ချင်းမိုင်

A d v e r t i s e m e n t With Us

July 25, 2019

မူးယစ်တရားခံဟုစွပ်စွဲပြီး ရွာသားအား ပစ်သတ်ခဲ့သည့် ရဲတပ်ဖွဲ့ ပြောင်းရွှေ့ရန် တောင်းဆို

ထိုင်းနိုင်ငံမြောက်ပိုင်း ချင်းမိုင်ခရိုင် မြန်မာနယ်စပ် ဝိန်းဟိုင်မြို့နယ် ပိန်းလုံအုပ်စုမှာ ဇူလိုင် ၂၃ ရက်နေ့က ရဲတပ်ဖွဲ့ဝင်တွေ ပစ်ခတ်လို့ ရွာသားတဦး သေဆုံးပြီးနောက် ဟွေ့ခိုက်မိုင်ရွာသား ၂၀၀ ကျော်က အဲဒီရဲတပ်ဖွဲ့ကို ပြန်လည်ပိတ်ဆို့ ရိုက်နှက်ခဲ့ပါတယ်။ ရွာသားတွေ ရိုက်နှက်လို့ ဝိန်းဟိုင်နယ်မြေ ရဲစခန်းက ဒုရဲမှူး ဒဏ်ရာတွေရပြီး ဆေးရုံမှာ ၁၁ ချက် ချုပ်လိုက်ရပါတယ်။ အဲဒီနောက် တာဝန်ရှိသူတွေက ရွာသား ၆ ဦးကို ဖမ်းဆီးခဲ့ပါတယ်။ ဒီကိစ္စနဲ့ပတ်သက်ပြီး ဒီနေ့မနက်မှာ ဟွေ့ခိုက်မိုင်ရွာသားတွေက ဝိန်းဟိုင်ရဲတပ်ဖွဲ့ကို နယ်မြေကနေ ၂၄ နာရီအတွင်း ရွှေ့ပြောင်းသွားဖို့ ဆန္ဒပြ တောင်းဆိုခဲ့ပါတယ်။ ရွာသားကိုယ်စားလှယ် ပြောပြချက်အရ ရဲကပစ်သတ်ခဲ့သူ အသက် ၅၀ အရွယ် နိုင်းကျကျည်း ကျာအောဟာ ရဲကစွပ်စွဲသလို မူးယစ်တရားခံမဟုတ်ကြောင်း၊ မျက်မြင်သက်သေ ရွာသားတဦး ပြောပြချက်အရ အခင်းဖြစ်တဲ့နေ့က နိုင်းကျာအောဟာ တောင်ယာကနေပြန်လာပြီး လက်ထဲမှာလည်း သေနတ်မရှိကြောင်း၊ ရဲက သူ့ကို ပစ်ထည့်ပြီးနောက် သက်သေက  ရွာထဲကလူတွေကို ပြေးခေါ်ပြီး ပြန်ရောက်လာတော့ အလောင်းကို နောက်တနေရာ ရွှေ့ထားသလို ဘေးမှာလည်း သေနတ်ပြောင်းရှည်တလက် ချထားတာ တွေ့ရတယ်လို့ ပြောပါတယ်။ သေဆုံးသူမိခင်က သားဖြစ်သူအလောင်းကို ပြေးဖက်စဉ် ရဲတပ်ဖွဲ့ဝင်တဦးက သူမကို တွန်းချပြီး