ကျောက်ဖြူ

July 13, 2021

ကျောက်ဖြူတွင် ခရိုင်အဆင့်ရှိ အရာရှိ ၂ ဦး ကိုဗစ်ကြောင့် သေဆုံး

ကိုဗစ်-၁၉ ကူးစက်ခံရပြီး ကျောက်ဖြူခရိုင် ပြည်သူ့ဆေးရုံမှာ ကုသမှုခံယူနေတဲ့ ခရိုင်လမ်းဦးစီးဌာနက ခရိုင်ဦးစီးမှူးနဲ့ ကျောက်ဖြူခရိုင်ရဲတပ်ဖွဲ့မှူးရုံးမှ ရဲမှူး ၁ ဦးတို့ ဇူလိုင် ၁၂ ရက်နေ့က သေဆုံးသွားခဲ့တယ်လို့ ဆိုပါတယ်။

အဆိုပါသေဆုံးသွားသူ ၂ ဦးထဲက ခရိုင်လမ်းဦးစီးမှူးဟာ အဝလွန်ပြီး အသက်ရှူရခက်တဲ့ ရောဂါအခံရှိသူ ၁ ဦးဖြစ်ကာ ဇူလိုင် ၇ ရက်နေ့က ကိုဗစ်ပိုး စစ်ဆေးတွေ့ရှိခဲ့တာကြောင့် ကျောက်ဖြူခရိုင် ပြည်သူ့ဆေးရုံကြီးမှာ ဆေးကုသမှုခံယူနေရာမှ ဇူလိုင် ၁၂ ရက်နေ့က နေ့လယ်က သေဆုံးသွားတာပါ။

ကျောက်ဖြူခရိုင်ရဲတပ်ဖွဲ့မှူးရုံးက ဆီးချို၊ သွေးတိုးရောဂါအခံရှိတဲ့ ဒုခရိုင်ရဲမှူးဟာလည်း အဲဒီနေ့ညမှာပဲ သေဆုံးသွားတယ်လို့ လေးဝတီကုလရက္ခိတပရဟိတအသင်း ဥက္ကဋ္ဌ ကိုဂျပန်ကြီးက ပြောပါတယ်။

“၁၂ ရက်နေ့မှာ ကိုဗစ်အတည်ပြုလူနာတွေထဲက ခရိုင်လမ်းဦးစီးမှူးက နေ့လယ်မှာ ဆုံးသွားတယ်။ ည ၁၁ နာရီကျော်မှာ ရဲရုံးက ဒုခရိုင်ရဲမှူး ၁ ဦး ထပ်ဆုံးသွားပါတယ်။ သူတို့က ရောဂါအခံရှိတဲ့သူတွေလို့ သိရတယ်။ ခရိုင်လမ်းဦးစီးမှူးမှာဆိုရင် အဝလွန်ပြီးတော့ အသက်ရှူရခက်တဲ့ ရောဂါရှိတယ်လို့ ပြောတယ်။ အဲဒီလမ်းဦးစီးဌာနက မြို့နယ်တာဝန်ရှိသူ ၁ ဦးမှာ ၆ ရက်နေ့က ပိုးတွေ့လို့ ဆက်စပ်သူတွေကို စစ်တော့ ခရိုင်ဦးစီးမှူးမှာလည်း ပိုးတွေ့တယ်။ အဲဒါနဲ့ ကျောက်ဖြူခရိုင် ပြည်သူ့ဆေးရုံကြီးကို ပို့ဆောင်ပြီး ဆေးကုသမှု ခံယူနေတာ၊ ရဲရုံးက ဒုခရိုင်မှူးကလည်း ဆီးချို၊ သွေးတိုး ရောဂါအခံရှိတယ်လို့ သိရတယ်။ သူကတော့ ၁၁ ရက်နေ့မှာ ကိုဗစ်တွေ့လို့ ဆေးရုံမှာ ဆေးကုသမှု ခံယူနေတာပေါ့။ မနေ့ကပဲ ၂ ယောက်စလုံး ဆုံးသွားတာပါ။” 

