ခရီးသွားလုပ်ငန်း

May 11, 2022

နိုင်ငံတကာပြည်ဝင်ခွင့်များ ပြန်ဖွင့်တော့မည်ဟု နယူးဇီလန်ဝန်ကြီးချုပ် ပြော

နယူးဇီလန်ဝန်ကြီးချုပ် ဂျာစင်းဒါး အာဒန်က နိုင်ငံတကာ ပြည်ဝင်ခွင့်တွေကို ဇူလိုင်လကုန်ပိုင်းမှာ အကုန်ပြန်ဖွင့်တော့မယ်လို့ မေ ၁၁ ရက်မှာ ပြောပါတယ်။ တဆက်တည်းမှာပဲ အပျော်စီး သင်္ဘောကြီးတွေကိုလည်း ဆိပ်ကမ်းတွေမှာ ဆိုက်ကပ်ခွင့်ပေးသွားမယ်လို့ ဆိုပါတယ်။

ဇူလိုင်လကုန်မှာ နယ်စပ်တွေကို ပြန်ဖွင့်မယ်လို့ ကြေညာလိုက်တာကြောင့် အရင်က နယူးဇီလန်အစိုးရက သတ်မှတ်ထားတဲ့ အချိန်ထက် ၂ လလောက် စောပြီး နိုင်ငံခြားသားတွေကို ဗီဇာထုတ်ပေးတော့မယ့်သဘော ဖြစ်ပါတယ်။

အော့ကလန်မှာ စီးပွားရေးကိစ္စ အလုပ်သဘော နေ့လယ်စာ စားပွဲအပြီးမှာ ဝန်ကြီးချုပ် အာဒန်က နယ်စပ်ကို ပြန်ဖွင့်ပေးလိုက်ခြင်းအားဖြင့် ကျွမ်းကျင်လုပ်သား လိုအပ်ချက်ကို ဖြည့်ဆည်းပေးနိုင်မယ်လို့ ပြောပါတယ်။

ကိုဗစ်ကပ်ဘေးကာလမှာ နယူးဇီလန်နိုင်ငံဟာ ကမ္ဘာမှာ စည်းကမ်းအတင်းကျပ်ဆုံး နိုင်ငံတနိုင်ငံ ဖြစ်ပါတယ်။ နောက်ပိုင်းမှာ လူကြိုက်နည်းတဲ့ တင်းကျပ်တဲ့ စည်းကမ်းတွေကို ပြန်ဖြေလျော့ပြီး ခရီးသွားလုပ်ငန်း မြှင့်တင်ရေးနဲ့ လုပ်သားလိုအပ်ချက်ကို ဖြည့်ဆည်းပေးဖို့ ပြန်ကြိုးစားလာတာ ဖြစ်ပါတယ်။

7 months Ago

April 3, 2022

စစ်ကောင်စီအလိုကျမဖြစ်စေရေး ခရီးမသွားကြရန် တိုက်တွန်း

ခရီးသွားလုပ်ငန်းတွေ ပြန်လည်ပတ်စေဖို့ ကြိုးစားနေတဲ့ စစ်ကောင်စီအလိုကျမဖြစ်အောင် တတ်နိုင်သလောက် ခရီးမသွားကြဖို့ ခရီးသွားလုပ်ငန်းနဲ့ပတ်သက်သူတွေက တိုက်တွန်းခဲ့ပါတယ်။

အာဏာသိမ်းစစ်ကောင်စီဟာ နိုင်ငံကို ပုံမှန်လည်ပတ်နေသလိုဖြစ်အောင် ကဏ္ဍပေါင်းစုံလည်ပတ်နေဖို့ ကြိုးစားနေတာဖြစ်ပြီး ကမ်းခြေခရီးသွားတာတွေ၊ ဘုရားပွဲတော်တွေ ပြုလုပ်ပြီး ခရီးသွားလာအောင်လုပ်ဆောင်နေတယ်လို့ ခရီးသွားလုပ်ငန်းနဲ့ ပတ်သက်သူတယောက်က ပြောပါတယ်။

