ကျွမ်းကျင်ပညာရှင်ခေါ်ယူမှု

April 19, 2017

ကျွမ်းကျင်ပညာရှင်ခေါ်ယူမှု ဗီဇာ ပိုမိုပိတ်ပင်ကန့်သတ်သွားမည်ဟု သြစတြေးလျ ပြော

သြစတြေးလျနိုင်ငံက နိုင်ငံခြားသား ကျွမ်းကျင်ပညာရှင်ခေါ်ယူမှု ဗီဇာအစီအစဉ်ကို ပိတ်ပင်ကန့်သတ်မှုတွေ ပိုလုပ်ဆောင်သွားမယ်လို့ သြစတြေးလျ ဝန်ကြီးချုပ်က ဧပြီ ၁၈ ရက်နေ့မှာ ကြေညာပါတယ်။ လက်ရှိ သြစတြေးလျနိုင်ငံရဲ့ နိုင်ငံခြားသား ကျွမ်းကျင်ပညာရှင် ခေါ်ယူမှု 457 ဗီဇာအစီအစဉ်ဟာ သြစတြေးလျနိုင်ငံရဲ့ အိုင်တီ နည်းပညာကဏ္ဍတွေ၊ ကျန်းမာရေးကဏ္ဍတွေနဲ့ စားသောက်ဆိုင်လုပ်ငန်းတွေမှာ နိုင်ငံတကာ ကျွမ်းကျင်ပညာရှင်တွေကို ခေါ်ယူခန့်ထားတဲ့ အစီအစဉ်ဖြစ်ပြီး ပညာရှင်အများစုဟာ အိန္ဒိယ၊ ဗြိတိန်နဲ့ တရုတ်နိုင်ငံတွေက လာရောက်ကြတာပါ။ ဒီဗီဇာအစီအစဉ်ကို ဖျက်သိမ်းပြီး သြစတြေးလျနိုင်ငံသားတွေရဲ့ အလုပ်အကိုင်နဲ့ အခွင့်အလမ်းကို ဦးစားပေးမယ့် ဗီဇာအစီအစဉ်နဲ့ အစားထိုးသွားမယ်လို့ သြစတြေးလျဝန်ကြီးချုပ် မဲလ်ကွန် တန်ဘူးလ် (Malcolm Turnbull) က ပြောပါတယ်။ ဒီ 457 ဗီဇာအစီအစဉ်ကြောင့် သြစတြေးလျနိုင်ငံသားတွေရဲ့ အလုပ်အကိုင် အများအပြားဟာ နိုင်ငံခြားသား ကျွမ်းကျင်ပညာရှင်တွေဆီ ဆုံးရှုံးကုန်တယ်လို့ ဒီဗီဇာအစီအစဉ်ကို ဆန့်ကျင်သူတွေက ပြောဆိုပါတယ်။ အဲ့ဒီဗီဇာအစား တခြားလိုအပ်ချက်၊ ကန့်သတ်ချက်သစ်တွေနဲ့ ယာယီဗီဇာအစီအစဉ် ၂ မျိုး အစားထိုးသွားမှာဖြစ်ပြီး ကျွမ်းကျင်ပညာရှင်တွေ ခေါ်ယူတဲ့ အလုပ်အကိုင် အမျိုးအစားတွေကိုလည်း လျော့ချသွားမှာဖြစ်ပါတယ်။ သြစတြေးလျနိုင်ငံသားတွေရဲ့ အကျိုးစီးပွားကို ဒီဗီဇာစနစ်အသစ်နဲ့ စနစ်တကျ၊ တင်းတင်းကျပ်ကျပ်၊ ပြတ်ပြတ်သားသား ကာကွယ်သွားမယ်လို့ ဝန်ကြီးချုပ် မဲလ်ကွန် တန်ဘူးလ်က ပြောဆိုပါတယ်။
4 years Ago
Up