ခိုက်ရန်ဖြစ်

February 13, 2021

မိတ္ထီလာတွင် တပ်မတော်ထောက်ခံသူများနှင့် စစ်အာဏာရှင်ဆန့်ကျင်ရေး ဆန္ဒပြသူများ ခိုက်ရန်ဖြစ်

မန္တလေးတိုင်း မိတ္ထီလာမြို့မှာ ဖေဖော်ဝါရီ ၁၂ ရက်ညနေက တပ်မတော်ထောက်ခံသူတွေနဲ့ စစ်အာဏာရှင်ဆန့်ကျင်ရေး ဆန္ဒပြသူတွေ ခိုက်ရန်ဖြစ်ပွားပြီး အမျိုးသားတယောက် ဒဏ်ရာရ သွားတယ်လို့ ဒေသခံတယောက်ဆီက သိရပါတယ်။

 တပ်မတော်ထောက်ခံသူတွေ စီတန်းလှည့်လည်လာတုန်း မြို့မ (၄) ရပ်ကွက်အရောက်မှာ ရွက်နုမာလာဟင်းဆိုင်ထဲက စားသောက်နေသူတယောက်က သံပုံးတီးရာက ခိုက်ရန်ဖြစ်ခဲ့တာလို့   မျက်မြင်ဒေသခံတယောက်က ပြောပါတယ်။

“ပုံးတီးရာက စဖြစ်တာ၊ တပ်မတော်ထောက်ခံပွဲလုပ်လာသူတွေ လှည့်လည်လာတုန်း သံပုံးတီးတယ်။ ထောက်ခံပွဲလုပ်သူ ၁၀ ယောက်လောက်က စျေးဆိုင်ထဲကို ခဲတွေနဲ့ပစ်တယ်။ အနီးအနားက အိမ်ကိုလည်း ခဲနဲ့ပစ်တော့ အပြန်အလှန် ခိုက်ရန်ဖြစ်ကြပြီး တပ်မတော်ထောက်ခံသူတယောက် ဒဏ်ရာရသွားတယ်။ မစိုးရိမ်ရပါဘူး။ စျေးဆိုင်နဲ့ အိမ်ကတော့ ပစ္စည်းတွေ ပျက်စီးသွားတယ်။ နှစ်ဖက်လုံး နစ်နာကြပါတယ်"လို့ ပြောပါတယ်။

သူ့ကို ကုတင် ၅၀၀ တပ်မတော်ဆေးရုံမှာ ဆေးကုသနေတယ်လို့ သိရပါတယ်။

  မိတ္ထီလာမြို့မရဲစခန်း တာဝန်ကျရဲဝန်ထမ်းက "ခိုက်ရန်ဖြစ်သွားတာ ဟုတ်ပါတယ်။ အခုထိတော့ အမှုလာဖွင့်တာ မရှိသေးပါဘူး” လို့ ပြောပါတယ်။

  ညနေ ၄ နာရီခွဲလောက်မှာ တာဝန်ရှိသူတွေက နှစ်ဖက်လုံး ထိန်းထိန်းသိမ်းသိမ်း လုပ်ခဲ့တာကြောင့် အေးဆေးစွာ ပြီးဆုံးသွားတယ်လို့ သိရပါတယ်။

သတင်း-ဓာတ်ပုံ-မောင်မောင်လင်း

2 months Ago

November 27, 2020

အမေရိကန်ဝက်သားတင်ပို့မှုနှင့်ပတ်သက်ပြီး ထိုင်ဝမ်လွှတ်တော်အမတ်များ ခိုက်ရန်ဖြစ်

အမေရိကန်က ဝက်သားတင်သွင်းမှု ဖြေလျှော့ပေးရေးနဲ့ပတ်သက်လို့ ထိုင်ဝမ်လွှတ်တောအတွင်း အငြင်းပွားရာကနေ ဝက်အူတွေနဲ့ ပစ်ပေါက်တာ၊  လွှတ်တော်အမတ် အချင်းချင်း ထိုးကြိတ်တာတွေ နိုဝင်ဘာ ၂၇ ရက်က ဖြစ်ခဲ့ပါတယ်။ ဇန်နဝါရီ ၁ ရက်ကစလို့ အသားထွက်နှုန်းတိုးစေတဲ့ ရက်တိုပါမင်ဆေးပါဝင်တဲ့ အမေရိကန်က ဝက်သားတွေနဲ့ လပေါင်း ၃၀ အရွယ် အမဲသားတွေကို တင်သွင်းခွင့်ပြုမယ်လို့ သမ္မတ စိုင်းအင်ဝမ်က သြဂုတ်လတုန်းက ကြေညာခဲ့ပါတယ်။   ဒါဟာ အစားအစာဘေးကင်းရေးအတွက် စိုးရိမ်စရာဖြစ်တယ်ဆိုပြီး အတိုက်အခံ ကူမင်တန် KMT ပါတီက အပြင်းအထန် ကန့်ကွက်ခဲ့ပါတယ်။  နိုဝင်ဘာ ၂၇ ရက်က လွှတ်တော်အတွင်း ဝန်ကြီးချုပ် ဆုဆန်းချောင် စကားပြောနေချိန် KMT အမတ်တွေက ဝက်အူတွေထည့်ထားတဲ့ ပုံးနဲ့ပစ်ပေါက်ခဲ့သလို  တချို့က လက်သီးတွေနဲ့ ထိုးကြိတ်ခဲ့ပါတယ်။  အဲဒီနောက် KMT ပါတီ ဆော်သြသူ လင်ဝေချူနဲ့  ပါတီငယ်တခုက ချန်ပိုဝေတို့အကြား ပြင်းပြင်းထန်ထန်  ထိုးကြိတ်မှုတွေ ဖြစ်ခဲ့ပါတယ်။   ဒီလို ဝက်အူတွေနဲ့ ပစ်ပေါက်တာက  လွှတ်တော်ကို ညစ်ပေစေပြီး ရွံရှာဖွယ်ဖြစ်တယ်လို့  DPP  ပါတီက သတင်းထုတ်ပြန်ပြီး ဆန္ဒပြမှုတွေကို  ပြစ်တင်ရှုတ်ချခဲ့ပါတယ်။  ထိုင်ဝမ်ဒီမိုကရေစီဟာ  ဆူဆူညံညံရှိလှပြီး ထိုင်ဝမ်လွှတ်တော်အတွင်း ထိုးကြိတ်တာတွေ ဟာ မဆန်းဘူးလို့လည်း ရိုက်တာသတင်းမှာ ဖော်ပြထားပါတယ်။
5 months Ago
Up