ကရင်ပြည်နယ်၊ ကြာအင်းဆိပ်ကြီးမြို့နယ်၊ သံပုရာကျေးရွာနားမှာ ဇန်နဝါရီ ၁၄ ရက်  မွန်းလွဲပိုင်းက စစ်ကောင်စီတပ်ခိုးယူထားတဲ့ပစ္စည်းတင်ကား ၄ စီးကို တော်လှန်ရေးတပ်ဖွဲ့က  သိမ်းဆည်းသွားပြီးနောက်  ရွာသား ၁၀ ယောက်လောက်ကို  စစ်ကောင်စီက ဖမ်းဆီးရိုက်နှက် စစ်ဆေးခဲ့တယ်လို့ ဒေသခံပြည်သူတွေကပြောပါတယ်။

တောင်စွန်း၊ ဆင်ပြေး၊ ခုံခံ၊ သံပုရာ၊ ကိုရောင်ကျေးရွာက ဈေးရောင်းဈေးဝယ်တွေနဲ့ ခရီးသွားပြည်သူတွေကို သံပုရာကျေးရွာအဝင်မှာ ကင်းပုန်းဝပ်စခန်းချနေတဲ့ စစ်ကောင်စီတပ်ဖွဲ့ဝင်တွေက ဖမ်းဆီးရိုက်နှက်စစ်ဆေးခဲ့လို့  ပြင်းထန်ဒဏ်ရာတွေရရှိခဲ့တာပါ။

တောင်စွန်းကျေးရွာမှာ တပ်စွဲထားတဲ့ ကြာအင်းဆိပ်ကြီးမြို့အခြေစိုက် ခလရ ၂၈၄ နဲ့ အမှတ် ၁ဝ၂၂ နယ်ခြားစောင့် (BGF) ပူးပေါင်းတပ်ဖွဲ့တွေက စစ်ပြေးရှောင်ပြည်သူတွေရဲ့ နေအိမ်ကနေ သိမ်းယူထားတဲ့ သစ်မျိုးစုံနဲ့ ခိုးယူထားတဲ့ပစ္စည်းတွေကို အနန်းကွင်းကျေးရွာမှာရှိတဲ့ စစ်ကောင်စီဗျူဟာကို ပို့ဆောင်ခိုင်းခဲ့တာပါ။

ခိုးယူထားတဲ့ပစ္စည်းတင်အရပ်ကား ၄ စီးကို တော်လှန်ရေးပူးပေါင်းတပ်ဖွဲ့တွေက ကြားဖြတ်သိမ်းဆည်းသွားလို့ အခုလိုခရီးသွားပြည်သူတွေကို ဖမ်းဆီးရိုက်နှက်စစ်ဆေးတာဖြစ်ပြီး  ညနေ ၅ နာရီလောက်မှ ပြန်လွှတ်ပေးခဲ့တယ်လို့ ဒေသခံပြည်သူတွေက ပြောပါတယ်။

မျက်မြင်ဒေသခံပြည်သူတစ်ဦးက “လမ်းဖြတ်သွားတဲ့ မြင်သမျှ ယောကျာ်း မိန်းမ အကုန်ဖမ်းပြီး လက်ပြန်ကြိုးတုပ် ဝါးလုံးနဲ့လည်းရိုက်တယ်။ သေနတ်နဲ့လည်း ခေါင်းကိုရိုက်တယ်။  ကန်တာတွေကောစုံနေတာပဲ။ ပြန်လွတ်လာတော့ မြင်ရက်စရာမရှိဘူး။ အကုန်လုံးသွေးသံရဲရဲနဲ့။ လူမဆန်အောင် ရိုက်နှက်ထားတာ"လို့ ပြောပါတယ်။ 

စစ်ကောင်စီပူးပေါင်းတပ်တွေဟာ တိုက်ပွဲအတွင်း ပျက်စီးသွားတဲ့တပ်စခန်းကို  ပြန်လည်ပြုပြင်ဖို့အတွက် ကျေးရွာတွေကနေ သစ်၊ ဝါး၊ ခြံစည်းရိုးတိုင်တွေကို အဓမ္မတောင်းယူပြီး စခန်းအရောက်ပို့ဆောင်ခိုင်းထားတယ်လို့ ဒေသခံပြည်သူတွေက ပြောပါတယ်။

နယ်မြေအတွင်း တိုက်ပွဲတွေ ပြင်းထန်စွာ ဖြစ်ပွားနေလို့ ခရီးသွားပြည်သူတွေ ခရီးသွားလာချိန်မှာ အလွန်အန္တရာယ်ရှိတာကြောင့် ကြာအင်းဆိပ်ကြီး - ဘုရားသုံးဆူလမ်းကို ဇန်နဝါရီ ၁၆  ရက်မှ ၂၃ ရက်အထိ အခုသတင်းပတ်အတွင်း ခရီးသွားလာတာမလုပ်ကြဖို့ ကေအန်ယူ ဒူးပလာယာခရိုင်က ပြည်သူတွေကို သတိပေးထုတ်ပြန်ထားပါတယ်။

