ကျောင်းအုပ်

May 23, 2021

မြို့သစ်မြို့နယ်က ကျောင်းအုပ်တစ်ဦး မကွေးအကျဉ်းထောင်၌ ပုံစံထိုင်ခိုင်းချိန် လဲကျသေဆုံး

မကွေးတိုင်းဒေသကြီး မြို့သစ်မြို့နယ်က ပြင်ပဘော်ဒါဆောင်ကျောင်းအုပ်တစ်ဦး မကွေးအကျဉ်းထောင်မှာ သေဆုံးခဲ့ပြီး မေ ၂၃ ရက်က မြို့သစ်သုသာန်မှာ သင်္ဂြိုဟ်ခဲ့တယ်လို့ ဒေသခံတွေဆီကနေ သိရပါတယ်။

သေဆုံးတဲ့သူ ဆရာဖိုးတုတ်(ခ)မျိုးခိုင်ထွန်းဟာ နွေဦးတော်လှန်ရေး သပိတ်တိုက်ပွဲတွေမှာ တက်ကြွလှုပ်ရှားတာကြောင့် မတ် ၂၃ ရက်နေ့မှာ အကြမ်းဖက်စစ်သူပုန်တွေရဲ့ ရိုက်နှက်ဖမ်းဆီးခံခဲ့ရတာလို့ မြို့သစ်မြို့ခံတစ်ယောက်က ပြောပါတယ်။

ဆရာဖိုးတုတ်ဟာ ရောဂါအခံရှိသူဖြစ်ပြီးတော့ မေ ၂၁ ရက်က မကွေးအကျဉ်းထောင်မှာ ထောင်တွင်းတရားရုံး ထုတ်စစ်ဆေးပြီးတော့ ပုံစံထိုင်ခိုင်းတဲ့အချိန် မွန်းလွဲ ၂ နာရီကျော်လောက်မှာ လဲကျ သေဆုံးခဲ့တာလို့ ဆိုပါတယ်။

သင်္ဂြိုဟ်တဲ့နေရာမှာလည်း အကြမ်းဖက်စစ်ကောင်စီတပ်တွေက နေရာယူထားပြီး လိုက်ပါ ပို့ဆောင်တဲ့ ပြည်သူတွေကို ဓာတ်ပုံရိုက်ခွင့်၊ Facebook တင်ခွင့်တွေကို တားမြစ်ထားတယ်လို့ ပြောပါတယ်။

မြို့သစ်မြို့နယ်အတွင်း စစ်အာဏာရှင်ပြုတ်ကျရေး နွေဦးတော်လှန်ရေး သပိတ်တိုက်ပွဲတွေမှာ တက်ကြွလှုပ်ရှားတဲ့ ဒေသခံပြည်သူ ၉ ယောက် အဖမ်းခံထားရတယ်လို့ ဒေသခံတွေဆီက သိရပါတယ်။

6 months Ago

May 19, 2021

စစ်ကိုင်းတိုင်းတွင် ကျောင်းအုပ်ဆရာ ဆရာမ အယောက် ၅၃၀ တာဝန်မှ ယာယီရပ်နားခံရ

စစ်ကိုင်းတိုင်းအတွင်း အထက်တန်းကျောင်းအုပ်နဲ့ အလယ်တန်းကျောင်းအုပ်တွေ အပါအဝင် ပညာရေးဝန်ထမ်း အယောက်  ၅၃၀ ကို အကြမ်းဖက်စစ်အုပ်စုက တာဝန်မှ ယာယီရပ်နားလိုက်ပါတယ်။ 

ခန္တီး၊ ဟုမ္မလင်း၊ ကလေး၊ ကလေးဝ၊ လဟယ်၊ မင်းကင်း၊ ကသာ၊ အင်းတော်၊ ဗန်းမောက်၊ ထီးချိုင့်၊ ကောလင်း၊ ပင်လယ်ဘူး၊ ဝန်းသို၊ ကန့်ဘလူ၊ ကျွန်းလှ၊ မော်လိုက်၊ ဖောင်းပြင်၊ မုံရွာ၊ အရာတော်၊ ချောင်းဦး၊ ဘုတလင်၊ စစ်ကိုင်း၊ မြင်းမူ၊ မြောင်၊ ရွှေဘို၊ ရေဦး၊ ခင်ဦး၊ မြို့ဝက်လက်၊ တန့်ဆည်၊ ဒီပဲယင်း၊ တမူး၊ ယင်းမာပင်၊ ဆားလင်းကြီး၊ ပုလဲ၊ ကနီ အစရှိတဲ့ မြို့နယ်များမှ အထက်တန်းကျောင်းအုပ် ၈၀ ဦး၊ အလယ်တန်းကျောင်းအုပ် ၄၅၀ ဦးကို မေလ ၇  ရက်နေ့က စပြီး အလုပ်တာဝန်မှ ရပ်ဆိုင်းလိုက်တာပါ။

ဒီလို အလုပ်က ယာယီရပ်ဆိုင်းရတာဟာ ခွင့်စည်းကမ်းကို ဖောက်ဖျက်ပြီးခွင့်မဲ့ပျက်ကွက်တာ လုံလောက်တဲ့အကြောင်းပြချက်မရှိဘဲ နိုင်ငံ့ဝန်ထမ်းနည်းဥပဒေ ၁၆၁၊ နည်းဥပဒေခွဲ (ဃ)၊ နည်းဥပဒေ (၁၇၀)  အရ ဖြစ်တယ်လို့ အခြေခံပညာဦးစီးဌာနရဲ့ မေလ ၁၂ ရက်နေ့စွဲနဲ့ ထုတ်ပြန်ချက်မှာဖော်ပြပါတယ်။

လာမယ့် ဇွန် ၁ ရက်မှာ နိုင်ငံတဝန်း အခြေခံပညာကျောင်းတွေ ဖွင့်လှစ်ဖို့ အကြမ်းဖက်စစ်ကောင်စီက စီစဉ်နေသလို  တဘက်မှာလည်း  ဆရာ၊ ဆရာမတွေကို အလုပ်ထုတ်ပစ်နေတာလည်း ဖြစ်ပါတယ်။

6 months Ago
Up