ချက်ခြင်းရပ်

April 4, 2021

လက်နက်မဲ့ပြည်သူအပေါ် အကြမ်းဖက်သတ်ဖြတ်မှု ချက်ခြင်းရပ်ရန် အပစ်ရပ်တိုင်းရင်းသား လက်နက်ကိုင်အဖွဲ့များ တောင်းဆို

လက်နက်မဲ့ ပြည်သူလူထုကို စစ်ကောင်စီရဲ့ အကြမ်းဖက်သတ်ဖြတ်၊ ပစ်ခတ်နှိမ်နင်းမှုကို ချက်ခြင်းရပ်တန့်ဖို့နဲ့ ဖမ်းဆီးထိန်းသိမ်းထားသူတွေအားလုံးကို ခြွင်းချက်မရှိ အမြန်ဆုံးလွှတ်ပေးဖို့ အန်စီအေ အပစ်ရပ် တိုင်းရင်းသားလက်နက်ကိုင်အဖွဲ့တွေက တောင်းဆိုလိုက်ပါတယ်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (အန်စီအေ) လက်မှတ်ရေးထိုး ထားတဲ့ တိုင်းရင်းသားလက်နက် ကိုင်တော်လှန်ရေးအဖွဲ့အစည်းတွေရဲ့  ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အစည်းအဝေးအပြီး ဒီကနေ့ ဧပြီ ၄ ရက်နေ့စွဲနဲ့ ထုတ်ပြန်ကြေညာလိုက်တာပါ။ 

လက်ရှိ ပြည်သူတစ်ရပ်လုံးက ဆင်နွှဲနေတဲ့ နွေဦးတော်လှန်ရေးအပါအဝင် CDM လူထုလှုပ်ရှားမှုတွေကို ဆက်လက် ပံ့ပိုးကူညီသွားမယ်လို့လည်း တိုင်းရင်းသားလက်နက်ကိုင်တွေက  ဆိုပါတယ်။

ဒါ့အပြင် ၂၀၀၈ ဖွဲ့စည်းပုံအခြေခံဥပဒေကို ဖျက်သိမ်းကြောင်း ပြည်ထောင်စုလွှတ်တော် ကိုယ်စားပြုကော်မတီ (CRPH) ရဲ့ ကြေညာချက်ကို ကြိုဆို ထောက်ခံကြောင်းနဲ့ ဖက်ဒရယ်ဒီမိုကရေစီပဋိညာဉ် (Federal Democracy Charter ) ကိုလည်း ဖက်ဒရယ်ဒီမိုကရေစီပြည်ထောင်စု တည်ဆောက်ရေး ကြိုးပမ်းမှုတစ်ရပ်အဖြစ် ကြိုဆိုတယ်လို့ထုတ်ပြန်ချက်မှာဖော်ပြပါတယ်။

အန်စီအေ လက်မှတ်ရေးထိုး တိုင်းရင်းသားလက်နက် ကိုင်တော်လှန်ရေးအဖွဲ့တွေရဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အစည်းအဝေးကို  ဧပြီလ ၃ ရက်နဲ့ ၄ ရက် တွေမှာ ကျင်းပခဲ့ပြီး ဒီအစည်းအဝေးကနေ လက်ရှိ နိုင်ငံရေး အခြေအနေတွေ ပြည်တွင်း အခြေအနေတွေကို ဆွေးနွေးညှိနှိုင်းပြီးနောက် ဘုံသဘောထားရပ်တည်ချက်တွေကို ထုတ်ပြန် ကြေညာခဲ့တာ ဖြစ်ပါတယ်။

ရက်စက်ကြမ်းကြုတ်တဲ့ အာဏာသိမ်းစစ်အုပ်စုခေါင်းဆောင်တွေအနေနဲ့ ပြည်သူကပေးတဲ့ပြစ်ဒဏ်ကို မလွဲမသွေခံယူရမယ်လို့  PPST ယာယီအဖွဲ့ခေါင်းဆောင် ဗိုလ်ချုပ်ကြီးယွက်စစ်က ဒီအစည်းအဝေး မစတင်ခင် ပြောကြားထားပါတယ်။

မြန်မာနိုင်ငံမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်ကစလို့ ၂ လကျော်ကာလတွင်း စစ်ကောင်စီရဲ့တပ်တွေက အကြမ်းဖက်ပစ်ခတ်သတ်ဖြတ်ခဲ့တာကြောင့် ကျဆုံးသွားတဲ့ ပြည်သူပေါင်း ၅၅၀ ကျော်ရှိနေပြီဖြစ်ပါတယ်။  

8 months Ago
Up