ကြူကုတ်(ပန်ဆိုင်း)

October 20, 2021

ကြူကုတ် (ပန်ဆိုင်း) ရဲစခန်းပစ်ခတ်ခံရ၊ မုံးကိုးဘက်တွင် တိုက်ပွဲထပ်မံဖြစ်ပွား

ရှမ်းပြည်နယ်မြောက်ပိုင်း၊ တရုတ်-မြန်မာနယ်စပ် ကြူကုတ် (ပန်ဆိုင်း) ရဲစခန်းကို အောက်တိုဘာ ၁၉ ရက်မှာ ကိုးကန့် (MNDAA) တပ်က တိုက်ခိုက်ပြီးနောက် မုံးကိုးဘက် စစ်ကောင်စီတပ်တွေနဲ့ တိုက်ပွဲ ထပ်မံဖြစ်ပွားခဲ့တယ်လို့  ဒေသခံတွေဆီက သိရပါတယ်။

မွန်းတည့် ၁၂ နာရီခွဲလောက်ကစပြီး  ရပ်ကွက် ၅ အနီးမှာ စတင်တိုက်ပွဲဖြစ်ပွားတာလို့ ဒေသခံ အမျိုးသမီးတယောက်က ပြောပါတယ်။ 

"ကျမတို့  ရပ်ကွက် ၅ ဘက်မှာ ပစ်နေပြီ။ လက်နက်သေးတွေ ပစ်နေတယ်။ လက်နက်ကြီးလည်း ပစ်သံကြားရတယ်။ အခု ကတုတ်ကျင်းထဲမှာ ပုန်းနေတယ်။"

မွန်းလွဲ ၁ နာရီ ၄၀ မိနစ်ဝန်းကျင်မှာ ကိုးကန့် (MNDAA) တပ်ဖွဲ့တွေက ကြူကုတ် (ပန်ဆိုင်း) မြို့ထဲက ရဲစခန်းကိုပစ်ခတ်ခဲ့ပြီး မိနစ်အနည်းငယ်အကြာမှာ တိုက်ပွဲပြန်ငြိမ်သွားတယ်လို့ ဆိုပါတယ်။

စစ်ကောင်စီတပ်၊ ကိုးကန့် (MNDAA) တပ်တို့အပြင် ကြူကုတ် (ပန်ဆိုင်း)မြို့အနီးနားတွေမှာ TNLA တပ်တွေ လှုပ်ရှားသွားလာနေတာလည်း မြင်ရတယ်လို့ ဒေသခံတွေက ပြောပါတယ်။

ညနေ ၃ နာရီ ကျော်လောက်ကနေ  ၅ နာရီ ကျော်အထိ  မုံးကိုး ကောင်းဒပ်ဘက်မှ လက်နက်ကြီးရော လက်နက်ငယ်ပါ ပစ်ခတ်ကာ တိုက်ပွဲပြင်းထန်ခဲ့ပြီး ၆ နာရီ ကျော်အထိ လက်နက်ကြီး တချက် တချက် ပစ်ခတ်နေဆဲ ဖြစ်တယ်လို့ မုံးကိုး ဒေသခံတဦးက ပြောပါတယ်။

တိုက်ပွဲကြောင့် နှစ်ဖက်ထိခိုက်ဒဏ်ရာရမှုအခြေအနေကိုတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။ ကိုးကန့် (MNDAA) တပ် ပြန်ကြားရေးကတော့ အခုရက်ပိုင်း ပဋိပက္ခတွေ ဖြစ်ပွားနေတာ မှန်ကန်ပြီး အသေးစိတ်အချက်အလက်တွေ စုဆောင်းနေတယ်လို့ ပြောပါတယ်။

အောက်တိုဘာ ၁၇ ရက်နေ့ကလည်း ကြူကုတ် (ပန်ဆိုင်း) မှာ စစ်ကောင်စီတပ် နဲ့ ကိုးကန့် MNDAA တို့ အကြား တိုက်ပွဲကြောင့် ကြူကုတ် (ပန်ဆိုင်း) ရပါယ်ကွက် ၅ က အသက် ၆၂ နှစ် အရွယ်အမျိုးသမီးကြီးတစ်ဦးနဲ့ ပန်ဆိုင်း မြို့အထွက်မှာ ဆိုင်ကယ်စီးပြီးထွက်လာတဲ့ အမျိုးသမီး လူငယ် ၂ ဦးတို့လည်း ကျည်ထိမှန် သေဆုံးခဲ့ပါသေးတယ်။