ကျောက်ဖြူခရိုင်ပြည်သူ့ဆေးရုံကြီးမှာ ဇူလိုင်လ ၃ ရက်နေ့ကနေ ဇူလိုင်လ ၁၂ ရက်နေ့ထိ ကိုဗစ်အတည်ပြုလူနာ ၆၁ ဦးအထိရှိကာ ဇူလိုင်လ ၁၁ ရက်နေ့ကလည်း ရောဂါအခံရှိတဲ့ စနဲမြို့မှ လူနာ ၁ ဦး သေဆုံးသွားခဲ့သလို ဇူလှိုင် ၁၂ ရက်နေ့မှာ ၂ ဦး ထပ်မံသေဆုံးခဲ့တာကြောင့် သေဆုံးသူ လူနာ ၃ ဦးရှိနေပြီဖြစ်တယ်လို့ ကျောက်ဖြူခရိုင် ပြည်သူ့ဆေးရုံကြီးက သိရပါတယ်။

2 months Ago

May 15, 2021

ကျောက်ဖြူ ဒေသခံ ၁ ဦးအား အကြမ်းဖက်စစ်ကောင်စီတပ်က ရိုက်နှက်

ရခိုင်ပြည်နယ်၊ ကျောက်ဖြူမြို့နယ် ကျောက်ပြောက်ကျေးရွာနေ ဦးအောင်ထွန်းဇံကို မေလ ၁၄ ရက်နေ့ညက အင်တိုင်းကြီးကျေးရွာကနေ မိမိနေရပ်ကို ပြန်လာရာလမ်းမှာ အကြမ်းဖက်စစ်ကောင်စီတပ်ဖွဲ့ဝင်အချို့ စစ်ဆေးမေးမြန်းပြီး ရိုက်နှက်ခဲ့တယ်လို့ ဒေသခံ ၁ ဦး ပြောပါတယ်။

“အသက်က ၄၁ နှစ်ရှိပြီ၊ နာမည်ကတော့ ဦးအောင်ထွန်းဇံပါ၊ သူက အင်တိုင်းကြီးကျေးရွာကို အလုပ်ကိစ္စနဲ့သွားပြီး ညနေ ၇ နာရီကျော်မှာ ရွာကို ပြန်လာတယ်၊ အဲဒီအချိန်မှာ အင်တိုင်းကြီးကနေ ဝမြှောင်ကျေးရွာ ဆက်ထားတဲ့ ကွန်ကရစ်လမ်းမှာရှိတဲ့ တံတားနားအရောက်မှာ စစ်သားတွေနဲ့ တွေ့တယ်၊ အဲဒီစစ်သားတွေက သူ့ကို အေအေကလား ဆိုပြီး မေးတယ်၊ သူက မဟုတ်ပါဘူးဆိုပြီး ပြောတယ်။ အဲဒါနဲ့ စစ်သားတွေက မင်း အရက်သောက်ထားလား၊ လူမိုက်လားဆိုပြီး မေးပြီးတော့ ဦးအောင်ထွန်းဇံရဲ့ ဝမ်းဗိုက်ကို သေနတ်ပြောင်းဝနဲ့ သုံး လေးချက်လောက်ထိုးပြီး လွှတ်လိုက်တာ၊ အခု အဲဒီဒဏ်ရာကြောင့် ဝမ်းဗိုက်အောင့်နေလို့ ဆေးသွင်းလိုက်ရတယ်၊ ဒီမနက်မှာတော့ နည်းနည်းသက်သာသွားပါပြီ” လို့ ပြောပါတယ်။

လက်ရှိ ရခိုင်ပြည်နယ်မှာ အကြမ်းဖက်စစ်ကောင်စီတပ်နဲ့ ရခိုင့်တပ်တော်တို့ကြား တိုက်ပွဲဖြစ်ပွားမှုမရှိတာဟာ ၆ လကျော်ရှိလာပြီဖြစ်ပေမဲ့ စစ်ကောင်စီတပ်က အင်အားတိုးချဲ့တာ တွေ လုပ်ဆောင်နေသလို နယ်တွေမှာလည်း သွားလာလှုပ်ရှားမှုတွေ ရှိလာနေတာကြောင့် တိုက်ပွဲတွေ ပြန်ဖြစ်လာမှာကို ဒေသခံတွေကြား စိုးရိမ်နေကြပါတယ်။

4 months Ago
More News
Up