ခြေတောက်နဲ့ကန်လို့ လဲကျသွားကြောင်း၊ ဒါကို မခံမရပ်နိုင်လို့ ရွာသားတွေက ရဲအရာရှိနဲ့ တပ်ဖွဲ့ဝင်တွေကို ဝိုင်းရိုက်တာလို့ ဆိုပါတယ်။ ဝိန်းဟိုင်ရဲတပ်ဖွဲ့ဝင်တွေ အနေနဲ့ စုံစမ်းမေးမြန်းခြင်း မရှိဘဲ ရွာသားကို သေနတ်နဲ့ ပစ်ခတ်ခဲ့တာ၊ လူတွေအထင်လွဲအောင် သတင်းဌာနတွေကို မူးယစ်တရားခံလို့ စွပ်စွဲပြောဆိုခဲ့တာ ဖြစ်ကြောင်း၊ ဒီကိစ္စနဲ့ပတ်သက်ပြီး ရွာသားတွေ ကြောက်လန့်နေကြကြောင်း၊ ဒါကြောင့် သက်ဆိုင်ရာ တာဝန်ရှိသူတွေအနေနဲ့ ဖြစ်ရပ်မှန်ကို စုံစမ်းစစ်ဆေးပြီး ရွာသားတွေအတွက် တရားမျှတမှု ဆောင်ကြည်းပေးပါရန် တောင်းဆိုထားပါတယ်။ ရွာသားတွေရဲ့ တောင်းဆိုချက်ထဲမှာ ၁ - အမှုမှန်ပေါ်ပေါက်ရေး လွတ်လပ်စွာ စုံစမ်းစစ်ဆေးနိုင်ရန် အခင်းဖြစ်ရာမှာ ပါဝင်တဲ့ ဝိန်းဟိုင်ရဲစခန်းက ရဲတပ်ဖွဲ့ဝင်တွေကို ၂၄ နာရီအတွင်း ရွှေ့ပြောင်းပေးရန်၊ ၂ - အကျိုးအမြတ်မယူ ဘက်မလိုက်တဲ့ ကြားနေကော်မတီတရပ် ဖွဲ့ပြီး အမှုမှန်စုံစမ်းရန်၊ ၃ - မျက်မြင်သက်သေနဲ့ ဟွေ့ခိုက်မိုင် ရွာသူရွာသားတွေရဲ့ လုံခြုံရေးကို အကာအကွယ်ပေးရန် စတဲ့အချက်တွေ ပါဝင်ပါတယ်။ ဟွေ့ခိုက်မိုင်ရွာသားတွေဟာ မူးယစ်ဆေးဝါး ဘေးအန္တရာယ်ကို ကောင်းစွာသိရှိပြီး လွဲ့ကျိုင်လို့ခေါ်တဲ့ မူးယစ်ဆေးတိုက်ဖျက်ရေး စီမံကိန်းမှာ တာဝန်ရှိသူတွေနဲ့အတူ စေတနာ့ဝန်ထမ်းတွေအဖြစ် ဝိုင်းဝန်းကူညီ ကာကွယ်ပေးနေတယ်လို့ ကျေးရွာကိုယ်စားလှယ်က ဖြည့်စွက် ပြောသွားပါတယ်။ ဒီမနက် ရွာသားတွေ ဆန္ဒပြတောင်းဆိုတာနဲ့ ပတ်သက်ပြီး ရဲတပ်ဖွဲ့ဘက်က တစုံတရာ တုံ့ပြန်ပြောဆိုတာတော့ မရှိသေးပါဘူး။
2 years Ago

