စာမေးပွဲကိုလည်း ကျင်းပပြုလုပ်သွားမှာ ဖြစ်တယ်လို့လည်း သိရပါတယ်။

2 months Ago
More News
Up