မကွေးတိုင်း၊ ထီးလင်းမြို့နယ်၊ ကျားခဲရွာက လူနေအိမ်တွေကို စစ်ကောင်စီတပ်က နိုဝင်ဘာ ၁၇ ရက် မနက်ပိုင်းမှာ ထပ်မံ မီးရှို့ဖျက်ဆီးသွားတယ်လို့ ဒေသခံတွေက ပြောပါတယ်။
ကျားခဲကျေးရွာမှာ လူနေအိမ် ၉၀ ဝန်းကျင်ရှိပြီး လူဦးရေ ၄၀၀ ဝန်းကျင် နေထိုင်ကြကာ ဂန့်ဂေါမြို့ ခလရ ၅၀ က စစ်ကောင်စီတပ်သားတွေနဲ့ ပျူစောထီးအဖွဲ့ဝင်က စစ်ကြောင်းထိုးဝင်ရောက်လာပြီး နေအိမ်တွေကို မီးရှို့သွားတာလို့ဆိုပါတယ်။
စစ်ကောင်စီတပ်တွေဝင်လာလို့ ဒေသခံတွေကတော့ ဘေးလွတ်ရာဒေသတွေကို ထွက်ပြေးတိမ်းရှောင်နေကြရပြီး ကျေးရွာကို ပြန်ပြီး မဝင်ရဲသေးတာကြောင့် အိမ်ခြေဘယ်လောက် လောင်ကျွမ်းတယ်ဆိုတာ မသိရသေးဘူးလို့ ထီးလင်းဒေသခံတဦးက ဒီဗွီဘီကို ပြောပါတယ်။
နိုဝင်ဘာ ၁ ရက်ကလည်း ကျားခဲရွာက လူနေအိမ် ၁၄ လုံးနဲ့ နွားစာတိုက်တွေကို စစ်ကောင်စီတပ်က မီးရှို့ ဖျက်ဆီးခဲ့ပါသေးတယ်။
အောက်တိုဘာ ၂၆ ရက်ကလည်း ထီးလင်းမြို့နယ်၊ အိုင်းမရွာက ဒေသခံနေအိမ် ၆ လုံးနဲ့ ချောင်းပေါက်လမ်းခွဲက ဆိုင်ခန်း ၂ ခန်းကို စစ်ကောင်စီတပ်သားတွေ မီးရှို့ ဖျက်ဆီးခဲ့ပါတယ်။
ထီးလင်းမြို့နယ်အတွင်းမှာ စစ်ကောင်စီတပ်သားတွေရဲ့ မီးရှို့ဖျက်ဆီးမှုကြောင့် ဒေသခံနေအိမ် ၉၀ ဝန်းကျင် မီးလောင်ဆုံးရှုံးထားပြီး စစ်ကောင်စီက အင်တာနက်လိုင်းတွေ ဖြတ်တောက်ထားတာ ၁ နှစ်ကျော် ကြာနေပြီ ဖြစ်ပါတယ်။
မကွေးတိုင်း၊ ဂန့်ဂေါခရိုင်မှာတော့ ကျောက်ထုမြို့နယ်ခွဲထဲမှာရှိတဲ့ ကျေးရွာတွေထဲကို စစ်ကောင်စီ လက်အောက်ခံ ကျောက်ထုတပ်ကနေ နိုဝင်ဘာ ၁၅ ရက်က လက်နက်ကြီးတွေနဲ့ ပစ်ခတ်ခဲ့လို့ ကံကြီးကျေးရွာက အမျိုးသမီးတဦး လက်နက်ကြီးကျည်ထိမှန်ပြီး စိုးရိမ်ဒဏ်ရာ ရရှိခဲ့ကာ ကျေးရွာတွေထဲက နေအိမ်တွေလည်း ပျက်စီးခဲ့တယ်လို့ ဒေသခံတွေက ပြောပါတယ်။
ဒါ့အပြင် ရင့်ရဲကျေးရွာ၊ ကံကြီးကျေးရွာက နေအိမ်တွေလည်း ပျက်စီးခဲ့ပြီး လျှပ်စစ်မီးကြိုးတွေလည်း လက်နက်ကြီး ထိမှန်ခဲ့တဲ့အတွက် ယောမြို့အပါအဝင် ကျေးရွာ ၄ ရွာလည်း လျှပ်စစ်မီးပြတ်တောက်နေတယ်လို့ ယောအလင်းတန်းအဖွဲ့က ထုတ်ပြန်ထားပါတယ်။
စစ်တပ်အာဏာသိမ်းပြီးနောက်ပိုင်း ၂၁ လအတွင်း ပြည်သူ ၂,၄၀၀ ကျော် ပစ်ခတ် သတ်ဖြတ်ခံရပြီး နေအိမ်အဆောက်အအုံ ၃၈,၀၀၀ ကျော် မီးရှို့ဖျက်ဆီးခံခဲ့ရကာ အဲဒီထဲမှာ မကွေးတိုင်းထဲက နေအိမ်တွေက ဒုတိယအများဆုံးဖြစ်တယ်လို့ လွတ်လပ်တဲ့ သုတေသန အဖွဲအစည်းတွေရဲ့ အချက်အလက်တွေအရ သိရပါတယ်။