July 24, 2019

မူးယစ်ဝရမ်းပြေးကို အသေပစ်ခတ်ခဲ့သည့် ထိုင်းရဲများအား ရွာသား ၂၀၀ ကျော် ရိုက်နှက်

ထိုင်းနိုင်ငံမြောက်ပိုင်း ချင်းမိုင်ခရိုင် မြန်မာနယ်စပ် ဝိန်းဟိုင်မြို့နယ်ထဲမှာ မူးယစ်မှုနဲ့ လွတ်မြောက်နေသူ တရားခံတဦးကို ထိုင်းရဲကပစ်ခတ်ပြီး သေဆုံးသွားလို့ ရွာသားတွေက ရဲကို ပြန်ပြီး ရိုက်နှက်ခဲ့ပါတယ်။ ဝိန်းဟိုင်မြို့နယ်ရဲတပ်ဖွဲ့က ဒုရဲမှူး တရီရုတ် ပန်တိနဲ့ အဖွဲ့ဝင်တွေဟာ ဇူလိုင် ၂၃ ရက် ညနေပိုင်းက မော်တော်ကားတစီး၊ ဆိုင်ကယ်သုံးစီးနဲ့အတူ နယ်မြေတွင်း ရာဇဝတ်မှု နှိမ်နင်းရေးအတွက် နယ်လှည့်စစ်ဆေးနေစဉ် ပိန်းလုံအုပ်စု ဟွေ့ခိုက်မိုင်ကျေးရွာအစွန် တောစပ်ဘက်ကနေ ဆိုင်ကယ်တစီး ရောက်လာပါတယ်။ ဆိုင်ကယ်နောက်က လိုက်စီးလာသူဟာ လက်ထဲမှာ သေနတ်ပြောင်းရှည်တလက် ကိုင်ဆောင်ထားတာ တွေ့လို့ ရဲတပ်ဖွဲ့က စစ်ဆေးဖို့ ရပ်တန့်ခိုင်းခဲ့ကြောင်း၊ ဆိုင်ကယ်မောင်းသူက ဆိုင်ကယ်ကိုပစ်ပြီး တောထဲဝင်ပြေးသွားပေမယ့် ဆိုင်ကယ်နောက်ကလူကတော့ ထိုင်ချလိုက်ပြီး ပြောင်းရှည်သေနတ်နဲ့ ရဲကို နှစ်ချက် စပစ်ခဲ့တယ်လို့ ရဲတပ်ဖွဲ့ဝင်က သတင်းထောက်ကို ပြောပါတယ်။ ဒါကြောင့် ရဲတွေကလည်း သူတို့အသက်နဲ့ လုံခြုံရေးအတွက် ပြန်ပစ်ခဲ့လို့ အဲဒီအမျိုးသား ပွဲချင်းပြီး သေဆုံးသွားပါတယ်။ အဲဒီအချိန်မှာ ရွာသားပေါင်း ၂၀၀ ကျော် စုဝေးရောက်ရှိလာပြီး ရဲတပ်ဖွဲ့ဝင်တွေကို တုတ်နဲ့ရိုက်၊ ကျောက်ခဲတွေနဲ့ ပေါက်သလို ရဲကားနဲ့ ဆိုင်ကယ်တွေကိုလည်း ဖျက်ဆီးခဲ့ကြပါတယ်။ ရွာသားတွေ ရိုက်နှက်မှုကြောင့် ဒုရဲမှူးမှာ ဒဏ်ရာအပြင်းအထန် ရခဲ့သလို ဒုရဲမှူးကို သွားဆွဲတဲ့ ရဲတပ်ကြပ်ကြီးတဦးမှာလည်း အညိုအမည်းဒဏ်ရာတွေ ရခဲ့ပါတယ်။ ဒီ့နောက် ထိုင်းစစ်တပ် ရောက်လာပြီး လူအုပ်ထဲကနေ ဒုရဲမှူးနဲ့ တပ်ကြပ်ကြီးတို့ကို ခေါ်ထုတ်ကာ ဝိန်းဟိုင်ဆေးရုံကြီးကို ပို့ဆောင်ပေးခဲ့ကြောင်း၊ ဒုရဲမှူးမှာ ၁၀ ချက်ချုပ်လိုက်ရကြောင်း ဆိုပါတယ်။ ထိုင်းရဲကိုစပစ်တဲ့ သေနတ်သမားဟာ အသက် ၅၀ အရွယ် နိုင်းကျကျည်း ကျာအော ဆိုသူ လားဟူတိုင်းရင်းသားတဦးဖြစ်ပြီး မူးယစ်မှု၊ လက်နက်မှုနဲ့ ချင်းမိုင်ခရိုင်တရားရုံးက ဖမ်းမိန့်ထုတ်ထားတဲ့ ဝရမ်းပြေးတဦးဖြစ်ကြောင်း၊ ရဲကိုလာဝိုင်းတဲ့ ရွာသားတွေကတော့ ဟွေ့ခိုက်မိုင်ကျေးရွာကဖြစ်ကာ နိုင်းကျကျည်းရဲ့ ဆွေမျိုးတွေ ဖြစ်တယ်လို့ ဝိန်းဟိုင်ရဲတပ်ဖွဲ့က ပြောပါတယ်။ ဒီနေ့မနက်မှာတော့ စစ်တပ်၊ ရဲတပ်ဖွဲ့နဲ့ နယ်မြေခံ အုပ်ချုပ်ရေးမှူးတို့ ပူးပေါင်းပါဝင်တဲ့ အဖွဲ့ဟာ အဲဒီကျေးရွာကို သွားရောက်ပိတ်ဆို့ စစ်ဆေးခဲ့ကြောင်း၊ ဥပဒေနဲ့မညီတဲ့ ပစ္စည်းတွေ မတွေ့ရပေမယ့် မနေ့က ရိုက်နှက်မှုမှာ ဦးဆောင်သူလို့ ယူဆရတဲ့ လူ ၆ ဦးကို ခေါ်ယူစစ်ဆေးနေကြောင်း ဆိုပါတယ်။ တာဝန်ကျဝန်ထမ်းနဲ့ နိုင်ငံပိုင်ပစ္စည်း ဖျက်ဆီးခဲ့သူတွေ အားလုံးကို စုံစမ်းဖော်ထုတ်ပြီး ဥပဒေနဲ့အညီ အရေးယူသွားမယ်လို့ ဝိန်းဟိုင်ရဲစခန်းက ပြောသွားပါတယ်။
2 years Ago
More News
Up