ကျူးကျော်နေထိုင်သူ

November 21, 2022

စစ်ကောင်စီက မရမ်းကုန်းမြို့နယ်ရှိ လူနေအိမ်အချို့ကို ဖယ်ရှားခိုင်း

ရန်ကုန်မြို့၊ မရမ်းကုန်းမြို့နယ်၊ အမှတ် ၁ ရပ်ကွက် အားကစားကွင်းပတ်လည်မှာရှိတဲ့ လူနေအိမ်တွေကို ကျူးကျော်ဆိုတဲ့ အကြောင်းပြချက်နဲ့ စစ်ကောင်စီလက်အောက်ခံ မြို့နယ်အထွေထွေအုပ်ချုပ်ရေးဌာနက နိုဝင်ဘာ ၂၁ ရက် နောက်ဆုံးထားပြီး ဖယ်ရှားပေးဖို့ အကြောင်းကြားလာတယ်လို့ ဒေသခံတွေက ပြောပါတယ်။

နေအိမ်ဖျက်ခံရတဲ့အထဲမှာ ပါဝင်တဲ့ ဒေသခံတဦးကတော့ “အန်တီတို့ဆို နေလာတာ နှစ် ၃၀ လောက်ရှိပြီ။ အရင် မူလပိုင်ရှင်ဆီကနေဝယ်ပြီး နေလာခဲ့တာပါ။ ခုတော့ ၃ ရက်အတွင်း အပြီးဖျက်ပေးဖို့ စာရောက်လာတယ်” လို့ ပြောပါတယ်။

စစ်ကောင်စီက အခုလိုဖယ်ရှားခိုင်းတဲ့ နေအိမ်တွေဟာ တချို့ဆိုရင် အရင်မူလပိုင်ရှင်ထံကနေ အခကြေးငွေပေးပြီး ဝယ်ယူနေထိုင်လာတာ နှစ် ၃၀ လောက်ရှိပြီလို့ ဆိုပါတယ်။ အခုလို ဖယ်ရှားခံရတဲ့အထဲမှာ ရိုးရိုးနေအိမ်တွေ အပါအဝင် အထပ်မြင့်အဆောက်အအုံတွေလည်း ပါဝင်တယ်လို့ သိရပါတယ်။ အဆိုပါရပ်ကွက်မှာ လူနေအိမ်ခြေ ၁၀၀ နီးပါးနဲ့ လူဦးရေ ၃၀၀ လောက်ရှိတယ်လို့ ဆိုပါတယ်။

စစ်ကောင်စီရဲ့ မြို့နယ်ထွေအုပ် အကြောင်းကြားစာထဲမှာတော့ ရာဇဝတ်ကျင့်ထုံး ဥပဒေပုဒ်မ (၁၃၃) အရ အမိန့်အမှတ် (၇/၂၀၂၂) နဲ့ ဖယ်ရှားရမယ်လို့ နိုဝင်ဘာ ၁၈ ရက်နေ့က အမိန့်ထုတ်ပြန်ခဲ့တာ ဖြစ်ပါတယ်။

နေထိုင်သူတွေရဲ့ ကျူးကျော်အဆောက်အအုံတွေနဲ့ ပစ္စည်းတွေကို အမိန့်ထုတ်ပြန်တဲ့နေ့ကစပြီး နိုဝင်ဘာ ၂၁ ရက် နောက်ဆုံးထားပြီး ဖယ်ရှားပေးရမှာဖြစ်ပြီး လိုက်နာဆောင်ရွက်ခြင်းမရှိပါက လုပ်ထုံးလုပ်နည်းအရ ဆက်လက်ဆောင်ရွက်သွားမယ်လို့ ဖော်ပြထားပါတယ်။

အလားတူ နိုဝင်ဘာ ၁၉ ရက် မနက်ပိုင်းကလည်း အမှတ် ၃ ရပ်ကွက် ကံသာဇေယျုံကျောင်းလမ်းမှာ လူဦးရေ ၁,၀၀၀ နီးပါး နေထိုင်တဲ့ လူနေအိမ် ၁၅၀ ခန့်ကိုလည်း စစ်ကောင်စီလက်အောက်ခံအဖွဲ့တွေနဲ့ စည်ပင်ဝန်ထမ်းတွေက မြေတူးစက် ဘူဒိုဇာတွေနဲ့ အင်အားသုံး ဖယ်ရှားခဲ့ပါသေးတယ်။

