ကွတ်ခိုင်မြို့

April 9, 2021

ကွတ်ခိုင်မြို့တွင် စစ်အာဏာရှင်ဆန့်ကျင်ရေး အရုဏ်ဦးသပိတ်ပြုလုပ်

ရှမ်းပြည်မြောက်ပိုင်း၊ ကွတ်ခိုင်မြို့က G-Z လူငယ်တွေဟာ ဧပြီ ၉ ရက်မနက်က   စစ်အာဏာရှင်တော်လှန်ရေး အရုဏ်ဦးသပိတ်ပြုလုပ်ပြီး ဆန္ဒပြခဲ့ကြပါတယ်။

လားရှိုး-မူဆယ် ပြည်ထောင်စုလမ်းကြီးအတိုင်း ရတနာမိုးဆီဆိုင်အနီးထိ စစ်အာဏာရှင် တော်လှန်ဆန့်ကျင်တဲ့ ကြွေးကြော်သံတွေနဲ့အတူ ငြိမ်းချမ်းစွာ ဆန္ဒပြခဲ့တာပါ။

သပိတ်မှာ ပါဝင်တဲ့သူတွေကို ဝန်းရံပြည်သူတချို့က သောက်ရေသန့်တွေ၊ အချိုရည်တွေနဲ့ ဒံပေါက်ထမင်းဘူးတွေ လှူဒါန်းခဲ့ကြပြီး စစ်အာဏာရှင်တော်လှန်ရေး သပိတ်စစ်ကြောင်းကို အားပေးဝန်းရံခဲ့ပါတယ်။

ကွတ်ခိုင်မြို့က G-Z လူငယ်တွေဟာ စစ်အာဏာရှင် အလိုမရှိကြောင်း နည်းလမ်းပေါင်းစုံနဲ့ ဆက်လက် ဆန္ဒထုတ်ဖော်နေကြသလို သပိတ်စစ်ကြောင်းကို စစ်ကောင်စီရဲ့တပ်ဖွဲ့ဝင်တွေက အင်အားသုံး လိုက်လံပစ်ခတ်ဖြိုခွဲပြီး ဖမ်းဆီးတဲ့အတွက် လူငယ်တချို့ ဖမ်းဆီးခံရတာတွေ ရှိပါတယ်။

ဓာတ်ပုံ - မိုင်းဘဉာဏ်(ကွတ်ခိုင်)

8 months Ago

March 16, 2021

ကွတ်ခိုင်မြို့တွင် စစ်အာဏာရှင် ကျဆုံးရေး ဆန္ဒပြသူတွေကို ရဲနှင့်တပ်က အင်အားသုံး ဖြိုခွင်း

မတ်လ ၁၅ ရက် မနက်ပိုင်းက ရှမ်းပြည်နယ်မြောက်ပိုင်း၊ ကွတ်ခိုင်မြို့မှာ စစ်အာဏာရှင် ကျဆုံးရေး ဆန္ဒပြသပိတ်စစ်ကြောင်းကို ရဲနဲ့တပ်က အင်အားသုံးလိုက်လံဖြိုခွင်းနေတဲ့ကြားက  G-Z လူငယ်တွေဟာ ပြည်ထောင်စုလမ်းမကြီးပေါ်မှာ  ဆန္ဒပြခဲ့ပါတယ်။

စစ်အာဏာရှင်ကျဆုံးရေး ဆန္ဒပြသူတွေကို ရဲနဲ့ စစ်တပ်က လိုက်လံဖမ်းဆီးတာတွေ မျက်ရည်ယိုဗုံး၊ ရာဘာကျည်နဲ့ အင်အားသုံး အကြမ်းဖက်ပစ်ခတ်ဖြိုခွင်းတာတွေ ရှိနေတဲ့ကြားက ဆန္ဒပြသူတွေဟာ ထိပ်တိုက်တွေဆုံတာတွေကို မပြုလုပ်ပဲ ​ကြွေးကြော်သံတွေနဲ့အတူ ငြိမ်းချမ်းစွာ ချီတက်ဆန္ဒပြခဲ့တာပါ။ 

စစ်ကောင်စီရဲ့ ရဲနဲ့ တပ်တွေက လူ ၅ဦးနဲ့အထက် မစုဝေးဖို့ လှည့်လည်သတိ​ပေးတာတွေရှိပေမယ့် ဒေသခံတိုင်းရင်းသား G-Z လူငယ်တွေက မြို့မဈေးရှေ့၊ ပြည်ထောင်စုလမ်းမပေါ်မှာ လူအင်အား ၂၀၀ ခန့်က ဆန္ဒပြခဲတာပါ။

"ဆန္ဒပြနေတဲ့ လူငယ်တွေကို က အင်အားသုံးလိုက်လံဖြိုခွင်းတာကို ထိတ်တိုက်တွေ့ဆုံတာမျိုးမလုပ်ဘဲ ရှောင်ကွင်းပြီး ဆန္ဒထုတ်ဖော်ခဲ့ကြတယ်"လို့ ဆန္ဒပြပွဲမှာပါဝင်တဲ့ G-Z လူငယ်တစ်ဦးက ပြောပါတယ်။

ဒီကနေ့ မနက်ပိုင်းမှာ G-Z လူငယ်တချို့ဟာ  မုခ်ဦးကုန်းမှာ Responsibility to Protest (R2P) အလိုရှိကြောင်းအပါအဝင် ဒီမိုကရေစီရရှိရေး၊ ပြည်သူ့အာဏာပြည်သူ့ပြန်ပေး၊ စစ်အာာရှင်ကျဆုံးရေး၊ စစ်အာဏာရှင်စနစ် အလိုမရှိစတဲ့ စာတန်းပါစာလုံးတွေနဲ့  လူမဲ့သပိတ် ပြုလုပ်ခဲ့ကြပါတယ်။

ဓါတ်ပုံ - မိုင်းဘဉာဏ်(ကွတ်ခိုင်)

9 months Ago
Up