ကျုံပျော်မြို့

October 6, 2022

ကျုံပျော်မြို့တွင် အသက် ၆၃ နှစ်အရွယ်အမျိုးသား PDF အဖြစ် စွပ်စွဲဖမ်းဆီးခံရ

ဧရာဝတီတိုင်း၊ ကျုံပျော်မြို့နယ်မှာ စစ်ကောင်စီတပ်သားတွေက အသက် ၆၀ ကျော်အရွယ် အမျိုးသားတဦးကို ပြည်သူ့ကာကွယ်ရေးတပ်ဖွဲ့ PDF အဖြစ် အောက်တိုဘာ ၃ ရက်နေ့က ဖမ်းဆီးသွားတယ်လို့ သိရပါတယ်။ 

ကျုံပျော်မြို့နဲ့ ကျောင်းကုန်းမြို့ကြားက သရက်ကုန်းကျေးရွာမှာနေထိုင်တဲ့ အသက် ၆၃ နှစ်အရွယ် ဦးတိုက်မောင်းကို စစ်ကောင်စီတပ်သားတွေနဲ့ လက်အောက်ခံရဲတွေက အင်အား ၂၀ လောက်နဲ့ လာရောက် ဖမ်းဆီးသွားတာလို့ ဒေသခံတွေက ပြောပါတယ်။ 

“အင်အား ၂၀ လောက်နဲ့လာဖမ်းတာ။ သူ နေတဲ့အိမ်က အမျိုးသားကိုပါ ဖမ်းသွားတာ။ ထင်တာတော့ ကျောင်းကုန်းစခန်းကို ခေါ်သွားတယ် ထင်တယ်၊ ခုထိတော့ ဘာသတင်းမှ မကြားရသေးဘူ” လို့ နီးစပ်တဲ့ ဒေသခံတဦးက ပြောပါတယ်။ 

အသက် ၆၃ နှစ်အရွယ် ဦးတိုက်မောင်း ဖမ်းဆီးခံရတဲ့နေ့မှာပဲ ကျုံပျော်မြို့နယ် ရေးစခန်းတိုက်နယ်က ကိုဒဿ ဆိုတဲ့ အမျိုးသားကိုလည်း စစ်ကောင်စီတပ်သားတွေက ညပိုင်းမှာ ဝင်ရောက်ဖမ်းဆီးသွားတယ်လို့ ဆိုပါတယ်။ 

ဦးတိုက်မောင်းအပါအဝင် အမျိုးသား ၃ ဦးကို စစ်ကောင်စီက ဘယ်နေရာမှာ ဖမ်းချုပ်စစ်ဆေး နေတယ်ဆိုတာ အတိအကျမသိရသေးသလို မိသားစုဝင်တွေနဲ့လည်း တွေ့ခွင့်မပေးသေးဘူးလို့ ဒေသခံတွေက ပြောပါတယ်။

4 months Ago

April 10, 2022

ကျုံပျော်မြို့တွင် စစ်ကောင်စီခန့် အုပ်ချုပ်ရေးမှူးက ဇနီးဖြစ်သူအား ဓားဖြင့်ခုတ်မှုဖြစ်ပွား

ဧရာဝတီတိုင်း၊ ကျုံပျော်မြို့နယ်မှာ  ဧပြီ ၈ ရက် ညနေပိုင်းက စစ်ကောင်စီခန့် အုပ်ချုပ်ရေးမှူးက ဇနီးဖြစ်သူကို ဓားနဲ့ခုတ်မှုဖြစ်ပွားခဲ့ပါတယ်။ 

ကျွဲတလင်း ကျေးရွာအုပ်ချုပ်ရေးမှူး ဦးဝင်းညိုက ညနေ ၅ နာရီကျော်လောက်မှာ ဇနီးဖြစ်သူနဲ့ စကားများရာကနေ ဓားနဲ့ခုတ်ခဲ့တာကြောင့် နားရွက်တဖက်ပြတ်သွားတယ်လို့ ဒေသခံတွေက ပြောပါတယ်။ 

“စကားများပြီးတော့ ခုတ်တာ လည်ပင်းကို ခုတ်တာ၊ လည်ပင်းတော့ မပြတ်ဘူး နားရွက်ပြတ်သွားတယ်။ ပြီးတော့ ခေါင်းလည်း ထိတယ်၊ လည်ပင်းလည်း ထိတယ်” လို့ ဒေသခံတဦးက ပြောပါတယ်။ 

ဓားနဲ့အခုတ်ခံရတဲ့ အုပ်ချုပ်ရေးမှူးရဲ့ဇနီးဖြစ်သူဟာ လည်ပင်း၊ ခေါင်းနဲ့ နားရွက်ပြတ်ခဲ့တာကြောင့် ညတွင်းချင်း ဆေးရုံပို့ဆောင်ခဲ့ရပြီး စိုးရိမ်ရတဲ့အနေအထားမှာရှိတယ်လို့ ဆိုပါတယ်။ 

စစ်ကောင်စီတပ်သားတွေနဲ့ ရဲတွေက အခင်းဖြစ်ပြီး နာရီပိုင်းအကြာမှာ ရောက်လာပေမဲ့ အုပ်ချုပ်ရေးမှူးကို ဖမ်းဆီးခြင်းမရှိဘဲ ဖြစ်စဉ်ကို အဆင့်ဆင့်မတင်ပြဘဲ သတင်းအုပ်ထားဖို့ လုပ်နေတယ်လို့ ဒေသခံတွေက ပြောဆိုပါတယ်။

10 months Ago
More News
Up