စစ်ကောင်စီတပ်နဲ့ ကိုးကန့် (MNDAA) တို့အကြား မုံးကိုးဘက်မှာ အခုနှစ် ဇူလိုင်လ ဆန်းပိုင်းကတည်းက တကျော့ပြန် တိုက်ပွဲ ပြန်လည်စတင် ဖြစ်ပွားလာခဲ့ပြီး ကြူကုတ် (ပန်ဆိုင်း) မြို့ဝန်းကျင်မှာတော့ ဩဂုတ်လဆန်းပိုင်းကစ တိုက်ပွဲ ပြင်းထန်လာခဲ့တာဖြစ်ပါတယ်။

တိုက်ပွဲကြောင့် မုံးကိုးနဲ့ ကြူကုတ် (ပန်ဆိုင်း) မြို့နယ်ခွဲအတွင်းတွေမှာ စစ်ဘေးဒုက္ခသည် ၂၀၀၀ ကျော် ရှိပြီး လက်နက်ထိမှန်သေဆုံးတဲ့ အရပ်သားပြည်သူ မုံးကိုး နဲ့ ကြူကုတ် (ပန်ဆိုင်း)မှာ ၁၀ ဦး ရှိပြီ ဖြစ်ပြီး လက်နက်ထိ ဒဏ်ရာရသူ ၉ ဦး နဲ့ ရှပ်ထိ ၃ ဦး ရှိပြီ ဖြစ်ပြီး မိုင်းနင်းမိ သေဆုံးသူ ၃ ဦး၊ ဒဏ်ရာရသူ ၁ ဦး ရှိပါတယ်။

1 month Ago

August 31, 2021

ကြူကုတ် (ပန်ဆိုင်း) တိုက်ပွဲတွင် စစ်ကောင်စီဘက်က ၁၅ ဦးကျ၊ အနည်းဆုံး ၆ ဦး ဒဏ်ရာရ

ရှမ်းပြည်နယ် မြောက်ပိုင်း တရုတ်-မြန်မာနယ်စပ် မူဆယ်ခရိုင် ကြူကုတ် (ပန်ဆိုင်း) နားက ဩဂုတ် ၃၀ ရက်နေ့ တိုက်ပွဲမှာ စစ်ကောင်စီဘက်က ၁၅ ဦးသေဆုံးပြီး အနည်းဆုံး ၆ ဦး ဒဏ်ရာရတယ်လို့ ကိုးကန့်သတင်းနဲ့ ပြန်ကြားရေးဌာနက တာဝန်ရှိသူတစ်ဦးက ပြောပါတယ်။ 

"စစ်ကောင်စီဘက် ၁၅ ယောက်ကျ၊  အနည်းဆုံး ၆ ထိခိုက်တယ်။ MNDAA ဘက် ထိခိုက်မှု  မရှိဘူး။ လက်ရှိမှာ စစ်ကောင်စီဟာ မုံးကိုးဒေသအခြေစိုက် MNDAA တပ်ဖွဲ့ရဲ့အခြေ စိုက်စခန်းတွေကို ထိုးစစ်ဆင်ဖို့ စစ်အင်အား ဖြည့်တင်းနေတယ်။" 

ကြူကုတ် (ပန်ဆိုင်း) နား ဩဂုတ် ၃၀ ရက်နေ့က မနက် ၁၀ နာရီလောက်က စတင်ဖြစ်ပွားခဲ့တဲ့ တိုက်ပွဲမှာ ညနေ ၆ နာရီထိ ပစ်လိုက်၊ နားလိုက် ဖြစ်ပွားခဲ့ကာ စစ်ကောင်စီဘက်က အများအပြား သေဆုံးတယ်လို့ ပန်ဆိုင်းဒေသခံတစ်ဦးက ပြောပါတယ်။ 

“စစ်ကောင်စီဘက်က သေတယ်။ အများကြီး။ ၁၀ ယောက် ကျော်တယ်။ ဈေးသွားပြီး ပြန်လာလို့ မရလို့ သေနတ်သံ ငြိမ်ပြီး ပြန်လာတော့ အလောင်းရေပြီးမှ ပြန်လာတယ်။ အဲဒီမှာ အလောင်းတွေ ပုံနေတယ်။ ပန်ဆိုင်းအကျော် ဖိုင်ကောင်း သွားတဲ့ လမ်းမှာ။ အဲမှာ အလောင်းစောင့်တဲ့ စစ်ကောင်စီ စစ်သား နှစ်ယောက်လောက် ရှိသေးတယ်။” 