3 weeks Ago

December 20, 2020

မှတ်ပုံတင်မရှိခြင်းကြောင့် အလုပ်အကိုင် ရရှိရန် ခက်ခဲနေသူများ (ဓာတ်ပုံ)

ရန်ကုန်တိုင်းဒေသကြီး မြေလွတ်နေရာမှာ ကျူးကျော်နေထိုင်သူ အများအပြားရှိပါတယ်။ ကျူးကျော်နေထိုင်သူတွေဟာ များသောအားဖြင့် ရွှေ့ပြောင်းလုပ်သားတွေ၊ ၂၀၀၈ ခုနှစ် နာဂစ်မုန်တိုင်းကြောင့် ရွာတွေ ပျက်စီးကာ ရေကြည်ရာမြက်နုရာရှာဖွေရင်း ရောက်‌ရှိနေထိုင်သူတွေ ဖြစ်ပါတယ်။ ဒဂုံမြို့သစ်အရှေ့ပိုင်းမြို့နယ် အမှတ်‌-၁၁၈ ရပ်ကွက် ပုဂံလမ်းမှာ ကျူးကျော်နေထိုင်တဲ့ မိသားစု ၃၀ ကျော်ရှိနေပြီး လူပေါင်းတစ်ရာကျော် ရှိပါတယ်၊ အဲဒီ မိသားစုဝင်တစ်ရာကျော်‌အနက် အရွယ်ရောက်ပြီးသူအများစုမှာ မှတ်ပုံတင်ပြုလုပ်ဖို့ မလွယ်ကူတာကြောင့် အလုပ်အကိုင်ရရှိရေး အခက်အခဲကြုံနေကြရပါတယ်။ “စား‌ရေး သောက်ရေးကတော့ သူလိုငါလို ရှာဖွေစားသောက်ရတာပေါ့။ တစ်ရက်လုပ် တစ်ရက်စားပဲ။ အဓိကကတော့ မှတ်ပုံတင်လို့ဖို့ မလွယ်ဘူး၊ အဲ‌ဒီတော့ မွေးလာတဲ့ သားသမီးတွေလည်း အရွယ်ရောက်လာရင် ကိုယ်တွေလို ကြုံရာကျပန်းလုပ်ကြရတာပဲ။ ယုတ်အစွဆုံး စက်ရုံတောင် ဝင်လုပ်လို့မရဘူး” လို့ ကိုချစ်ဦးမောင်က ပြောပါတယ်။ ရန်ကုန်တတိုင်းလုံးရှိ ကျူးကျော်နေထိုင်သူအားလုံးမှာ မှတ်ပုံတင်ပြဿနာမှာ အရေးကြီးဆုံးဖြစ်နေပြီး အလုပ်အကိုင်အခွင့်အလမ်းများ ရရှိနိုင်ဖို့ မှတ်ပုံတင်ရရှိဖို့ မျှော်လင့်နေကြတယ်လို့ ကျူးကျော်နေထိုင်သူတဦးက ပြောပါတယ်။ “မျှော်လင့်တာပေါ့။ မှတ်ပုံတင်ရရင် ကလေးလေးတွေ အလုပ်အကိုင် အတည်တကျလေးနဲ့ သက်သက်သာသာ အလုပ်လုပ်နိုင်မှာပေါ့။” ကျူးကျော်နေထိုင်သူတွေ မှတ်ပုံတင်ရရှိဖို့ ဘိုးဘွားဘီဘင်စာရင်းတွေ နာဂစ်မုန်တိုင်းကြောင့် ပျောက်ဆုံးသွားတာ၊ တချို့ရွာတွေမှာ သွားရေးလာရေး စရိတ်များပြားတဲ့ အခက်အခဲတွေ ကြုံနေကြတယ်လို့ သိရပါတယ်။ Photo - Ye Myo Khant / MPA
2 years Ago
More News
Up