“တောင်ကြီး အင်းလေး ခရီးစဉ်တွေ၊ ပုဂံ မန္တလေးခရီးတွေအပါအဝင် စစ်ကောင်စီရဲ့ တိုင်းအစိုးရတွေကလည်း ရွှေစက်တော် မော်တင် စတဲ့ ဘုရားပွဲတွေနဲ့ လူတွေလာအောင် ကြိုးစားနေကြတယ်။ ကျနော်တို့ ခံယူချက်ကတော့ စစ်တပ်ရဲ့လောင်းရိပ်အောက်မှာ မလုပ်ချင်ဘူး။ ပြီးတော့ ဒီအချိန် ခရီးထွက်တာက တော်လှန်ရေးကို အနှောင့်အယှက်ဖြစ်စေသလို စစ်တပ်ကိုလည်း တစိတ်တပိုင်း ထောက်ပံ့ရာရောက်တယ်။” 

ခရီးသွားလုပ်ငန်းတချို့ကတော့ တောင်ကြီး-အင်းလေး-ပင်းတယ ၅ ရက်ခရီးအတွက် တယောက်ကို ၁ သိန်းကျပ်၊ ထားဝယ်- မောင်းမကန်- မော်လမြိုင်- စက်စဲ ၅ ရက်ခရီးအတွက် ၁ ယောက်ကို ၁၂၀၀၀၀ ကျပ်၊ မန္တလေး-ပြင်ဦးလွင် စစ်ကိုင်း ၅ ရက်ခရီးအတွက် တယောက်ကို ၁ သိန်းကျပ်၊ မင်းဘူးနဲ့ ပုဂံ ၅ ရက်ခရီးအတွက် ၁ ယောက်ကို ၁ သိန်းကျပ်နဲ့ သွားနိုင်မယ်လို့ ကြေညာထားပြီး ဘုန်းကြီးကျောင်းမှာတည်းရမယ့်ခရီးစဉ်တွေ ဖြစ်ပါတယ်။

ခရီးသွားလုပ်ငန်းတခုရဲ့ ဒါရိုက်တာက “အခုအချိန် ခရီးမထွက်သင့်ပါဘူး။ ကိုဗစ်က စိတ်မချရသေးဘူး။ မြန်မာပြည်မှာ စစ်အာဏာသိမ်းထားတဲ့အတွက် ပြည်သူတွေ ဒုက္ခရောက်နေတဲ့အချိန်၊ နေစရာ စားစရာမရှိ ဒုက္ခဘေးသင့်နေတဲ့အချိန်မှာ သူတို့ကို စာနာတဲ့အားဖြင့် အပန်းဖြေခရီး၊ ဘုရားဖူးခရီး မထွက်သင့်ပါဘူး” လို့ ပြောပါတယ်။

လက်ရှိမှာတော့ မင်းဘူးရွှေစက်တွေကို နေ့စဉ် ဘုရားဖူး ၁၀၀၀ လောက်လာရောက်နေပြီး ညအိပ်လို့တော့ မရသေးပါဘူး။

ရန်ကုန် ချောင်းသာ၊ ရန်ကုန် ငွေဆောင် ကားခ ၂၅၀၀၀၊ ရန်ကုန် ငပလီ ကားခ ၅၀၀၀၀ စတဲ့ နှုန်းထားတွေနဲ့လည်း ခရီးသွားတွေကို ပို့ဆောင်နေပြီး အခု ငပလီမှာလည်း ဧည့်သည်တော်တော်များများ ရောက်နေတယ်လို့ ဒေသခံတွေက ပြောပါတယ်။ 

Tour Operator တယောက်က “နိုင်ငံရေးအခြေအနေက လုံးဝ မတည်ငြိမ်တဲ့အပြင် ခရီးသွားလာရေးနဲ့ ဆက်စပ်နေတဲ့ ကားလိုင်း၊ ဟိုတယ် တော်တော်များများက Boycott List ထဲ ဝင်ထားတာကြောင့် မလိုအပ်ရင် ဒီအချိန်မှာ ခရီးမသွားသင့်ပါဘူး” လို့ ပြောပါတယ်။

ခရီးသွားတွေကြောင့် တော်လှန်ရေးတိုက်ပွဲတချို့အနှောင့်အယှက်ဖြစ်ရပြီး ရပ်လိုက်ရတဲ့ လှုပ်ရှားမှုတွေလည်း ရှိတယ်လို့ ပြည်သူ့ကာကွယ်ရေးတပ်ဖွဲ့တချို့က ပြောဆိုထားပါတယ်။ 

ဓာတ်ပုံ - စစ်အာဏာသိမ်းမှုကို ခရီးသွားလုပ်ငန်းများ ဆန္ဒပြစဉ်

8 months Ago
More News
Up