ဩဂုတ်လ ၂၈ နဲ့ ၂၉ ရက်တွေက မုံးကိုးတိုက်ပွဲမှာ စစ်ကောင်စီက အကျအဆုံးရှိလို့ စစ်ကောင်စီဘက်က အင်အားဖြည့် စစ်ကူတက်လာတဲ့ စကခ ၁၇ ခမရ ၅၇၅ မှတပ်သား ၄၀ ကျော်ကို MNDAA ၅၁၁ တပ်မဟာမှ တပ်ဖွဲ့တစ်ဖွဲ့ ပန်ဆိုင်းကနေ မုံးကိုး အတက်လမ်းမှာ ပိတ်ဆို့ တိုက်ခိုက်ရာ နမ့်ဟူးရွာအထိ တိုက်ပွဲဖြစ်ပွားခဲ့ပြီး တစ်နာရီကြာတိုက်ပွဲ ပြင်းထန်ခဲ့ကာ လက်နက် အများအပြား သိမ်းရတယ်လို့ ကိုးကန့်သတင်းမှာ ဖော်ပြထားပါတယ်။

ဩဂုတ် ၃၀ ရက်နေ့က ပန်ဆိုင်းတိုက်ပွဲမှာ စစ်ကောင်စီတပ်ဖွဲ့ဆီကနေ MA1 ရိုင်ဖယ် ၅ လက်၊ MA3 ရိုင်ဖယ် ၂ လက်၊ MA4 ရိုင်ဖယ် ၂ လက်၊ ရိုင်ဖယ်ကျည် ၄၅၀၀၊ MG3 ကျည်အတောင့် ၃၀၀၊ ကျည် ၅ လုံး၊ မော်တာကျည် ၁၈ လုံး၊ လက်ပစ်ဗုံး ၂၆ လုံး၊ လက်ပစ်ဗုံး ၁၂ လုံးနှင့်မြေမြှုပ်မိုင်း ၁၂ လုံး၊ တစ်လုံး၊ လက်ပစ်ဗုံး ၂၂ လုံး၊ MA2 အပေါ့စားစက်သေနတ် ၃ စင်း၊ ကျောပိုးအိတ်အကြီး ၂၀၊ ကျည်အိတ် ၁၆ လုံး၊ လက်ကိုင်ဖုန်း ၃ လုံး၊ walkie-talkies ၉ လုံး၊ ဆိုလာပြား ၂ ခုနဲ့ အခြားပစ္စည်းတွေ သိမ်းဆည်းရမိခဲ့တယ်လို့ ဆိုပါတယ်။

ဩဂုတ်လ ၃၁ ရက်‌‌နေ့မှာလည်း မုံးကိုး နော့ဂူနားက မန်မောဝ်ဘက်မှာ စစ်ကောင်စီနဲ့ မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) တို့ တိုက်ပွဲဖြစ်ပွားနေတယ်လို့ မုံးကိုး ဒေသခံတစ်ဦးက ပြောပါတယ်။

တိုက်ပွဲတွေကြောင့် လက်နက်ကြီးထိမှန် သေဆုံးတဲ့ အရပ်သားပြည်သူ ဩဂုတ်လ ၂၉ ရက်နေ့က မုံးကိုး နမ့်ဟာရွာမှာ ၄ ဦး၊ ဩဂုတ်လ ၃၀ ရက်နေ့က ကြူကုတ် (ပန်ဆိုင်း) နားက တိုက်ပွဲမှာ ၂ ဦး စုစုပေါင်း ၆ ဦးရှိပြီ ဖြစ်ပါတယ်။ 

မုံးကိုးမြို့နယ်မှာ ဇွန်‌ေဆန်းပိုင်းကစ လက်ရှိထိ စစ်ကောင်စီနဲ့ MNDAA တို့ အကြား တိုက်ပွဲများ မကြာခဏ ဖြစ်ပွားနေပြီး စစ်‌ရှောင်ပြည်သူ ဖောင်းဆိုင်ဘက်မှာ ၁၉၀ ကျော်၊ မုံးကိုးမြို့မှာ ၆၀၀ ဝန်းကျင်နဲ့ ကြူကုတ် (ပန်ဆိုင်း) ဘက်မှာ ၁၄၀၀ ကျော်ရှိပြီး လက်ရှိရှောင်တိမ်း လာနေဆဲနဲ့ ရှောင်တိမ်းဖို့ပြင်ဆင်နေတဲ့ ပြည်သူတွေလည်း ရှိနေပါတယ်။

Photo Crd -  ကိုးကန့် သတင်းဌာန

3 months Ago
Up