ဒီဇင်ဘာ ၃၁ ရက်က KNLA မဟာမိတ်ပူးပေါင်းအဖွဲ့က ဘုရားသုံးဆူမြို့နယ်၊ တောင်စွန်းကျေးရွာအနီးက စစ်ကောင်စီတပ်စခန်းတွေကို  စတင်ထိုးစစ်ဆင်တိုက်ခိုက်ခဲ့ရာ  ဇန်နဝါရီ ၅ ရက်နေ့အထိ နှစ်ဖက်တိုက်ပွဲတွေပြင်းထန်ခဲ့ပါတယ်။

နယ်ခြားစောင့် BGF တပ်စခန်း နှစ်ခုကို KNLA မဟာမိတ်ပူးပေါင်းအဖွဲ့က တိုက်ခိုက်သိမ်းပိုက်နိုင်ခဲ့သလို စစ်ကောင်စီပူးပေါင်းတပ်ဘက်က သေဆုံးသူ ၁၀၀ နီးပါးရှိပြီး လက်နက်တွေပါသိမ်းဆည်းခံခဲ့ရသလို KNLA မဟာမိတ်ပူးပေါင်းအဖွဲ့ဘက်က တပ်ဖွဲ့ဝင် ၁၁ ဦးကျဆုံးခဲ့ပါတယ်။

မကွေးတိုင်းပေါက်မြို့နယ်မှာ ဇွန် ၂၉ ရက်မနက်က  ခရီးသွားပြည်သူ လေးယောက်ကို စစ်ကောင်စီတပ်တွေက PDF ထောက်ပံ့ပေးသူလို့ စွပ်စွဲဖမ်းဆီးသွားတယ်လို့ ဒေသခံတွေဆီကနေ သိရပါတယ်။

ပေါင်မြို့နယ်၊ ယာကြီးပြင်ကျေးရွာနားမှာ ဇွန် ၂၉ ရက် မနက် ၈ နာရီလောက်က ခရီးသွား အမျိုးသား သုံးယောက်နဲ့ အမျိုးသမီး တယောက်ကို PDF အတွက်ဆက်ကြေးကောက်ခံပြီး ထောက်ပံ့ပေးသူတွေလို့စွပ်စွဲပြီး စစ်တပ်က ဖမ်းဆီးသွာတာလို့ ပေါက်မြို့ဒေသခံက ပြောပါတယ်။

အဖမ်းခံရတဲ့ သူတွေကတော့ ပခုက္ကူမြို့နယ်၊ ကမ္မမြို့ အမှတ် ၆ ရပ်ကွက်က ကိုကျော်နိုင်၊ ကိုဇော်ညွှန့်၊ ကိုထွန်းဦးနဲ့ မဖြူဖြူဝင်းတို့ ဖြစ်ကြပါတယ်။

ဒေသခံတဦးက “တကယ်တော့ စစ်(...)တွေက ခေတ်ပျက်ထဲမှာ စီးပွားရှာနေကြတာဗျ။ နည်းနည်းငြိတာနဲ့ တန်းဖမ်းတော့တာ ။ငွေနဲ့လိုက်ရင် ပြန်လွှတ်ပေးပြီး ငွေမပေးနိုင်သူတွေကိုတော့ စစ်ကြောရေးနဲ့ ထောင်ကိုပို့ကြတယ်။ ဒီကောင်တွေက ပိုက်ဆံချမ်းသာတဲ့ သူဌေးတွေကို လိုက်ဖမ်းပြီး သိန်းထောင်နဲ့ ချီဂွင်ဖန်နေလို့ ပခုက္ကူမြို့ပေါ်က သူဌေးတွေလည်း ထွက်ပြေး တိမ်းရှောင်နေကြတယ်”လို့  ပြောပါတယ်။

ပခုက္ကူမြို့မှာ ဇွန် ၃၀ ရက် မွန်းလွဲပိုင်းကလည်း ပခုက္ကူတက္ကသိုလ် ကျောင်းသားသမဂ္ဂအဖွဲ့ အတွင်းရေးမှူးဟောင်း တယောက်ကို  မမှန်သတင်းရေးသား ဖြန့်ဝေလို့ ဆိုပြီး စစ်အုပ်စုတွေက ရိုက်နှက်ဖမ်းဆီးသွားပါတယ်။

စစ်တပ်အာဏာစသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်မှ ၂၀၂၂ ခုနှစ် ဇူလိုင် ၁ ရက်အထိ နိုင်ငံတဝန်း ဖမ်းဆီးချုပ်နှောင်ခြင်းခံထားရသူ စုစုပေါင်း ၁၁၃၆၂ ဦးရှိပြီး ၁၂၀၈ ဦးက ထောင်ဒဏ်ချမှတ်ခံထားရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)  မှတ်တမ်းအရ သိရပါတယ်။