မဟတ္တမဂန္ဒီရဲ့ နှစ် ၁၅၀ ပြည့် မွေးနေ့အထိမ်းအမှတ်အဖြစ် ဗြိတိန်နိုင်ငံ မန်ချက်စတာမြို့မှာ ဂန္ဒီကြေးရုပ်တုကို နိုဝင်ဘာလ ၂၅ ရက်နေ့က ဖွင့်လှစ်ခဲ့ပါတယ်။
အိန္ဒိယရှေ့နေနဲ့ နိုင်ငံရေး နီတိဆရာတဦး ဖြစ်တဲ့ ဂန္ဒီရဲ့ ပုံတူကြေးရုပ်တုကို မန်ချက်စတာဘုရားရှိခိုးကျောင်း အပြင်ဘက်မှာ စိုက်ထူပြီး နိုင်ငံရေးနဲ့ ဘာသာရေး ခေါင်းဆောင်တွေ ရှေ့မှောက် ဖွင့်လှစ်ခဲ့တာပါ။
ရမ်ဗွီဆူထာ ဆိုသူ ပန်းပုပညာရှင် ဖန်တီးတဲ့ ၉ ပေ အမြင့်ရှိ ကြေးရုပ်တုဟာ မန်ချက်စတာမြို့ရဲ့ ယဉ်ကျေးမှုပေါင်းစုံ လူ့အဖွဲ့အစည်းကို ဂုဏ်ပြုဖို့ ရည်ရွယ်ပါတယ်။
၁၉၃၁ ခုနှစ်တုန်းက ဂန္ဒီဟာ လန်ကတ်ရှိုင်းယားနယ်က စက်ရုံလုပ်သားတွေကို လာတွေ့ရင်း မန်ချက်စတာမြို့ကို ရောက်ရှိတဲ့ အထိမ်းအမှတ်အဖြစ် ဒီကြေးရုပ်တုကို ဂုဏ်ပြု သွန်းလုပ်တာလည်း ဖြစ်ပါတယ်။
မဟတ္တမဂန္ဒီဟာ ငြိမ်းချမ်းခြင်းတရား၊ မေတ္တာတရားနဲ့ ကရုဏာတရား ၃ ခုစလုံးကို ကိုယ်စားပြုတယ်။
အခု လူ့အဖွဲ့အစည်းအတွင်း အဲဒီတန်ဖိုးတွေ ပျက်စီးဆုံးရှုံးနေချိန်ဖြစ်လို့ စိတ်ငြိမ်းချမ်းဖို့ ဖြစ်ဖြစ်၊ ကမ္ဘာကြီး ငြိမ်းချမ်းဖို့ဖြစ်ဖြစ် ဒီကိုလာပြီး သမိုင်းဝင် အခမ်းအနားလေးမှာ အတူဆင်နွှဲပါလို့ ဒေသခံတဦးက ဖိတ်ခေါ်ခဲ့ပါတယ်။
3 years Ago