မကွေးတိုင်း၊ ဆောမြို့နယ်၊ ကျောက်ထုဒေသမှာ မေလ ၂၄ ရက်နဲ့ ၂၅ ရက်တွေက စစ်ကောင်စီ စစ်ကြောင်း မိုင်းဆွဲတိုက်ခိုက်ခံရပြီး စစ်ကောင်စီတပ်သား အယောက် ၃၀ ထက်မနည်း သေဆုံးကာ အများအပြား ဒဏ်ရာရရှိခဲ့တယ်လို့ ကျောက်ထု-PDF(YRPA)ကနေ သိရပါတယ်။
ကျောက်ထုဒေသ တပြင်းကျေးရွာကနေ ပုံတောင်တောင်ခြေဘက်ကို စစ်ကြောင်းထိုးလာတဲ့ စစ်တပ်ကို မနေ့က မေလ ၂၄ ရက်က မိုင်း ၃ ကြိမ်ဆွဲပြီး တိုက်ခိုက်ခဲ့တာလို့ ယောဒေသကာကွယ်ရေးတပ်ပေါင်းစု YRPA ရဲ့ ပြောရေးဆိုခွင့်ရှိသူ ဗိုလ်မင်းကျော်က ဒီဗွီဘီကို ပြောပါတယ်။
“မနက်စောစော ၅ နာရီလောက်မှာ မိုင်း ၂ လုံး၊ မနက် ၉ နာရီလောက်မှာ ၁ လုံး၊ ညနေ ၃ နာရီလောက်မှာ ၁ လုံး၊ စုစုပေါင်း မိုင်း ၄ လုံးဆွဲပြီး တိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူ များပြားနိုင်တယ်။”
ပုံတောင်ထိပ်ကနေ အရှေ့ဘက်ကို ရှေ့ပြေးပွိုင့်အနေနဲ့ အင်အား ၅၀ လောက်နဲ့ ခြေလျင် စစ်ကြောင်းထိုးလာတဲ့ စစ်တပ်ကို ဒီမနက် ၁၁ နာရီလောက်မှာ မိုင်းကွင်းထဲ ဝင်လာလို့ ရီမုမိုင်း ၃ လုံး၊ ကားမိုင်း ၂၇ လုံးနဲ့ မိုင်းဆွဲတိုက်ခိုက်ခဲ့ရာမှာ စစ်ကောင်စီတပ်သား ၃၀ ထက်မနည်း သေပြီး အများအပြား ဒဏ်ရာရရှိခဲ့တယ်လို့ဆိုပါတယ်။
ထီးလင်းမြို့နယ် ရေမျက်နီရဲစခန်းကိုလည်း မေ ၂၀ ရက်ညနေပိုင်းမှာ ယောဒေသကာကွယ်ရေးတပ်
ပေါင်းစု YRPA က ပထမဆုံးအကြိမ်တိုက်ခိုက်ခဲ့လို့ စစ်ကောင်စီဘက်က ၅ ယောက်ထက်မနည်း သေဆုံးပြီး အများအပြားဒဏ်ရာရရှိခဲ့တယ်လို့ သိရပါတယ်။
ဒါ့အပြင် ကျောက်ထုဒေသကနေ ပခုက္ကူမြို့ဘက်ကို ထွက်ခွာမယ့် အင်အား ၂၀၀ ကျော်လောက်ပါတဲ့ စစ်ကောင်စီရဲ့ ရိက္ခာယာဥ်တန်း ရှေ့ပြေးပွိုင့် စစ်ကောင်စီတပ်သား ၁၀ ယောက်လောက်ကိုလည်း မေ ၂၂ ရက် မနက်ပိုင်းမှာ ကျောက်ထု-PDF(YRPA) နဲ့ The Youth Force (ဆော၊ ကျောက်ထု)တို့ ညီနောင်မဟာမိတ် ၂ ဖွဲ့က ပဒေသာမိုင်း ၆ လုံးနဲ့ မိုင်းဆွဲတိုက်ခိုက်ရာ စစ်ကောင်စီတပ်သား ၉ ယောက် သေဆုံးပြီး တယောက် ဒဏ်ရာရရှိခဲ့တယ်လို့ သိရပါတယ်။
နှစ်ဘက်တိုက်ပွဲတွေနဲ့ပတ်သက်လို့တော့ ထိခိုက်သေဆုံးတဲ့ အခြေအနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။
YRPA တပ်ပေါင်းစုကို မတ်လ ၂၇ ရက်မှာ စတင်ဖွဲ့စည်းခဲ့ပြီး ယောဒေသအတွင်းမှာရှိတဲ့ တော်လှန်ရေးအဖွဲ့တွေကို စုစည်းနိုင်ဖို့၊ တော်လှန်ရေးတပ်ဖွဲ့တွေ အချင်းချင်း ပွတ်တိုက်တဲ့ ပဋိပက္ခတွေကို လျှော့ချနိုင်ဖို့နဲ့ စစ်တိုက်ခိုက်တဲ့အခါ ပိုမိုတောင့်တင်းတဲ့ ထိရောက်တဲ့ စစ်ဆင်ရေးတွေ ပြုလုပ်နိုင်ဖို့ ရည်ရွယ်ပြီးဖွဲ့စည်းခဲ့တာလို့ ဗိုလ်မင်းကျော်က ပြောပါတယ်။
