ချင်းပြည်နယ် တွန်းဇံမြို့အဝင်က နှစ် ၁၀၀ ကျော် သမိုင်းကျောက်စာတိုင်များ

January 9, 2019

ချင်းပြည်နယ် တွန်းဇံမြို့အဝင်က နှစ် ၁၀၀ ကျော် သမိုင်းကျောက်စာတိုင်များ (သတင်းဓာတ်ပုံ)

ချင်းပြည်နယ်မြောက်ပိုင်း၊ တွန်းဇံမြို့အဝင်မှာ ရွေ့ပြောင်းစိုက်ထားတဲ့ တိုက်သူကြီး အိမ်တော်ကျောက်စာနဲ့ အခြားကျောက်စာတွေဟာ ချင်းမျိုးနွယ်တို့ရဲ့ လူနေမှုသမိုင်းတွေကို ထင်ဟပ် ဖော်ပြနေပါတယ်။ ဒီကျောက်စာတိုင်တွေကို ၁၉၁၇ ခုနှစ်လောက်ကတည်းက စတင်စိုက်ထူခဲ့တာဖြစ်ပြီး ကျောက်တိုင်တွေမှာ မြန်မာစာနဲ့ ရုပ်ပုံတွေကို တွေ့ရမှာပါ။ လွန်ခဲ့တဲ့ နှစ် ၁၀၀ ကျော်က အဲ့ဒီဒေသမှာ ဘာသာစာအက္ခရာ မရှိသေးတာကြောင့် မြန်မာစာကို တိုက်သူကြီးက ကလေးမြို့မှာ သင်ယူခဲ့ပြီး အခုလို မြန်မာစာတွေကို ကျောက်စာမှာ ရေးနိုင်ခဲ့တာ ဖြစ်ပါတယ်။ ကျောက်စာတိုင်တွေမှာ ထွင်းထုထားတဲ့ ရုပ်ပုံတွေမှာ အဲ့ဒီဒေသ ချင်းတိုင်းရင်းသားမျိုးနွယ် တွေရဲ့ လူမှုနေထိုင်မှုဖော်ပြတဲ့ နေအိမ်ပုံတွေ၊ ရိုးရာပွဲပုံတွေ၊ တောင်ယာစိုက်ပုံတွေ အမဲလိုက်တဲ့ပုံတွေ  မြင်တွေ့ရမှာ ဖြစ်ပါတယ်။ ချင်းတိုင်းရင်းသားတွေဟာ သူတို့မသေခင် ကျောက်စာတိုင်မှာ ဂုဏ်ပြုခံရဖို့ အသက်ရှင်စဉ်ကတည်းက သူတို့ရဲ့ ရဲစွမ်းသတ္တိ၊ လုပ်ရည်ကိုင်ရည်တွေကို ကြိုးစားပြသနိုင်အောင် နေထိုင်ခဲ့ပြီး သူတို့သေဆုံးတဲ့အခါကျန်သူတွေက သူတို့အသက်ရှင်စဉ်က ပြုလုပ်နိုင်ခဲ့တာတွေကို ကျောက်တိုင်ထူ ဂုဏ်ပြုပေးကြလေ့ရှိပါတယ်။ တွန်းဇံမြို့အဝင်က သမိုင်းကျောက်စာတိုင်တွေကို တိုက်သူကြီး မိသားစုက လက်ရှိမှာ ထိန်းသိမ်းထားပါတယ်။ တွန်းဇံမြို့ကိုသွားလေ့လာမယ် ဆိုရင်တော့ ခရီးလမ်းပန်းလည်း သာယာနေပြီဖြစ်ပါတယ်။ မင်းရဲစစ်နိုင်
2 years Ago
Up